Jeremías 21:7 - Bible in Tzeltal de Oxchuc y Tenejapa

⁷ Patil ya cac' ta c'abal te Sedequías, te muc' ajwalil yu'un Judá. Ja' ya cac' ta sc'ab te Nabucodonosor soc te yantic scontrotac te jmilawaletique te ja' nix sjo'tac ta ajwalil, soc te soldadoetic yu'une. Te alumal te cuxulic to ya xjilic ta lum ta patil teme c'axemix a te chamel te ya xmilawane, te guerra soc te wi'nale, jo'on ya cac' te ya xmilotic ta puñal, ni ma'yuc xc'uxtayel, ni ma me ayuc ta na'beyel yo'bolil sba. Jo'on Ajwalilon, tulan ya cal’, xi me”, uta me.

Bible in Tzeltal Bachajón

⁷ Ta patil, xchi te Jehová, ya cac' ta c'abal te Sedequías ajwalil yu'un Judá, te a'batetic yu'un soc te mach'atic cuxul hilic yu'un te jmilawal-chamel, te espada soc wi'nal, ya cac' ta sc'ab te Nabucodonosor ajwalil yu'un Babilonia, ta sc'ab te scontratac te ya slehbe scuxlejalic. Ha ya smilticlan ta espada; ma ba ya spasbe perdón, ma ba ya sc'uxultay, ma ba ya sna'be yo'bolil sbahic.

Jeremías 21:7 Referans Kwoze

Jeremías 37:17

Te muc' ajwalil Sedequías la yal mandal ta iq'uel tel ta spalacio te Jeremías. C'alal c'otix ta stojol a, te muc' ajwalil la sjojc'obey ta muquen: —¿Ay bal yaloj sc'op te Cajwaltique? —xi'. Te Jeremías la sjac': —Ay, ja' in to: “Ja'at muc' ajwalil, ya x'ochat ta sc'ab te muc' ajwalil yu'un Babilonia” xi' me —la yut.

Ezequiel 7:9

Ma ba ya xtalix xc'uxul co'tan, ma'yuquix perdón ta atojol. Te bila beil at'unoje, ja' ni me ya xc'ot ta awenta. Ya me xc'ot ta awenta te bila ilaybil sba la apase. Ya me ana'ic te jo'on Ajwalilon te ya cac'beyex castigo.

Jeremías 13:14

Ta ora nax ya me jwuy jichuc oxometic, ya me cac' swuy sbaic ta stuquelic nax, tatiletic soc nich'aniletic pajal me. Ma ba ya jna'bey yo'bolil sbaic; ni ma me ayuc xc'uxul co'tan soc slequil co'tan ta stojolic. Jo'on Ajwalilon, jich ya cal’, xi' me”, uta me —xi' te Cajwaltique.

Deuteronomio 28:50

Winiquetic te xiweltic sba stalelic, te ma'yuc sc'oplal yu'unic me'el-mamaletic, soc ma sna'beyic yo'bolil sba alaletic.

Ezequiel 9:10

Ja' yu'un, ma ba ya jna'bey yo'bolil sbaic, ya me quich'bey ta wenta soc te bi yilel yat'el la spasique —xi'.

Ezequiel 8:18

Pero ya me x'at'ejon soc te quilimbae, ma me ba ya jna'bey yo'bolil sbaic ta jc'axel. Manchuc me ya sc'opononic ta aw, pero ma ba ya jac'bey te sc'opique —xi' te Cajwaltique.

Isaías 47:6

C'alal ilinon ta stojol te lum cu'une, la cac' ta q'uexlal, la cac' ochuc ta ac'ab. Te ja'ate ma la ana'bey yo'bolil sbaic, soc la awac'bey ta stojol mamaletic te yalal yugo-te' awu'une.

Isaías 27:11

Te sc'ab te' ya yich' c'asel coel te c'alal ya xtaqueje; jich yu'un te antsetic ya stsobic, soc ya spas sc'ajq'uic a. Jich te lum te ma'yuc sp'ijile. Jich yu'un te Mach'a chicnantesot yu'une, ma sna'bey yo'bolil sba yu'un; te Mach'a pasot yu'une ma xc'uxtay.

Jeremías 15:5

“¿Mach'a c'an sna'bat yo'bolil aba, Jerusalén? ¿Mach'a c'an sna'bat ac'uxul te ja'ate? ¿Mach'a c'an smel yo'tan yu'un te ayat ta chamele?

Jeremías 15:9

Te me'iletic bayal yalatac ya xcom q'uinal yaiyic, ma xyich'iquix ic'; ya xq'uexawic soc ya xpejc'ajic, te xojobil c'aal ya sujtp'ej ta ijc' q'uinal ta stojolic. Teme ay to mach'a cuxul ya xjilique ya me cac' milotuc yu'un te scontroique. Jo'on Ajwalilon, ya cal te jc'ope —xi'.

Jeremías 22:25

swenta yu'un ya cac'at ta sc'ab te acontrotac te jmilawaletique, te bayal ya axi'e. Ya cac'at ta sc'ab Nabucodonosor te muc' ajwalil yu'un Babilonia, soc te caldeoetic te ja' nix te swinictaque.

Jeremías 27:6

Lec ay jiche, ta spisil te balumilal jo'on cac'ojbey ta swenta te cabat Nabucodonosor, te muc' ajwalil yu'un Babilonia, asta te ja'mal chambalametic, la cac'bey swenta yu'un ya yabatin.

Jeremías 34:3

Te ja'ate ma xju' xcolat loq'uel ta sc'ab, ya me xchucat soc ya me x'ac'otat ta stojol. C'alal ya xlaj yo'tan te ya stejc'anat ta stojol, ya me yic'at bael ta Babilonia.

Ezequiel 23:28

“Jo'on Ajwalilon te jich ya cale: Ya me cac'at ta sc'ab yantic nacionetic, ja' te yantic nacionetic ilaybil awu'une, soc te ilaybil sba ta asite.

Jeremías 14:12

Manchuc teme bayal ya spas ayuno yu'un, ma ba ya quich'bey ta wenta te ya sc'anbonic coltayele. Manchuc me bayal chic'bil majt'anil ta scojt'ol soc te ya yac'bonic majt'anil harina ya yich'bonic tel, ma ba ya jtsacbey sc'op yu'un. Ya me jin ta guerra, ta wi'nal soc te chamel ya xmilawane —xi' te Cajwaltique.

Jeremías 19:7

Tey ta bay lum to ya jinbey ta jc'axel te bila xchapoj te Judá soc te Jerusalén. Ya me cac' tsalotuc yu'un te scontrotac soc te ya xmilotic yu'une. Te sbaq'uetalic ya me xti'ot yu'un te xulemetic soc te jti'awal chambalametique.

Jeremías 20:4

Melel te Cajwaltic ya yalbat: “Ya me cac' te ja'at nix ya axiwtes aba atuquel soc ta spisil te ajo'taque. Ta mero asit atuquel, te ajo'tac ya me xlajic ta spuñal te scontrotaque. Ya me cac' ta c'abal spisil yajwal te Judá ta sc'ab te muc' ajwalil yu'un Babilonia, te ya x'ic'otic bael ta Babilonia, o teme ya xlajic ta milel ta cuchillo.

Jeremías 32:4

Te muc' ajwalil Sedequías ma xju' ya scoltay sba ta sc'ab te caldeoetique, ya me x'och ta sc'ab te muc' ajwalil yu'un Babilonia, ya me stejc'an sba ta stojol.

Jeremías 36:29

Soc jich me ya awalbey: “Jich ya yalbat te Cajwaltique: ‘Ja'at la achic' te balbil june, soc la awut te Jeremías, te la sts'ibuy tey a te ya me xtal te muc' ajwalil yu'un Babilonia, ma me scom sba te ya xtal sjin te lumq'uinal, ma me ayuc ants-winiquetic ya yijq'uitay jilel, ni chambalametic.

Jeremías 50:17

“Te Israel jich c'oem te bit'il chij te ch'ayeme, te nutsbil ta jyalel yu'un te león-chojetique. Ta sbabial ja' la sti'bey sbaq'uetal c'oem te muc' ajwalil yu'un Asiria; ta patil te muc' ajwalil yu'un Babilonia, ja' la snulbeyix ta c'uxel c'oem te sbaquele.

Lamentaciones 2:20

Cajwal, nopa awaiy, melel ma'yuc mach'a apasojbey jich bit'il in to. ¿Lec bal te ya sti' yalatac te me'eletic te ya to xchu'unique? ¿Lec bal te ya yich'ic milel ta ch'ul templo awu'un te sacerdoteetic soc te j'alwanejetique?

Lamentaciones 2:22

La awac' tel bitic chujc'ul ta bayuc, yacalic ta talel ta il-q'uin yilel. Cajwal, ta sc'aalelal awilimba ma'yuc mach'a col jtuluc. Te mach'atic muc'ub cu'un soc te la jp'ijubtese, laj ta milel yu'un jcontro.