Gálatas 5:13 - Bible in Tzeltal de Oxchuc y Tenejapa

¹³ Melel te ja'ex quermanotac, Dios la yiq'uex ta stojol swenta yu'un jich me jc'axel libre ya x'ainex yu'un. In te bit'il libre ayexe, ¿yu'un bal lec teme ya xjajch' apasic spisil te bila stalel ya smulan spasel te jmulawil jbaq'uetaltique? Ja' lec teme talel c'axel ya awac' abaic ta abatinel ta swenta bit'il c'ux ya awaiy abaic ta awo'tanic.

Nuevo Testamento Tzeltal de Amatenango

¹³ Te jaꞌexe, kermanotak, Dios la yikꞌex yuꞌun te libre ya xkꞌoexe. Pero ma me jaꞌuk libre ayex yuꞌun te ya aleik xan amulike. Jaꞌ lek abatin abaik ta juju-tul sok slekil awoꞌtanik.

Bible in Tzeltal Bachajón

¹³ Ha'ex, quermanotac, ic'bilex scuenta yu'un libre ya x'ayinex; pero ma yu'unuc libre ayex ta spasel te bin ya smulan abaq'uetalic; ha me ya sc'an te talel c'axel yac awa'batin abahic ta scuenta sc'uxul awo'tanic.

Gálatas 5:13 Referans Kwoze

1 Pedro 2:16

Te bit'il libre ayexe, ma me ja'uc ja' libre ayex yu'un te ya apasic te bila amene. Lequil abatuquex me yu'un te Diose.

1 Corintios 9:19

Jich yu'un libre ayon yu'un spisil ants-winiquetic; ja'uc me to, abat cac'oj jba ta stojolic, swenta jich me ya jpas ta ganar tsobol ta jtul.

1 Corintios 8:9

Ja'uc me to, tsajtaya me abaic te bit'il ayex ta libre yu'un sti'ele. Ma me xawac' yaluc a te mach'a ma'yuc yip yo'tane.

Gálatas 5:14

Melel jun nax c'oem sc'oplal spisil te mandalile, ja' bi: “C'ux me x'awaiy ta awo'tan te apat-axujq'ue, jich nix te bit'il c'ux ya awaiy aba atuquel te ja'ate”, te xie.

Efesios 5:21

Jech ich'a abaic ta muc' ta swenta bit'il awich'ojic ta muc' ta melel te Cristoe.

Gálatas 6:2

Juju-jtul jech cuchbeya abaic te awijc'atsique. Jich me ts'acal ya xc'ot ta ch'uunel awu'unic a te smandal te Cristoe.

Isaías 61:1

Te espíritu yu'un Cajwaltic ay ta jtojol. Melel te Cajwaltic stsaojon soc sticunejon tel ta yalel sc'oplal te lec yach'il c'op ta stojol te me'baetique, tal cac' lamajuc xchamelic te mach'a ay swocolique, tal calbey te ya x'ac'otic ta libre te mach'atic ayic ta mosoile, soc te ya xjilic ta libre mach'atic ayic ta chuquele.

Judas 1:4

Yu'un ay mach'atic te ju' yu'unic te la slo'layex te muquen ochemiquix ta awolilique. Ja'uc me to, namey ts'ibubilix jilel sc'oplalic ta Sjun Dios te quechelic ta yich'el castigoe. Melel c'ax amen te yo'tanique. Syantesejiquix ta slejibal smulic te bit'il ayotic ta c'uxtayel yu'un te Diose. Ma xyaq'uic ta ich'el ta muc' te Cajwaltic Jesucristoe, te ja' nax cajal yat'el stuquele.

2 Pedro 2:19

Ya yalbeyic sc'oplal te ayic ta libre. Ja'uc me to, c'axem to xan mosoinbilic yu'un te bila ya xlajinwane. Melel spisil ants-winiquetic, ayic ta moso yu'un spisil te bitic u'uninbilic yu'une.

2 Corintios 4:5

Melel te jo'otique, ma ja'uc ya jchol jc'oplaltic, ja' ya jcholbeytic sc'oplal te Cajwaltic Jesucristoe. Te jo'otique, abat nax ayotic ta atojolic ta swenta xc'uxul yo'tan te Jesuse.

Hechos 20:35

Spisil ora la cac'beyex awilic te bit'il ya sc'an ya x'at'ejotic ta lec ta jpisiltique, swenta yu'un jich me ya jcoltaytic te mach'atic ay swocolic te ma'yuc bi ay yu'unique. Ac'a juluc ta awo'tanic te jich la yal te Cajwaltic Jesuse: “Ja' me bin nax yutsil te mach'a ay bila ya yaq'ue, ma ja'uc te mach'a ay bila ya yich'e”, te xie —xi' te Pabloe.

Gálatas 5:22

Yan te sit stuquel te Espiritue, ja' te xc'uxul-o'tanil, sbujts'-o'tanil, lamal q'uinal, sts'iquel, yutsil-o'tanil, lequil-o'tanil, xch'uunjel-o'tanil,

San Lucas 4:18

“Te Espíritu yu'un te Cajwaltique julix ta jtojol, yu'un tsabilon yu'un ta yalel te lec yach'il c'op ta stojol te me'baetique. Ticunbilon tel ta scoltayel te mach'atic ay swocolic ya yaiyic ta yo'tanique, soc te ya calbey yaiyic te bit'il ya xcolic ta libre te mach'atic ayic ta chuquele, soc te ya jambey sitic te ma'sitetique, soc te ya jcoltay ta libre te mach'atic mosoinbilique,

Gálatas 4:22

Melel jich ts'ibubil jilel tey a te ay cheb snich'nab te Abrahame. Te jtul snich'ane, ja' yal te scriadae. Te yane, ja' yal te yinam te ay ta libree.

1 Tesalonicenses 1:3

Ja' ya xjul ta co'tan te bit'il ay xch'uunjel awo'tanic ta stojol te Jtatic Diose, soc te bit'il awac'oj abaic ta abatinel soc te xc'uxul awo'tanique, soc te bit'il jun awo'tan yaquex ta smaliyel te bi ora ya xtal te Cajwaltic Jesucristoe.

2 Corintios 12:15

Jich te jo'one bin nax co'tan ya jlajin te jayeb bila ay cu'une, soc manchuc teme ya cac' jcuxlejal ta swenta awutsilalic te ja'exe. Manchuc teme bayal jc'anojex te jo'one, ja'uc me to, jteb nax ayon ta awo'tanic te ja'exe.

2 Corintios 3:17

Melel te Cajwaltique, ja' te Espiritue. Ta banti ay te Espíritu yu'un te Cajwaltique, ay colel tey a.

Gálatas 2:4

Ay lotil quermanotactic te jich nax ochic tel ta coliltic te banti ayotique, yu'un talemic ta tsajtaywanej tey a ta banti jtsoboj jbajtic. Yo'tanuc te yacuc yac'otic xan ta mosoil te bit'il libre colemotic ta swenta bit'il jun ayotic soc te Cristo Jesuse.

Gálatas 5:1

Te Cristo la yac'otic ta libre swenta yu'un jc'axel libre ayotic ta melel. Jich yu'un ma me xawac' abaic xan ta yugo yu'un te mosoile.

2 Corintios 2:8

Ja' swentail te ya calbeyex wocol te ya awac'beyic yil te bit'il c'ux ya awaiy ta awo'tanique.