Jeremías 23:25 - Bible in Tzeltal de Oxchuc y Tenejapa

²⁵ “Caiyojbey slotic te j'alwanejetic to te ya xjelawic, te ja' ya xc'opojic ta jwenta ta sc'opique, soc te la jc'opon ta swaichic ta sc'opique.

Bible in Tzeltal Bachajón

²⁵ Ca'iybeyej te bin ya yalic te jalwanejetique, ha te ya yalic lotil sc'op-jalwanej ta scuenta te jbihile. ¡Ay jwayich, ay jwayich! xchihic.

Jeremías 23:25 Referans Kwoze

Jeremías 23:32

Ya me cal ta jamal te ya jcontroin te j'alwanejetic to te ya xcholic slotil waichique; ta swenta te lotetic soc c'opetic te ya spasic te ya sjowtesbonic te lum cu'une. Ma'yuc bay jc'oponej, ni ma'yuc bay jticunej, ni ma'yuc bay calojbey mandal jtebuc, jich ma xju' yu'unic scoltayel te lume. Jo'on Ajwalilon, jich ya cal.

Joel 2:28

Jich ya yal te Cajwaltic: —C'alal ya xc'ax ta spisil te bitic la cale, spisil te ants-winiquetic ya me jmalbey ta stojolic te espíritu cu'une. Te aquerem-nich'nabic, te awantsil-nich'nabic ay me bi ya yalic ta jwenta, te mamaletic ay me bila ya swaichinic, te queremetic ay bitic ya x'ac'bot yilic ya yaiyic.

Jeremías 29:8

Jo'on Ajwalilon te Spisil ya xju' cu'une, te Dioson yu'un Israel, ya jultesbeyex awo'tanic: Ma me xawac' abaic ta lo'layel yu'un te lotil j'alwanejetic soc te mach'atic ay bila ya sna'ic yalel te ayic ta awolilique; ma x'awich'beyic ta muc' te ay swaichique.

Jeremías 23:28

Teme ay jtul j'alwanej ay swaich, ac'a yal te ay swaiche; teme yu'unix yaiyojbon te jc'ope, jich toj ta alel yu'un. Ma pajaluc soc taquin ac te trigoe. Te jc'ope jich bit'il c'ajc', soc jich bit'il martillo te ya swuy te tone. Jo'on Ajwalilon, jich ya cal.

1 Corintios 4:5

Jich yu'un, ma me xjelawex ta c'op te ja'exe, yu'un ma to sta sc'aalelal ta alel te bi yilel yat'el juju-jtule. Maliyaic te bi ora ya xtal te Cajwaltique. Ja' me ya yac' ta ilel ta jamalal ta saquil q'uinal stuquel te bila muquen aye, soc ya me yac' ta na'el te bila jnopoj ta co'tantique. Jich yu'un juju-jtulotic, ya me yalbotic lec jc'oplaltic te Diose.

Jeremías 8:6

Jun co'tan yacon ta yaiyel stojol; ja'uc me to, ma'yuc mach'a ya caiybey sc'op jtuluc te ya sujt'es yo'tan yu'un te bila amen soc te jamal nax yo'tan ya yal: ‘¿Bila a te jpasoje?’ te xiuque. Ta spisilic la st'unic bael ta animal te sbeique, jich bit'il caballoetic te tulan ya x'animajic ochel ta guerra.

Números 12:6

te Cajwaltic, soc jich albotic yu'un: —Aiya awaiyic stojol te bila ya calbeyex: Te c'alal ay jtul j'alwanej cu'un ta awolilic ja'ex, ya jc'opon ta swenta bitic ya cac'bey yil, soc ya jc'opon ta swaich.

Apocalipsis 2:23

Soc ya me quejch'entes ta lajel te yalataque. Jich me ya sna'ic stojol spisil jch'uunjeletic te jna'oj te bila snopoj ta sjolic soc ta yo'tanic. Jich me ya cac'bey stoj juju-jtul, chican bi yilel te yat'elique.

Hebreos 4:13

Melel te Diose, ma'yuc bila pasbil yu'un te ma chicanuc ta ilel ya yile. Spisil jamal ta ilel ya yil. Xujt' ma'yuc bila macal ta sit te Mach'a ya yich'botic ta wenta te cat'eltique.

San Lucas 12:3

Spisil bila awaloj ta ijc' q'uinal, ya me x'aiyot stojol ta saquil q'uinal. Melel te bila muquen la awal ta yutil anae, ja' me ya yich' awtayel ta sbaba naetic.

San Mateo 1:20

Te c'alal jich snopojix a te jich c'an spase, ta swaich chicnaj la yil jtul ch'ul abat yu'un te Cajwaltique. Jich albot yu'un: —José, te sts'umbalat Davide, ma x'axi' te ya awic' awinamin te Mariae, melel te bit'il ay yale, ja' ta swenta te Ch'ul Espiritue.

Jeremías 29:23

Jich nix ya xc'ot ta pasel, scaj te ma lecuc bitic la spas ta Israel: La spasic mulwej soc yinamic te spat-xujq'ue, soc la scuyic te jo'on ta jwenta te lotil c'opetic la yalic, te ma'yuc bay calojbey mandal ta yalel. Jo'on ya jna', soc ay ta co'tan. Jo'on Ajwalilon, jich ya cal”, xi'. Jich la yal bael ta scarta te Jeremiase.

Jeremías 16:17

Melel yacon ta yilel spisil te yat'elic, ma'yuc bila mucul ya xjil ta jtojol, ma xju' ya smuc smulic ta jsit.

Jeremías 14:14

Jich yu'un te Cajwaltic la sjac'bon te jc'ope: —Teme jich yacalic ta yalel ta jwenta te j'alwanejetique, yacalic ta lot abi. Ma'yuc bay jticunej, soc ma'yuc bay calojbey mandal, soc ma'yuc jc'oponej. Tojol nax ya yalic te ay bila cac'ojbey yil ta sc'opic, stuquel nax la slomic ta alel. Ja' ya yal te j'alwanejetic abi.

Jeremías 13:27

Quiloj te toyol awo'tan yu'un te mulweje, q'uexlaltic sba te awat'el yu'un te chijil jolobele, ma lecuc awat'el ta witstiquil soc ta aquiltic. Obol aba, Jerusalén. ¿Jayeb to c'aal ya xbolob bael te ac'oplale? ¿Jayeb to c'aal ya apasulay bael te bila ilaybile? —xi' te Cajwaltique.

Salmos 139:4

Te c'alal ma to xloc' ta que a te c'ope, ana'ojix a, Cajwal.

Salmos 139:2

ja'at ana'oj spisil te bitic ya jpase; manchuc me c'ubul ayon, pero ana'ojix a te bi ya yal te co'tane.

Génesis 37:9

Ta yan buelta waichej xan te José. La xcholbey yaiyic te sbanquiltaque: —Ay yan jwaich, aiya awaiyic stojol, ya calbeyex awaiyic. La quil la stinan sbaic ta jtojol te c'aal, te u, soc te bulucheb eq'uetique —xi'.

Génesis 37:5

Jun buelta waichej te José. La xcholbey yaiyic te sbanquiltac te bit'il ay te swaiche. Bayal to xan la yil-o'tantayic yu'un.

Jeremías 27:10

Te bila ya yalique, lotil me. Ja' nax ya yac'beyex ataic a te ya jyantesbeyex alumalique, soc te ya jpuquex bael te ya xlajexe.

Jeremías 27:15

Te Cajwaltic tulan ya yal te ma ja'uc la sticun tele; tojol c'opetic nax ya yalic ta swenta te Cajwaltique. Jich me ya slajinex spuquel bael te Cajwaltique. Ya me xlajex ja'ex soc te j'alwanejetic te la yalbeyex te c'ope —xon.

Lamentaciones 2:14

Te bila ac'bot yilic ta sc'opic te j'alwanejetic awu'une, ja' nax puro lo'laywanej la spasic a. Ma la yaq'uic chicnajuc te amule, te jichuque la ataic c'uxtayel. Tojol la yalbat te ay bila ac'bot yilic ta sc'opic; ja' nax la slo'layex a te la yac'beyex ach'uunique.

Ezequiel 22:28

Te j'alwanejetic yu'unic ya smuc ta yo'tanic te bila smelelile; ja' pajalic soc te mach'atic ya sbonic pajq'ue. Ya yalic te ay bila ac'bot yilic ta sc'opique. Te bila ya yalique, ma xc'ot ta pasel. Ya yalic ta jamal: “Jich la yal te Cajwaltique”, xiic. Pero te jo'one ma'yuc bila caloj.

Zacarías 13:3

“Teme ay mach'a ay bi ya yil ta sc'op, te ya yalbey sc'oplal, jich me ya x'albotic yu'un te sme'-state: “Ya me xlajat, melel ay bi ya awal ta lot, te ya awal te ja' ta swenta te Cajwaltique”, ya me yut. Ja' ni me te sme'-stat te ya x'ac'bot puñal yu'une, te bi ora yac ta yalel ta lot te ja' j'alwanej yu'un te Cajwaltique.