Jeremías 3:21 - Bible in Tzeltal de Oxchuc y Tenejapa

²¹ “Ay c'opetic chican ta witstiquil ta jochol taquin q'uinal: Ja'ic te israeletic, te ya x'oq'uic ta sc'anel te yacuc xna'bot yo'bolil sbaique. Jowejic bael a ta bay toj be, soc la xch'ayon ta yo'tanic, jo'on te Ajwalilon te Dioson yu'unique.

Bible in Tzeltal Bachajón

²¹ Chicnaj aw ta toyol t'axal witsiltic, ha te oq'uel yu'un sc'anel coltayel te israeletic, como la showiytesic te be yu'unic, la sch'ay ta yo'tanic te Jehová, te Dios yu'unique.

Jeremías 3:21 Referans Kwoze

2 Corintios 7:10

Yu'un teme ya jmel co'tantic ta stojol te Diose, jich me ya yac' sujt'es co'tantic, soc tey me ya xcolotic a. Jich ma ba ya caiytic xan mel-o'tan ta patil. Yan teme ja' ya jmel co'tantic ta swenta nax te balumilale, ya yac'otic ta lajel stuquel.

Jeremías 31:9

Ya me xtal sc'opononic soc oq'uel. Jo'on ya quic' bael ta beja'etic soc ta pamal be, ta bay ma sc'ojch'in te yacanique. Melel jo'on Staton te Israele, soc te jnich'an Efraín, te ja' banquilale.

Jeremías 3:2

“Ilawil ta lec ta bay t'axalix te witsetique: ¿Ay bal junuc te banti ma ba la awac' aba ta c'oponel tey a? La anajc'an aba ta maliywanej jichuc árabe ta jochol taquin q'uinal, la anajc'an aba ta bay ti'be ta smaliyel mach'atic ya smulanat. La aboltesbon te lumq'uinal yu'un amulwej soc te bila amen la apase.

Jeremías 2:32

Te antse ¿ya bal xju' xch'ay ta yo'tan te xch'alil te ya yac' sba ta mulanel a? Ja'uc me to, te lum cu'une, mero c'ax bayalix c'aal te ch'ayon ta yo'tane.

Isaías 17:10

melel la ach'ay ta awo'tan te Dios te la scoltayate, ma la ana' te ja' anjibal awu'un te jun nax awo'tan tey a. Ja'at ya apas te yawil nichimetic te t'ujbile, ya ats'unbey snichimal ta swenta yich'jibal ta muc' te yan diose;

Isaías 15:2

Te yajwal lum Dibón ya xmo bael ta oq'uel ta templo yu'unic te ay ta ch'in witse. Te Moab ya smel yo'tan yu'un te la yich'ix jinel te lum Nebo soc te lum Medeba. Spisilic joxbil sjolic, joxbil yisimic.

Miqueas 3:9

Ajwaliletic soc jtsobwanejetic yu'un Israel, aiya me awaiyic stojol ta ora to. Te ja'exe ya awilayic te bila toj ta pasele; ja' ya ajinic spisil te bila toj aye.

Oseas 13:6

“C'alal la spas sobrail awe'elic te ja'exe, noj toybail ta awo'tanic yu'un, soc la ach'ayon ta awo'tanic.

Oseas 8:14

Israel ya spas palacioetic yu'un ajwalil; ja'uc me to, ya xch'ay ta yo'tanic te mach'a jpaswanej yu'une. Judá ya spas bayal ta jpam lumetic te tulanic sts'ajc'ule; ja'uc me to, ya cac'bey tiluc sc'aal te ya xtanub ta c'ajq'uel te muc'ul naetic yu'une —xi' te Cajwaltique.

Ezequiel 23:35

“Ja' yu'un jo'on Ajwalilon te jich ya cale: Melel la ach'ayon ta awo'tan soc la awalac'patiyon. Ja' yu'un ya me awil awocol ta castigo yu'un te la awac'bey awo'tan te mulile, soc te la awac' aba ta jmulawil antse —xi' te Cajwaltique.

Ezequiel 7:16

Manchuc me ay ya xcolic ta anel ta witstiquil, jich te bit'il ya xbajt' ta anel ta witstiquil yu'un xiwel te stsumutetique, pero spisil me ya xlajic ta scaj te smulique.

Proverbios 19:3

Te mach'a ma sna' q'uinal, ya xjowej ta be yu'un; pero ja' ya xba yac'bey smulin te Cajwaltique.

Proverbios 10:9

Te mach'a ma'yuc bila amen ya spase, ma'yuc bi ya xi'; yan te mach'a ma lecuc te yat'ele, ya me xlajinot yu'un.

Job 33:27

Jich me ya yal ta c'ayoj: “La jta jmul, la jpas te bila ma stojiluc, pero Dios ma ba la sc'an la yac'bon castigo yu'un stuquel;

Números 22:32

Ja'uc me to, te ch'ul abat yu'un te Cajwaltic jich la yal: —¿Bistuc la amaj oxeb buelta te aburrae? Jo'on te tal jmacat ta be, melel te yacat ta baele, ma jmulan.

Isaías 57:11

“¿Mach'atic a te diosetic te axi'oj soc te awich'oj ta muc', te ma tojuc awo'tan ta jtojol yu'une, soc te jc'axel la ach'ayon ta awo'tan yu'une? Te c'alal ma ba la awich'on ta muc', ma ba c'opojon, ma'yuc bila la cal yu'un.

Jeremías 7:29

Jerusalén, joxa loq'uel te stsotsil ajole, ch'oja bael. C'ajintaya mel-o'tan c'ayoj ta ch'in witsetic ta jochol taquin q'uinal. Melel te Cajwaltic ilinem ta stojol te awinictaque, la spijt'esix soc la xch'ojix bael ta yo'tan.

Jeremías 12:12

Spisilic te ch'in witsetic te jocholixe, talic j'ixta-winiquetic tey a. Melel jo'on Ajwalilon, ay puñal cu'un te ya jin a te lum ta xcha'jejch'el, soc ma me ayuc lamal q'uinal yaiy ni jtuluc.

Jeremías 13:25

Jich me ya xc'ot ta awenta, Israel, jich ya sc'an te ya jpasbate. Jo'on Ajwalilon, jich ya cal. Melel la ach'ayon ta awo'tan, ja' ba awac' smuc'ulin awo'tan te lotil diosetic awu'une.

Jeremías 18:15

Ja'uc me to, te lum cu'une ch'ayon ta yo'tanic, soc ya yac'bey pom te lotil diosetique. Jowejemic ta be, ja' te antiguo be, soc ja' st'unojic chujc'ul be te ma sna'beyic sbae.