Eclesiastés 11:2 - Bible in Tzeltal de Oxchuc y Tenejapa

² Puca me te bay c'alal ya xju' awu'un te bitic ay awu'une; melel ma na'biluc awu'un te bi ma lecuc ya xtal ta stojol te lumq'uinale.

Bible in Tzeltal Bachajón

² Pucticlana ta hucwohc', o ta waxacwohc' te bintic ay awu'un, como ma na'biluc awu'un bin wocolil ya xtal ta q'uinal.

Eclesiastés 11:2 Referans Kwoze

Proverbios 6:16

Ay waqueb ta jchajp, asta juqueb, te bila jc'axel yilayej te Cajwaltique:

Salmos 112:9

Ya smajt'antes te me'baetic; spisil ora ay te sc'uxul yo'tane. Jamal me sit-yelaw; ma me ayuc q'uexlal ta stojol.

Job 5:19

Ta spisil ora ya scoltayat loq'uel a te bila chujc'ule, ma xyac' te ya staat te bitic amene.

Daniel 4:27

Ja' yu'un, muc' ajwalil, ja' me xat'un jiche te tojtesel cu'un in to: Mero stojil me xapasix te awat'ele, ma me xaleix amul. Jc'axel x'alajinbey sc'oplal te bila amene, soc at'elina scoltayel te me'baetique. Teme repente jich spisil ora lamal q'uinal ta atojol, soc ya me x'esmaj xan bael biluc awu'un’, xi' ta jtojol te Beltsasar”, xi' sc'op te Nabucodonosore.

Hebreos 13:3

Juluc me ta awo'tanic te mach'atic ayic ta chuquele. Jichuc me c'oem ta awo'tanic te bit'il pajal chuculat soque. Ja' nix me jich te mach'atic ayic ta uts'inele, jichuc me c'oem ta awo'tanic te bit'il pajal ayat ta uts'inel soque.

Efesios 5:16

Na'aic me stuuntesel te jujun c'aale, te melel ay amen ya xc'ax te jujun c'aale.

Gálatas 6:1

Quermanotac, teme ay mach'a la awilic te la staix smule, te ja'ex te wentainbil awo'tanic yu'un te Espiritue, lamaluc me awo'tan ya acoltay ta sujt'esel yo'tan ta stojol Dios. Soc tsajtaya me aba uuc, ma me ja'uc te ya xlajat ta sujel ta mulil uuc te ja'ate.

San Lucas 17:4

Manchuc teme ya sta smul ta atojol juqueb buelta te jujun c'aale soc teme jujun buelta ya xtal yalbat te ma ba ya spasixe, pasbeya perdón jujun buelta —xi' te Jesuse.

San Mateo 18:22

La yal te Jesuse: —Ma xcalbat te tic' a te juqueb bueltae. Ja' to tic' a teme juqueb buelta ya x'esmaj ta lajuneb xchanwinique (70 x 7).

San Mateo 5:42

Teme ay mach'a ay bila ya sc'anbate, ac'beya, soc ma me xamac ta c'op te mach'a ay bila ya smajanbate.

Miqueas 5:5

Ya me yac' lamal-o'tanil stuquel. C'alal ya yochintay asiriaetic te jlumaltic soc te ya x'ochic ta muc'ul palacioetic cu'untic, ya me jticuntic bael ta yilbeyel sba soc juqueb jtsobwanejetic soc waxactul winiquetic te muc' sc'oplalique.

Ester 9:22

Melel ja' sc'aalelal te la smilic te scontroic, soc ja' yuil te bi ora te jelon ta sbujts' yo'tanic te smel-o'tanic soc jelon ta q'uin te yawic swenta xc'uxul te mel-o'tane. Ja' in c'aaletic to ya me yich'ic pasel q'uin soc we'elil soc sbujts' q'uinal yaiyic, soc talel c'axel me ya smajt'antes sbaic a, soc ya me yaq'uic majt'anil yu'un me'baetic, xi' te smandale.

Ester 9:19

Pero te yantic judioetic nainemic ta lumetic soc ta ch'in lumetic, te ma'yuc sjoyob ts'ajc'ulique, ya spasic q'uin soc sbujts' yo'tanic ta xchanlajunebal te u Adar, soc talel c'axel la smajt'antes sbaic yu'un.

Nehemías 8:10

Soc jich la yalbey te Esdrase: —Baanic ta swe'el te bila mero bujts'anic ta we'ele, uch'aic chi'il vino, soc ticunbeya swe'el uuc te mach'atic ma'yuc bila xchajbanejic yu'un ya swe'ique. Melel in c'aal to q'uin ta stojol te Cajwaltique. Ma me xamel awo'tanic ta stojol, melel te yutsil q'uinal ya caiytic yu'un te Cajwaltique, ja' quiptic stuquel —la yut.

Proverbios 19:17

Te bila ya cac'beytic smajan te me'ba, ja' ya cac'beytic smajan te Cajwaltique; soc ja' nix ya stojbotic te Cajwaltic te betile.

Eclesiastés 11:3

Teme ay bayal ya'lel te tocale, ya me yac' ja'al ta lumq'uinal. Manchuc me ya xyal bael ta norte te te'e, manchuc me ya xyal bael ta sur, ta bayuc ya xyal bael, pero tey me ya xjilix a.

Eclesiastés 11:8

Pero manchuc me ya xcuxinotic bayal ja'wil, soc ya caiybeytic yutsilal ta spisilic, pero ya me sc'an ya jna'tic te bayal c'aal te ainel ta muquenal ta ijc' q'uinale. Spisil te bitic quechel ta talele, mero tojol ta jyalel.

Eclesiastés 12:1

Na'a me te Jpaswanej awu'un te bit'il jch'ielat toe, te bit'il ma to staojuc yorail te awocol te c'alal ya xmamalubate. Melel ya me sta yorail te jich ya awale: “Jc'axel ma jtabey yutsilal ya caiy te jcuxlejal ta q'uinale”, te xaate.

1 Samuel 25:8

Ya xju' ya ajojc'obey te abatetic awu'une, ya me yalic ta jamal te melel te bila ya calbate. Ja' yu'un wocoluc, c'uxtaya te winiquetic te buen ora yacalic ta c'oel ta atojol te yacuc awac'bon soc jtebuc te bitic ay awu'un ta ora in to, melel jichon ta atojol te bit'il anich'ane”, xaex me ya xc'oex —xi' te David.