Esdras 1:2 - Bible in Tzeltal de Oxchuc y Tenejapa

² “Ciroon muc' ajwalilon yu'un Persia, ya cal ta jamal in to: Te Ajwalil te Dios ta ch'ulchane, la yac'bonix ta jc'ab spisil q'uinaletic yu'un te ajwaliletic ta balumilale. La yac'bon ta jwenta spasel templo ta Jerusalén te ay ta sq'uinal Judá.

Bible in Tzeltal Bachajón

² Hich ya yal te Ciro ajwalil yu'un Persia: Te Jehová te Dios ta ch'ulchan, ya'beyejon ta jcuenta spisil ta ban c'alal smacoj te ajwaliletic ta bahlumilal; soc ha la yalbon mandar te ya jpasbe sna ta Jerusalén te ay ta sq'uinal Judá.

Esdras 1:2 Referans Kwoze

Isaías 44:26

Ja'uc me to, ja' ya cac' c'otuc ta pasel sc'op te abatetic cu'une; soc te lecuc ya xc'ot ta loq'uel te bitic chajbanbil yu'un te mach'atic jticuneje. Ya me cal ta jamal, te Jerusalén ya xnoj xan yajwal, soc te lumetic yu'un ta Judá ya me yich' xan pasel. Jo'on ya cac' jajch'uc xan te jinem ts'ajq'uetic yu'une.

Daniel 5:23

Pero ma jichuc la apas. Ja'at te muc' ajwalilate, la alaban te Cajwaltic te ay ta ch'ulchane, melel la aticun ta ich'el tel ta amesa te vasoetic soc te muc'ul tazaetic yu'un templo ta Jerusalén. Ja'at soc te mach'atic ic'bil awu'une la awuch'ic vino a, soc la awalbey yutsil sc'oplal diosetic a te pasbil ta oro, ta plata, ta bronce, ta hierro, ta te' soc ta ton, ja'ic te ma xyilic q'uinal, te ma xyaiyic c'op, soc te ma'yuc bi ya sna'ique. Yan te Dios yich'ojbat ta sc'ab acuxlejal te ja'at te muc' ajwalilate, soc te ja' nax ta swenta stuquel te ay bila ya xju' awu'un spasele, ma ba ya awalbey yutsil sc'oplal stuquel.

Daniel 4:32

Ya me awich' loq'uesel ta yolil te ants-winiquetic, ya me xbaat ta nainel soc chambalametic. Ya me alo' wamal jichuc wacax. Jich me ya x'ainat juqueb ja'wil tey a, ja' to me teme c'ot ta awo'tan te ay yip yu'el ta stojol spisil nacionetic ta balumilal te Dios mero toyole, soc te ja' stuquel te ya yac'bey yat'el ta ajwalil te mach'a ya sc'an ya yac' ochele —xi'.

Daniel 4:25

Te ja'at muc' ajwalil, ya me awich' pijt'esel ta stojol te ants-winiquetique, ya me xba ajoin ta nainel chambalametic. Ya me alo' wamaletic jichuc wacaxetic. Ya me yajts'esbat abaq'uetal te ts'ujule. Jich me ya x'ainat juqueb ja'wil tey a, muc' ajwalil, ja' to teme c'ot ta awo'tan te ay yip yu'el te Dios ya x'at'ej ta stojol ajwaliletic te ch'ich'-baq'uet naxe, soc te ja' nax stuquel ya yac' ochuc yat'el ta ajwalil te mach'a ya sc'an ya yac' ochel stuquele.

Daniel 2:28

Pero ay jun nax Dios ta ch'ulchan te ya sna' te bila wocol ta na'ele, ja' la yac'bat ana' te bila ya xc'ot ta pasel ta patil baele. Ya me calbat awaiy, muc' ajwalil cu'untic, te bila swentail te awaiche, soc te bitic la awil la awaiy te c'alal wayalate:

Daniel 2:21

Ja' ya sjelbey sc'aalelal, soc yajtalul. Ya xju' yu'un ya sloq'ues ajwaliletic, soc ya yac' ochel ajwaliletic. Ya xju' ya yac'bey sp'ijil yo'tan te mach'a ay sp'ijile; ya xju' ya yac'bey snopjibal yu'un te mach'a ay bila sna'oje.

Jeremías 10:11

(Ja'ex, israeletic, albeyaic te mach'atic ma'yuquic ta stojol te Diose: —Te diosetic, te ma ja'uc la spasic te ch'ulchan balumilal, ya me xch'ayic ta jc'axel ta balumilal; ni jtuluc ma xjilic ta yet'al ch'ulchan —xaex me.)

Isaías 66:1

Te Cajwaltic ya yal: —Ja' jnactijib te ch'ulchane, te balumilal, ja' scajtijib cacan. ¿Banti ya xju' ya apasbon jna? ¿Banti ya xju' ya apasbon jun awilal yu'un ya jcux co'tan a?

2 Crónicas 2:12

Soc la yal xan: “Bin nax me yutsil te Awajwal, te Dios yu'un lum Israel, te la spas te ch'ulchan soc te balumilale, melel la yac'bey jtul snich'an te muc' ajwalil David te ay sp'ijil yo'tan, te buen p'ijtesbil soc te ya sna' stsajtayel spisile. Ja' ya yac' ta pasel templo yu'un te Yajwal soc te muc'ul na yu'un te bit'il muc' ajwalile.

1 Reyes 8:27

“¿Melel bal te ya xnainat ta sba balumilal te Diosate? Melel te ch'ulchan te mero muq'ue, ma ba ya x'ochat a. ¿Ja'uc to balix a jiche te templo la jpasbate?

Esdras 1:5

Te jwentainwanejetic yu'un jujun na ta Judá soc ta Benjamín soc te sacerdoteetic, soc te levitaetique, ja'ic ta spisil te tijbot yo'tanic yu'un te Diose, la xchajban sbaic yu'un te bael ta Jerusalén, soc ta xcha'pasel xan te templo yu'un te Cajwaltique.

Esdras 3:7

Jajch' yac'beyic taq'uin te albañiletic, soc te carpinteroetic. Soc te winiquetic ta Tiro soc ta Sidón la yac'beyic swe'el yuch'elic soc aceite, swenta yu'un ya me yich'ic jajch'el cedroetic ta Líbano, ya me yich'ic bael ta mar c'alal ta Jope, jich te bit'il ac'botic permiso yu'un Ciro te muc' ajwalil ta Persia.

Esdras 4:3

Pero te Zorobabel, te Josué soc te yantic jwentainwanejetic yu'un juju-jchajp na yu'un israeletic, jich la yalbeyic: —Ma xju' teme ya jointiquex ta xcha'pasel te templo yu'un te Diose. Ta jtuqueltic ya jcha'pastic te templo yu'un Cajwaltic, te Dios yu'un Israel, melel jich la spasotic ta mandal te Ciro te muc' ajwalil yu'un Persia —la yutic.

Salmos 136:26

¡Albeyaic wocol te Dios ay ta ch'ulchan, melel sbajt'el q'uinal ay te xc'uxul yo'tane!

Isaías 41:2

¿Mach'a la yac' chicnajuc ta bay sloq'uib c'aal te muc' ajwalil te puersa ya spas ya yaiy tsalawe? ¿Mach'a ya yac'bey ta sc'ab nacionetic soc te ya spejc'an ta stojol te muc' ajwaliletic yu'unic, swenta yu'un ta spuñal soc ta yat'ejibal st'im ya me slic bael soc ya me spuc bael ta wilesel jichuc taquin ac?

Isaías 44:28

Jo'on ya calbey te Ciro: “Ja'at me jcanan-chijat cu'un ya xc'ot; ya me apas spisil te bila ya sc'an co'tane”, ya me cut. Soc ya calbey te Jerusalén: “Te ja'ate ya me awich' xan pasel”, ya me cut; soc te ja'at templo: “Ya me yich' aq'uel te awiptajibe”, ya me cut —xi' te Cajwaltique.

Isaías 45:1

Te Cajwaltic la yac'bey yat'el ta muc' ajwalil Ciro, la stsac ta sc'ab swenta yu'un ya smandaltes te nacionetique soc te ya spojbey yat'ejibic ta guerra te muc' ajwaliletique. Te Cajwaltic ya spas ta stojol Ciro te ya xjam te smajq'uil yochibal te lumetique, te ma me ayuc mach'a ya xju' yu'un smacticlayel. Ta ora yo'tic jich ya yalbey:

Daniel 6:25

Jich te muc' ajwalil Darío la sts'ibubey jun ta stojolic te ants-winiquetic ta spisil nacionetic soc ta spisil c'opiletic ta q'uinal, jich la yalbey: “Ac'a lamajuc q'uinal awaiyic soc ac'a toyuc xan yutsil awo'tanic.

Jonás 1:9

La sjac' te Jonás: —Te jo'one hebreoon. Ja' quich'oj ta muc' te Cajwaltic te Dios ta ch'ulchan, te la spas te mar soc te lumq'uinale —xi'.

Esdras 5:15

Ja' yu'un te Ciro la yalbey mandal te Sesbasar te ya stsob te biluquetique, te yacuc yich' sujt'el, ya yac' xan ta templo ta Jerusalén, soc te ya xcha'pas xan ta yawil nix yan buelta te templo yu'un te Diose.

Esdras 6:3

“Ta sbabial ja'wil yat'el ta muc' ajwalil a te Ciro, jich la yal ta pasaw ta mandal: Te sc'oplal te templo yu'un Dios ta Jerusalén: Ac'a yich' aq'uel te xjajch'ibal yiptajibe, soc ac'a yich' xan cha'pasel te nae, swenta yu'un ya me yich' aq'uel milbil smajt'an Dios tey a. Ya me yich' aq'uel juqueb xcha'winic (27) metro stoyolil soc juqueb xcha'winic (27) metro sjamalul,

Esdras 6:10

Jich me ya yac'beyic ta smajt'an te Dios ta ch'ulchane te buen lec yo'tan yu'un, soc te yacuc yalic wocol ta stojol Dios yu'un te xcuxlejal te muc' ajwalil soc te yal-snich'nabe.

Esdras 7:12

“Te Artajerjes muc' ajwalil swentainej yantic te muc' ajwaliletique, ya spatbey yo'tan te Esdras, sacerdote soc maestro te snopoj te smandal Dios ta ch'ulchane.

Nehemías 1:4

C'alal la caiy te c'opetic in to, la jnajc'an jba, ochon ta oq'uel yu'un. Che'oxeb c'aal la jmel co'tan yu'un. La jcom jwe'el soc la jc'opon te Dios ta ch'ulchane.

Nehemías 1:5

Jich la cal: —Cajwal Dios ta ch'ulchan, te muc' Diosat soc te ayat ta xi'ele, te stalel ay awu'un te c'op chapal awu'une, soc te jun awo'tan ta stojolic te mach'atic c'uxat ta yo'tanique, te ya yaq'uic c'otuc ta pasel te mandaliletic awu'une,

Salmos 85:2

La apasbeyix perdón te sbolil yo'tan te lum awu'un; la apasbeyix perdón ta spisil te smulique.

Proverbios 21:1

Ay ta sc'ab Cajwaltic te yo'tan te muc' ajwalile, jich me toj ya xbeen te bit'il muc'ja', jich te bit'il ya sc'an yo'tan te Cajwaltique.

Jeremías 27:5

Ta smuc'ul cu'el la jpas te balumilale, soc te ants-winiquetic soc te chambalametic te ayic tey a, soc ya xju' ya cac'bey te mach'a ya sc'an co'tane.

Jeremías 29:10

“Soc jich ya yal te Cajwaltique: ‘C'alal ya sts'aquej lajuneb xchanwinic (70) ja'wil, ya xjajch'on ta at'el ta ac'uxtayelic te ja'exe, soc ya me jc'otes ta pasel te bila caloj ta jamal te ya jc'uxtayex soc te ya jsujt'esex tele.

Daniel 1:21

Tey jil a te Daniel asta ja' to c'alal ta sbabial ja'wil yat'el ta muc' ajwalil te Ciro.