Éxodo 19:5 - Bible in Tzeltal de Oxchuc y Tenejapa

⁵ Jich yu'un teme ya awaiybonic spisil jc'op, soc teme ya awich'bonic ta muc' te trato cu'une, mero lumex me cu'un, te ma'yuc yan lumetic ya spajex, melel ja' cu'un spamal te balumilale.

Bible in Tzeltal Bachajón

⁵ Ha yu'un teme yac awa'iybonic jc'op soc teme yac ac'ohtesic ta pasel te chapbil-c'op cu'une, ha'ex me tsahbil c'ulejalil cu'un ya c'ohex ta yohlil spisil te pueblohetic; como ho'on cu'un spisil te bahlumilale.

Éxodo 19:5 Referans Kwoze

Deuteronomio 14:2

Melel te ja'exe, ch'ul lumex yu'un te Cajwaltic te Dios cu'untique. Stsaojex loq'uel ta yolil spisil te yantic lumetic ta balumilal, swenta yu'un ja'ex me lum yu'un ya xc'oex.

Deuteronomio 7:6

Melel te ja'exe, ch'ul lumex yu'un te Cajwaltic te Dios cu'untique. Stsaojex loq'uel ta yolil spisil te yantic lumetic ta balumilal, swenta yu'un ja'ex me lum yu'un ya xc'oex.

Deuteronomio 26:18

Ja' nix jich te Cajwaltique, yo'tic la yalix ta jamal ta atojol, Israel, te ja'at te lumat te mero yu'unate, jich te bit'il yaloj ta nameye, soc te ya ach'uunbey spasel spisil te mandaliletic yu'une.

Malaquías 3:17

Te Cajwaltic te Spisil ya xju' yu'un ya yal: —Yacon ta xchajbanel sc'aalelal te mero lum cu'un ya xc'ot. Jich te bit'il tatil te ya xjajch' sna'bey yo'bolil sba te snich'an ya yabatin, jich me ya xjajch' jna'bey yo'bolil sbaic te jo'one.

Éxodo 15:26

Jich la yal: —Teme jun awo'tanic ya awaiybonic stojol te bila ya cal te jo'on Ajwalilon te Dioson awu'unique, soc teme ya apasic te bila lec co'tan yu'une, teme ya ach'uunic te mandaliletic cu'une, soc teme ya ac'otes ta pasel te bila ya yal te mandaliletic cu'une, ma'yuc bi ora ya xtal tulan chamel ta atojolic te bit'il la cac'bey te egipcioetique, melel jo'on te Ajwalilon te ya jlamantesbeyex achamelique —xi' te Cajwaltique.

Salmos 135:4

Melel la stsa Jacob, ja' te Israel, swenta yu'un ja' sc'ulejal c'ot stuquel.

Deuteronomio 4:20

Te ja'exe la stsobex loq'uel tel ta Egipto te Cajwaltique, ta yutil horno yu'un yultesel taq'uin c'oem. Jich la yaq'uex te bit'il ayex ta ora in to: Ja'ex lumex yu'un stuquel.

Éxodo 23:22

Yan teme ya ach'uunbeyic ta melel te sc'ope, soc teme ya apas spisil te bit'il calojbeyexe, ya me jcontroin te mach'atic ya scontroinate. Ja' me jcontro ya xc'ot te mach'atic acontroe.

Tito 2:14

Ja' la yac' sba ta lajel ta jwentatic stuquel. Jich la scoltayotic loq'uel ta bay te bila amen jpasojtique, soc jich la yutstesbotic co'tantic swenta yu'un lumotic yu'un ya xc'ot te toyol co'tantic ta spasel spisil te bila lec ta pasele.

Deuteronomio 10:14

Na'aic me te ja' yu'un te Cajwaltic Dios te ch'ulchan soc te mero stoyolile, te lumq'uinal soc spisil te bitic ay tey a.

Éxodo 9:29

Te Moisés la sjac': —Ja' nax teme loc'on bael a ta lume, ya me jtoy jc'ab ta sc'oponel te Cajwale. Jich me ya xcom te bat soc te chawuque. Pero tey me ya ana' a te spamal q'uinal ja' yu'un te Cajwale.

Salmos 24:1

Te Cajwaltic ja' yu'un ta spamal te balumilale, ta spisil te bitic ay soc ta spisil te bitic cuxajtique.

1 Corintios 10:26

Melel spisil te bitic ay ta balumilale, ja' yu'un stuquel te Cajwaltique.

Job 41:11

¿Ay bal mach'a ya spajaltay sba soc te mero lec aye? Ma'yuc ni jtuluc ta balumilal.

Deuteronomio 5:2

“Te Cajwaltic te Dios cu'untic la spas trato ta jtojoltic ta wits Horeb.

Hebreos 11:8

Ta swenta xch'uunjel yo'tan te Abrahame, la xch'uunbey smandal Dios te c'alal la yich' iq'uel yu'une. Jich loc' tel ta slumal, bajt' ta banti q'uinal te ya x'ac'bot yu'unin yu'un te Diose. Ja'uc me to, ma ba sna'oj stojol te banti ya xc'ot te c'alal jajch' loq'uel ta slumale.

Isaías 43:1

Ja'uc me to, ta ora yo'tic, Israel, te lumat yu'un Jacob, te Cajwaltic te la xchicnantesate, ya yalbat: —Ma xiwat, jo'on la cac'atix ta libre; jo'on la quic'at ta abiil, jich la cu'uninat.

Isaías 41:8

Te Cajwaltic ya yal: —Aiya awaiy stojol Israel, lum yu'un Jacob, te cabat te jtsaoj jtuquele, ja' te lum te sts'umbal Abraham, te jun co'tan jba soque:

Salmos 25:10

Spisil te beetic yu'un Cajwaltic ay xc'uxul-o'tanil soc te bila melele. Ay ta swenta te mach'atic ya xch'uunic te trato soc te mandaliletic yu'une.

1 Samuel 15:22

La sjac' te Samuel: —Ja' buen lec yo'tan Cajwaltic yu'un teme ya yich' ch'uunel smandal; ma ja'uc bayal sc'oplal teme ya cac'beytic milbil smajt'an soc chic'bil smajt'ane. Ja' mero bayal sc'oplal te ya jch'uunbeytic smandal soc teme ya cac' ta co'tantic te bi ya yale; ma ja'uc bayal sc'oplal te ya cac'beytic milbil smajt'an soc smajt'anin xepuil chije.

Josué 24:24

Te lum la sjaq'uic: —Te jo'otic ya me cac' yabatinotic te Cajwaltic te Dios cu'untic, ya me jpastic te bila ya yalbotic —xiic.

Isaías 1:19

Teme ya xc'ot ta awo'tanic xch'uunel te jmandale, ya me awe'elinic te bi slequil ya yac' te lumq'uinale.

1 Reyes 8:53

Melel te ja'at Cajwal, parte la awac', yu'un la awu'unin te antiguo jme'-jtatic ta yolil te yantic lume. Jich awaloj ta swenta te awabat Moisés te c'alal la awic' loq'uel tel ta Egipto —xi' ta sc'oponel Dios te Salomón.

Deuteronomio 28:1

“Teme mero melel te ya ach'uunbeyic sc'op te Cajwaltic Diose, soc te ya apasbey bael spisil te mandaliletic yu'un te ya calbat apas ta ora in to, ja'at me toyolat ya xc'oat yu'un spisilic te lumetic ayic ta q'uinale.

Isaías 56:4

Melel te Cajwaltic, jich ya yal: —Te eunucoetic, teme ya yich'bonic ta muc' te bi c'aalil yu'un te cux-o'tanile, teme ya xch'uunic spasel te sc'anjel co'tane, soc teme jun yo'tan ay ta sna'el te trato cu'une,

Éxodo 24:7

La stsacbey slibroil te trato, soc la yawtaybey yaiy ta stojol te lume. Jich la yalic yu'un: —Ya me jpastic spisil te bila ya sc'an te Cajwaltic, ya me jch'uunbeytic te sc'ope —xiic.

Jeremías 7:23

Te bila mandal la calbey, ja' te ya xch'uunbonic te jc'ope, melel jo'on te Dioson yu'unic ya xc'oone, soc ja'ic te lum cu'une. La calbey te tojuc ya yac' sbaic jich bit'il la jpas ta mandal, swenta yu'un lecuc me ya xc'otic ta loq'uel a.

Deuteronomio 11:27

Te bitic swenta bendición, ja' teme ya ach'uunbeyic te mandaliletic yu'un te Cajwaltique, ja' te ya calbeyex ta ora in to.

1 Corintios 10:28

Yan teme ay mach'a la yalbeyexe: “Ja' in ti'bal to, ja' milbil smajt'an te loc'ombaetic”, teme xie, ta scaj te la yalbat ta jamal, ma me xati', swenta yu'un ma me xjin yo'tan yu'un. [Melel spisil te bitic ay ta balumilale, ja' yu'un te Cajwaltique.]

Deuteronomio 14:21

“Ma me xati'ic te chambalam ya xlaj ta stuquel nax, melel te ja'exe, ch'ultesbilex yu'un te Cajwaltic te Dios cu'untique. Ya me xju' ya awac'bey te jyanlumetic nainemic ta alumalique, ya me xju' ya sti'ic stuquel. Soc ya xju' ya achonbeyic te jyanlumetic c'axel nax ayique. “Ma me xapayic ta ya'lel xchu' sme' te ch'in tentsune.

Jeremías 10:16

Mero yan yilel stuquel a te Dios yu'un Jacob, jchicnanteswanej yu'un spisil te bitic aye. La stsa Israel te mero yu'un stuquele. “Ajwalil te Spisil ya xju' yu'un”, xi' te sbiile.

Cantares 8:12

Te jmil ta jsejp plata, ja'at awu'un, Salomón, jich te jcananetique lajunwinic (200) yu'unic. Yan te jo'one ja' nix ya jcanantay te ts'usubil cu'une.

Hebreos 8:9

“Ma pajaluc soc te trato la jpas soc te neel me'il-tatiletic yu'unique, te c'alal bi ora la jnit loq'uel tel ta sc'abic ta sq'uinal Egipto. Melel ma jc'axeluc la yich'bonic ta muc' te trato la jpase, jich yu'un te jo'one la quijq'uitay ta co'tan”, xi' te Cajwaltique.

1 Pedro 2:9

Yan te ja'exe, tsabilex yu'un Dios soc te lum yu'une. Sacerdoteex yu'un te Muc' Ajwalile. Ch'ul muc'ul lumex soc manbilex yu'un te Diose, swenta yu'un ya me apuquic ta alel te jchajp at'eliletic spasoj te Diose te bit'il la yiq'uex loq'uel tel ta bay te ijc' q'uinale soc te la yiq'uex ochel ta bay te saquil q'uinal te jelawen yutsile.

Génesis 17:9

Albot xan yu'un Dios te Abraham: —Te ja'ate ya me awich'bon ta muc' te trato albil cu'un ja'at soc jayeb ats'umbal.

Éxodo 6:7

Ja' mero lum ya xc'oex cu'un, te jo'one ja' me Dioson awu'unic. Jich me ya ana'ic te jo'on Ajwalilon te Dioson awu'unique, te la jcoltayex loq'uel ta tulan at'el te tenbilex ta spasel yu'un te egipcioetique.

Éxodo 8:22

Te c'alal ya xc'ot ta pasel, ma ba ya cac' xc'ot ta Gosén, te banti ay te lum cu'une. Ma'yuc jcojt'uc ja ya xc'ot tey a. Jich me ya ana' a te ja' Ajwalilon jtuquel te joinej te lume.

Deuteronomio 28:9

“Teme ya ach'uun spasel te mandaliletic yu'un, soc teme ja' ya at'unbey te be yu'une, te Cajwaltic Dios stalel me ch'ul lum ya xc'oat yu'un, jich nix te bit'il jc'axel yalojbate.

1 Crónicas 17:22

melel la awic' te Israel te ja' lum ya xc'ot awu'un ta sbajt'el q'uinal, soc Diosat yu'unic ya xc'oat, Cajwal.

Ezequiel 16:8

“Cha'c'axon xan ta ats'eel yan buelta. La quilat, ataojix amuc'ul, yorailix te ya xbaat ta ich'ele. La jlim bael ta atojol te jmuc'ul c'u'e, la jmucbat a te abaq'uetal t'anale. Soc tey ora la cal jba ta jamal ta atojol a, soc tey ora la jchap jc'optic swenta trato, jich la cu'uninat. Jo'on Ajwalilon te jich caloje.

Amós 3:2

—Ja'ex nax atuquelic te la jtsaex ta yolilic spisil te lumetic ta balumilal. Jich yu'un ya cac'beyex castigo yu'un spisil te bila amen apasojique —xi'.

Amós 6:1

Ya me yil swocolic te mach'atic ayic ta cuxinel ta Sión. Ya me yil swocolic te mach'atic ja' smuc'ulinej yo'tanic te cuxinel ta Samaria, ja' te mach'atic jtsobwanejetic yu'un te nación te muc' sc'oplalique, soc te mach'atic te israeletic ya xbajt'ic ta stojolique.

Éxodo 34:9

Jich la yal: —¡Cajwal! ¡Cajwal! Teme melel te lec c'oemon ta asite, joinawotic bael jiche. Te lume, melel nix a ma spejc'an sbaic ta jyalel, ma xch'uunic mandal. Pasbon perdón yu'un a te jmul soque. Lumucotic me awu'un —xi' te Moisese.

Levítico 20:24

Jo'on ya calbeyex ta jamal, te ja'ex awu'unic ya xc'ot te slum-sq'uinalique. Jo'on nix me ya cac'beyex awu'uninic te lumq'uinal te banti ya x'oquin leche soc chab c'oeme. “Jo'on Ajwalilon Dioson awu'unic, yan me awilelic cu'un te bit'il yantic lumetique.

Deuteronomio 9:29

Yan te ja'ate lum awu'un, ja'at awu'un ta spisilic. Ja'at la aloq'ues tel ta Egipto ta smuc'ul yip awu'el, soc ta swenta bit'il la atoy ac'ab”, xoon ta stojol Cajwaltic ta awentaic.

Deuteronomio 26:19

Te Cajwaltic muc' me ya xc'oat yu'un ta stojol yantic nacionetic, soc muc' me yutsil ac'oplal ya xc'oat yu'un. Ya me x'ich'otat ta muc', soc ya me xpujc' ac'oplal ta stojol te yantic nacionetic la spase. Jich me ya xc'oat te bit'il la yalixe, ch'ul lum me ya xc'oat yu'un te Cajwaltic te Dios cu'untique —xi' te Moisese.

Job 41:3

¿Ya bal xba yalbat wocol swenta yu'un ya ac'uxtay, soc biq'uitic bal sc'op ya xc'o yal wocol ta atojol?

Jeremías 13:11

Jich bit'il te mach'a tulan ya xchuc xch'ujt' ta xchujq'uil, jich ta co'tan spisil te lum Israel soc spisil lum Judá, jun nax c'oem ta jtojol. Ja' lum cu'un ta neelal, te sc'oplal la yac'onic ta na'el stojol, soc ya yalbonic wocol yu'un cutsilal te jichuque. Ja'uc me to, ma la xch'uunbonic c'op. Jo'on Ajwalilon, jich ya cal —xi'.