Apocalipsis 8:10 - Bible in Tzeltal de Oxchuc y Tenejapa

¹⁰ Te yoxebal ch'ul abate la yoq'uesin te oq'uese. Ay muc'ul ec' ch'ay coel tel ta ch'ulchan te yac ta tilel jich bit'il silbil taje. C'ot ta bay jteb ma oliluc te muc' ja'etique soc te sloc'ja'etique.

Nuevo Testamento Tzeltal de Amatenango

¹⁰ Te yoxebal ángel la yokꞌesin te skornetae, y ay jun mukꞌul ekꞌ, yipal ta tilel jachik tutꞌil jtuch-kꞌajkꞌ, tꞌuxaj tal koel ta chꞌulchan ta sba te yoxxejtꞌel te mukꞌul ukꞌumetike y ta sba te lokꞌib jaꞌetike.

Bible in Tzeltal Bachajón

¹⁰ Te yoxebal ch'ul a'bat la yoq'uesin te scorneta; ay muc'ul ec' ta ch'ulchan, xpulpon ta tihlel hich te bin ut'il tsumbil c'ahc', ch'ay cohel ta jun ta yoxeht'el te muc'ul-ha'etic soc te sloq'uib ha'etique.

Apocalipsis 8:10 Referans Kwoze

Apocalipsis 16:4

Te yoxebal ch'ul abate ba smal ta muc' ja'etic soc ta sloc'ja'etic te copa yich'oje. Jich c'atp'uj ta ch'ich' spisil te ja'etique.

Apocalipsis 9:1

Te yo'ebal ch'ul abate la yoq'uesin te oq'uese. La quil te ay ec' ch'ay coel tel ta ch'ulchan te c'ot ta sba te balumilale. Te eq'ue ac'bot ta sc'ab te sllaveil sti'il te xaabe.

Isaías 14:12

“¡Bit'il ch'ayat coel ta ch'ulchan, ja'at te muc'ul ec' ta sacubel q'uinale! La awich' ch'ojel coel ta lumq'uinal, ja'at te la atsal spisil te nacionetique.

Apocalipsis 6:13

Te eq'uetic te ayic ta ch'ulchane, ch'ayic coel tel ta balumilal, jich bit'il xbuquet nax ya xco xyaxal sit te higo-te' teme yuc'ot yu'un te tulan iq'ue.

Apocalipsis 14:7

Tulan jich yac ta yalel ta c'op: “Xi'aic me te Diose. Albeyaic yutsil sc'oplal, yu'un c'otix yorail te ich'el ta c'ope. Lajina me abaic ta stojol te Mach'a la spas ch'ulchan soc te balumilale soc te mare soc te sloc'ja'etique”, xi' la caiy.

Apocalipsis 12:4

Ta sne la smes coel jteb ma oliluc te eq'uetic ta ch'ulchane, soc la xch'oj coel ta balumilal. Te muc'ul chane la stejc'an sba ta stojol te ants te ya x'ayinix te yale, swenta yu'un ya me sbic'bey ta ora te c'alal ya x'ayine.

Apocalipsis 1:20

Jich ay sc'oplal te muquen c'op te juqueb eq'uetic te ay ta swa'el jc'abe soc te jucch'ix yawil c'ajc' te pasbilic ta oroe: Te juqueb xtuchtijib eq'uetique, ja' sc'oplalic te juctul ch'ul abatetic te ayic ta bay te jucchajp jch'uunjeletique, soc te jucch'ix xtuchtijib c'ajc' te la awile, ja' sc'oplal te jucchajp jch'uunjeletique —xi' la caiy.

Judas 1:13

Pajalic soc sbul mar te bayal sbolilal te q'uexlaltic sba te bila ya spasique. Pajalic soc eq'uetic te jowejemic ta beele te chapal sc'oplalic te ya xba ainuquic sbajt'el q'uinal ta bay mero ijc' nax te q'uinale.

San Lucas 10:18

La yal te Jesuse: —Jich na'ax, melel yacon ta yilel te ch'ay coel tel ta ch'ulchan te Satanase. Jich la quil te bit'il xlememet ya xco tel te chawuque.

Isaías 12:3

Ja' nix jich te ja'exe ya xju' ya xba awuch'ic soc sbujts' awo'tanic te sloq'uibja' yu'un colele.

2 Crónicas 32:3

Jich yu'un la snop soc te sjo'tac ta at'el soc te capitán-soldadoetic te ja' lec ya sbut'ic te sloq'uibja'etic te ayic ta fuera yu'un te lume. Jich c'ot ta yo'tanic.

Jueces 15:11

C'alal la yaiyic stojol te judioetic, bajt'ic ta nailch'en ta Etam oxmil (3,000) ta jtul winiquetic te sts'umbal Judá. Jich la yalbeyic te Sansón: —¿Yu'un bal ma x'ana' te ja' c'axem to xan tulanic cu'untic te filisteoetique? ¿Bistuc tal ajach c'op ta jtojoltic? —xiic. Te Sansón la sjac': —Ma'yuc yan bi yacon ta spasel ta stojolic, ja' nax ya cac'bey stojic te bi la spasbonique —xi'.

Zacarías 13:8

Ta yoxchajbal te nainemic li' ta lumq'uinal, ya me xlajic cha'chajp, ja' xanix jchajp cuxul ya xjil. Ja' te jchajp ya xjile, ya me cac' c'axuc ta c'ajc'; jich me ya jlecubtes te bit'il ya yich' lecubtesel plata, soc jich te bit'il ya yich' pasel t'ujbil oro. Ya me sc'opononic, jo'on ya me jac'bey sc'opic: “Lum cu'un”, xoon me ta stojolic. Jich me ya yalic ta sjaq'uel: “Te Cajwaltic ja' Dios cu'untic”, xiic me. Jo'on Ajwalilon, ya cal ta jamal —xi' te Cajwaltique.

San Mateo 25:1

Soc la yal xan te Jesuse: —Te bit'il ay ta ajwalinel te Dios te ay ta ch'ulchane, ja' pajal soc te ay lajuntul tec'tojom ach'ixetic te la yich'ic bael sc'ajq'uic te ba staic tel te winic ya xnujbine.

Apocalipsis 8:7

Te sbabial ch'ul abate la yoq'uesin te oq'uese. Chicnaj bat soc c'ajc' capal soc ch'ich' te la yich' malel coel ta bay te lum q'uinale. Laj ta c'ajq'uel jxejt' ta yox-xejt'el te te'etic ta lum q'uinale, soc laj ta c'ajq'uel spisil uuc te yax aquiltique.

Apocalipsis 9:15

Jich colic bael ta chuquel te chantul ch'ul abatetique, swenta yu'un ya xba smilic jteb ma oliluc te ants-winiquetique. Melel ja' swentail te chapalique, ja' to teme ya sta te bi ora soc bi c'aalil soc bi uil soc bi ja'wil te ya xc'ot ta pasele.

Apocalipsis 9:18

Jteb ma oliluc te ants-winiquetic te lajic yu'un te oxchajp miljibale, ja' bi ja' te c'ajq'ue soc ch'ail soc azufre te loc' ta yeic te caballoetique.