Éxodo 30:10 - Bible in Tzeltal de Oxchuc y Tenejapa

¹⁰ Ja' in scajtijib jmajt'an to ja' nax me cu'un jtuquel te Ajwalilone. Te Aarón jun me buelta jujun ja'wil ya yac'bey ch'ich' te xulubiletic yu'un te scajtijib jmajt'ane, ja' me xch'ich'el te milbil jmajt'an te ya yich' tael perdón yu'un a te amulique. Jun me buelta jujun ja'wil, pero spisil me ja'wil ya yich' ac'ulayel te xch'ich'el milbil jmajt'an, swenta yu'un ya ataic perdón yu'un a te amulique —xi' te Cajwaltique.

Bible in Tzeltal Bachajón

¹⁰ Jun buelta ta jujun ha'bil te Aarón ya me yac' ta sba te xulubetic te sch'ich'el te milbil mahtanil scuenta stojel mulil. Ya me spas te stojel mulil tey a jun buelta ta jujun ha'bil ta cajalcaj ats'umbalic. Ha mero ch'ultesbil yu'un Jehová, xchi.

Éxodo 30:10 Referans Kwoze

Levítico 16:18

ya me xloc' bael ta slecubtesel sc'oplal te scajtijib ta chiq'uel majt'anil te ay ta jtojol jo'on te Ajwalilone. Ya me stsac jtebuc te xch'ich'el toro soc te xch'ich'el tat tentsun, ya me xjaxbey ta xchanebal xulubil yu'un te ay ta sjoyobal te scajtijib ta chiq'uel majt'anile.

Hebreos 9:25

Yan te muc' sacerdote te ay ta balumilale jujun to ja'wil ya x'och bael ta bay Mero Ch'ul Awilal te ya xc'o stsijts'an ta stojol Dios te ch'ich' te ma ja'uc xch'ich'el stuquele. Yan te Cristoe ma ba ya yac'ulay sba ta lajel bayal buelta stuquel.

Levítico 23:27

—Ta slajunebal c'aal sjajch'el te sjuquebal u, ya me xc'ot Sc'aalelal Perdón. Ya me sc'an te ya apasic ch'ul tsoblej, soc ya me acom awe'elic ta sjunal c'aal. Ya me achiq'uic majt'anil swenta quich'jibal ta muc' jo'on te Ajwalilone.

Hebreos 9:7

Yan ta bay te xcha'tsalale, ja' nax stuquel te muc' sacerdote te ya x'och bael jun buelta ta jun ja'wil. In te c'alal ya x'och baele, puersa ya yich' ochel xch'ich'el chambalametic te ya xc'o stsijts'an tey a swenta xch'ayjibal te smule soc xch'ayjibal smul uuc te slumale te ma'yuc ta yo'tanic te bila mulil te la spasique.

Hebreos 1:3

Ja' chican a te yutsil xojobil te Diose, soc ja' chican a te bi yilel ay soc yo'tan te Diose. Spisil te bitic aye ja' ipajemic a te yu'el sc'ope. Te c'alal ju'ix yu'un spoquel loq'uel a te jmultique, la snajc'an sba ta ch'ulchan ta swa'el sc'ab te Muc' Diose.

Apocalipsis 9:13

Te swaquebal ch'ul abate la yoq'uesin te oq'uese. La caiy stojol te ay mach'a c'opoj ta yolilal te chanch'ix xulubil te ay ta scajtijib majt'anil te pasbil ta oro te ay ta stojol te Diose.

Éxodo 30:9

Ma me ayuc yan pom ya yich' aq'uel ta chiq'uel tey a, soc ma me ayuc milbil jmajt'an te ya yich' chiq'uel tey a, soc ma me xawac'bon te majt'anil harina, soc ma me xyich' malel vino tey a.

Éxodo 30:11

Te Cajwaltic la sc'opon te Moisés, jich la yalbey:

Levítico 16:2

Jich la yalbey te Moisese: —Albeya te abanquil Aarón, te ma me biluc nax ora ya x'och bael ta yutil ch'ul awilal ta spat te pac' t'imile, soc ma me xnoptsaj bael ta banti te yawil perdón te ay ta sba te caja, swenta yu'un jich ma xlaj a. Melel ya me xchicnajon ta ilel ta sba tocal.

Levítico 16:16

Jich me ya xlecub sc'oplal a te ch'ul awilal te bit'il ma ba lec sc'oplal yu'un smulic, ja' te stoybailic te israeletique. Ja' nix jich ya sc'an ya spas ta Nailpac' te banti ya quich' c'oponel, ja' te ay ta yolilic te ma ba lec sc'oplal ayique.

1 Reyes 1:50

Yan stuquel te Adonías ta scaj te la xi' te Salomón, jajch' bael, bajt' ta Nailpac' Templo. Tey c'o sle yanib a, c'o stsacbey te xulub scajtijib smajt'an te Diose.

1 Crónicas 6:49

Te Aarón soc te sts'umbale, ja'ic te la xchiq'uic te smajt'an Dios ta scajtijib, soc la xchiq'uic pom ta scajtijib. Jich nix la spasic spisil te abatinel ta Mero Ch'ul Awilal, soc te bit'il ya staic perdón yu'un smulic te israeletique, jich nix te bit'il yaloj mandal Moisés, te yabat Diose.

Levítico 4:7

Soc ya me xjaxbey jtebuc ch'ich' te xulubiletic yu'un te scajtijib ta chiq'uel pom, te ay ta jtojol ta Nailpac' te banti ya quich' c'oponele. Spisil te xch'ich'el ay to ya xjile, ya me smalbey ta yacan te scajtijib ta chiq'uel majt'anil, te ay ta stojol te yochibal Nailpac' te banti ya quich' c'oponele.

Levítico 4:18

Ya me xjax ta ch'ich' te xulubiletic yu'un te scajtijib ta chiq'uel pom te ay ta jtojol ta Nailpac' te banti ya quich' c'oponele. Ta spisil te ch'ich' ya xjile, ya me smalbey ta yacan te scajtijib majt'anil, te ay ta stojol yochibal te Nailpac' te banti ya quich' c'oponele.