Ester 4:16 - Bible in Tzeltal de Oxchuc y Tenejapa

¹⁶ “Baan tsoba spisilic te judioetic ayic ta Susa, albeya ac'a scom swe'elic cu'un. Ma me ayuc bi ya swe' yuch'ic oxeb c'aal soc oxeb ajc'ubal. Jo'on soc te criadaetic cu'une jich me ya jpastic uuc. Ta patil ya me xba quil te muc' ajwalile, manchuc me ma jichuc ya yal te leye. Teme ya smilon a, ac'a smilon”, xi'.

Bible in Tzeltal Bachajón

¹⁶ Bahan, tsoba spisil te judiohetic ayic ta Susa, coma awe'elic ta jcuenta. Ma me xwe' x'uch'ex oxeb c'ahc'al soc oxeb ahc'abal. Ha nix hichon soc te ach'ixetic cu'un ya jcom jwe'elcotic. Patil ya x'ochon bahel ta yilel te ajwalil, aunque ma hichuc ya yal te ley. Teme ya xlajon, lajucon, xchi.

Ester 4:16 Referans Kwoze

Hechos 20:24

Ja'uc me to, ma ba ya jmel co'tan yu'un. Ma'yuc sc'oplal te bit'il ay te jcuxlejale. Ja' nax ay sc'oplal ta co'tan te bin nax co'tan ya jloq'ues te jayeb c'aal ay ta jwenta, ja' to c'alal te ya xc'ot coraile, soc te ya ju'tes cat'el te yac'ojbon ta jwenta spasel te Cajwaltic Jesuse, ja' bi ja' te la yac'bon ta jwenta yalel sc'oplal te jcoleltic ta swenta nax yutsil yo'tan cu'untic te Diose.

2 Crónicas 20:3

Te Josafat xiw yo'tan yu'un, la snop te ya sjojc'obey te Cajwaltique. La spucbey sc'oplal te ya scom swe'elic ta spamal Judá.

San Lucas 9:24

Melel te mach'a ya xc'uxtay sba soc te xcuxlejale, ch'ayel me ya xbajt' soc te xcuxlejale. Yan te mach'a ya yac' sba ta lajel soc xcuxlejal ta jwentae, ya me xcuxin stuquel.

Génesis 18:19

Melel tsabil cu'un te ya me spas ta mandal yal-snich'nab soc te mach'atic ay yu'un ta patil bael, te ya spasic spisil te bitic ya cac'bey snopique, te ya me spasic spisil te bitic lec soc te bitic toj ta pasele, swenta yu'un jich me ya jc'otes ta pasel te bila calojbey sc'oplal ta jamale”, xi' ta yo'tan.

Josué 24:15

Teme ma x'ac'an ya awac' abaic ta abatinel ta stojol te Cajwaltic, nopa awaiyic mach'a ya awac' abaic ta abatinel ta stojol: teme ja' te diosetic la yac' sbaic ta abatinel yu'un te antiguo ame'-atatic ta ti'ti'ja' Éufrates, o teme ja' te diosetic yu'unic te amorreoetic te nainemic ta q'uinal to. Te jo'on soc te mach'atic ay cu'un ta jna, ya cac' jbajtic ta abatinel ta stojol te Cajwaltique —xi'.

2 Samuel 10:12

Ma me xiwat. Ta spisil me co'tantic ya cac'tic puersa ta guerra ta swenta scoltayel te nación cu'untique, ja' te lumetic yu'un te Dios cu'untique. Ja' me ac'a spas te bi lec ta pasel ya yil te Cajwaltique —xi'.

Génesis 43:14

Te Dios te Spisil ya xju' yu'une, ac'a scoltayex, ac'a stijbey yo'tan te ajwalil te yacuc xc'uxtayexe, yacuc scoltaybotic tel te abanquilic chucul jilele, soc te manchuc ya yuts'inbotic te Benjamín. Teme spisil ya xpojboton te jnich'nabe, jich nanix, bi c'an cal —xi' te mamal Israele.

Isaías 22:12

Te bi c'aalil ya cale, te Cajwaltic te Spisil ya xju' yu'une, la yiq'uex ta oq'uel soc ta mel-o'tan, te ya ajox loq'uel stsotsil ajolique, soc te ya alapic te ch'ixal paq'uetic.

Ester 5:1

C'alal c'ax oxeb c'aal, te Ester la slap te sc'u' swenta antsil-ajwalile. Och bael ta yamaq'uil ta yutil spalacio te muc' ajwalil, ba stejc'an sba ta stojol sala ta banti nacal ta smuc'ul nactijib te muc' ajwalile.

Filipenses 2:30

Melel jteb ma laj yu'un te bit'il la yac' sba ta abatinel ta stojol te Cristoe. Ja' te bit'il ma la xc'uxtay sba te la yac' sba ta abatinel cu'une. Ja' la ajelolinic te bit'il ma ju' awu'unic te tal awac' abaic ta abatinel cu'une.

Romanos 16:4

Ja'ic te c'an yac' sbaic ta lajel cu'un, jich colon ta swentaic. Jich yu'un te jo'on soc spisil te jyanlum jch'uunjeletic, bin nax co'tantic yu'unic.

Hechos 27:33

Te c'alal nopol ya sacubix te q'uinale, te Pablo tulan la yalbey spisil te yantic te yacuc we'uquic jtebuc. Jich la yal: —Xchanlajunebalix c'aal in to te ma ba wayalexe soc te ma ba we'emexe.

Hechos 21:13

Ja'uc me to, la yal te Pabloe: —¿Bi yu'un ya x'oq'uex? ¿Bi yu'un ya awac'bonic jmel co'tan? Te jo'one, jun co'tan chican teme chuquel o milel ya xc'o quich' ta Jerusalén ta swenta te Cajwaltic Jesuse —xi'.

Hechos 10:7

Te c'alal bajt' te ch'ul abat te yac ta c'op soque, la yic' tel cheb te abatetic yu'un soc jtul soldado te spisil ora ya yabatin soc te jun yo'tan xch'uunej te Diose.

Hechos 9:9

Oxeb c'aal ma la yil q'uinal, soc ma ba we' xujt'uc, ni ayuc bi la yuch' jtebuc.

San Mateo 12:40

Melel te Jonase ain ta xch'ujt' muc'ul ballena-chay oxeb c'aal soc oxeb ajc'ubal. Ja' nanix jich uuc te Nich'anile ya me x'ain ta muquenal oxeb c'aal soc oxeb ajc'ubal.

1 Samuel 19:5

Manchuc me la sna' te ay lajel tey a, pero loc' sba ta yo'tan te ba smil te filisteo. Jich te Cajwaltic jc'axel la scoltay ta sc'abic ta spisil israeletic. Te ja'at la awil, bin nax awo'tan yu'un te jich c'ot ta pasele. ¿Bi yu'un te ya ac'an ya ata amul ta smilel te mach'a ma'yuc bi snopoje, jich te bit'il ya ac'an ya amil te David te ma'yuc bi amen spasoje? —xi' te Jonatán.

San Juan 19:22

La yal te Pilatoe: —Te bila la jts'ibuye, la nanix jts'ibuy abi —xi'.

Ester 4:3

Soc ta spisil ta juju-jpam q'uinal te banti c'ot sc'op soc te smandal te muc' ajwalile, bayal la smel yo'tanic te judioetique. La scom swe'elic, oq'uic, bic'tal-c'opojic, ay tsobolic la smejts'an sbaic ta stanul c'ajc' soc la slapic ch'ixal pac', jich la yaq'uic ta ilel te smel-o'tanique.

Ester 4:15

Te Ester jich la sut te c'op ta stojol te Mardoqueo:

Ester 4:17

Jich te Mardoqueo ba spas spisil te bila albot yu'un te Ester.

Jeremías 36:9

Ta sbalunebal u ta yo'ebal ja'wil yat'el ta ajwalil a te Joacim, snich'an Josías, te muc' ajwalil yu'un Judá, la yich' pucbeyel sc'oplal te ya spasic ayuno ta stojol Cajwaltic ta spisilic te mach'atic yajwal Jerusalén soc mach'atic ay talemic ta yantic lumetic yu'un Judá.

Daniel 2:18

Jich yu'un jajch'ic ta sc'anel coltayel yu'un Dios ta ch'ulchan ta sna'beyel sc'oplal te bila wocol ta na'ele, soc swenta yu'un jich ma ba ya yich'ic milel soc a te mach'atic ay sp'ijilic te ayic ta Babilonia.

2 Reyes 7:4

Teme ya jnoptic ya x'ochotic bael ta yutil te lume, ya xlajotic ta wi'nal, melel bayal wi'nal tey a. Teme li' ya jnajc'an jbajtique, ja' nix jich ya xlajotic. Ja' lec c'axucotic bael ta banti scampamento te siriaetique. Teme ma ba ya smilotique, ya me xcuxinotic. Teme ya smilotique, jichuc, melel ya nix xlajotic a —xiic.

Esdras 8:21

Patil la cal mandal ta comel we'elil ta sts'eel muc'ja' Ahava, swenta yu'un ya me caltic ta jamal te jmultic ta stojol te Dios cu'untique, soc yu'un ya jc'anbeytic te lecuc ya yic'otic bael jo'otic soc mach'atic ay cu'untic, soc bitic ay cu'untic.

Ester 9:31

Tey la spasic ta mandal a te ya spasic te q'uin Purim ta yorail te bitic c'aalil la yich'ix alele, mero jich nix te bit'il la yaliquix mandal te Mardoqueo soc te antsil-ajwalil Ester ta stojolic, soc ta stojolic uuc te patil alnich'anetic yu'unique. Ja' nix jich la yich' alel sc'oplal ta comel we'elil, soc te ya yoq'uetay ta na'el te bila c'ot ta pasele.