Éxodo 3:9 - Bible in Tzeltal de Oxchuc y Tenejapa

⁹ Ya calbat awaiy, caiyojbeyix stojol sc'opic te alumale, soc quiloj te bayal ayic ta uts'inel yu'un te egipcioetique.

Bible in Tzeltal Bachajón

⁹ Te yawic te snich'nab Israel c'ohtix ta jtojol, soc quilojix te swocolic a'botic yu'un te egipciohetique.

Éxodo 3:9 Referans Kwoze

Éxodo 2:23

Bayal c'aal ta patil laj te ajwalil yu'un te Egipto. Pero yacalic ta woclajel ta ajc'an ta mozoinel te israeletique. Ja'uc me to, c'ot ta stojol Dios te yajc'anic soc te sc'opique.

Éxodo 3:7

Te Cajwaltic jich la yal xan: —Mero chican ta jsit te bit'il ay swocol te lum cu'un ta Egipto. La caiybeyix stojol sc'opic ta scaj uts'inel yu'un te jwolwanejetic yu'un te tulan at'ele. Jna'ojbey ta lec te swocolique.

Éxodo 1:11

Jich yu'un te egipcioetic la sleic tulan jwolwanejetic, te ya stenic ta tulan at'el te israeletique. La yac'beyic spas cha'pam lum te Pitón soc Ramsés te sbiilique. Yu'un ay ta yo'tan te faraón, te muc' ajwalil xi' c'oem yu'un Egipto, te ja' sq'uejibal te sbiluque.

Éxodo 1:22

Te faraón la yalbey mandal spisil te slumale. Jich la yal: —Ch'ojaic bael ta muc'ja' spisil te alalqueremetic te ya x'ayinique. Yan teme ach'ixetique, ma xawuts'inbey xcuxlejal stuquelic —xi'.

Eclesiastés 5:8

Ma me jchajbuc q'uinal ya awaiy yu'un, teme ay ya awil ta yantic lum te banti yacalic ta uts'inel te me'baetique, soc te ya yixlanic ta pasel te bi stojil ay ta stojolique. Melel ay me yan mach'a cajal yu'un te mach'a toyole, in te mach'a toyole ay to xan mach'a cajal yu'un a, pero ta xchebalic ay to xan yan mach'a mero toyol xan yu'unic a.

Eclesiastés 4:1

Bajt' co'tan ta yilel te tulan uts'inel yac ta pasel ta balumilal. La quil te mach'atic yacal yich'belic tulan uts'inele, yacalic ta oq'uel, pero ma'yuc mach'a ya xmuc'tesbot q'uinal yaiyic yu'un. Ya x'ac'botic tulan swocolic yu'un, pero ma'yuc mach'a ya xmuc'tesbot q'uinal yaiyic yu'un.

Salmos 12:5

Yan te Cajwaltic jich ya yal: “Te mach'atic me'baetic ta q'uinal soc te peq'uel ayique, yacalic ta uts'inel soc yacalic ta ac'beyel swocolic. Jich yu'un ya me xjajch'on yo'tic, ya me cac'bey te coltayel te bayal sc'anojique”, xi'.

Amós 4:1

Aiya awaiyic stojol, ja'ex antsetic te pajalex soc me' wacax ta Basán ta switsul Samaria, te ya atenic ta uts'inel te me'baetic, soc te c'axem to xan ya awilbeyic yo'tan yu'un te ma'yuc bila ay yu'unique; te ya awalbeyic te amamlalique: “Ich'aic tel vino ya cuch'tic”, te xaex ta stojolique.

Génesis 16:11

Melel awic'ojix awal, soc ya me x'alajat. Te querem ya x'ayin, Ismael sbiil ya xc'ot awu'un, yu'un yaiyoj stojol te Cajwaltic te bit'il ay awocole.

Deuteronomio 26:7

Ja' yu'un te Cajwaltic te Dios yu'un te jme'-jtatique, la jc'antic coltayel ta stojol. La yaiybotic te jc'optic te la calbeytic wocole, soc la yilbotic te jme'bailtic, soc te at'el, te uts'inel te ay jwocoltic yu'une.

1 Samuel 9:16

—Pajel ta jich ora in to, ya me jticunbat tel jtul winic talem ta sq'uinal sts'umbal Benjamín. Ja' te mach'a tsabil ya xc'ot awu'un. Ya me awac'bey yich' yat'el ta swentainel te lum Israel cu'un, ya me amalbey aceite ta sjol. Ja' me ya scoltaybon loq'uel ta sc'ab filisteoetic te israeletique. La jna'beyix yo'bolil sba te lum cu'une, melel c'otix c'alal ta jtojol te sc'opique —xi' sc'oplal yu'un te Diose.

2 Reyes 13:4

Te Joacaz la sc'opon te Cajwaltique. Te Cajwaltic la yich'bey ta wenta te sc'op, melel la yil te bi la yut la yuts'in te israeletic te muc' ajwalil yu'un Siria.

Génesis 31:12

La yalbon: “Toya asit, bayal pintoetic, soc ts'ibaltic soc ts'ijt'iltic te tat chambalametic te ya xcuch sbaic soc yantsilelic, te melel quilojix te bila ya spasbat te Labán.

Éxodo 1:8

Ta patil chicnaj yach'il muc' ajwalil ta Egipto te ma'yuc bay la sna'beyix sc'oplal te José. Jich la yalbey te slumale:

Éxodo 2:25

Dios la yilbey swocolic te israeletic, soc la sna'bey yo'bolil sbaic.

2 Reyes 20:5

—Sujt'an bael, albeya te Ezequías te jwentainwanej yu'un te lum cu'une: “Te Cajwaltic te Dios yu'un te antiguo ame'-atat David, jich la yal: ‘Jo'on la caiybatix te ac'ope, soc la quilbatix te ya'lel asite, ja' yu'un ya me jch'aybat te achamele. Li' ta oxeb c'aal ya me xju'ix ya xbaat ta templo yu'un Cajwaltic a.

Nehemías 9:9

Ja'at la awil bit'il c'ax swocolic ta Egipto te antiguo jme'-jtatique, soc la awaiybey yoq'uelic ta sti'il te Mar Rojo.

Salmos 9:14

Ja' yu'un ta bay yochibal sts'ajc'ul Jerusalén, tey me ya calbey spisil lum te atuquel ayat ta alel wocole, te melel bin nax co'tan yu'un te la acoltayonixe.