Jeremías 30:10 - Bible in Tzeltal de Oxchuc y Tenejapa

¹⁰ “Jo'on, Ajwalilon, jich ya cal: Ma me xiwat, lum Jacob, abatat cu'un; ma me xnijc' awo'tan, Israel. Melel te ja'ate soc te anich'nab ya me jcoltayex tel ta lum te c'ubul ay ta bay ic'bilex baele. Lamal me q'uinal ya xtal cuxinuquex, jun nax me awo'tanic, ma me ayuc mach'a ya xiwtesex.

Bible in Tzeltal Bachajón

¹⁰ Ha'at, Jacob, a'batat cu'un, ma me xiwat, xchi te Jehová, ma me xnihc awo'tan, Israel, como ilawil, ho'on ya jcoltayat tal ta namal q'uinal, ha'at soc ats'umbal ta q'uinal banti chuculex. Ya suht tal te Jacob, lamal q'uinal soc jun yo'tan ya x'ayin, mayuc mach'a ya xiwtesot yu'un.

Jeremías 30:10 Referans Kwoze

Oseas 2:18

“Te c'alal ya sta yorail ya me jpas trato soc te ja'mal chambalametique, te ja'mal mutetic soc te chanetic, ta swenta xc'uxtayel te lum Israel. Ya me jloq'ues ta yolil lum te t'im, te puñal soc spisil guerra, swenta yu'un jun nax me yo'tan ya xcux yo'tan te lum cu'une.

Jeremías 29:14

Ya me cac' jba ta tael awu'unic te ja'exe; ya me jel te bit'il ayexe. Ta spisil te nacionetic ta bay la jpuquex baele, ya jloq'uesex tel tey a; ya me jtsobex, ya me sujt'ex tel, ya xloq'uex tey a ta bay la jticunex bael ta mosoil. Jo'on Ajwalilon, jich ya cal’, xi'.

Isaías 43:5

Ma me xiwat, melel joinejat me. C'alal ta sloq'uib soc smalib c'aal, ya quic' sujt'el tel te ants-winiquetic awu'une swenta yu'un ya yich' xan tsobel.

Isaías 44:2

Jo'on Ajwalilon te jchicnanteswanejon awu'un te la jchicnantesat te c'alal ma to x'ayinat a, jo'on la jcoltayatix. Ma xiwat, Jesurún, lumat yu'un Jacob, cabatat te jtsaojate.

Isaías 35:9

Tey ma'yuquix león-chojetic; ma xnoptsajiquix jti'awal chambalametic tey a. Ja' me be to, tey me ya sujt'ic tel a te mach'atic ac'bilic ta libre,

San Juan 12:15

“Ma me xiwat, lum yu'un Sión. Ilawilic, talix te Muc' Ajwalil awu'unique. Ya me awil cajal ya xtal ta ch'in burro te ja' yal te me' burrae”, te xie.

Jeremías 33:16

Te bi yorail ya cale, te Judá ya me xcol soc Jerusalén, jun nax me yo'tan ya xcuxinic. Ja' me sbiil ya awalbeyic: “Cajwaltic te toj ya yaiy tsalaw cu'untique”, xi' me.

Jeremías 23:8

ja'uc me to, jich me ya awalic: “Ta swenta bit'il cuxul te Cajwaltic, jich la sloq'uesbey tel sts'umbal Israel ta bay norte, soc ta spisil te lumetic ta bay la spuc baele”, xaex me. Tey me ya xba ainuquic ta bay mero te slum-sq'uinalique —xi'.

Jeremías 23:3

Jo'onix ya quic' tel te jayeb xan chijetic te bay la cac' anuc bael ta lumetique, ya jtsob tel, soc ya cac' sujt'uc tel ta bay te swe'elique, swenta yu'un ya me yac' bayal yalatac.

Jeremías 3:18

“Te c'alal ya xc'ot sc'aalelal, te Judá jun ya xc'ot soc Israel; pajal me ya sujt'ic tel ta slumalic ta bay norte, ja' te q'uinal te la cac'bey yu'unin te antiguo ame'-atatic te ja'exe.

Zacarías 3:10

Te c'alal ya xc'ot sc'aalelal, ya me xju' te talel c'axel ya awic' abaic ta yaiybeyel yutsilal te lamal q'uinal ta yaxinal ats'usubiletic soc higueraetic awu'unic. Jo'on, Ajwalilon te Spisil ya xju' cu'une ya cal ta jamal”, xi' me te Cajwaltic —xi' te ch'ul abate.

Ezequiel 38:11

Jich me ya awal: “Ya me xba cac'bey guerra jsejp lumq'uinal te ma'yuc bi ya scoltay sba a, te banti jun yo'tan soc bin nax yo'tan nainem te ants-winiquetique. Ta spisilic ayic ta lumetic ma'yuc sjoyob ts'ajc'ul, ma'yuc yochibal sti' soc ma'yuc sbalal taq'uinal.

Ezequiel 16:52

Yo'tic puersa me ya xc'ot ta awenta te ya awich' pejc'anele, melel te bit'il ja'at la apas muliletic te mero ilaybil sbae, la awac' te ma'yuc smul loc' yilel te yantic awermanataque. Ja'at me ya xc'ax awocol yu'un sc'asesel te q'uexlaletic soc te pejc'anele, melel ma'yuc smul a loc' yilel awu'un te awermanataque.

Jeremías 30:3

Melel ya xtal sc'aalelal te ya cac'bey xan yutsilal te lum cu'une, ja' te Israel soc te Judá. Jo'on Ajwalilon, jich ya cal. Ya jsujt'es tel ta bay lumq'uinal te la cac'bey yu'unin te sme'-statique —xi'.

Jeremías 23:6

Ta yorail te ay ta at'el ta muc' ajwalile, te Judá ya me xcol; jich nix te Israel, jun nax me yo'tan ta q'uinal. Ja' me sbiil ya awalbeyic in to: “Cajwaltic te toj ya yaiy tsalaw cu'untique” xaex me ta yalel —xi'.

Isaías 54:4

Ma me xiwat, ma me xjilat ta q'uexlal; ma ba ya yixtac'optayex, ma me ayuc bi ya xq'uexawat yu'un. Ya me xch'ay ta awo'tan te bit'il q'uexawat te c'alal ach'ixat to a, soc ma me x'ana' xan te la awich' ilayel yu'un te me'ba antsate,

Isaías 46:13

Jo'on ya cac' te ya xnoptsaj tel te ya x'ac'awanon ta libre; te colel cu'une ma ba ya xjalajix, ma ba bayalix c'aal ya sc'an. Jo'on ya cac'bey Sión te colele; ja' ya cac'bey Israel te cutsilale —xi' te Cajwaltique.

Isaías 46:11

La quic' jtul winic ta sloq'uib c'aal, te ya xtal ta c'ubul q'uinal. Jich bit'il ja'mal-mutetic te ya stsac sti'ic te chambalametique, jich ya xc'ot ta pasel te bitic chapal cu'une. Teme jich caloj, jich nix ya jpas; te bitic jchajbaneje, jich nix ya jc'otes ta pasel.

Génesis 15:1

Patil te Abram c'oponot yu'un Dios te chicnaj ta sit yilel, jich albot: —Ma xiwat, Abram, jo'on jcanantaywanejon awu'un, muc' me amajt'an ta bay nax c'alal —xi' sc'oplal.

Isaías 49:25

Te Cajwaltic ya yal te jich nix ya xc'ote: —Te c'ajc'al winique ya me xpojbot loq'uel ta sc'ab te bila yich'ojixe; te jtsalwaneje ya xpojbot loq'uel ta sc'ab te bila yich'ojix ta guerra. Jo'on me ya quil jba soc mach'a ya sc'an sleat yu'un ya yac'bat guerra; jo'on nix jtuquel ya jcoltaybat te anich'nabe.

Isaías 14:3

Ja'ex lum Israel, te Cajwaltic ya me yac'beyex acux awo'tanic yu'un te awocolique, te amel-o'tanic soc te tulan abatinel la awich'ic pasbeyele.

Isaías 44:1

“Aiybon awaiy yo'tic, Israel, lumat yu'un Jacob, cabatat te jtsaojate.

Jeremías 23:4

Ya cac'bey jcanantaywanej yu'un te ya scanantayic ta lec, swenta yu'un ma me ayuc xiwel ya yaiyic, ni ma me xch'ay jcojt'uc. Jo'on Ajwalilon, jich ya cal —xi'.

Jeremías 29:11

Ya jna' te bila jnopoj ta awentaic, ja' jnopoj ta swenta awutsilalic, ma ta swentauc awuts'inelic. Jich me ay bila t'ujbil ya amaliyic bael ta patil. Jo'on Ajwalilon, jich ya cal.

Jeremías 30:7

Ya me xnoptsaj tel sc'aalelal te mero xiweltic nax sbae; ma me ayuc jich sc'aalelal ya xc'ot yan a. Ja' me sc'aalelal te ya yaiy mel-o'tan te lum yu'un Jacob; ja'uc me to, ya me jcoltay.

Joel 2:21

Binuc nax me awo'tan, lumq'uinal, ma me xiwat, melel te Cajwaltic ay bitic muc' ya spas.

Isaías 49:12

Ilawilic, ya xtalic ta mero c'ubul q'uinal: ay ya xtalic ta stojol norte, ay ya xtalic ta stojol smalib c'aal, soc ay ya xtalic ta bay sq'uinal Asuán.

Daniel 12:1

“Ja' me yorail ya xchicnaj te Miguel, ja' te muc'ul jcanantaywanej ch'ul abat te ya scoltay te lum awu'une. Ja' yorail a te ay me bayal wocol, ma'yuc yan wocol jich c'oem ta pasel a te jayebix c'aal ay te nacionetique. Te c'alal ya sta yorail te jich ya xc'ot ta pasele, ya xcolic spisil te alumale, ja' te ts'ibubil sbiilic ta libro.

Oseas 2:20

Ya me quic' quinaminat, soc jun nax me co'tan ta atojol; jich yu'un te ja'ate ya me ana'bon jba te jo'on Awajwalone.

Oseas 6:11

Soc ja' nix jichat, Judá, la jleix te bi c'aalil ya cac'bat castigoe. “C'alal ya jc'an cac'bey slequilal te lum Israel cu'une,

Miqueas 4:9

Ta ora yo'tic, ¿bi yu'un jich ya x'awunat, jich bit'il ya x'awun ants yu'un xc'uxul te alajele? ¿Yu'un bal ma'yuc muc' ajwalil awu'un te ja'ate? ¿Yu'un bal chameniquix te jconsejeroetic awu'une?