Jueces 10:16 - Bible in Tzeltal de Oxchuc y Tenejapa

¹⁶ Jich te israeletic la yijq'uitayic te diosetic yu'un jyanlumetic te xch'uunejique, swenta yu'un ja' ya xch'uunic xan te Cajwaltique. Te Cajwaltic ma la sc'anix te ya xc'ax xan swocol te israeletique.

Bible in Tzeltal Bachajón

¹⁶ Hich la sloq'uesic te yantic diosetic, la yac' sbahic ta a'batinel yu'un te Jehová. C'ux la ya'iy te Jehová te ay swocol te Israel.

Jueces 10:16 Referans Kwoze

Isaías 63:9

yu'un spisil te swocolique. Ma yu'unuc yan mach'a la sticun tel te tal ta coltaywaneje; ja' nix tal stuquel te Cajwaltique. Ta swenta xc'uxul yo'tan la yac' ta libre soc yutsil yo'tan, la sjach, la stsac ta sc'ab. Jich la spas spisil ora.

Oseas 11:8

“¿Bit'il c'an quijq'uitayat ta co'tan, Efraín? ¿Bit'il c'an ch'ayucat ta co'tan, Israel? ¿Jich bal c'an jinat te bit'il la jin te lum Adma, jich bal ya jpasbat ta atojol te bit'il la jpasbey te lum Zeboim? Bayal ya xc'opoj co'tan awu'un; ta spisil co'tan ya jna'belat yo'bolil aba.

Jeremías 31:20

“Te lum Efraín, ja' te jnich'an te c'ux ta co'tane; ja' te jnich'an te bayal sc'anoj te co'tane. Manchuc me ya cac'bey tulan comel, ma ba ya quijq'uitay ta sna'ulayel; ya stij sba co'tan yu'un, c'ax muc' ya jna'bey yo'bolil sba. Jo'on Ajwalilon, jich ya cal.

Deuteronomio 32:36

Te Cajwaltique ya me xloc' ta scoltayel te lum yu'un, teme ya yil te ma'yuc te yipe; te Cajwaltic ya me sna'bey yo'bolil sba te abatetic yu'un, te c'alal ya yil te ma'yuquix jilem mach'atic ay yipic.

Hebreos 4:15

Melel te Muc' Sacerdote cu'untique, ma yu'unuc ma sna'botic yo'bolil jbatic te bit'il ay jwocoltic yu'un te ma'yuc quiptique, melel la yaiy swocol yu'un spisil ta jchajp uuc te yiljibal yo'tane, jich nix te bit'il ya caiytic te jo'otique. Ja'uc me to, ma ba yal ta mulil yu'un.

Hebreos 3:10

Ja' swentail te ilinon ta stojol in ants-winiquetic to, soc jich la cal yu'un: ‘Spisil ora jowejem yo'tanic, soc ma sc'an st'unbonic te jbee’, te xoone.

Efesios 4:32

Ja' ya sc'an te talel c'axel ay yutsil awo'tan abaique, soc te pajal ya ac'uxtay abaique. Pasbeya abaic perdón jich te bit'il Dios la spasbeyex perdón ta swenta te Cristoe.

San Lucas 19:41

Te c'alal nopol ayiquix bael ta Jerusalene, te Jesús la yil spamal te lume. Jajch' yoq'uetay.

San Lucas 15:20

Jich jajch' ta beel. Sujt' bael ta bay sna te state. “C'ubul to ay tel a te ilot yu'un te state. C'uxbaj ta yo'tan. Animal ba sta tel ta be. La smey soc la sbujts'iy.

Oseas 14:8

Te Efraín ya yal: “Ma'yuquix sc'oplal ta co'tan te loc'ombaetique”, xi' me. Jo'on ya jna' soc ya jcanantay te lum cu'une. Jichon te bit'il taj te spisil ora yaxe, jo'on ta jwenta te ya yich' tael sit te lum cu'une —xi' te Cajwaltique.

2 Crónicas 33:15

La sloq'ues te lotil diosetic yu'un jyanlumetic te ayic ta templo yu'un Cajwaltic, soc te yajcanan, soc nix spisil te scajtijib majt'aniletic swenta lotil diosetic te spasojbeyic ta wits te banti ay te templo soc ta spamal Jerusalén, spisil la xch'oj loq'uel ta ti'lum.

2 Crónicas 15:8

C'alal la yaiy stojol Asa te sc'op j'alwanej, la yich' xan yip yo'tan yu'un. La sloq'ues te bitic ilaybile, ja' te yajcananic ta spamal sq'uinal Judá, ta spamal sq'uinal Benjamín, soc ta bay te lumetic te la yu'uninic ta witstiquil ta sq'uinal Efraín. La spas xan te scajtijib smajt'an Cajwaltic te ay ta stojol yochibal templo yu'un te Cajwaltique.

2 Crónicas 7:14

jich te lum cu'un te yich'ojbon te jbiile, teme ya xbic'taj, soc teme ya sc'oponon, soc teme ya xtal ta jtojol, soc teme ya yijq'uitay spasel te amen yat'ele, ya me caiybey sc'opic c'alal ta ch'ulchan, ya me jpasbey perdón yu'un te smulique, soc ya me cac' utsubuc xan te slumalique.

Josué 24:23

La to yalbey xan te Josué: —Loq'uesaic spisil te yantic diosetic te ay awu'unique, sujt'anic tel soc spisil awo'tanic ta stojol te Cajwaltic Dios cu'untic te israelotique —xi'.

Génesis 6:6

Jich yu'un bayal la smel yo'tan yu'un te la spas te ants-winiquetique. C'ax to xan la smel yo'tan,

San Juan 11:34

Jich la sjojc'obey yaiy: —¿Banti la amuquic? —la yut. La yalic: —Li' ay to, Cajwal. La', ilawil —xiic.

1 Samuel 7:3

Ja' yu'un te Samuel jich la yalbey te israeletic: —Teme mero spisil awo'tanic ya sujt'ex ta stojol te Cajwaltic, ya me sc'an jiche te ya ach'ojic loq'uel te diosetic yu'un jyanlumetic soc te loc'ombaetic yu'un Astarté te awich'ojique. Ja' xan meix ya sc'an ya awac' yabatinbeyex acuxlejalic te Cajwaltic, ja' nax ya sc'an ya ach'uunic. Jich to me ya scoltayex loq'uel ta sc'ab te filisteoetic te Cajwaltique —xi'.

1 Samuel 12:10

Pero la sna'ic te staoj smulic ta stojol Cajwaltic te bit'il la yijq'uitayic, ta scaj xch'uunel sloc'ombail Baal soc sloc'ombail Astarté. La xcha'albeyic xan wocol te yacuc xcoltayotic loq'uel ta sc'ab te scontroique. La yal sbaic ta jamal te ja' xanix stuquel te Cajwaltic te ya xch'uunique.

Salmos 73:21

Mero bayal bitic pich'il co'tan yu'un, ay bila la sjulbon la caiy te co'tane,

Jueces 2:18

Te juez ya sle jujun buelta te Cajwaltique, ya xcoltayot yu'un te jayeb c'aal cuxule, soc ya xcoltayotic te israeletic ta sc'ab te scontroique. Te Cajwaltic ya sna'bey yo'bolil sbaic c'alal ya yaiybey stojol yajc'anic, yu'un ya xwoclajic bayal yu'un te uts'inele.

1 Samuel 7:4

Te israeletic la xch'ojic loq'uel te jayeb ta jchajp sloc'ombail Baal soc te sloc'ombail Astarté, ja' xanix la xch'uunic te Cajwaltique.

2 Reyes 13:23

Pero te Cajwaltic la sna'bey yo'bolil sbaic, soc tal xc'uxul ta yo'tan yu'un. Ta scaj te bi xchapoj soc Abraham, Isaac, Jacob te Cajwaltique, la sna' xan. Ma ba la sc'an slajin, soc ma ba la xch'ay ta yo'tan ta jc'axel. Jich nix ay yu'un Cajwaltic c'alal ora te Israel.

Miqueas 7:18

Ma'yuc yan Dios jich te bit'ilate, melel ya apasbey perdón yu'un te bila amen spasojique, soc ya ach'aybey ta awo'tan stoybail te lum te jilem xan jtebuque. Te ja'at ya awac'botic quiltic te xc'uxul awo'tan; soc ma'yuc ta awo'tan sbajt'el q'uinal te awilimbae.