Daniel 3:12 - Bible in Tzeltal de Oxchuc y Tenejapa

¹² Pero ta ora in to, ay me judioetic te ay yat'elic ta banti jsejp q'uinal Babilonia sbiile, te mero ma xyich'at ta muc' te ja'at te muc' ajwalilat cu'untique, te ma sc'an xch'uunic te diosetic, ni yacuc sc'anic ya xch'uunic te loc'omba pasbil ta oro te la awac' ta pasel, ja'at te muc' ajwalilat cu'untique. Ja' te mach'atic la awac'bey yat'elic ta administrador yu'un te jsejp q'uinal yu'un Babilonia, ja'ic te Sadrac, Mesac, soc Abed-nego —xiic c'oel.

Bible in Tzeltal Bachajón

¹² Ay judio-winiquetic te la awa'be ya'telic ta jsehp q'uinal yu'un Babilonia, ha te Sadrac, Mesac soc Abed-nego; te winiquetic ini ma xyich'at ta cuenta, ajwalil, ma ba ya sch'uhuntayic te diosetic awu'un soc ma ba ya sch'uhuntayic te loc'omba pasbil ta oro te atehc'anej.

Daniel 3:12 Referans Kwoze

Daniel 6:13

C'opojic xan bael, jich la yalic: —Ja' te Daniel, te ja' jtul sjoy te judioetic te ic'otic tel ta mosoile, ma sc'an xyich'at ta muc' ja'at te muc' ajwalilat cu'untique, soc mero ma sc'an xyich' ta muc' te c'op chapal la apuc ta alele. Yu'un la quiltiquix te yac ta yalel wocol oxeb buelta jujun c'aal ta stojol te Dios yu'une —xiic.

Daniel 2:49

Ta scaj te c'opoj te Daniel ta stojol muc' ajwalil, yu'un te Sadrac, Mesac, soc te Abed-nego, ac'bot tulan yat'elic ta sejpel ta sq'uinal Babilonia. Te Daniel ja' la sjoin jilel ta banti ay ta at'el te muc' ajwalile.

Hechos 17:7

Te Jasone ja' la snajc'anix ta sna. Spisilic ya scontroinbeyic smandal te muc' ajwalil Cesare, yu'un ya yalic te ay yan muc' ajwalil ta sc'opic te Jesús sbiile —xiic ta aw.

Proverbios 27:4

Te ilimba ya yac' wocol, te sc'ajc'al-o'tanil ya xjinawan; pero ma xju' ta comel te paichale.

Hechos 5:28

—¿Ma bal tulanuc mandal la caltic ta atojolic te ma x'awaiyiquix p'ijubteswanej ta swenta sbiil te Jesuse? Ja'uc me to, amen te bila la apasique, melel ta spamal Jerusalén, la apuquiquix te nopjibal awu'unique, soc ya ac'an awac'botic jcuchtic te bit'il laj ta milel te winique —xi'.

Eclesiastés 4:4

La quil te bayal ya x'at'ejotique, te bayal ya x'esmaj jbiluctic swenta bit'il muc' at'el ya jchajbantique, talel c'axel ya xjajch' bic'tal-o'tantay jbajtic yu'un. Ja' nix jich mero tojol ta jyalel, soc te ja' pajal soc te yacuc jtsactic te iq'ue.

Ester 3:8

Ja' yu'un te Amán jich la yalbey te muc' ajwalil Asuero: —Ta spisil te lumetic te smacoj te juju-jpam q'uinal awu'uninej ta mandalteswanej, ja'at te muc' ajwalilate, ay jtsob te parte yac'oj sba ta stojol te yantique. Ay leyetic yu'un te ma pajaluc soc te yu'un te yantic lumetique, soc ma sc'an spas te bila mandal awaloj te ja'at te muc' ajwalilate. Ma lecuc te ya x'ainic xan ta atojol tey ta banti ya spasawanat ta mandale.

Daniel 1:7

Te queremetic jeltaybot sbiilic yu'un te jwentainwanej yu'un j'at'eletic ta palacio yu'un ajwalil: te Daniel, Beltsasar sbiil c'ot; te Ananías, Sadrac sbiil c'ot; te Misael, Mesac sbiil c'ot; te Azarías, Abed-nego sbiil c'ot.

Daniel 2:48

Te muc' ajwalil la stoyesbey xan yat'el te Daniel, la yac'bey bayal yutsil smajt'an. Soc la yac'bey yat'el ta ajwalil ta jsejp q'uinal te Babilonia sbiile. Ja' mero muc' jwentainwanej c'ot yu'un spisil te mach'atic bayal bi sna'ojic te tey ayic ta nación yu'unique.

Daniel 3:11

Te mach'a ma ba ya spase, ya me yich' ch'ojel ochel ta horno te banti tulan yac ta tilel te c'ajq'ue.

Daniel 3:16

Te oxeb queremetic jich la yalic: —Ma puersauc ya jsujt'estic te bila ya awale.

Daniel 3:29

Yo'tic jo'on ya cal mandal, mach'auc a te ya yal amen c'op ta stojol te Dios yu'unic te winiquetic in to, ac'a yich'ic milel ta jyalel. Te snae, jc'axel ac'a yich' busanel ta jinel, ta bayuc lumil talem, bayuc nacionil soc biluc c'opil ya xc'opojic a. Melel, ma'yuc yan dios jich ya xju' yu'un coltaywanej te bit'il te Dios yu'unique —xi'.

Daniel 3:30

Te oxeb queremetic ac'botic xan mero muc' yat'elic yu'un te muc' ajwalil, ac'bot swentainic te bitic bayal xan sc'oplal tey ta jsejp q'uinal ta Babilonia.

Daniel 6:14

C'alal la yaiy te muc' ajwalile, bayal la smel yo'tan yu'un, la sle bi ya yut ya scoltay te Daniel. Yac ta snopel smalel c'aal te bi ya yut ya scoltaye.