Josué 22:5 - Bible in Tzeltal de Oxchuc y Tenejapa

⁵ Jun nax te bi ya calbeyex, c'otesaic ta pasel te mandaliletic la yac'beyex Moisés te yabat Cajwaltic te Dios cu'untique. C'ux me x'awaiy ta awo'tanic, soc t'unbeya spisil ora te sbe, ch'uunbeyaic te mandaliletic yu'une. Na'aic me, soc ac'a abaic ta abatinel ta stojol soc spisil awo'tanic soc spisil ach'ulelic —xi' te Josué.

Bible in Tzeltal Bachajón

⁵ Ha nax ac'a c'ohtuc ta pasel awu'unic te mandariletic te la spasex ta mandar Moisés te a'bat yu'un Jehová: ha te c'uxuc me xawa'iy ta awo'tanic te Jehová te Dios awu'unic, te yacuc xbehenex ta spisil te behetic yu'un, te yacuc ach'uhunic te mandariletic yu'un, yacuc at'unic bahel soc yacuc awac' abahic ta a'batinel ta stojol ta spisil awo'tanic soc spisil ach'uhlelic, xchi.

Josué 22:5 Referans Kwoze

San Mateo 22:37

Jich la yal te Jesuse: —“C'ux me x'awaiy te Cajwaltic Dios soc spisil awo'tan, soc spisil ach'ulel, soc spisil ap'ijil”, te xie.

Éxodo 20:6

Yan te mach'atic c'uxon ta yo'tanic te ya xch'uunbonic te jmandale, ya jc'uxtay jmil ta caj soc yal-snich'anic stuquelic.

Romanos 8:28

Jna'ojtic stojol te mach'atic c'ux ta yo'tanic te Diose, ya x'ac'botic yu'un spisil bila leque, ja'ic me te mach'atic ic'bilic yu'un Dios te bit'il jich la sc'an yo'tan stuquele.

Deuteronomio 11:22

“Teme jun awo'tan ya ach'uunic spasel spisil te mandaliletic ya calbeyex apasic baele, teme c'ux ya awaiy ta awo'tanic te Cajwaltic te Dios cu'untique, soc teme mero spisil awo'tanic ya at'unbeyic te beetic yu'une,

Éxodo 15:26

Jich la yal: —Teme jun awo'tanic ya awaiybonic stojol te bila ya cal te jo'on Ajwalilon te Dioson awu'unique, soc teme ya apasic te bila lec co'tan yu'une, teme ya ach'uunic te mandaliletic cu'une, soc teme ya ac'otes ta pasel te bila ya yal te mandaliletic cu'une, ma'yuc bi ora ya xtal tulan chamel ta atojolic te bit'il la cac'bey te egipcioetique, melel jo'on te Ajwalilon te ya jlamantesbeyex achamelique —xi' te Cajwaltique.

Santiago 1:12

Bin nax yutsil te mach'a jun yo'tan ya xts'ijc' yu'un te swocole. Yu'un teme cujch' yu'un te swocole, ya me yich' corona swenta cuxlejal, ja' bi ja' te yaloj Dios te ya yac'bey spisil te mach'atic c'ux ta yo'tanic te Diose.

San Mateo 4:10

Jesús la yalbey: —Baan, q'ueja aba, Satanás. Melel jich ts'ibubil ta Sjun Dios: “Ja' nax me x'awich' ta muc' te Cajwaltic te Diose, soc ja' nax me ya awac' aba ta abatinel ta stojol stuquel”, te xie —xi'.

Romanos 12:9

C'ux me x'awaiy abaic ta melel. Ilayaic te bila amene; ja' me x'at'unic te bila leque.

Romanos 1:9

Melel te Diose, te jun nax co'tan cac'oj jba ta abatinel yu'un te ya calbey sc'oplal ta bayuc te Snich'ane, ja' testigo cu'un te spisil ora ya jna'ex te c'alal ya jc'opon te Diose.

Hechos 27:23

Melel te Diose te yu'uninejone soc te ayon ta abatinel yu'une, ta ajc'ubal la stejc'anbon ta jtojol jtul ch'ul abat yu'un.

Hechos 11:23

Te c'alal c'ot tey a, la yilbey yutsilal te Diose. Bin nax yo'tan yu'un, soc la stac'uy te ayuc me swentail ta yo'tanic soc te jc'axel ac'a junajuc yo'tanic ta stojol te Cajwaltique.

San Juan 14:15

“Soc teme c'uxon ta awo'tanique, ya me ach'uunbonic spisil te jmandale.

San Lucas 1:74

te ya me scoltayotic loq'uel ta libre ta sc'ab te cajcontrotique. Jich me ma'yuc xiwel ya caiytic te ya cac' jbatic ta abatinel yu'une.

San Mateo 6:24

“Ma'yuc jtuluc abat te ya xju' yu'un te ya yac' sba ta abatinel yu'un te cheb yajwale. Teme jiche, ja' ya sp'aj te jtule; yan te yane, c'ux ya yaiy ta yo'tan stuquel. Jun yo'tan ta stojol te jtule; ja'uc me to, te yane ma'yuc sc'oplal ta yo'tan ya xc'ot. Ja' nanix jich te ja'exe, ma xju' awu'unic te ya awac' abaic ta abatinel yu'un Dios, teme ja' baem ta awo'tanic te ac'ulejalique.

Isaías 55:2

¿Bistuc ya alajin ataq'uinic yu'un teme ma we'eliluque? ¿Bistuc ya alajin aganaric yu'un teme ma ja'uc te bila ya xnoj ach'ujt'ic yu'une? Aiybon awaiyic stojol ta lec, jich me ya awe'elinic lequil we'eliletic, ya me awe'elinic bitic bujts'anic.

Salmos 106:3

Bin nax yutsilic te mach'atic ya yat'elinic spasel te toj-o'tanil, soc te spisil ora ya spas te bila toj ta pasele.

Deuteronomio 11:13

“Teme spisil awo'tanic ya ach'uunic spasel te mandaliletic yacon ta yalel ta atojolic, teme mero c'ux ya awaiy ta awo'tanic te Cajwaltic te Dios cu'untique, teme mero spisil awo'tanic soc teme spisil acuxlejalic ya ach'uunique,

Deuteronomio 11:1

“C'uxuc me ta awo'tanic te Cajwaltic te Dios cu'untique, ch'uunbeyaic spasel te bila ya yale, soc spisil ta jchajp te mandaliletic soc te bitic chapal yu'une.

Deuteronomio 6:17

Mero jun me awo'tan xach'uunic spasel te mandaliletic yu'un te Cajwaltic te Dios cu'untic, spisil ta jchajp te mandaliletic te la yalbeyex te ya ach'uunic spasele.

Santiago 2:5

Quermanotac te bayal c'uxex ta co'tane, aiya awaiyic stojol in to: ¿Ma bal ja'uc tsabilic yu'un Dios te mach'atic me'ba ayic li'to ta balumilale? Melel ja' sc'ulejalic ya xc'ot te ay xch'uunjel yo'tanique, soc te ya x'ac'bot ainuquic tey a ta bay ay ta ajwalil te Diose, jich te bit'il yalojbey sc'oplal spisil te mach'atic c'ux ya yaiyic ta yo'tanic te Diose.

Hebreos 12:15

Tsajtaya me abaic, ma me ayuc jtuluquex te ma ba ya ataic te yutsil yo'tan te Diose. Ma me ayuc jtuluquex te ay bila ma lecuc ay ta awo'tanique. Melel teme muc'ube, ay me awocolic yu'un, soc jich me ay tsobol ya xbolob yo'tanic yu'un.

San Juan 12:26

Teme ay mach'a ya sc'an ya yac' sba ta abat cu'une, ac'a me sts'aclinon bael. Melel te bay ya xc'oon te jo'one, tey me ya xc'ot uuc te cabate. Te mach'a ya yac' sba ta abatinel cu'une, ya me x'ac'bot yich' yutsilal yu'un te Jtate.

Proverbios 4:23

Ja'uc me tulan sc'oplal ta awo'tan te ya acanantay ta balumilal te ajol soc te awo'tane, melel tey me ya xtal a te acuxlejale.

1 Samuel 12:24

Yan te ja'exe, ja' nax ya sc'an te ya ach'uunbeyic smandal te Cajwaltic, soc ya me ach'uuntayic ta mero melel soc ta mero spisil awo'tanic. Ja' me x'ana'ic te mero bayal bi spasojbeyex te Cajwaltique.

1 Samuel 12:20

La sjac' te Samuel: —Ma xiwex. Melel nix a te mero ma lecuc te bi apasojique, pero yo'tic ma me xapit loq'uel abaic ta stojol te Cajwaltique. Ch'uunaic ta spisil awo'tanic.

1 Samuel 7:3

Ja' yu'un te Samuel jich la yalbey te israeletic: —Teme mero spisil awo'tanic ya sujt'ex ta stojol te Cajwaltic, ya me sc'an jiche te ya ach'ojic loq'uel te diosetic yu'un jyanlumetic soc te loc'ombaetic yu'un Astarté te awich'ojique. Ja' xan meix ya sc'an ya awac' yabatinbeyex acuxlejalic te Cajwaltic, ja' nax ya sc'an ya ach'uunic. Jich to me ya scoltayex loq'uel ta sc'ab te filisteoetic te Cajwaltique —xi'.

Josué 23:8

Junuc me awo'tanic ta stojol Cajwaltic te Dios cu'untique, jich nix te bit'il yacalex tel ta spasel c'alal ora.

Deuteronomio 13:4

Ja' nax xat'unic soc ja' nax x'awich'ic ta muc' stuquel te Cajwaltic te Dios cu'untique. Ch'uunaic spasel te mandaliletic yu'une, aiybeyaic te sc'ope, ch'uunaic. Jun me xawac' abaic soc te Cajwaltic, ac'a me swentainbeyex acuxlejalic.

Deuteronomio 10:20

“Ich'aic ta muc' te Cajwaltic te Dios cu'untique, ch'uunaic ta mero stuquel nax, junuc me awo'tanic ta stojol. Teme ay bila jc'axel ya awalique, ja' me xachapic ta swenta stuquel.

Deuteronomio 4:9

Ja' yu'un mero tsajtaya me abaic, ma me xach'ay ta awo'tanic te bitic awilojique, soc ma me ayuc bi ora ya xch'ay ta ajolic. Ya me sc'an te ya awalbeyic yaiyic te awal-anich'anic soc te amamataquique.

Deuteronomio 4:6

Ac'a me c'otuc ta pasel awu'unic, soc jich me xapasic bael spisil ora, melel jich me ya sna'ic a te yantic lumetic te ay sp'ijil awo'tanic soc te spisil ya ana'beyic swentaile. Te c'alal ya sna'ic te bit'il ay te mandaliletic, jich me ya yalic: “Mero bayal sp'ijil yo'tan, soc sna'ojbey swentail spisil, ja' muc'ul nación in to”, xiic me.

Deuteronomio 4:4

Pero ta apisilic te ja'exe, te jun awo'tanic la awac' abaic ta stojol te Cajwaltic te Dios cu'untique, cuxulex ta ora to.

Jeremías 12:16

Ta smelelil la sp'ijubtesic te lum cu'un ta yalel sbiil te Baal. Pero ta ora yo'tic ya xju' xnajc'ajic ta yolil te lum cu'une, teme ya xch'uun yo'tanic ta melel te bi xch'uunejic te lum cu'une, soc teme ya stabonic ta alel te jbiile: “Cuxul te Cajwaltic”, teme xiique.

Apocalipsis 15:3

Soc yacalic ta sc'ajintayel sc'ayoj Moisés te abat yu'un te Diose soc sc'ayoj te Alalchij te jich yacalic ta yalele: “Cajwaltic Dios te spisil ya xju' awu'un, c'ax muc' spisil te awat'ele soc jelawen yutsil spisil te bila ya apase. Ja'at Muc' Ajwalilat yu'un spisil ta jchajp te nacionetique. Toj awo'tan atuquel soc smelelil stuquel te be awu'une.

Éxodo 23:25

Ja' nax me xaquejan abaic ta jtojol jo'on te Ajwalilon te Dioson awu'unique, melel ja' ya cac'bat bendición yu'un awe'el soc te ja' ya awuch'ique. “Ma xcac' xnoptsaj chamel ta atojol.

Deuteronomio 4:29

Yan teme spisil awo'tanic soc spisil ach'ulelic ya aleic te Dios awu'unic te c'alal tey ayex a, ya me ataic ta leel.

Deuteronomio 5:10

Yan te mach'atic c'uxon ta yo'tanic te ya xch'uunbonic te jmandale, ya jc'uxtay mil ta caj soc yal-snich'anic stuquelic.

Salmos 78:7

Jich me ay smuc'ul yo'tanic ta stojol a te Diose, soc ma me xch'ay ta yo'tanic a te bila spasoj stuquele; swenta yu'un jich me ya xch'uunbeyic a te mandaliletic yu'une.

Éxodo 23:13

“Ch'uunaic spasel spisil te bitic la calbeyexe, soc ma me x'ana'ulay yantic diosetic, soc ma me ayuc xujt'uc ya awal loq'uel ta awe te sbiilique.