Jeremías 7:22 - Bible in Tzeltal de Oxchuc y Tenejapa

²² Ja'uc me to, te c'alal la jloq'ues tel ta Egipto te antiguo ame'-atatique, ma'yuc bila la calbey ni jtebuc, ma la calbey mandal te ya yac'bon majt'anil te chic'bil ta scojt'ol soc yantic milbil majt'aniletique.

Bible in Tzeltal Bachajón

²² Como te c'alal la jloq'ues tal ta Egipto te ame'atatic, ma ba la jpas ta mandar ta scuenta scohtol chic'bil mahtaniletic soc milbil mahtaniletic.

Jeremías 7:22 Referans Kwoze

Oseas 6:6

Te bila ya jc'anbeyex te ja'exe, ja' te c'uxucon ta awo'tanique, te ma ja'uc ya apasbonic te milbil majt'anile. Ja' ya jc'an te ya ana'bonic jba jo'on te Diosone, ma ja'uc te ya awac'bonic chic'bil majt'anile.

1 Samuel 15:22

La sjac' te Samuel: —Ja' buen lec yo'tan Cajwaltic yu'un teme ya yich' ch'uunel smandal; ma ja'uc bayal sc'oplal teme ya cac'beytic milbil smajt'an soc chic'bil smajt'ane. Ja' mero bayal sc'oplal te ya jch'uunbeytic smandal soc teme ya cac' ta co'tantic te bi ya yale; ma ja'uc bayal sc'oplal te ya cac'beytic milbil smajt'an soc smajt'anin xepuil chije.

San Mateo 9:13

Baan, nopaic te bi ya yal te Sjun Diose: “Ja' ya jc'an te ya awaiyic c'uxtaywaneje. Ma ja'uc ya jc'an te milbil majt'anile”, te xie. Melel ma ja'uc tal quic' te mach'atic tojique. Ja' tal quic' te jmulawiletic te ya sujt'es yo'tanic ta stojol te Diose —xi' te Jesuse.

Salmos 40:6

Te ja'at, ma ja'uc lec awo'tan yu'un milbil amajt'an, soc ma x'ac'an amajt'anin sit awalts'unubil, soc ma x'ac'an amajt'anin te scojt'ol ya yich' chiq'uel, ni ja'uc chic'bil majt'anil swenta stojol mulil. Ja'uc me to la ajambonix jchiquin.

San Marcos 12:33

Soc te bit'il c'ux me ya caiytic ta spisil co'tantic, soc spisil jp'ijiltic, soc spisil te quiptique; soc te bit'il c'ux me ya caiytic te jpat-jxujc'tique jich te bit'il c'ux ya caiy jbajtic jtuqueltique. Ja' c'ax muc' sc'oplal ta pasel stuquel a te bit'il ya cac'beytic smajt'an te Diose soc spisil smajt'an te ya yich' chiq'uel ta bay xchic'jibal te smajt'ane —xi' te winique.

Deuteronomio 17:3

ta swenta te bit'il ya xjajch' xch'uun yantic bitic cuybilic ta Diose, teme ya squejan sba ta stojolic, teme ja' ya squejan sba ta stojol te c'aal, u, eq'uetic, te ma ja'uc yaloj te Cajwaltique,

Jeremías 32:30

Xjajch'ibal nix tel a, te lum Israel soc te lum Judá spasojic nix tel a te bila ma smulan co'tane; te israeletic ma ba yijq'uitayej ta sbolc'optaybelonic ta swenta te yajcananic te ja'ic nix spasoj stuquelique. Jo'on Ajwalilon, jich ya cal.