Gálatas 6:16 - Bible in Tzeltal de Oxchuc y Tenejapa

¹⁶ Spisil mach'a xch'uunejic in c'op to, pajal me lamal q'uinal ya yaiyic soc pajal me ya yich'ic c'uxtayel soc spisil te lum Israele.

Nuevo Testamento Tzeltal de Amatenango

¹⁶ Spisilik te machꞌa jich xchꞌuunejik ekꞌae, ya yichꞌik te bujtsꞌan kꞌinale y te slekil yoꞌtan Diose, sok spisil te machꞌatik batsꞌi jtejklum yuꞌun te Diose.

Bible in Tzeltal Bachajón

¹⁶ Spisil te mach'atic hich ya spasic, ac'a c'ohtuc ta stojolic lamal q'uinal soc c'uxultayel, soc ta stojol te Israel yu'un Dios.

Gálatas 6:16 Referans Kwoze

Gálatas 3:29

Teme yu'unex te Cristoe, jich sts'umbal c'oemex te Abrahame. Jich me ya awich'ic te bendición te la yalbey sc'oplal ta trato te Diose.

Filipenses 3:3

Yan te jo'otique quich'ojtic te mero circuncisione. Melel ta swenta nax te Espíritu te yacotic ta abatinel yu'un te Diose. Jich bayal sbujts' co'tantic ta swenta te Cristo Jesuse; ma ba ja' ya smuc'ulin co'tantic te bila ya yich' pasel ta jbaq'uetaltique.

Romanos 4:12

Te Abraham, ja' tatil yu'un uuc spisil te mach'atic yich'ojic te circuncisione, teme ay xch'uunjel yo'tanique, jich bit'il ayix xch'uunjel yo'tan a te Abrahame te c'alal ma to yich'ojuc a te circuncisione.

Oseas 1:10

Ya me sta sc'aalelal te mach'atic israeletic te jichic te bit'il sji'al mar, te ma'yuc mach'a ya xju' yu'un sp'isel, ni yajtayel. Te bit'il la yich' albeyel: —Ma lumuquexix cu'un te ja'exe —te xi' sc'oplalique, Dios me ya yalbey: —Ja'ex me yal-snich'anex te cuxul Dios —xi' me sc'oplalic.

San Juan 1:47

Te Jesús la yil te Natanael te yac ta talel ta stojole. Jich la yal: —Ja' mero israel-winic in to, te ma'yuc lo'laywanej ta yo'tane —xi' sc'oplal yu'un.

Isaías 45:25

Ta jwenta jtuquel, jtsalwanej ya xc'otic ta loq'uel spisil te lum Israel, soc toyem nax me q'uinal yaiyic cu'un —xi' te Diose.

Salmos 73:1

Mero lec yo'tan ta stojol Israel te Diose; ja' lec yo'tan ta stojolic te mach'atic pocbil yo'tanique.

Filipenses 3:16

Ja'uc me to, ta bay c'alal c'oemix ta co'tantique, jich me ac'a jna'tic soc jich me ac'a jpastic.

Gálatas 5:25

Jich yu'un teme cuxulotiquix ta swenta te Espiritue, ja' yacotiquix ta beel soc spisil ora te Espiritue.

Gálatas 5:16

Jo'on ya calbeyex xan in to: Ac'a me swentainex spisil ora te Espiritue. Jich ma ba ya apasic te bila ya smulan spasel te abaq'uetalique.

San Juan 16:33

La calbeyex spisil in to, swenta yu'un jich me lamal q'uinal ya awaiyic ta jwenta. Yan ta bay te balumilale ya me xc'ax awocolic, ja'uc me to, ayuc me smuc'ul awo'tanic ta jwenta, melel tsalbilix cu'un te balumilale —xi' te Jesuse.

San Juan 14:27

“Ya cac'beyex jilel lamal q'uinal. Ja' ya cac'beyex jilel te lamal q'uinal cu'une. Ma pajaluc soc te bit'il ya yac' te balumilale. Ma me xawac' woclajuc awo'tanic soc ma me xiw awo'tanic.

1 Crónicas 12:18

Jich yu'un te Amasai, te jtsobwanej yu'un te lajuneb xcha'winic (30) ta jtule, ja' u'uninbil yu'un te espíritu, jich la yal: —¡David, lamaluc q'uinal ta atojol, ja'at te snich'anat Isaí! ¡Lamaluc me q'uinal ta atojol! ¡Lamaluc me q'uinal ta atojol soc ta stojol te mach'atic ya scoltayate, melel scoltayejat te Dios awu'une! —xi' ta yalel. Te David la yic' ta stojol, soc la yac'bey yat'elic soc te yantic jtsobwanejetic yu'un te soldadoetique.

Filipenses 4:7

Te lamal q'uinal yu'un te Diose, c'ax jelawen yutsil stuquel a ta spisil te bila ay ta nopele, ac'a me scanantaybeyex awo'tanic soc te bila ya anopic ta swenta te Cristo Jesuse.

Gálatas 1:3

Ac'a yac'beyex yutsil yo'tan te Jtatic Diose soc te Cajwaltic Jesucristoe. Lamaluc me q'uinal ya awaiyic yu'un spisil ora.

Romanos 1:7

Ya jpatbeyex awo'tanic ta apisilic te ayex ta lum Roma, te c'ux ya yaiyex ta yo'tan te Diose, soc te ic'bilex swenta ch'ul lum yu'un Dios ya xc'oex. Ayuc me yutsilal soc lamaluc me q'uinal ya awaiyic yu'un ta swenta te Jtatic Diose soc ta swenta te Cajwaltic Jesucristoe.

Efesios 6:23

Te Jtatic Diose soc te Cajwaltic Jesucristoe, ac'a yac'beyex lamal q'uinal soc xc'uxul awo'tanic ta swenta te xch'uunjel awo'tanic soc spisil te quermanotactique,

1 Pedro 1:3

Jelawen yutsil te Diose, te Stat te Cajwaltic Jesucristoe. Yu'un ta scaj nax te bayal xc'uxul yo'tan ta jtojoltic te la yac' cha'ayinucotic xan ta swenta bit'il cha'cux tel ta bay animaetic te Jesucristoe. Jich cuxul spisil ora te smuc'ul co'tantique.

Judas 1:2

C'axem to xan ac'a xc'uxtayex te Diose, soc lamaluc me q'uinal ya awaiyic yu'un, soc ayuc me bayal xc'uxul awo'tanic ta apisilic.