Jeremías 30:3 - Bible in Tzeltal de Oxchuc y Tenejapa

³ Melel ya xtal sc'aalelal te ya cac'bey xan yutsilal te lum cu'une, ja' te Israel soc te Judá. Jo'on Ajwalilon, jich ya cal. Ya jsujt'es tel ta bay lumq'uinal te la cac'bey yu'unin te sme'-statique —xi'.

Bible in Tzeltal Bachajón

³ Como ya xtal sc'ahc'alel, xchi te Jehová, te ya cac' te ya suhtic tal te jchuqueletic yu'un te pueblo cu'un, ha te Israel soc te Judá. Ya quic'ticlan tal ta q'uinal te la jca'be te sme'static, ya me yu'untayic, xchi.

Jeremías 30:3 Referans Kwoze

Jeremías 29:14

Ya me cac' jba ta tael awu'unic te ja'exe; ya me jel te bit'il ayexe. Ta spisil te nacionetic ta bay la jpuquex baele, ya jloq'uesex tel tey a; ya me jtsobex, ya me sujt'ex tel, ya xloq'uex tey a ta bay la jticunex bael ta mosoil. Jo'on Ajwalilon, jich ya cal’, xi'.

Jeremías 16:15

Ja'uc me to, jich me ya awaliquix: “Ta swenta bit'il cuxul te Cajwaltic, jich la sloq'ues tel israeletic ta yan lum ta norte soc ta spisil te lumetic te bay spucoj baele”, xaex meix ta yalel. Jo'on ya me cac' sujt'ex tel ta aq'uinalic, ja' te q'uinal la cac'bey te antiguo ame'-atatique.

Ezequiel 20:42

‘Te c'alal ya caq'uex ochel ta sq'uinal Israel, ta lumq'uinal te jc'axel la calbey te antiguo ame'-atatic te ya cac'beye, jich me ya ana'ic te jo'on Ajwalilone.

Jeremías 30:18

Te Cajwaltic la yal: —Ya jelbey sc'oplal, lec me ya xc'ot ta loq'uel te nación yu'un Jacob, ya me jna'bey yo'bolil sba te slumale; ya me spasic xan te lumetic tey nix a te bay jinemique, soc te palacioetic, ja' nix ta bay yawilique.

Sofonías 3:20

Te bi c'aalil ya xc'ote ya quiq'uex tel te ja'exe, ya jtsobex. Ya me jeltay te bila c'oem ta awentaique; soc ya cac' xpujc' ac'oplalic. Ya x'ich'otex ta muc' ta stojol spisil te lumetic ay ta balumilale. Jo'on Ajwalilon te jich caloje —xi'.

Jeremías 33:26

Jich yu'un, ma'yuc bi ora ya jch'oj bael ta co'tan sts'umbal Jacob soc David te cabate; ma xch'ay cu'un ta tsael loq'uel ta yolilic te mach'atic ya xmandalajic ta stojol te sts'umbal Abraham, Isaac soc Jacob. Melel te jo'one ya me jna'bey yo'bolil sbaic, soc ya me cac'bey xan yutsilalic —xi' te Cajwaltique.

Jeremías 32:44

Puersa me ya yich' manel, ya me yich' pasel contratoetic ta ts'ibuyel sc'oplal, ya me yich' maquel ta sello, soc ya me yac' sfirmaic te testigoetique. Tey me ya xc'ot ta pasel ta sq'uinal sts'umbal Benjamín, ta sjoylejal Jerusalén soc ta bay lumetic yu'un Judá, ta toyol witstiquil, ta peq'uel witstiquil, soc ta bay lumetic ta Néguev. Melel ya sta sc'aalelal te ya cac'bey xan te yutsilale. Jo'on Ajwalilon, jich ya cal —xi' te Cajwaltique.

Hebreos 8:8

Yu'un Dios la stabey ta alel smulic te ants-winiquetique jich bit'il la yal: “Ya me sta yorail te ya jpas yach'il trato soc te lum Israele soc te lum Judae”, xi' te Cajwaltique.

Joel 3:1

Jich ya yal te Cajwaltic: —C'alal ya xc'ot yorail ya me cac' te ya staic yutsilal te Judá soc te Jerusalén.

Ezequiel 36:24

Jo'on me ya jloq'uesex tel ta spisil nacionetic ta lumq'uinaletic. Ya me jtsobex, soc ya me cac' sujt'anic bael ta alum-aq'uinalic.

Salmos 53:6

Ja'uc ta wits Sión ya xtal scolel te lum Israel. Te bi ora ya stam jajch'el te lum yu'un te Cajwaltique, bin nax me yo'tanic ya xc'otic yu'un te sts'umbal Jacob, ja' ta spisil te lum Israele.

San Lucas 21:6

—Yacalex ta yilel spisil in to. Ja'uc me to, ya me sta yorail te ma'yuc jp'ijuc ton te cajal ya xjil ta sba te yan tone —xi' te Jesuse.

San Lucas 19:43

Yu'un ya me sta sc'aalelal te ya xtal te awajcontroe. Ya me sjoytayat soc spamal te alumale. Ya me xtal yaiy tulan guerra. Ya me sle bi ya yut ya yochintaybat te alumale.

San Lucas 17:22

Soc la yalbey te jnopojeletic yu'une: —Ya me sta yorail te awo'tanuc yacuc awilic te Nich'anile manchuc teme ja' nax jun c'aale, ja'uc me to, ma ba ya awilic.

Ezequiel 47:14

Jo'on la calbey ta jamal te antiguo ats'umbalic te ya cac'bey te lumq'uinale. Pucbeya abaic ta pajal, ya me awu'uninic.

Jeremías 32:37

Ja'uc me to, ya jtsob tel spisil yajwal te alumal ta bay la jpuquex bael c'alal noj ta co'tan quilimba soc sc'ajc'al co'tan te xiweltic sbae. Ya me quiq'uex sujt'el li' ta bay in q'uinal to, swenta yu'un jun nax me awo'tanic ya x'ainex tey a.

Jeremías 31:38

Te Cajwaltic jich ya yal xan: —Ya me sta sc'aalelal te ya yich' cha'pasel te lum cu'une, c'alal ta toyol ts'ajc' swenta iljibal q'uinal yu'un Hananeel ja' to ta Yochibal te banti yac'oj buelta te sts'ajc'ule.

Jeremías 31:31

Te Cajwaltic jich ya yal: —Ya me xtal sc'aalelal te ya jpas yach'il trato soc Israel soc Judá.

Jeremías 31:27

Te Cajwaltic jich ya yal: —Ya me xtal sc'aalelal te ya cac' esmajuc te winiquetic soc chambalametic ta bay Israel soc ta bay Judá.

Jeremías 30:10

“Jo'on, Ajwalilon, jich ya cal: Ma me xiwat, lum Jacob, abatat cu'un; ma me xnijc' awo'tan, Israel. Melel te ja'ate soc te anich'nab ya me jcoltayex tel ta lum te c'ubul ay ta bay ic'bilex baele. Lamal me q'uinal ya xtal cuxinuquex, jun nax me awo'tanic, ma me ayuc mach'a ya xiwtesex.

Jeremías 27:22

—Ya me x'ich'otic bael ta Babilonia, tey me ya yich' q'uejel a, ja' to te bi ora ya jc'an quich' tel ta yan buelta ta bay q'uinal to. Jo'on Ajwalilon, jich ya cal —xi' te Cajwaltique.

Jeremías 27:11

Yan te nación te ya yac' sba ta sc'ab te muc' ajwalil yu'un Babilonia, ya quijq'uitay jilel ta sq'uinal swenta yu'un ya xcuxin tey a soc ya sc'altay. Jo'on Ajwalilon, jich ya cal —xi'.

Jeremías 23:5

Te Cajwaltic jich ya yal: —Ya me sta sc'aalelal te ya cac'bey tel jtul mero sts'umbal David, ja' me jtul muc' ajwalil te ya xmandalaj soc sp'ijil, soc toj me ya x'at'ej ta chajbanwanej ta stojol te lume.

Esdras 3:12

Soc ay tsobolic te sacerdoteetic, levitaetic soc jwolwanejetic yu'un juju-jchajp na te mamaliquix a te la yilic te sbabial templo, mero tulan oq'uic yu'un te la yilic te yac ta jajch'el ta pasel te yach'il templo. Tsobol xan yantic yacalic ta aw ta swenta sbujts' yo'tanic.

Esdras 3:8

Ja' yu'un ta xchebal u sjajch'el xchebal ja'wil sjulelic ta Jerusalén a, te Zorobabel snich'an Salatiel, soc Josué snich'an Josadac, te sjo'tac sacerdoteetic, te levitaetic, soc ta spisil te namey ic'otic loq'uel ta slumalic te sujt'ic xan tel ta Jerusalén, jajch'ic xan ta xcha'pasel te templo yu'un Dios. Ja' la yac'beyic swentain at'el te levitaetic c'axemix ta jtab ya'wilalique.

Esdras 3:1

C'alal la sta te sjuquebal u te israeletic ayiquix ta pamalpam slumalic a. Ta spisil te lume la stsob sbaic ta Jerusalén.

Deuteronomio 30:3

jich me ya syantesbeyex a te bila wocolil ay ta atojolic te Cajwaltic Diose. Ya me sna'beyex xan yo'bolil abaic, ya me xcha'tsobex tel li' ta nacionetic ta banti la xch'ojex bael ta neelal toe.

Jeremías 31:23

Te Cajwaltic te Spisil ya xju' yu'une, te Dios yu'un Israel, ya yal: —C'alal ya cac'bey xan yutsilal te ants-winiquetic yu'un Judá, te ayiquix ta yan buelta ta sq'uinalic soc ta lumetic yu'unic, jich me ya yalic ta yan buelta: “Te Cajwaltic ac'a yac'bey bendición te ch'ul wits te bay ya xnain te stojil chajbanele”, xiic me.

Deuteronomio 30:5

Te Cajwaltic ya me yiq'uex xan tel yan buelta li' ta lumq'uinal to te banti nainic te antiguo ame'-atatique, te ja'exe ya me yac'bat xan awu'uninic. Ya me yac' jajch'uquex xan, soc c'ax me jich ya yac' esmajuc awal-anich'nab a te bit'il te antiguo ame'-atatique.

Jeremías 3:18

“Te c'alal ya xc'ot sc'aalelal, te Judá jun ya xc'ot soc Israel; pajal me ya sujt'ic tel ta slumalic ta bay norte, ja' te q'uinal te la cac'bey yu'unin te antiguo ame'-atatic te ja'exe.

Jeremías 29:10

“Soc jich ya yal te Cajwaltique: ‘C'alal ya sts'aquej lajuneb xchanwinic (70) ja'wil, ya xjajch'on ta at'el ta ac'uxtayelic te ja'exe, soc ya me jc'otes ta pasel te bila caloj ta jamal te ya jc'uxtayex soc te ya jsujt'esex tele.

Jeremías 30:4

Ja' sc'op Cajwaltic ta stojol Israel soc Judá.

Jeremías 31:16

Ja'uc me to, ya yalbey te Cajwaltique: —Raquel, ma x'oc'at xan; ma xamalix loq'uel ya'lel te asite. Melel te mel-o'tanil awu'une, ya me awich'bey stojol; te awalataque ya sujt' loq'uel tel ta slumal te scontroe. Jo'on Ajwalilon, jich ya cal.

Jeremías 51:60

Te Jeremías sts'ibuyejix jpajc' libro. Tey ts'ibubil a te sc'op te la yalbey sc'oplal spisil tulan woclajel ya xtal ta stojol te Babilonia.

Salmos 126:4

Cajwaltic, yantesbotic xan te bila ma lecuc c'otix ta pasel ta jtojoltic, jich bit'il ya yich' yantesel te jochol taquin q'uinal ta yorail te ja'ale.

Ezequiel 34:13

Ya me jloq'ues tel ta slum-sq'uinal jyanlumetic, ya me jtsob, ya me quic' bael ta mero slumalic. Ya me quic' bael ta we'el ta witstiquil yu'un Israel, ta beja'etic, soc ta spisil te banti ay mach'atic nainemic tey ta lumq'uinale.

Sofonías 2:7

Te mach'atic cuxulic xan ta Judá, ya me x'och ta sc'abic te lumq'uinale, te c'alal ya xtal te Cajwaltic Dios te ya yac'bey coltayel soc te ya slecubtes te bit'il ayique. Tey me ya xbajt'ic soc a te xchijique, soc ta ajc'ubal ya me xcux yo'tanic ta bay nanatic yu'un Ascalón.