Éxodo 15:26 - Bible in Tzeltal de Oxchuc y Tenejapa

²⁶ Jich la yal: —Teme jun awo'tanic ya awaiybonic stojol te bila ya cal te jo'on Ajwalilon te Dioson awu'unique, soc teme ya apasic te bila lec co'tan yu'une, teme ya ach'uunic te mandaliletic cu'une, soc teme ya ac'otes ta pasel te bila ya yal te mandaliletic cu'une, ma'yuc bi ora ya xtal tulan chamel ta atojolic te bit'il la cac'bey te egipcioetique, melel jo'on te Ajwalilon te ya jlamantesbeyex achamelique —xi' te Cajwaltique.

Bible in Tzeltal Bachajón

²⁶ hich la yal: Teme yac awa'iybe ta lec te sc'op Jehová te Dios awu'unic, teme yac apas te bin toj ta pasel ta stojol, teme yac awich' ta cuenta te mandariletic yu'un soc teme yac ach'uhun spasel spisil te chahpambil mandariletic yu'une, ma ba ya ca'bat junuc te chamel te la jca'be te egipciohetic, como ho'on Jehovahon te jpoxtaywanejon awu'unic, xchi.

Éxodo 15:26 Referans Kwoze

Salmos 103:3

Ja' te ya spasbon perdón yu'un spisil te bitic ma lecuc jpasoj; ja' te ya slamantesbon spisil te jchamel;

Deuteronomio 7:15

Te Cajwaltic ma me xyac' noptsajuc spisil chameletic ta atojolic, soc ma xyac' tel ta atojolic te bitic mero xiweltic sba te ya x'uts'inwane, te jich bit'il ana'ojic ta lec te la yac' c'otuc ta stojolic te egipcioetique. Yan ta spisil te acontroique, ya me yac'bey swocolic stuquelic.

Éxodo 23:25

Ja' nax me xaquejan abaic ta jtojol jo'on te Ajwalilon te Dioson awu'unique, melel ja' ya cac'bat bendición yu'un awe'el soc te ja' ya awuch'ique. “Ma xcac' xnoptsaj chamel ta atojol.

Salmos 147:3

Ja' ya slamantesbey xc'uxul te smel-o'tanique; ja' ya spotsbey yejch'en stuquel.

Jeremías 33:6

Ja'uc me to ya jpoxtay, ya cac' lecubuc q'uinal yaiyic, soc ya me cac' yaiybeyic yutsilal ta lec te lamal-o'tanil, soc ya me cac' te jun yo'tanique.

Oseas 6:1

La'ic ta apisilic, sujt'ucotic ta stojol te Cajwaltique. Ja' nix la stsacotic, ja'uc me to, ja' nix ya xpoxtayotic; la yejch'entesotic, ja'uc me to, ya spotsbotic.

Levítico 26:13

Jo'on me te Ajwalilon te Dioson awu'unic, te la quiq'uex loq'uel tel ta Egipto, te ja' la quiq'uex loq'uel tel yu'un te ma ba ya smozoinexix a te egipcioetique. Jo'on la jin te yugo te ay awocolic yu'une, buen atoyoj ajolic ya xbeenex cu'un.

Job 5:18

Teme ay ja' nix ya yac' ejch'ene, ja' nix me ya spots yan buelta; teme ta sc'ab ya xmajawane, ta sc'ab nix me ya xpoxtaybey.

Deuteronomio 28:60

Ya me yac' sujt'uc tel ta atojol te tulan chameletic la awilic ta Egipto, te bayal la yac'bat xiwele, spisil me ora ya yac'bat awocol.

Deuteronomio 12:28

“Aiya awaiyic soc ch'uunaic spasel te bila ya calbeyexe, swenta yu'un jich me lec ya x'ainex soc awal-anich'nabic spisil ora a, swenta te bit'il ja' ya apasic te bila lec yo'tan yu'un, soc te bila stojil ta pasel ya yil te Cajwaltic te Dios cu'untique.

1 Reyes 11:33

Melel te Salomón la yijq'uitayonix ta yo'tan, ochix ta xch'uunel Astarté, antsil-dios yu'un sidonetic; te Quemos, dios yu'un moabetic; soc Milcom te dios yu'un amonetique. Ma lecuc ta jsit te bitic spasoje. Ma ba la yac' c'otuc ta pasel yu'un te mandaliletic cu'un soc te c'op chapal cu'une. Ma jichuc la spas te bit'il la spas te David, ja' te state.

Isaías 57:18

Quilojbeyix te yat'ele, ja'uc me to, ya me jlamantesbey xchamel. Ya me cac'beyix xcux yo'tan; jc'axel ya cac'bey lamajuc yo'tan. Ya jmuc'tesbey q'uinal yaiyic te mach'atic smeloj yo'tanic.

Deuteronomio 13:18

teme ya ach'uunbeyic smandal te Cajwaltic te Dios cu'untique, soc te ya awaq'uic c'otuc ta pasel spisil te mandaliletic yu'un te jo'on la cac'beyex ta ora in to, soc te ya apasic te bila lec ta sit te Cajwaltique.

2 Reyes 20:5

—Sujt'an bael, albeya te Ezequías te jwentainwanej yu'un te lum cu'une: “Te Cajwaltic te Dios yu'un te antiguo ame'-atat David, jich la yal: ‘Jo'on la caiybatix te ac'ope, soc la quilbatix te ya'lel asite, ja' yu'un ya me jch'aybat te achamele. Li' ta oxeb c'aal ya me xju'ix ya xbaat ta templo yu'un Cajwaltic a.

Deuteronomio 28:27

“Te Cajwaltic ya me yac'bat awocol ta swenta c'a'el chin, jich te bit'il la spasbey te egipcioetique. Ya me yac' te ay me bila ya yac' wolajuc ta abaq'uetal, sal soc spintoil, ma me xju' ya apoxtay aba.

Ezequiel 18:5

“Te winic toj yo'tane, ja' me te mach'a ya spas te bila stojile, soc te bila yich'oj swentaile.

Jeremías 8:22

¿Ma bal ayuc jtebuc poxil ta Galaad? ¿Ma bal ayuc mach'a ya xpoxtaywan tey a? ¿Bi yu'un ma xcol te jlumale?

2 Reyes 22:2

Te yat'el Josías lec ta sit te Cajwaltique, melel ta spisil te bitic la spase, ja' la st'unbey te yat'el David, te ja' antiguo sme'-state. Mero ja' la st'unbey, ma'yuc banti jowej yu'un.

Levítico 26:3

“Teme ya ach'uunbonic spasel te mandaliletic cu'une, teme ya apasic ta spisile, soc teme jich ya apasic spisil ora te bit'il ya cale,

1 Reyes 11:38

Teme ya ach'uunbon spisil te bila mandalil ya calbate, soc teme toj ta jsit te bitic ya apase, soc teme ya awac' c'otuc ta pasel te bila chapal cu'un soc te mandaliletic cu'une, jich te bit'il la spas te cabat David, ya me joinat. Soc ya me cac' te stalel ya xjil ta ajwalil te ats'umbale, jich te bit'il la jpasbey te sts'umbal David, soc ya me cac'bat te Israele.

Deuteronomio 28:58

“Teme ma ba ya apas bael spisil te mandaliletic ts'ibubil jilel li' ta libro in to, soc teme ma ba ya awich' ta muc' te yutsil xch'ul sbiil te Cajwaltic Dios, soc teme ma ba ya axi',

Éxodo 12:29

Ta olil ajc'ubal a te Cajwaltic la yejch'entes ta lajel sba snich'anic ta juju-jchajp sna te egipcioetique. Spisilic soc te sba snich'an faraón te ya xnajc'aj ta smuc'ul nactijibe, asta te mach'a ay ta chucjibale. Soc uuc te sba yalatac te xchamsbalamique.

Éxodo 19:5

Jich yu'un teme ya awaiybonic spisil jc'op, soc teme ya awich'bonic ta muc' te trato cu'une, mero lumex me cu'un, te ma'yuc yan lumetic ya spajex, melel ja' cu'un spamal te balumilale.

Éxodo 19:6

¡Te ja'exe ajwalilex soc sacerdoteex soc ch'ul lum c'oemex ta jtojol!” uta me —xi' te Diose.

Éxodo 20:2

—Jo'on Ajwalilon, te Dioson awu'une, te la jloq'uesat ta Egipto ta banti ayat ta mozoile.

Deuteronomio 12:25

Ma me xalo'ic, jich lec ya xc'oex soc a te awal-anich'nabic, ta swenta bit'il ja' ya apasic te bila stojil ta pasel ta sit te Cajwaltique.

Deuteronomio 32:39

Jo'on nax jtuquel te Diosone, ma'yuc yan dios pajalon soc. Jo'on ya cac' cuxlejal, jo'on nix ya xju' cu'un slajinel. Jo'on ya cac' ejch'en, jo'on nix ya xju' cu'un xpoxtayel. Ma'yuc mach'a ya xju' yu'un ya scoltay sba ta jc'ab jtuquel.

2 Reyes 2:21

te Eliseo bajt' ta bay sloq'uibja', la xch'oj ochel tey a te ats'ame, jich la yal: —Jich ya yal te Cajwaltic: “Jo'on la jlecubtesix te ja'e. Ma'yuquix bi ora ya xjajch' chamel, soc ma'yuquix bi ora ya sboltes te lume”, xi' te Cajwaltique —xi' te Eliseo.

Jeremías 7:23

Te bila mandal la calbey, ja' te ya xch'uunbonic te jc'ope, melel jo'on te Dioson yu'unic ya xc'oone, soc ja'ic te lum cu'une. La calbey te tojuc ya yac' sbaic jich bit'il la jpas ta mandal, swenta yu'un lecuc me ya xc'otic ta loq'uel a.

Jeremías 11:7

C'alal la jloq'ues tel ta Egipto te antiguo ame'-atatique, la jultesbey yo'tanic te ja' nax ac'a yich'bonic ta muc' te trato. Ja' to tel yo'tic abi, asta c'alal ora yacon ta sjultesbeyel yo'tanic.

Jeremías 17:24

‘Jo'on Ajwalilon, jich ya cal: Ch'uunbonic jc'op ta melel, ma me x'awich'ic bael ni junuc ijc'atsil ta ochibaletic yu'un sts'ajc'ul te lum te bi c'aalil yu'un cux-o'tanil; ac'bonic cu'unin in c'aal to, ma me xapasic ni jtebuc at'el a.

Jeremías 30:17

Ya me cac'bat xan yutsil q'uinal awaiy, ya jpoxtaybat te awejch'ene; manchuc me jich ya yalbat ac'oplal te acontrotaque: “Te Sión ijq'uitaybilix, ma'yuc mach'a ya xc'opojix yo'tan yu'un”, teme xiique. Jo'on Ajwalilon, jich ya cal —xi' te Cajwaltique.

Números 12:13

Jich yu'un te Moisés la yalbey wocol te Cajwaltic: —Wocoluc, Dios cu'un, ya calbat wocol, ya me alamantesbey te xchamele —xi' te Moisese.

Deuteronomio 5:1

Te Moisés la stsob spisil te lum Israel, jich la yalbey: —Aiya awaiyic, israeletic, te mandaliletic soc te bila chapal ya calbeyex awaiyic yo'tic, nopaic ta lec, soc jich me xapasic bael ta spisil ora.

Salmos 81:9

Ma me x'adiosinbeyic te diosetic yu'un jyanlumetic; ma me xach'uunic diosetic teme ma ja'uc ya awil te Dios awu'une.

Isaías 55:3

La'ic ta jtojol, soc aiya awaiyic, aiybon awaiyic stojol te jc'ope, yu'un jich me ya xcuxinex. Te jo'one ya jpas trato ta sbajt'el q'uinal ta atojolic, jich me ya xc'ot ta pasel te bit'il caloj ta swenta xc'uxul co'tan ta stojol David.

Oseas 11:3

Ja'uc me to, jo'on la quic' ta beel te lum Efraín soc la jp'ijubtes ta beel; pero ma c'ot ta yo'tanic te jo'on la jcanantaye.