Jeremías 22:21 - Bible in Tzeltal de Oxchuc y Tenejapa

²¹ La jc'oponat jo'on ta yorail te yacat ta esmajel a; ja'uc me to, ma la awaiybon stojol jc'op.

Bible in Tzeltal Bachajón

²¹ La jc'oponat te c'alal ay bayel bintic ay awu'un, pero hich la awal: ¡Ma ba ya ca'iy! xchihat. C'alal ta aqueremil hich ay te atalele, mayuc bin ora la awa'iybon te jc'ope.

Jeremías 22:21 Referans Kwoze

Jeremías 32:30

Xjajch'ibal nix tel a, te lum Israel soc te lum Judá spasojic nix tel a te bila ma smulan co'tane; te israeletic ma ba yijq'uitayej ta sbolc'optaybelonic ta swenta te yajcananic te ja'ic nix spasoj stuquelique. Jo'on Ajwalilon, jich ya cal.

Jeremías 3:25

Ac'a me jpejc'an jbatic yu'un q'uexlal jiche, ac'a me spotsotic te jq'uexlaltique. Melel ja' to ta calaliltic soc asta c'alal ora yo'tic, te jo'otic soc te jme'-jtatic jtaoj jmultic ta stojol Cajwaltic te Dios cu'untique, soc ma ba jch'uunejbeytic sc'op —xiic ta yalel.

Isaías 48:8

Te ja'exe ma'yuc bay awaiyojbeyic sc'oplal ta alel, ni ma ba ana'ojbeyic sba, melel macal te achiquinique. Jo'on jna'oj te ma tojuc awo'tanic ta jtojol, soc te atalel jc'axin-c'opex te c'alal ma to x'ayinex ae.

Proverbios 30:9

Melel teme ya spas sobrail, repente ya xch'ayat ta co'tan yu'un, ya niwan cal te ma jna'bat abae. Yan teme ayon ta wi'nal, ya niwan caiy elec' yu'un; soc jich ya jbolc'optaybat te ach'ul-biile.

Ezequiel 20:8

‘Pero ja'ic stuquelic ma ba la sc'an la yich'onic ta muc', ma la sc'an yaiybonic jc'op. Ma ba la xch'ay ta yo'tanic te bitic ilaybil sba cuybilic ta Dios yu'unique, soc ma ba la xch'ayic jilel te loc'ombaetic yu'un te egipcioetique. Jo'on la jnop ta co'tan te ya jt'omes bael quilimba ta stojolic, jich ya cac'bey castigo ta stojolic ta Egipto, asta ja' to teme lamaj te sc'ajc'al co'tan ta stojolique.

Jeremías 35:15

Spisil ora la jticunbeyex ta atojolic spisil j'alwanejetic te abatetic cu'une, swenta yu'un ya yalbeyex te yacuc awijq'uitayic te amen awo'tanic soc te amen at'eliletique. Soc te manchuc ya xbaex ta stojol te lotil diosetique, te ma xaquejan abaic ta stojole, te jich ya xju' xcuxinex bael ta bay lumq'uinal te cac'ojbeyex soc te antiguo ame'-atatique. Ja'uc me to, te ja'exe ma la awich'ic ta muc', ni ma la ach'uunic.

Jeremías 6:16

Te Cajwaltic jich ya yalbey te lum yu'une: —Tejc'ana abaic ta bebetic soc ilawilic, jojc'oic te namey biq'uit beetique, ja' te banti lec xan te be; t'unaic bael, tey me ya acux awo'tanic a —xi'. Ja'uc me to jich la yalic: —Ma jc'an jt'untic bael —xiic.

Ezequiel 20:28

Te c'alal la cac' ochel ta lumq'uinal te la cal ta jamal te ya cac'beye, yacalic to nax ta yilel a te toyol tselelique soc te muc'ul te' te bayal yabenale, tey la yaq'uic a te milbil majt'anil yu'unic, te mero ilaybil cu'une. Tey la yaq'uic bitic bujts'an yic', soc tey la smalic a te majt'anil vino yu'unique.

Ezequiel 20:21

‘Pero te yal-snich'nabique, ja' nix jich la stoy sbaic ta jtojol. Ma ba la xch'uunbonic te mandaliletic cu'une, te ya yac'bey xcuxlejal te mach'a ya spas baele. La sboltesbey te sc'aalelal cux-o'tan cu'une. La jnop ta co'tan te ya jt'omes bael ta stojolic te quilimba, yu'un c'an jlajin ta jc'axel ta jochol taquin q'uinal, swenta yu'un jich ya xlamaj a te sc'ajc'al co'tane.

Ezequiel 20:13

Pero la stoy sbaic ta jtojol ta jochol taquin q'uinal, ma ba la xch'uunbonic te mandaliletic cu'une. La xch'ayic te mandaliletic la cac'bey yu'un ya sta xcuxlejal sc'oplal a te mach'a ya xch'uun spasele. Jc'axel la sboltesbon te sc'aalelal cux-o'tan cu'une. Ja' yu'un te jo'on la jnop ta co'tan te ya jt'omes bael ta stojolic te quilimbae, c'an jlajin ta jc'axel tey ta jochol taquin q'uinale.

Jeremías 2:31

(Ja' nix jichex, te jcaj alnich'anex ayex ta q'uinal ta ora to, aiybeya awaiyic stojol sc'op te Cajwaltique.) Israel, ¿yu'un bal jochol taquin q'uinalon ta atojol? ¿Jich bal acuyojon te bit'il q'uinal te nojel nax yu'un te ijc' q'uinale? Lum cu'un, ¿bi yu'un ya awal: “Ayotic ta libre; mero ma sujt'otiquix bael ta atojol”, te xaate?

2 Crónicas 33:10

Te Cajwaltic la sc'opon te Manasés soc te lum yu'une, pero ma la yich'bey ta muc'.

Deuteronomio 31:27

Melel jna'oj te ja'ex te mero toyba lumexe, te mero tulan ya awac' abaique. Ora te cuxulon to ta awolilique, ya atoy abaic ta stojol te Cajwaltique. Ja'uc to balix a te c'alal ya xlajonixe, ¿bi wan awilelic ya x'ainex?

Deuteronomio 9:24

¡Ja' to te c'alal la jna'beyex abaique, spisil ora tulan awac'oj abaic ta stojol te Cajwaltique!

Deuteronomio 9:7

“Ya me sc'an te ma xch'ay ta awo'tanic te la awac' ilinuc yo'tan ta jochol taquin q'uinal te Cajwaltic te Dios cu'untique. Te c'alal loq'uex tel ta Egipto, ja' to te julex tel li'to, spisil ora ya atoy abaic ta stojol.

Salmos 129:1

Bayal buelta ay mach'atic la yac'boniquix jwocol, c'alal to ta jqueremil jajch' yac'bonic jwocol, ac'a yalic te israeletique

Jeremías 3:24

Te loc'ombaetic te q'uexlaltic sbae, ja' la xch'aybotic te bi la staic te jme'-jtatic, ja' to c'alal alalotic to ae: ja' te chijetic soc wacaxetic, soc te yal-snich'nabique.

Jeremías 13:10

Ja' in lum to te amen yo'tane ma sc'an xch'uunbon te jmandale, q'uejel yac'oj sbaic bael soc stulanil te yo'tanique. Bajt'ic ta stojol lotil diosetic, yac'oj sbaic ta abatinel yu'un soc ta xch'uunel. Pajalic soc te xchujq'uil ach'ujt' te ma'yuquix yutsil ta jyalele.

Jeremías 19:15

—Te Cajwaltic te Spisil ya xju' yu'une, te Dios yu'un Israel, ya yalbeyex: “Ya jticunbey tel spisil castigo ta stojol te alumal soc spisil te lumetic nopol ayic te la calbeyix sc'oplale. Melel tulan yac'oj te yo'tanique yu'un ma la yich'bonic ta muc' te jc'ope”, xi' me te Cajwaltic —xi' te Jeremiase.

Jeremías 48:11

Moab lamal nax q'uinal la yaiy spisil ora, ma'yuc bay baem ta mosoil ta yan lum. Jich c'oem te bit'il vino te ya sts'ab sba ta yawil, te ma'yuc bay yich'oj aq'uel ta yan yawil, te jich ma xch'ay sbujts', ni ma xch'ay yic'.

Zacarías 7:7

¿Ma bal ja'uc nix jiche te c'opetic te la yal te Cajwaltic ta swenta te antiguo j'alwanejetic, te c'alal lamal q'uinal ta Jerusalén a, soc te nojel ta ants-winiquetic, soc ja' nix nojel a te yantic lumetic te ayic ta sjoyobal, soc jich nix te sq'uinal Néguev soc te peq'uel witstiquile?

Jeremías 2:25

“Israel, ma me x'alajin awacan soc ma me xawac' xtaquinaj anuc' yu'un snutsel yantic diosetic. Pero ya awal: “Ma'uc. Ma xju' ya sujt'on ta jpat. Mero ya jmulan te yantic diosetic; ya to me jle xan”, xaat.

Jeremías 25:3

—C'alal to ta yoxlajunebal ja'wil yat'el ta ajwalil a te Josías te snich'an Amón ta Judá asta ora yo'tic, ja' te ayix oxeb xcha'winic ja'wil, te Cajwaltic la sc'oponon. Ta jujun buelta la calbeyex awaiyic te ja'ex ta jujun buelta; ja'uc me to, ma la awich'bonic ta muc'.

Jeremías 25:4

Manchuc teme bayal buelta la sticun te yabat te j'alwanejetic yu'une, te ja'exe ma'yuc bay la awich'ic ta muc', ni ma la ac'an la awaiyic stojol, soc ni ma la ach'uunic.

Jeremías 25:7

Ta ora yo'tic te Cajwaltic ya yal: “Te ja'exe ma x'ac'an awich'bonic ta muc' te jc'ope; ya awac' ilinuc co'tan yu'un te ach'uunejic lotil diosetic te ja'ex nix la apasique. Jich me ya xtal te bila amen ta atojolique”, xi'.

Jeremías 25:8

“Jich yu'un, ya yal te Cajwaltic te Spisil ya xju' yu'une: “Te bit'il ma la awich'bonic ta muc' te sjultesjibal awo'tanic cu'une,

Sofonías 3:2

Ma la ach'uunbey sc'op te Cajwaltique; ma la awich' ta muc' te tojtesel yu'une. Ma la smuc'ulin awo'tan; ma ba baat ta stojol te Dios awu'une.