San Juan 14:27 - Bible in Tzeltal de Oxchuc y Tenejapa

²⁷ “Ya cac'beyex jilel lamal q'uinal. Ja' ya cac'beyex jilel te lamal q'uinal cu'une. Ma pajaluc soc te bit'il ya yac' te balumilale. Ma me xawac' woclajuc awo'tanic soc ma me xiw awo'tanic.

Nuevo Testamento Tzeltal de Amatenango

²⁷ “Teme boone, ya me kaꞌbeyex jilel te bujtsꞌan kꞌinale. Joꞌon ya kaꞌbeyex te butsꞌan kꞌinal ya awaꞌiyike: pero ma me pajaluk sok te machꞌatik ya yakꞌ te ayikta skuenta te balmilale. Ma me wakꞌ yajtal awoꞌtanik y ma me xiꞌanik.

Bible in Tzeltal Bachajón

²⁷ Ya ca'beyex hilel lamal q'uinal; ya ca'beyex te lamal q'uinal cu'un; ma hichuc ya ca'beyex te bin ut'il ya yaq'uic te mach'atic ayic ta bahlumilal. Ma me xamel awo'tanic soc ma me xiwex.

San Juan 14:27 Referans Kwoze

Filipenses 4:7

Te lamal q'uinal yu'un te Diose, c'ax jelawen yutsil stuquel a ta spisil te bila ay ta nopele, ac'a me scanantaybeyex awo'tanic soc te bila ya anopic ta swenta te Cristo Jesuse.

San Juan 16:33

La calbeyex spisil in to, swenta yu'un jich me lamal q'uinal ya awaiyic ta jwenta. Yan ta bay te balumilale ya me xc'ax awocolic, ja'uc me to, ayuc me smuc'ul awo'tanic ta jwenta, melel tsalbilix cu'un te balumilale —xi' te Jesuse.

Isaías 41:10

Ma me xiwat, joinejat me; ma me xnijc' awo'tan, melel jo'on te Dioson awu'une. Jo'on ya cac'bat awip, jo'on ya jcoltayat; ja' me jtsacojat ta jc'ab te jtsalwanejone.

2 Tesalonicenses 3:16

Te Cajwaltic te lamal q'uinal ta swentae, ac'a slamantesbeyex awo'tanic ta spisil ora chican te bi awilelic ayexe. Ac'a sjoinex ta apisilic stuquel te Cajwaltique.

Colosenses 3:15

Te lamal q'uinal yu'un te Diose ac'a swentainbeyex awo'tanic. Melel la yic'otic te Diose te jun nax ya xc'ootic ta jpisiltique, jich te bit'il jun nax ay te jbaq'uetaltique. Soc albeyaic wocol Dios yu'un spisil.

2 Timoteo 1:7

Melel te Diose ma ja'uc yac'ojbotic te ya xiw co'tantique. Ja' yac'ojbotic yip co'tantic soc xc'uxul co'tantic, soc te bit'il ya jna'tic stsajtaybel jbajtique.

Romanos 15:13

Te Diose, ja' yac'oj smuc'ul co'tantic ta smaliyel, ac'a snojesbeyex bayal sbujts' awo'tanic soc lamaluc me q'uinal awaiyic ta stojol ta swenta te bit'il ach'uunejique. Jich me jelawen to xan ay smuc'ul awo'tanic ta smaliyel ta swenta yu'el te Ch'ul Espiritue.

Números 6:26

te Cajwaltic ac'a yilat soc xc'uxul yo'tan, ac'a yac'bat lamal-o'tanil’, xaex me ta stojol te israeletique”, uta me.

Romanos 8:6

Melel teme ja' nax ya xbajt' ta o'tanil te bila ya sc'an te baq'uete, ja' ya x'ac'awan ta lajel yu'un. Yan teme ya xbajt' ta o'tanil te bila ya sc'an te Espiritue, ja' ya yac' cuxinel soc lamal q'uinal.

Jeremías 1:8

Ma me ayuc mach'a ya axi' jtuluc, joinejat me, ya me xc'opojon awu'un. Jo'on Ajwalilon te jich ya cale —xi'.

Gálatas 1:3

Ac'a yac'beyex yutsil yo'tan te Jtatic Diose soc te Cajwaltic Jesucristoe. Lamaluc me q'uinal ya awaiyic yu'un spisil ora.

Gálatas 5:22

Yan te sit stuquel te Espiritue, ja' te xc'uxul-o'tanil, sbujts'-o'tanil, lamal q'uinal, sts'iquel, yutsil-o'tanil, lequil-o'tanil, xch'uunjel-o'tanil,

Salmos 29:11

Te Cajwaltic ya yac'bey yip te lum yu'une; te Cajwaltic ya yac'bey bendición ta swenta lamal q'uinal te lum yu'une.

Romanos 5:1

Ta swenta te xch'uunjel co'tantique, libre c'oemotiquix yu'un te jmultique. Jich me junajemix co'tantic soc te Diose, ta swenta nax te Cajwaltic Jesucristoe.

San Juan 14:1

Te Jesús la yal: —Ma me xawac' woclajuc te awo'tanique. Ch'uunaic te Diose, soc ch'uunawonic uuc te jo'one.

Isaías 9:6

Melel ayinemix jtul alal cu'untic, Dios la yac'botic jtul nich'anil, ja' te ac'bil yu'el ta mandalteswanej. Ja' me sbiilic ya xc'ot: “Jchajp nax Jtojteswanej”, “Dios te bayal yip”, “Tatil sbajt'el q'uinal”, soc “Ajwalil yu'un lamal q'uinal”.

Salmos 112:7

Ma xiw yu'un teme ay ma lecuc c'op ya xjul ta stojole; ts'unul ta lec yo'tan, ja' smuc'ulinej yo'tan te Cajwaltique.

Romanos 5:10

Melel te bit'il contro quiloj jbatic soc te Diose, jich la yac' junajuc co'tan jbatic soc ta swenta bit'il laj te Snich'ane. In te bit'il junajemix co'tan jbatic soque, jich me c'axem to xan ya xcolotic ta swenta te bit'il cuxulix stuquele.

San Juan 20:21

Jesús la yal xan: —Muc'ubenuc me q'uinal ya awaiyic. Jich te bit'il la sticunon tel te Jtate, ja' nanix jich ta jticunex uuc te ja'exe —xi'.

Salmos 56:11

Ja' ya smuc'ulin co'tan te Diose, ma ba ya xiw co'tan. ¿Bi ya xju' ya spasbon te winiquetique?

Salmos 91:5

Ma x'axi' te bitic ya xiwteswan ta ajc'ubal, ma me xiwat yu'un te t'im te ya yich' t'imuyel ta c'aaleltique,

Colosenses 1:20

Soc ja' ta swenta Cristo te ya yac' junajuc ta stojol Dios spisil te bitic ay ta balumilale soc uuc te bitic ay ta ch'ulchane. Tey la yac' lamajuc q'uinal a ta swenta bit'il la smal xch'ich'el ta cruz.

Romanos 1:7

Ya jpatbeyex awo'tanic ta apisilic te ayex ta lum Roma, te c'ux ya yaiyex ta yo'tan te Diose, soc te ic'bilex swenta ch'ul lum yu'un Dios ya xc'oex. Ayuc me yutsilal soc lamaluc me q'uinal ya awaiyic yu'un ta swenta te Jtatic Diose soc ta swenta te Cajwaltic Jesucristoe.

Isaías 54:13

Jo'on ya jp'ijubtesbat ta spisil te awalataque, spisil me ya staic muc' yutsilalic.

Salmos 85:10

Ya me xc'ot yorail te ya sta sba soc te c'uxul-o'tanil te bila smelelil, te lamal-o'tanil soc te toj-o'tanile, jich c'oem te ya spet sbaique.

1 Corintios 1:3

Ac'a yac'beyex lamal q'uinal ta swenta yutsil yo'tan te Jtatic Diose soc te Cajwaltic Jesucristoe.

Salmos 56:3

Te c'alal ya xtal xiwel ta co'tan, ja'at ya smuc'ulinat co'tan.

San Juan 20:19

Ja' nix te sba c'aalil semana te stsoboj sbaic ta ajc'ubal te jnopojeletique. Smacoj sbaic ta na scaj te ya xi'ic te judioetique. Te Jesús tal stejc'an sba ta yolilic, soc la yal: —Muc'ubenuc me q'uinal ya awaiyic —xi'.

2 Tesalonicenses 1:2

Ac'a yac'beyex yutsil yo'tan te Jtatic Diose soc te Cajwaltic Jesucristoe. Lamaluc me q'uinal ya awaiyic yu'un spisil ora.

Hechos 10:36

Dios la sticun ta alel ta stojol te israeletique te bit'il ya xju' te lamal q'uinal ya caiytic ta swenta te Jesucristoe, te ja' Ajwalil yu'un spisil te ants-winiquetique.

San Lucas 2:14

“¡Jelawen ay yutsilal te Dios te ay ta ch'ulchan! Ya yac' lamajuc q'uinal ta balumilal ta stojol spisil ants-winiquetic te ayic ta c'uxtayel yu'une”, xiic.

San Lucas 1:79

swenta yu'un ya me yac' sacubuc q'uinal ta stojol te mach'atic ayic ta sc'ubulil te ijc' q'uinale soc ta bay yaxinal te lajele, soc ya me stojtesotic bael ta sbelal te lamal q'uinale —xi' te Zacariase.

Hebreos 13:20

Te Dios, te ya yac' lamal q'uinale, la xcha'cuses tel ta bay animaetic te Cajwaltic Jesucristo te Muc' Jcanantaywanej yu'un te chijetique, te ja' ta swenta xch'ich'el te chajbaj a te trato te sbajt'el q'uinal aye.

Hechos 18:9

Te Pablo c'oponot ta ajc'ubal ta stelemal yilel yu'un te Cajwaltique. Jich albot yu'un: —Ma me xiwat, c'opojan me. Ma me x'acom aba,

San Mateo 10:26

“Jich yu'un ma me x'axi'ic te j'uts'inwanejetique, melel ma'yuc bila nac'al te ma xyich' chicnantesele, soc ma'yuc bila muquen te ma x'ac'ot ta na'el stojole.

Isaías 55:12

“Te ja'exe bin nax me awo'tanic ya xloq'uex tel tey a, lamal nax me q'uinal awaiyic ya sujt'ex bael ta alumal. C'alal ya yilex te toyol witstiquil soc te ch'in witsetic, ora nax ya xc'ajinic yu'un yutsil yo'tanic, soc spisil te te'etic ta q'uinal ya me spac' sc'abic awu'un.

Salmos 27:1

Sacuben q'uinal ta jtojol yu'un te Cajwale, soc ja' Jcoltaywanej cu'un stuquel. ¿Mach'a a te ya jxi'e? ja' ya xc'opoj te Cajwal yu'un te jcuxlejale; ¿mach'a a jiche te ya jxi'e?

Apocalipsis 2:10

Ma me xiwat yu'un te bit'il ya xc'ax bayal awocole. Melel te pucuje ya me yaq'uex ta chucjibal swenta yu'un jich me ya yilbeyex awo'tanic ta apisilic. Tey me ya xc'ax awocolic lajuneb c'aal a. Ja'uc me to, junuc me awo'tan ta jtojol, manchuc teme ya xlajat tey a. Jich me ya cac'bat acorona swenta cuxlejal.

Apocalipsis 1:4

Jo'on Juanon te ya jpatbeyex awo'tanic ja'ex te jucchajp jch'uunjelex te ayex ta sq'uinal Asia. Ac'a yac'beyex bayal yutsil yo'tan, soc lamaluc me q'uinal ya awaiyic yu'un te mach'a stalel aye, te ay ta namey tele, soc te mach'a talelixe, soc uuc te juqueb espirituetic te ayic ta yelaw te muc'ul nactijibale,

Hebreos 7:2

Jich te Abrahame la yac'bey jun ta slajunebal te biluc te la spoj tel te banti xc'otuc ta guerrae. Te Melquisedeque “muc' ajwalil te lec ya xchajbanwane”, xi' ta c'asesel te sbiile. Soc te bit'il ja' muc' ajwalil yu'un lum Salem, te “lamal q'uinal” xi' ta c'asesel sbiil te lume, jich “muc' ajwalil yu'un lamal q'uinal”, xi' sc'oplal.

San Juan 20:26

Ta swaxaquebal c'aal ta patil stsoboj sbaic yan buelta ta na te jnopojeletique. Tey sjoinejiquix a te Tomase. Macal ta lec yu'unic te ti'nailetique, ja'uc me to, teq'uel julel ta yolilic te Jesuse. Jich la yal: —Muc'ubenuc me q'uinal ya awaiyic —xi'.

Ezequiel 2:6

Ja'at winic, ma me xtal xiwel ta awo'tan ta stojolic, soc ma me x'axi' te bila ya yalic ta atojole, manchuc me jich ta awo'tan te bit'il sjoyintayejat bayal ch'ixe, manchuc me ayat ta yolil tsequetic ya awaiy. Ma me xiwat yu'un teme ay bila ya yalbate, soc ma me xnijc' awo'tan yu'un teme ya xyanaj sitique, manchuc me mero tulan ya yac' sbaic ta jtojol.

Salmos 28:3

Ma me pajaluc ya atason bael soc te mach'atic amenique; ma me xc'ot ta jwenta awu'un te bila ya xc'ot ta swenta te mach'atic amen yat'elique. Tojol nax te t'ujbil ya xc'opojique, melel ta yutil yo'tanic nojel ta mulil.

Daniel 4:1

Te muc' ajwalil Nabucodonosor la sts'ibubey jun ta stojolic te ants-winiquetic ta spisil nacionetic soc ta spisil c'opiletic ta q'uinal, jich la yalbey: “Ac'a lamajuc q'uinal awaiyic soc ac'a toyuc xan yutsil awo'tanic.

Proverbios 3:25

Ma me xiwat yu'un te lajel te ora nax ya xtale, soc ni ja'uc te jinel ya xtal ta stojolic te mach'atic amen yo'tanique;

Apocalipsis 21:8

Yan te mach'atic ya xiwique, soc te ma sc'an xch'uunone, soc te mach'atic ilaybil sba te bila ya spasique, jmilawaletic, jmulwejetic, j'ac'chameletic, soc te mach'atic jch'uunej-loc'ombaetic, jpas-lotetic, ta spisilic in to, ja' me ya xbajt'ic ta bay muc' pamal c'ajc' te yac ta tilel soc azufre te ja' xchebal buelta lajele —la yuton.

Gálatas 6:16

Spisil mach'a xch'uunejic in c'op to, pajal me lamal q'uinal ya yaiyic soc pajal me ya yich'ic c'uxtayel soc spisil te lum Israele.

San Lucas 10:5

Te bay nailuc te ya x'ochexe, patbeya yo'tan neeluc. Jich me xawalic: “Lamaluc me q'uinal ya awaiy ta anaic” xaex me.

Zacarías 6:13

Ya me xcha'pas xan te templo yu'un Cajwaltic, soc ya me yich' ich'el ta muc', jich te bit'il ya x'ich'ot ta muc' te ajwalile. Ya me snajc'an sba ta smuc'ul nactijib ta mandalteswanej; soc ta xujc' te smuc'ul nactijibe, ya me snajc'an sba te sacerdote. Lamal me q'uinal ya yaiyic ta xchebalic’, uta me.

Isaías 57:19

Soc jich ya calbey ta spisilic: “Lamaluc me q'uinal awaiyic te c'ubul ayexe, soc lamaluc me q'uinal awaiyic te nopol ayexe. Jo'on ya jlamantesbey xchamel te lum cu'une”, xoon me.

Salmos 72:7

Ac'a esmajuc lamal q'uinal soc te bitic yich'oj swentail ta lec ta pasele te jayeb c'aal ochem ta ajwalil ja' to teme laj te ue.

Colosenses 1:2

Ya jpatbeyex awo'tanic quermanotac, te ch'ul lumex yu'un te Diose soc te jun awo'tanic ach'uunejic te Cristo te ayex ta lum Colosae. Ac'a yac'beyex yutsil yo'tan soc lamal q'uinal ta atojolic te Jtatic Diose.

San Lucas 12:4

“Te bit'il jun ayotique, yo'tic ya calbeyex: Ma me ja'uc x'axi'ic te mach'a ya smilbeyex abaq'uetalic te patil ma'yuc bi ya xju' ya spasbeyex xane.

Isaías 41:14

Te Cajwaltic tulan ya yalbey sc'oplal: —Israel, te lumat yu'un Jacob, manchuc me ch'in xujt'at, soc teme ma'yuc awipe, ma me xiwat, jo'on ya jcoltayat. Jo'on, te Ch'ul Dioson yu'un Israel, jo'on Jcoltaywanejon awu'un.

Daniel 6:25

Jich te muc' ajwalil Darío la sts'ibubey jun ta stojolic te ants-winiquetic ta spisil nacionetic soc ta spisil c'opiletic ta q'uinal, jich la yalbey: “Ac'a lamajuc q'uinal awaiyic soc ac'a toyuc xan yutsil awo'tanic.

Isaías 12:2

Ja' Dios te ya scoltayone, ja' smuc'ulinej co'tan, ma xiwon. Te Cajwale, ja' anjibal cu'un soc ja' me quip, ja' jcoltaywanej cu'un —xaex me.

Salmos 11:1

Jo'on ya jle canjib ta stojol te Cajwale. Tojol te bila ya awalbonique: “Anan bael ta witstiquil jich bit'il te ja'mal mutetique.

Job 34:29

Pero teme ma xc'opoj yu'un te Diose, ¿mach'a ya xju' yu'un ya yalbey smul te j'uts'inwaneje? Teme ya snac' yelaw te Diose, ¿mach'a ya yilbey te smule? Ja' stuquel ya yil lumetic soc juju-jtul ants-winiquetic,

Lamentaciones 3:17

C'ubul bajt' ta jtojol te lamal q'uinale, soc ch'ayix bael ta co'tan te sbujts' q'uinale.

Salmos 72:2

swenta yu'un yich'oj me swentail ta lec soc mero stojil me ya swentainbat te lum awu'un soc te me'baetic awu'une.

2 Crónicas 20:30

Jich jun yo'tan mandalaj ta ajwalil te Josafat, melel te Diose la yac' lamajuc q'uinal yaiy soc te nacionetic te jun smojón soque.