Jeremías 10:10 - Bible in Tzeltal de Oxchuc y Tenejapa

¹⁰ Te Cajwaltique, ja' te Dios ta melele, Cuxul Dios stuquel, Muc' Ajwalil sbajt'el q'uinal. Te c'alal ya x'iline, ya xnijc' yu'un te lumq'uinale; te nacionetique ma xcujch' yu'un te yilimbae.

Bible in Tzeltal Bachajón

¹⁰ Yan te Jehová ha Dios ta melel, ha cuxul Dios soc Muc'ul Ajwalil scuenta sbahtel q'uinal. Ya xnihc te lumq'uinal c'alal ya x'ilin, te nacionetic ma xcuhch yu'unic te yilimbahe.

Jeremías 10:10 Referans Kwoze

Deuteronomio 32:4

Ja' Jcanantaywanej cu'untic, mero lec yat'el stuquel, mero toj spisil te bitic ya spase. Ja' Dios te jun yo'tan ta jtojoltic, ma'yuc lo'laywanej ta yo'tan; ¡mero stojil ya x'at'ej, mero lec stuquel!

Isaías 57:15

Melel te Mach'a toyole, ja' te mach'a stalel cuxule, te Ch'ul Dios, xi' sbiil, jich ya yal: —Jo'on nainemon ta jun toyol awilal te ch'ultesbile; ja'uc me to, joinej te mach'a peq'uel soc te mach'a ay swocol ta mel-o'tane. Ya cac'bey sbujts' yo'tan soc ya xjam q'uinal yaiy.

Salmos 76:7

Mero xi'bilat atuquel. ¿Mach'a ya xju' yu'un ya stejc'an sba ta atojol te c'alal ya xtil jajch'el sc'ajc'al te awo'tane?

Nahúm 1:6

¿Mach'a ya xju' yu'un te ya stejc'an sba ta stojol te yilimbae? ¿Mach'a ya xcujch' yu'un te sc'ajc'ale? Te sc'ajc'al yo'tan ya me spuc bael jichuc c'ajc', ya me xjat yu'un te muc'ul tonetique.

Salmos 42:2

Taquin co'tan ta stojol Dios, ja' te Dios yu'un te cuxlejale. ¿Bi wan ora ya xtalon xan te ya jtejc'an jba ta stojol te Diose?

Salmos 100:5

Melel te Cajwaltic mero lec yo'tan stuquel. Te xc'uxul yo'tane sbajt'el q'uinal ay; soc te bit'il jun yo'tan ta jtojoltic, ma'yuc slajibal yu'un.

Apocalipsis 20:11

La quil ay mero muc'ul saquil nactijibal te ay mach'a nacal tey a. Loc' bael ta anel ta stojol te ch'ulchan balumilale, ma ba wejt' xan yawilic ta banti ya x'ainique.

Salmos 31:5

Ya cac'bat ta ac'ab te jch'ulele; coltayawon, Cajwal, te Diosat ta melele.

Salmos 10:16

Te Cajwaltique Muc' Ajwalil sbajt'el q'uinal; te mach'atic ma'yuc ta stojol Dios, ya xch'ayic bael ta stojol.

Salmos 18:7

Jich a tal tulan nijq'uel ta balumilal: te witstiquil nijq'uic c'alal ta snactijibic; yuq'uilayot yu'un yilimba te Cajwaltique.

1 Juan 5:20

Jna'ojtic stojol te xtaluc ta balumilal te Snich'an Diose. Ja' la yac'botiquix jna'tic q'uinal swenta yu'un jich me ya jna'beytic sba te Mach'a Smelelile. Jich jun ayotiquix ta bay te Mach'a Smelelile, ja' bi, ja' te Jesucristo te Snich'an Diose. Ja' mero cuxul Dios stuquel, soc ja' cuxinel sbajt'el q'uinal.

Hebreos 10:31

¡Xiweltic sba ta c'axem to xan teme ipajotic ta sc'ab te cuxul Diose!

1 Timoteo 1:17

Jich yu'un, ac'a ich'otuc ta muc' te muc' Ajwalil sbajt'el q'uinal, te stalel cuxul stuquel, te ma chicanuc ta ilel, te ja' nax Dios stuquel, soc te ay yutsilal ta sbajt'el q'uinal stuquel. Jichuc.

1 Tesalonicenses 1:9

Ja'ic nix te ya yalbeyex ac'oplalic te bin nax awo'tanic la anajc'anotic te c'alal julotic ta atojolique, soc ora nax la awijq'uitayic xch'uunel te loc'ombaetique. La asujt'es awo'tanic ta stojol te Diose, soc ja' la awac' abaic ta abatinel yu'un te mero cuxul Diose.

Hechos 14:15

—Winiquetic, ¿bistuc te jich ya apasique? Melel te jo'otique winicotic uuc jich te bit'ilexe. Ja' tal calbeyex te ya awijq'uitayic ta pasel te bila xujt' ma'yuc stuule soc te ya asujt'es awo'tanic ta stojol te cuxul Dios te ja' la spas te ch'ulchane te balumilale te mare soc spisil te bitic ay tey a.

Malaquías 3:2

Ja'uc me to, ¿mach'a ya xcujch' yu'un te bi c'aalil ya xtale? ¿Mach'a ya xju' yu'un te stalel teq'uel ya xjile? Melel jich ya xjul te bit'il c'ajc' te ya slecubtesotic, jich bit'il xapon te ya sloq'uesbotic sbolil te co'tantique.

Habacuc 3:6

Te lumq'uinal ya xnijc' te c'alal ya xcom ta beele; ya xcajic ta nijq'uel te nacionetic te c'alal ya x'ilot yu'une. Te muc'ul witsetic ya xjemic coel; ya xch'ayic bael te antiguo witsetique. Yan te beetic yu'un Dios sbajt'el q'uinal ayic stuquel.

Miqueas 1:4

Ta yet'al yacan ya x'ulub coel te witstiquil, jich bit'il chabec' te ya slac' te c'ajq'ue. Soc ya me xjat bael te q'uinale, cha'jat ya xc'ot, jich bit'il ya xjat bael lum yu'un yip snojel ja'.

Salmos 146:6

Ja' la spas ch'ulchan, balumilal, soc mar, soc spisil te bitic aye. Melel te bila ya yal, ya xc'ot ta pasel.

Salmos 145:13

Te awat'el ta ajwalil sbajt'el q'uinal ay; te wentainel awu'un sbajt'el q'uinal stuquel.

Salmos 114:7

Ja'at lumq'uinal, nijc'an me ta stojol te Cajwaltic te Dios yu'un Jacob.

Salmos 104:32

Te balumilal ya xnijc' te c'alal ya yil stuquele; ya yac' loc'uc ch'ail ta witstiquil te c'alal ya stij stuquele.

Salmos 97:4

Te tsantsewaletic yu'un, ya sacubtes balumilal; te c'alal ya yil te balumilale, ya xnijc' yu'un.

Salmos 93:2

Cajwal, ta xjajch'ibal to stalel ay yiptajib ta lec te amuc'ul nactijibe; te ja'at atalel ayat sbajt'el q'uinal.

Salmos 90:11

¿Mach'a ya sna'bey sba te yip te awilimbae? ¿Mach'a ya sna'bey sba te sc'ajc'al awo'tane?

Salmos 84:2

Ta mero spisil co'tan soc yutsil co'tan ya jc'an te spisil ora ya xtalon ta yutil te templo awu'une. Ta spisil co'tan buen bayal yutsil q'uinal ya caiy te ya jc'ajintay te cuxul Diose.

Salmos 77:18

Chicnaj sc'op chawuquetic awu'un ta sutu-ic'; te tsantsewaletic sacub balumilal yu'un; jich uuc te lumq'uinal yuq'uilayot yu'un nijq'uel.

Job 9:6

Ja' ya yac'bey stij sba te lume, soc ya yac'bey stij sba te yiptajibe.

2 Crónicas 15:3

Te israeletic ma'yuquic ta stojol Dios bayal c'aal, ma'yuc sacerdote p'ijtesotic yu'un, ni ma'yuc ta alel ta stojolic te smandal Diose.

1 Reyes 18:39

C'alal la yilic te bi c'ot ta pasel, spisilic te mach'atic tey ayic a, la stinan sbaic coel c'alal ta lum, jich la yalic: —¡Ja' Dios te Cajwaltic, melel ja' nix Dios stuquel a te Cajwaltique! —xiic.

1 Samuel 17:36

Manchuc me león-choj, manchuc me oso, pero ya jmiltic te jo'on te abaton awu'une. Te filisteo te ma ba xch'uunej te cuxul Diose, ja' ni me jich ya xc'ot ta swenta; melel ya stijulabey slab yo'tan te soldadoetic yu'un te cuxul Diose.

1 Samuel 17:26

Jich te David la sjojc'obey te mach'atic ayic ta sts'eele: —¿Bila ya yac'beyic te winic ya smil te filisteo, te jich ya xlaj sc'oplal ta labanel te soldado-israeletique? ¿Mach'a ya scuy sba a te filisteo te ma ba xch'uunej te cuxul Diose te jich tal stijulabey jajch'el slab yo'tanic te soldadoetic yu'un te cuxul Diose? —xi'.

Jueces 5:4

“C'alal loc'at tel ta Seir, Cajwal, c'alal loc'at ta aquiltic yu'un Edom, nijc' te lumq'uinal, nijc' te ch'ulchane, te tocaletic la smalic coel tel ja'al.

Deuteronomio 5:26

Melel ¿ay bal mach'a ya yaiy yac ta c'op ta yolil c'ajc' te cuxul Diose, jich te bit'il la caiytiquix te jo'otique, te ma ba ya xlaj yu'une?

1 Timoteo 6:17

Pasa me ta mandal te mach'atic ay sc'ulejalic ta balumilal te ma me stoy sbaic yu'un, soc te ma me ja'uc ya smuc'ulin yo'tanic te sc'ulejalique, melel ma staleluc ay. Ja' lec te ja' ya smuc'ulin yo'tanic te Diose te stalel cuxul stuquele, te ma p'isbiluc ya yac'botic spisil te bila ya xtuun cu'untic te ya xbujts'naj co'tantic yu'une.

San Juan 17:3

Ja' ay xcuxlejalic sbajt'el q'uinal yu'un te ya sna'bat aba ja'at te jip jtul mero Diosate, soc te ya sna'beyic sba uuc te Jesucristo te la aticun tele.

San Mateo 26:63

Ja'uc me to, te Jesuse jp'al ma c'opoj. Jich yu'un te muc' sacerdote la yalbey xan: —Ya me awal ta melel ta stojol te cuxul Dios teme ja'at Cristoat te Snich'anat te Diose —la yut.

San Mateo 16:16

La yal te Simón Pedroe: —Ja'at Cristoat te Snich'anat te cuxul Diose —xi'.

Habacuc 3:10

Te witsetic ya xnijq'uic te c'alal ya yilate; ya xco tel ta ch'ulchan bayal ja'al. Te snabilal te mar ya x'awun, yu'un te ya stoyes moel yip te sbule.

Joel 2:11

Te Cajwaltic neel yac'oj sba ta stojol te soldadoetic c'oem yu'une, ya yac' chicnajuc yaw ta mero tulan. Mero bayal te soldadoetic c'oeme, ma x'ajtabaj te mach'atic ya xch'uunbey smandale. Mero muc' soc mero xiweltic sba te sc'aalelal te Cajwaltique. Ma'yuc mach'a ya xcujch' yu'un.

Daniel 7:14

Ac'bot yu'el, ac'bot yutsilal, soc ac'bot yich' yat'el ta muc' ajwalil; la yac' sbaic ta abatinel yu'un ants-winiquetic ta spisil nacionetic soc ta spisil ta jchajp c'opiletic. Stalel ay sbajt'el q'uinal te yu'ele, ma sna' xyanaj, sbajt'el q'uinal ma xlaj yat'el ta mandalteswanej.

Daniel 6:26

Yo'tic ya cal tulan mandal ta stojol ta spisil te bay c'alal ayic ta jwenta, te ya me yich'ic ta muc' soc ac'a xch'uunic te Dios yu'un Daniel. Melel ja' mero cuxul Dios stuquel, soc sbajt'el q'uinal ay. Te mandalteswanej yu'une, ma'yuc bi ora ya xlaj, soc ma'yuc slajibal te yu'ele.

Daniel 4:34

La yal xan te Nabucodonosore: “C'alal ts'acaj te castigo ta jtojole, jo'on te Nabucodonosor la quil moel te ch'ulchane. Te c'alal la quil moele, la caiy te lecubon te bit'il boloben te jole. Jich la calbey yutsil sc'oplal te Dios mero toyole, jich la calbey ta xch'ul-tojol te Mach'a cuxul ta swenta sbajt'el q'uinale: ‘Sbajt'el q'uinal ay yip te yu'ele; sbajt'el q'uinal ay ta ajwalinel yu'un spisil ta cajalcaj mach'atic ya xc'axic ta q'uinal.

Daniel 4:3

Mero c'ax yan yilel a te smuc'ul yat'el te yu'ele. Sbajt'el me q'uinal ma xloc' yat'el ta Ajwalil. Te yip yu'ele, ya me xc'ax ta stojol spisil ta caj mach'atic ya xc'axic ta q'uinal.

Jeremías 23:36

ma me ja'uc xawal xan: “Mero al te ijc'atsil yu'un Cajwal.” Melel teme ay ya awal loq'uele, ya me cac' te ya xc'atp'uj ta awijc'ats te c'op ya awale. Melel la ayantesic te jc'op jo'on te cuxul Dioson, te Dioson awu'un, te Ajwalilon te Spisil ya xju' cu'une.

Isaías 37:17

Aiybon awaiy, Cajwal, soc aiybon awaiy stojol te bila ya cale. Ac'a tel asit, Cajwal, soc ilawotic. Aiya awaiy stojol sc'op te Senaquerib te la sticun tel ta alel ta jtojole, ja' te sc'op spisil abolc'optayel yu'une, te cuxul Diosat atuquele.

Isaías 37:4

Te Cajwaltic te Dios awu'une la yaiybey stojol sc'op te mach'a yich'oj yat'el te ticunot tel yu'un te muc' ajwalil yu'un Asiria, te tal yixtac'optay te cuxul Diose. Ayuc bit'il ya yac'bey castigo yu'un te bitic la yale. La nix yaiy stojol stuquel a te Dios awu'une. C'oponbotic Dios a te jich xan yipal jilemotic ta c'abale”, uta me —xi' bael sc'op te muc' ajwalil Ezequías.

Salmos 68:11

C'opoj te Cajwaltique, tsobol antsetic la spucbeyic ta alel te sc'ope:

Génesis 21:33

Te Abraham la sts'un jpejt' tamarisco-te' ta Beerseba, tey la sc'opon a te Cajwaltic Dios te stalel cuxul sbajt'el q'uinale.

1 Reyes 8:60

soc swenta yu'un ta spisil ta jpam nacionetic ta balumilal ya sna'beyic sba a te Cajwaltic te ja' Dios stuquel soc te ma'yuc yan te diose.

Salmos 29:10

Te Cajwaltic ja' smandal te ya xtal ja'al; te Cajwaltic ja' ya xmandalaj, melel Ajwalil sbajt'el q'uinal stuquel.

Salmos 68:8

te lumq'uinal la syuq'uilay sba, te ja'al yal coel tel ta ch'ulchan, te wits Sinaí la syuq'uilay sba ta stojol Dios, ja' ta stojol te Dios yu'un Israel.

Salmos 90:2

Te c'alal ma to ayuc a te witstiquil, te c'alal ma to ayuc a te lumq'uinal soc spisil bitic ay, c'alal to ta mero namey soc ja' to c'alal ta patil bael, ja'at atalel Diosat atuquel.

Isaías 40:15

Te Cajwaltic, jich nax c'oem ta yo'tan te nacionetic te bit'il jt'ul nax ja', jp'ij nax tsubil lum c'oem ta báscula; te lumetic ta ti'ti'mar, jich c'oemic ta yo'tan te jp'ij sit ji'.

Isaías 65:16

Mach'auc a ta lumq'uinal te ya sc'an bendición, ja' me ya sc'anbey te Dios te jun yo'tan ta melele; soc mach'auc ta lumq'uinal te ya sta ta alel Dios a te bila ya xchape, ja' me jich ya spas ta swenta Dios te jun yo'tan ta melele. Te woclajeletic ta neelal to tele, ch'ayemix ta o'tanil, ch'ayiquix ta jc'axel ta jsit stuquel.

Jeremías 4:2

jich me ya xju' te ya atabon ta alel jbiil ta smelelil, ta stojil soc ta swenta bitic lequic ta pasele. Ta swenta jbiil ya me xc'ot bendición ta stojol te nacionetic, soc ya me yalbonic lec jc'oplal —xi' te Cajwaltique.

Jeremías 4:24

La quil te witstiquile, yacalic ta nijq'uel; spisilic te ch'in witstiquile nijq'uic.

Jeremías 50:46

C'alal ya xjin te Babilonia, muc' nax me sc'op ya xc'ot. Te lumq'uinal ya me xnijc'; te yawique ya to me yaiyic stojol te yantic nacionetique —xi' te Cajwaltique.

Jeremías 51:29

Te lumq'uinal ya xnijc' soc ya syuc' sba, melel yac ta c'oel ta pasel te bila xchapoj te Cajwaltique, ja' te ya xc'atp'uj te Babilonia ta jochol q'uinal te xiweltic sbae.

Josué 3:10

Ja' laj me seña te ay ta coliltic te cuxul Diose. Ja' te bit'il c'alal ya xc'axotic baele, ya laj me xjajch' sticunbotic loq'uel te cananeoetic, hititaetic, heveoetic, ferezeoetic, gergeseoetic, amorreoetic soc te jebuseoetique.

1 Crónicas 29:11

Cajwal, awu'un atuquel te ich'el ta muc', te awu'el, te xojobil awutsilal; atuquel ya xmandalajat soc atuquel ay awat'el. Melel spisil bitic ay ta ch'ulchan soc te bitic ay ta balumilal, ja'at awu'un. Atuquel ay awat'el ta mandalteswanej, cajalat yu'un spisil, Cajwal.

Salmos 9:8

Toj me ya xchajban ta spamal te balumilale; toj me ya yalbey sc'oplal juju-jpam lum.

Salmos 74:12

C'alal to ta namey tel, ja'at muc' ajwalilat cu'un; Ja'at Dios cu'un, bayal buelta la acoltayotic ta tsalaw ta banti te lumq'uinaltique.

Salmos 76:8

C'alal ta ch'ulchan ya awac' ta na'el te bi yilel ya xchajbanwanate; te balumilal ya xi' soc ya slaman sba

Salmos 100:3

Na'beyaic sba te Cajwaltic te ja' Dios stuquele. Ja' la spasotic, ja' yu'unotic; lumotic yu'un, soc chijotic c'oem te yac'ojotic ta yax aquiltic yu'une.

Isaías 40:28

¿Yu'un bal ma x'ana'? ¿Ma bal awaiyojuc stojol? Te Cajwaltique, ja' te Dios te sbajt'el q'uinal aye, ja' te la xchicnantes spamal te balumilale, ma'yuc bay ya xcom yo'tan soc ma xlub; te bitic sna'oje, bajt' nax ta jyalel.

Daniel 6:27

Ja' ya xju' ya xcoltaywan, ja' ya xju' ya x'ac'awan ta libre. Ja' te ya spas jchajp señailetic ta ch'ulchan soc ta balumilal. Ja' la scoltayix ta ye león-chojetic te Daniel”, xi'.

Nahúm 1:5

Ya xnijq'uic te toyol witstiquil ta stojol; te peq'uel witstiquil ya x'ulubic yu'un. Spisil te lumq'uinal ya stij sba te c'alal ya yil; spamal balumilal ya stij sba soc te mach'atic nainemic tey a.