Éxodo 29:7 - Bible in Tzeltal de Oxchuc y Tenejapa

⁷ Tsaca te aceite ta swenta ch'ultesel, malbeya ta sjol Aarón, jich me ya yich' ch'ultesel ta sacerdoteil.

Bible in Tzeltal Bachajón

⁷ Patil ya me atsac te aceite yu'un ch'ultesel, ya me amalbe ta sjol scuenta yich'el te ya'tele.

Éxodo 29:7 Referans Kwoze

Números 35:25

Te lum ya me xc'opoj yu'un te mach'a ma ba snopoj ta yo'tan te la yaiy milawe, ma me xyaq'uic te ya sujt'esbey spacol te yermano te mach'a lajeme. Yan te mach'a la yaiy milaw, ya me yich' ticunel sujt'el ta bay lum yu'un anjibal, tey nix ta bay sleoje. Tey me ya xjil a ja' to me c'alal ya xlaj te muc' sacerdote te ochemix ta ch'ul at'ele.

Levítico 21:10

“Te muc'ul sacerdote la yich'ix tulan yat'el te ya xju' ya slap te ch'ul c'u'ile, ta swenta te ch'ulteswanej aceite la yich' aq'uel ta sjole. Ja' yu'un tesbiluc me te sjole, soc ma me xch'i' sc'u' swenta seña mel-o'tan yu'un ay mach'a lajeme.

San Juan 3:34

Melel te mach'a ticunbil yu'un te Diose, ja' ya yal te sc'op Diose, yu'un ma p'isbiluc nax Espíritu ya yac' te Diose.

Isaías 61:1

Te espíritu yu'un Cajwaltic ay ta jtojol. Melel te Cajwaltic stsaojon soc sticunejon tel ta yalel sc'oplal te lec yach'il c'op ta stojol te me'baetique, tal cac' lamajuc xchamelic te mach'a ay swocolique, tal calbey te ya x'ac'otic ta libre te mach'atic ayic ta mosoile, soc te ya xjilic ta libre mach'atic ayic ta chuquele.

Salmos 133:2

Pajal c'oem soc buen t'ujbil perfume te ya x'oquin ta sjol sacerdoteetic, ya xco tel ta oc ta yisimic c'alal ta snuc' sc'u'ic.

Salmos 89:20

La jtaix ta leel te cabat David; la cac'bey ch'ul aceite ta sjol jich la jtsaix ta muc' ajwalil.

Levítico 10:7

Soc te ja'exe ma me xc'ubex bael ta yochibal te Nailpac' te banti ya yich' c'oponel te Cajwaltique, swenta yu'un ma ba ya xlajex a, melel awich'ojiquix ch'ultesel ta swenta te aceite yu'un te Cajwaltique —xi' sc'oplalic yu'un te Moisese. Mero jich nix la spasic a te bit'il albotic yu'un te Moisese.

Éxodo 28:41

“Jich me ya awac'bey sc'u'-spac' te abanquil Aarón te bit'il to, soc te snich'nabe. Ya me amalbey aceite ta sjolic swenta yu'un ya yich' yat'elic ta sacerdoteil te ya jch'ultes ta abatinel.

1 Juan 2:27

Ja'uc me to, te ja'exe malbilix ta awo'tanic te Ch'ul Espíritu te la yac'beyex te Jesucristoe, jich me jc'axel ya x'ain ta awo'tanic. Jich ma puersauc te ay mach'a ya sp'ijubtesexe. Ja' nix ya yac'beyex ana'ic stojol spisil te Espiritue. Yu'un melel spisil te bila ya yac'beyex anopic stuquele; ma lotil c'opuc te bila ya yale. Te bit'il p'ijubtesbilex yu'un te Espiritue, jich me jc'axel jun ya x'ainex soc te Cristoe.

Levítico 21:12

Ma me xju' ya xloc' ta ch'ul awilal cu'un, soc ma me xyac' pejc'ajuc yutsil sc'oplal te ch'ul awilal, melel ja' c'oem ta sjol te aceite swenta ch'ultesel cu'un. Jo'on Ajwalilon.

Zacarías 4:14

La sjac'bon, jich la yalbon: —Ja' in to, seña chebic te la yich'iquix u'uninel yu'un te Cajwaltic, te ja' Yajwal swolol balumilal, swenta yu'un ya yich'ic abatinel yu'un —xi'.

Éxodo 40:13

Te Aarón ac'a slap te t'ujbil c'u'ile. Balanbeya aceite ta sjol, jich me ya jch'ultes ta sacerdoteil.

Levítico 7:35

Te majt'aniletic ya yich' chiq'uel swenta yich'el ta muc' te Cajwaltique, tey me ya xloc' a te bila ya xc'ot ta swenta te sacerdote Aarón soc te sts'umbale. Ja' me ya xjajch' ta aq'uel a te bi c'aalil ya yich' ch'ultesel soc sts'umbal te ya yac' ochel ta sacerdoteil te Cajwaltique.