Jeremías 9:12 - Bible in Tzeltal de Oxchuc y Tenejapa

¹² ¿Mach'a a te bayal sp'ijil ta swenta sna'beyel swentail in to? ¿Mach'a ac'bot sna' stojol yu'un Cajwaltic swenta ya xju' yu'un xcholbel yaiy te yantique? ¿Bi yu'un te lum te jineme, te taquinix jichuc jochol taquin q'uinal ta bay ma'yuc mach'a ya xc'axix tey a?

Bible in Tzeltal Bachajón

¹² ¿Mach'a a te ay sp'ijil yo'tan te ya xhu' ya sna'be scuentahil ini? ¿Mach'a c'oponot yu'un Jehová scuenta yu'un ya xhu' ya spuc ta halel? ¿Bin yu'un te jihnem te q'uinale, te jimbil hich te bin ut'il jochol taquin q'uinal te mayuc mach'a ya xc'axix tey a?

Jeremías 9:12 Referans Kwoze

Oseas 14:9

Te mach'atic ay sp'ijilic soc te ya sna'ic stojole, ac'a me yaiyic stojol te bila ya cale: Te beetic yu'un te Cajwaltic toj ay stuquel. Te mach'atic toj yo'tanic, ja' me ya st'unic; yan te mach'atic amenic, ya me sc'ojch'in sbaic tey a.

Salmos 107:43

Te mach'a ay sp'ijile ya sc'an te ay ta yo'tan ta spisil, soc te yacuc sna'beyic swentail te xc'uxul yo'tan te Cajwaltique.

Salmos 107:34

ya sc'atp'un ta taquin q'uinal te lequil q'uinale, ta scaj smulic te mach'atic nainemic tey a.

Deuteronomio 32:29

Te ayuc sp'ijil yo'tanic, ya xc'ot ta yo'tanic te bi c'oem ta pasel te jichuque.

Apocalipsis 1:3

Bin nax me yutsil te mach'a ya sc'opon in jun to, soc te mach'a ya yaiybey stojol te sc'op te j'alwaneje, soc te ya yac' ta yo'tan te bila ts'ibubile, te melel nopol te ya xc'otix ta pasel.

San Mateo 24:15

“Te j'alwanej yu'un Dios te Daniel sbiile, la yalbey jilel sc'oplal te jinwanej te ya sboltes te ch'ul awilale. (Te mach'a ya yil te bila ts'ibubil li'to, ac'a me sna' stojol.) Te c'alal ya awilic te ya xc'ot ta pasel te bila la yale,

Ezequiel 14:23

Ya me xtal smuc'ul awo'tanic yu'un te c'alal ya awilic te bi yilel yat'elic soc te bitic spasojique. Jich me ya ana'ic a te yich'oj swentail te bitic la cac' taluc ta stojol te Jerusalén. Jo'on Ajwalilon te jich caloje —xi' te Cajwaltique.

Isaías 42:23

¿Ja'uc me to, mach'aex a te ja'exe te ya xch'uun awo'tan te bila la cale? ¿Mach'a te jich yo'tan ta yaiyel stojol te bi ya xc'ot ta pasele?

Jeremías 9:20

Antsetic, aiya awaiyic stojol sc'op te Cajwaltique, aiya awaiyic te bila ya yalbate. P'ijubtesaic ta oq'uel te awantsil-alic soc te ajo'taque, te yacuc yalic ta oq'uel:

Jeremías 23:10

Te lume nojel ta yo'tanic mulwej; ja' te ants-winiquetic buen animal ya xbajt'ic ta spasel te bila amene, mero ya stuuntesic yip sbaq'uetalic ta spasel te bila ma stojiluque. Ja' swentail te la yut jilel Cajwaltic te q'uinale, jich a taquej te lumq'uinale, c'ajq'uem yilel a jil te aquiltic ta jochol taquin q'uinal.

Jeremías 23:16

Te Cajwaltic te Spisil ya xju' yu'une, ya yal: —Israeletic, ma x'awich'ic ta muc' te bila ya yalbeyex te mach'atic ya scuy sbaic ta j'alwanejetique. Te bila ya yalique, ja' nax puro lot; te bitic ya yalique, ja' nax ya xchicnantesic stuquelic, ma'yuc bay calojbey jc'op.

Jeremías 23:22

Te yu'unuc la sna'ic te bila ay ta co'tane, la yalbonic jc'op ta stojol te lum cu'un te jichuque; la yac'beyic yijq'uitay te amen be st'unojic te jichuque soc la yijq'uitayic te sbol at'elique —xi' te Cajwaltique.

Jeremías 23:28

Teme ay jtul j'alwanej ay swaich, ac'a yal te ay swaiche; teme yu'unix yaiyojbon te jc'ope, jich toj ta alel yu'un. Ma pajaluc soc taquin ac te trigoe. Te jc'ope jich bit'il c'ajc', soc jich bit'il martillo te ya swuy te tone. Jo'on Ajwalilon, jich ya cal.

Joel 1:11

Ja'ex te ya x'at'ejex ta yawil trigo soc ta yawil ts'usubile, oc'anic me yu'un mel-o'tan. Melel ma'yuc swentail c'ot te ts'unubiletic, ma'yuc swentail c'ot te sit trigo, soc ma'yuc swentail c'ot te sit cebada.

Sofonías 3:6

Ya yal te Cajwaltique: —Jinojix te nacionetique; la jinbeyix coel te ts'ajq'uetic yu'un. Jochol la quijq'uitayix te calleetic yu'une; ma'yuquix ants-winiquetic ya xc'axic tey a. Jc'axel ma'yuquix bila ay ta lumetic; ma'yuquix, ni jtuluc yajwal.

Oseas 4:10

Melel la yijq'uitayic te abatinel cu'un te Ajwalilone. Jich yu'un ya xwe'ic, ja'uc me to, ma xnoj xch'ujt'ic yu'un; te ya spasic mulweje, ma ba ya xnich'najic yu'un.