Jeremías 6:21 - Bible in Tzeltal de Oxchuc y Tenejapa

²¹ Jich yu'un te Cajwaltic jich ya yal: —Te lume ya cac'bey sc'ojch'in yacan, soc ya cac' xyalic. Tatiletic soc nich'aniletic, spat-xujq'uic soc te mach'a jun yo'tanic sbaic soque, pajal me ya xlajic —xi' te Cajwaltique.

Bible in Tzeltal Bachajón

²¹ Ha yu'un hich ya yal te Jehová: Ya cac' te bin ya sc'ohchin sba a te pueblo ini, pajal ya xyahlic tey a te tatiletic soc al-nich'aniletic; ya xch'ayic bahel te spat-xuhquic soc mach'atic jun yo'tan sbahic, xchi.

Jeremías 6:21 Referans Kwoze

Isaías 8:14

Jich me c'oem ta atojolic te bit'il pejts'e; jich c'oem ta atojolic te bit'il ton ya ac'ojch'in abaic a, ja' me ya yac' xyalic a te cha'chajp muc' ajwaliletic yu'un Israel; jich me c'oem te bit'il pejts' ta bay ya xyalic te yajwal Jerusalén.

Ezequiel 3:20

Soc teme repente ay winic te toj yo'tane, pero teme ay la yijq'uitay te toj-o'tanile, teme ja' jajch' spas te bila amen ta pasele, teme la cac' ta swenta lajel yu'une, teme ma ba la awalbeye, ya me xlaj yu'un te smule. Ma me ba ya quich'bey ta wenta te bila lec la spase, puersa me ya xlaj yu'un te smule, pero ja'at me ya quich'at ta c'op yu'un te ya xlaje.

Jeremías 13:16

Ich'aic ta muc' te Cajwaltic te Dios awu'unique, te c'alal ma to xtal yu'un te ijc' q'uinal te ya ac'ojch'in awacanic ta bay ijc' q'uinal ta witstiquil; c'alal ma to sc'atp'un ta ijc' q'uinal, c'alal ma to sc'atp'un ta mero pimil ajc'ubal te saquil q'uinal ya amaliyic te ja'exe.

1 Pedro 2:8

Soc ja' sc'oplalic xan te bit'il ts'ibubil jilele: “Ja' te ton swenta c'ojch'injibal soc te ton ya syaleswane”, te xie. Melel ya syalesotic ta scaj te ma xyich'beyic ta muc' te sc'ope. Yu'un nanix namey jich albil sc'oplalic yu'un Dios a.

Romanos 11:9

Soc jich la yal uuc te Davide: “Ac'a c'atp'ujuc ta spejts'ulic soc syacjibalic te sq'uinique, ac'a sta swocolic a, soc ac'a staic castigo tey a.

Romanos 9:33

Jich bit'il ts'ibubil ta Sjun te Diose: “Jo'on ya cac' ta bay wits Sión te ton swenta c'ojch'injibale, soc te ton te ya xyaleswane. Te mach'a jayeb ya xch'uunique, ma'yuc bi ora ya staic q'uexlal yu'un”, te xie.

Ezequiel 5:10

Ta awolil ay me ya sti' yal-snich'anic te me'il-tatiletique, soc ay me alnich'anetic ya sti'ic te sme'-statique. Ya me cac' c'otuc ta pasel ta atojol te castigo. Te mach'atic cuxulic ya xjile, ya me jpuc bael ta xchanxujc'ul balumilal.

Jeremías 21:7

Patil ya cac' ta c'abal te Sedequías, te muc' ajwalil yu'un Judá. Ja' ya cac' ta sc'ab te Nabucodonosor soc te yantic scontrotac te jmilawaletique te ja' nix sjo'tac ta ajwalil, soc te soldadoetic yu'une. Te alumal te cuxulic to ya xjilic ta lum ta patil teme c'axemix a te chamel te ya xmilawane, te guerra soc te wi'nale, jo'on ya cac' te ya xmilotic ta puñal, ni ma'yuc xc'uxtayel, ni ma me ayuc ta na'beyel yo'bolil sba. Jo'on Ajwalilon, tulan ya cal’, xi me”, uta me.

Jeremías 18:21

Ja'uc me to, pasa yo'tic, ac'a lajuc te snich'nabic yu'un wi'nal o ta puñal; ac'a jiluc ta me'ba antsetic te yinamique, soc ni ma me ayuc yalatac ya xjilic. Ac'a milotuc yu'un milawal chamel te smamlalique; te queremetic, ac'a lajuquic ta guerra.

2 Crónicas 36:17

Jich yu'un te Cajwaltic la yac' taluc soc soldadoetic te Nabucodonosor, te ajwalil yu'un caldeoetic, tal smilbey ta puñal te yal-snich'anic ta mero templo, ni ma'yuc c'uxtayel yu'un te queremetic, te ach'ixetic, te mamaletic, ni ja'uc te mach'atic ma'yuc bila ya xju' spasique. Spisilic la yac'bey ta sc'abic te Cajwaltique.

Levítico 26:37

Atenten me abaic ta anel, jich te bit'il yacalex ta anel ta guerra, manchuc teme ma'yuc mach'a yacal snutsbelex. Ma me ayuc jtuluquex te ya xju' awu'unic te ya atsac abaic soc te acontroique.

Jeremías 8:12

Ya me sc'an ya xq'uexawex yu'un te yacalex ta spasel te bila ma sts'ijq'uix cu'une; ja'uc me to, ma'yuc q'uexlal ta yo'tanic, maniwan ya sna'ic te bila a te q'uexlale. Jich yu'un te c'alal ya cac'bey castigo, ya me sc'ojch'in yacan, ya me xyalic jich bit'il te yantique. Jo'on Ajwalilon te ya cale”, uta me —xi' te Cajwaltique.

Jeremías 13:14

Ta ora nax ya me jwuy jichuc oxometic, ya me cac' swuy sbaic ta stuquelic nax, tatiletic soc nich'aniletic pajal me. Ma ba ya jna'bey yo'bolil sbaic; ni ma me ayuc xc'uxul co'tan soc slequil co'tan ta stojolic. Jo'on Ajwalilon, jich ya cal’, xi' me”, uta me —xi' te Cajwaltique.

Jeremías 18:23

Yan te ja'at Cajwal, ya ana'bey spisil te bila chajbanbil yu'unique, ja' la spasic yu'un te tey ya yac'onic ta lajel a. Ma xapasbey perdón yu'un te sbolilique; ni ma me xach'aybey ta awo'tan te smulique. Pasbeya te ya xyalic ta atojole, ac'beya castigo ta swenta awilimba.

Isaías 8:15

Bayal me ya sc'ojch'in sbaic a, ya me xyalic, soc ya me xlajic; bayal me ya xyalic ta pejts', ya xjilic ta chuquel —xi'.