Jeremías 11:10 - Bible in Tzeltal de Oxchuc y Tenejapa

¹⁰ Ja' nix ya xcha'pasic te muliletic te neel la spasic te antiguo sme'-statique, ja' te mach'atic ma la sc'an xch'uunbonic jc'op, bajt'ic ta xch'uunel te lotil diosetique. Ta Israel, jich bit'il ta Judá, la xc'axintaybonic te trato la jchap soc te antiguo sme'-statique.

Bible in Tzeltal Bachajón

¹⁰ Suhtemiquix bahel ta spasel te bintic chopol la spasic te sme'static, te mach'atic ma ba la sc'an la ya'iybonic te jc'ope. La st'unic bahel yantic diosetic yu'un ya yac' sbahic ta a'batinel yu'unic. Te sna Israel soc te sna Judá la sc'axuntaybonic te chapbil-c'op la jchap soc te sme'statique.

Jeremías 11:10 Referans Kwoze

Deuteronomio 31:16

Te Cajwaltic jich la yalbey te Moisés: —Nopolix ya xlajat. Te lum in to ya me xc'ax bolob ta jc'axel ta swenta te xch'uunel diosetic yu'un te yantic lumq'uinaletic te ya xba yich'e. Jich me ya xch'ayon ta yo'tanic, ya me sjinic te trato jpasoj soque.

Ezequiel 16:59

“Jo'on Ajwalilon te jich ya cale: Ya me cac'bat te bila snujp' te awat'ele. Melel ma ba la apas te bila jc'axel awaloje, ma ba la apas te bila trato la jpastique.

1 Samuel 15:11

—Ma lecuc ya caiy te ja' och ta muc' ajwalil te Saúl. Melel la spijt'esix sba, ma ba la xch'uunbon te bi la calbey spase —xi'. Te Samuel mero ma ba lec la yaiy, sjunal ajc'ubal la yalbey bayal wocol te Cajwaltic yu'une.

Jueces 2:19

Ja'uc me to, te c'alal ya xlaj te juez, ya xcha'boltes sbaic xan, ja' c'axem to xan jelawen la spasic a te bit'il sme'-statique. La xch'uunic soc la yac' sbaic ta abatinel yu'un loc'ombaetic te scuyojic ta diosetique. Ma la yijq'uitayic te bi snopojic spasel soc te sbolil yo'tanique.

Jueces 2:17

Ja'uc me to, te israeletic ma la yich'ic ta muc' te juecetique. Jc'axel chebaj yo'tanic ta stojol Cajwaltic, la xch'uunic loc'ombaetic te scuyojic ta diosetique. Te antiguo sme'-static la xch'uunbeyic te mandaliletic yu'un Cajwaltic; yan stuquelic ma ja'uc la snopbeyic te yo'tanique.

Hebreos 8:9

“Ma pajaluc soc te trato la jpas soc te neel me'il-tatiletic yu'unique, te c'alal bi ora la jnit loq'uel tel ta sc'abic ta sq'uinal Egipto. Melel ma jc'axeluc la yich'bonic ta muc' te trato la jpase, jich yu'un te jo'one la quijq'uitay ta co'tan”, xi' te Cajwaltique.

Sofonías 1:6

Ja' nix jich ya jlajin te mach'atic ya xchebaj yo'tanic ta jtojole, te mach'atic ma ba ya sleonic soc ma xnoptsajic tel ta sjojc'oyel te jc'ope —xi'.

Oseas 6:7

“Ja'uc me to, te lum cu'un pajal soc Adán, la xc'axintayic te trato cu'un soc ma junuc yo'tanic ta jtojol.

Ezequiel 44:7

Ja'ex ya aboltesic te templo cu'une, melel ya awaq'uic ochel jyanlumetic tey a. Ja'ic te ma ba yich'ojic te marca yu'un te trato cu'une, ma'yuc ta yo'tanic ni ta sbaq'uetalic yich'ojic. Ya sjinbeyic sc'oplal, melel ya awac'bonic jwe'elin te xepuil soc te xch'ich'el te milbil majt'anile. Jich ya ajinbonic a te trato cu'une, ta scaj te mero ilaybil sba awat'elique.

Salmos 78:57

Melel ja' nix jich la spasic te bit'il sme'-static, la yijq'uitay, ma ba jun yo'tanic ta stojol. Jich la scox sba c'oemic te bit'il t'imalte' te ma tojuque.

Deuteronomio 9:7

“Ya me sc'an te ma xch'ay ta awo'tanic te la awac' ilinuc yo'tan ta jochol taquin q'uinal te Cajwaltic te Dios cu'untique. Te c'alal loq'uex tel ta Egipto, ja' to te julex tel li'to, spisil ora ya atoy abaic ta stojol.

Levítico 26:15

teme ya ach'ayic soc teme ma'yuc sc'oplal awu'unic te bitic chapal cu'une, soc teme ma ba la awaq'uic c'otuc ta pasel te mandaliletic cu'une, jich me ma'yuc ta wenta c'ot awu'unic a te trato cu'une.

Zacarías 1:4

Ma me jichuc xapasic te bit'il te antiguo ame'-atatic te albotic yu'un te antiguo j'alwanejetic cu'un, te yacuc yijq'uitayic jilel te amen yo'tanic soc te amen yat'elique. Pero ma ba la sc'an la yaiybonic te jc'ope, soc ma ba la yich'bonic ta wenta. Jo'on Ajwalilon, ya cal ta jamal.

Oseas 7:16

Ja' bajt' yo'tanic ta sc'oponel te yajcananique. Jich c'oemic te bit'il t'im te ma tojuque, te yat'ejibal ma xc'ot te bay stojlineje. Ta scaj te puro ixta c'op ya yalique ya me xyalic te ajwaliletic yu'unic ta swenta puñal, soc ya me stse'luyotic ta Egipto.

Oseas 6:4

Ya yal te Cajwaltique: —¿Bi me ya jpas ta atojol, Efraín? ¿Bi me ya jpas ta atojol, Judá? Te xc'uxul awo'tanic ta jtojole jich c'oem te bit'il sjab lumq'uinal ta sacubele, soc jich c'oem te bit'il ts'ujul ta ijc' to q'uinal te sab ya xch'ay c'axele.

Jeremías 31:32

Te trato ya jpase, ma jichuc te bit'il la jpas soc te antiguo sme'-static, c'alal la jtsacbey tel sc'abic te la jloq'ues tel ta Egipto. Melel ma la sc'otesic ta ch'uunel te trato cu'une, manchuc teme jo'on yajwalonique. Jo'on Ajwalilon, jich ya cal.

Jueces 2:11

Te israeletic la spasic bi amen ta sit te Cajwaltic, ja' te bit'il jajch'ic ta xch'uunel loc'ombaetic yu'un Baal.

Jeremías 7:28

Albeya: “Ja' in nación to ma xch'uunbonic jc'op jo'on te Ajwalilon te Dioson yu'une, ni ma sc'anic tojtesel. Te stojil yutsil yo'tanique ch'ay c'axel ta yeic ta jyalel”, uta me —xi' te Cajwaltique.

Jeremías 9:6

Te Cajwaltic jich ya yal: —Yantic nax te uts'inele, yantic nax te lote. Te lum cu'un ma sc'an sna'bonic jba.

Jeremías 13:10

Ja' in lum to te amen yo'tane ma sc'an xch'uunbon te jmandale, q'uejel yac'oj sbaic bael soc stulanil te yo'tanique. Bajt'ic ta stojol lotil diosetic, yac'oj sbaic ta abatinel yu'un soc ta xch'uunel. Pajalic soc te xchujq'uil ach'ujt' te ma'yuquix yutsil ta jyalele.

Jeremías 17:23

Ja'uc me to, ma la sc'an yich'bonic ta muc' te jc'ope. Tulan nax la yac' sbaic bael, ma la sc'an la xch'uunic, ni ma ba tojobic a.

Jeremías 44:5

Ja'uc me to, ma la ach'uunbonic jc'op, ni ma la awich'ic ta muc'. Ma ja'uc la awijq'uitayic te bila amene; ja' la awat'elinic yac'beyel pom te lotil diosetique.

Jeremías 44:16

—Ma xquich'tic ta muc' te c'op la awich'botic tel ta swenta te Cajwaltique.

Ezequiel 5:6

Pero te yajwal la stoy sbaic, ma ba la xch'uunic spisil te mandaliletic cu'une, c'axem jich amenic a te bit'il te yantic lumetic ayic ta sjoyobale, melel la sp'ajic spisil te mandaliletic cu'une, soc ma la xch'uunbonic spasel.

Zacarías 7:11

Pero te ants-winiquetic ma ba la sc'an xch'uunic. La swalac'patiyic te Diose, jich la spas sbaic te bit'il ma x'och c'op ta xchiquinique.

Zacarías 7:13

Jich la yal: —Jich te bit'il ma ba la sc'an la yaiybonic te jc'op te c'alal la quiq'ue, ja' nix jichon uuc, te c'alal ya sc'opononique ma ba ya jac'beyic.

Isaías 24:5

Te balumilal boloben yu'un te mach'atic nainemic tey a, melel la yijq'uitayic ta pasel te mandaliletic, la xc'axintay ta spisilic, la xch'ayic ta ch'uunel te trato te ay ta sbajt'el q'uinale.

Jeremías 22:9

Ya me yalbey sbaic: “Melel la yijq'uitayic te trato ac'bot yu'un te Yajwalic te Dios yu'unique, soc la squejan sbaic ta stojol soc la xch'uunic te lotil diosetique”, xiic me —xi' te Cajwaltique.