Apocalipsis 20:4 - Bible in Tzeltal de Oxchuc y Tenejapa

⁴ Soc la quil te ay muc'ul nactijibaletique. Te mach'atic nacalic tey ae, yich'oj yat'elic ta chajbanwanej. Soc la quilbey xch'ulelic te mach'atic la yich'ic coq'uel sjolic ta scaj te la yalic ta jamal ta testigo-c'op te Jesuse, soc ma'yuc banti la slajin sbaic ta stojol te muc'ul chambalam te xi'bantic sbae soc ta stojol te sloc'ombae, soc ma la xch'uunic yich'el smarca ta stibaic o ta sc'abic. La quil cha'cuxic spisilic soc la quil te sjoinejic ta ajwalil jmil (1,000) ja'wil te Cristoe.

Nuevo Testamento Tzeltal de Amatenango

⁴ La kil mukꞌul naktajibaletik, y te machꞌatik nakajtik teꞌ ae, jaꞌ te machꞌatik yichꞌoj yaꞌtelik ta chapawe. Sok la kil xan te xchꞌulelik te machꞌatik te setꞌalanbot sjol yuꞌun te jun yoꞌtanik a yalik ta jamal te skꞌoplal Jesuse y sok te skꞌop Diose. Te stukelike maꞌyuk a yichꞌik ta mukꞌ te chanbalam te xiꞌbentik sbae ni te slokꞌole. Ni maꞌ skꞌan a yichꞌbeyik te smarka ta stiꞌsbaike o ta skꞌabike. Y la kil te chꞌakuxik xane, y la sjoyinik ta ajwalil jmil jaꞌbil te Cristoe.

Bible in Tzeltal Bachajón

⁴ La jquil muc'ul-huctajibaletic, soc huculic tey a te mach'atic a'bot ya'telic ta chahpanwanej. Soc la jquilbe sch'uhlelic te mach'atic xot'bot sjolic ta scaj te testigo-c'op yu'un Jesús soc ta scaj te sc'op Dios, ha te mach'atic ma ba la sch'uhuntayic te chambahlam te xiweltic sba o te sloc'ombahil, soc ma ba la yich'beyic smarca ta sti'bahic o ta sc'abic; la yich'ic scuxlejalic soc la sjoquinic Cristo ta cuentahinwanej lajunwinic yoxbahc' (1,000) ha'bil.

Apocalipsis 20:4 Referans Kwoze

Daniel 7:27

Te mandalteswanej, te yip soc te yutsilal ta spisil te jmandalteswanejetic ta balumilale, ya me yich' ac'beyel te lum yu'un Dios te mero toyole. Sbajt'el me q'uinal te mandalteswanej yu'une, ta spisil te lumetic ta balumilal ya me yac' sbaic ta abatinel yu'un, soc ya me xch'uunbeyic smandal’, xi'.

Daniel 7:18

Pero ta patil, te mandalteswanej yu'unique, ya me yich' ac'beyel ta swenta te lum yu'un Dios mero toyole, ja' me ya yu'uninic sbajt'el q'uinal stuquel’, xi'.

San Mateo 19:28

Te Jesús jich la yalbey yaiyic: —Jamal ya calbeyex, te bi ora ya yich' pasel ta yach'il spisil te bitic aye, te c'alal ya snajc'an sba ta bay yutsil smuc'ul nactijib te Nich'anile, ja'ex uuc te ajoinejique ya me x'ac'botex anactijibinic lajchayeb muc'ul nactijibaletic, yu'un ya me awaiyic chajbanwanej ta stojol te lajchaychajp israeletique.

Apocalipsis 6:9

Te c'alal la sjam te yo'ebal sello te Alalchije, la quil te ay xch'ulelic ta bay yanil te xchic'jibal milbil smajt'an Dios te jayeb mach'atic la yich'ic milel ta scaj te sc'op Dios soc te jun yo'tan la yalic ta testigo te bila xch'uunejique.

Apocalipsis 3:21

Te mach'atic ya xju' yu'unic tsalawe, ya me sjoinon ta naclej ta banti te muc'ul nactijibal cu'une, jich nix te bit'il caiyoj tsalaw te jo'one soc te joinejix ta naclej ta bay smuc'ul nactijib te Jtate.

2 Timoteo 2:12

Teme ts'ijc' cu'untic te jwocoltique, ya me join jbatic ta ajwalil soc. Teme la jmuc ta co'tantique, ya me smucotic ta yo'tan uuc.

Daniel 7:22

ja' to te c'ot te Mamale te la xchajban ta stojil te lum yu'un te Dios mero toyole. Melel c'otix yorail sc'aalelal te ya yu'uninix spasel ta mandal te lum yu'un te Diose.

Apocalipsis 20:6

Bin nax me yutsil te mach'atic cha'cuxic ta sbabial buelta cha'cuxele, soc ja'ic te ch'ul lum yu'un Dios stuquelique. Te xchebal buelta lajele ma'yuquix yip ta stojolic. Sacerdoteetic yu'un Dios soc te Cristoe, soc ya me sjoinic ta ajwalil jmil (1,000) ja'wil te Cristoe.

Daniel 7:9

“Tey yacon ta yilel a, la quil chicnaj muc'ul nactijibaletic, ay jtul Mamal yilel najc'aj tey a. Te sc'u' mero sac jichuc toib; te stsotsil sjol pajal soc buen saquil stsotsil chij te buen saque. Te smuc'ul nactijib soc te ruedaetic yu'une, puro c'ajc' yilel,

San Lucas 22:30

Jich me ya xwe'ex soc ya x'uch'ajex ta jmesa te c'alal ayonix ta ajwalinel te jo'one. Ya me xnajc'ajex ta bay muc'ul nactijibaletic ta chajbanwanej ta stojol te lajchaychajp israeletique.

Apocalipsis 22:5

Ma'yuquix ajc'ubal tey a. Ma xtuunix yu'unic te xojobil c'ajq'ue soc te xojobil c'aale, melel ja' sacuben q'uinal ta stojolic yu'un te Cajwaltic Diose. Sbajt'el q'uinal ya sjoinic ta ajwalinel te Diose.

Apocalipsis 12:11

Te quermanotactique la stsaliquix ta swenta xch'ich'el te Alalchije soc ta swenta te sc'op Dios te la stejc'an sbaic ta testigo yu'une. Melel ma la xc'uxtay sbaic soc te xcuxlejalique. Jun nax yo'tanic la yac' sbaic ta lajel yu'un.

Apocalipsis 1:9

Jo'on Juanon te awermanoon te pajal ay ta jwentatic te woclajele soc te pajal ay ta jwentatic ya jointic ta ajwalil te Cristoe. Tey ac'bilon ta bay ch'in q'uinal te ay ta yolil mar te Patmos sbiile, ta scaj te sc'op Diose soc te jamal la cac' ta na'el te sc'oplal te Jesucristoe.

Romanos 8:17

Teme yal-snich'anotic te Diose, ja' cu'untic uuc te bila ay yu'un te Diose. Pajal me ya quich'tic soc Cristo teme pajal ya xc'ax jwocoltic jich te bit'il c'ax swocol stuquele. Jich me pajal ya quich'tic cutsilaltic soc.

Apocalipsis 15:2

Soc ay bi yan la quil te pamal jich bit'il mar te xlemet nax jich bit'il espejo te ay sc'aal yac ta tilel ta spamlejale. La quil tec'ajtic ta bay mar yilel spisil mach'atic te ju' yu'unic te ma ba la yich'ic ta muc' te muc'ul chambalam te xi'bantic sbae soc te sloc'ombae soc snumeroil te sbiile. Yich'ojic ta sc'abic yarpaic te ac'botic yu'un te Diose.

Apocalipsis 14:11

Te xch'ailel te swocolique, xtomomet nax ya xmo sbajt'el q'uinal. C'aal ajc'ubal ma'yuc banti ya yich'ic lewa yu'un castigo spisil mach'atic te ya slajin sbaic ta stojol te muc'ul chambalam te xi'bantic sba soc ta stojol te sloc'ombae soc te yich'ojbeyic smarca ta stibaique o ta sc'abique”, xi' ta aw la caiy.

Apocalipsis 11:7

Ja'uc me to, c'alal ju'ix yu'unic a te yat'elic ta testigoe, ya me xloc' tel ta xaab te muc'ul chambalam te xi'bantic sbae. Ya me spasic guerra soc ya me stsalotic yu'un, soc jc'axel ya xmilotic yu'un.

San Juan 14:19

Jteb sc'an xch'ayon ta sitic te mach'atic ayic ta balumilale. Yan te ja'exe, ya to awilon xan atuquelic. Melel cuxulon te jo'one, jich me ya xcuxinex uuc te ja'exe.

Daniel 2:44

Te c'alal ay yat'elic ta muc' ajwalil ae, te Dios ta ch'ulchan ya me yac' ochel jtul jmandalteswanej te sbajt'el q'uinal ma ba ya xlaje, soc te ma'yuc bi ora ya x'u'uninot yu'un yan nación. Ja' me ya slajin ta jyalel te yantic ajwaliletique, ja' nax me muc' ajwalil ya xjil ta sbajt'el q'uinal stuquel.

Apocalipsis 17:8

Te muc'ul chambalam te xi'bantic sba te la awile, ja' seña te mach'a ay ta neelale te ma ba chican ta ora to soc te ya to xmo loq'uel tel ta bay te xaabe. Patil ya me xbajt' ta lajel ta jc'axel. Te mach'atic cuxajtic ta balumilal te ma nacaluc sbiilic ta lista swenta cuxinel c'alal to ta xjajch'ibal te balumilale, cham nax me ya yaiyic te c'alal ya yilic te muc'ul chambalam te xi'bantic sba te ay ta neelal te ma ba chican ta ora to soc te ya to xchicnaj xane.

Apocalipsis 11:15

Te sjuquebal ch'ul abat la yoq'uesin te oq'uese. Ay mach'atic tulan c'opojic ta ch'ulchan la caiy te jich la yalique: “Spisil te muc' ajwaliletic ta balumilal soc te bila ay ta swentaique, ayix ta swenta stuquel te Cajwaltique soc te Cristo yu'une. Ja' me ay ta ajwalinel sbajt'el q'uinal stuquel”, xiic la caiy.

Apocalipsis 11:11

Ja'uc me to, te c'alal c'axix a te olil xchaneb c'aale, te Diose la xcha'cuxes te testigoetique. Jich tejc'aj jajch'el. Spisil te mach'atic la yilique, och bayal xiwel ta yo'tanic yu'un.

Apocalipsis 11:3

Soc ya me jticun cheb testigoetic cu'un te ya xc'opojic ta j'alwanej cu'un oxbajc' soc oxwinic (1,260) c'aal te slapojic ch'ixal pac' swenta mel-o'tan —xi' la caiy.

Romanos 11:15

Melel te bit'il ijq'uitayot te judioetic yu'un te Diose, jich junaj yo'tanic ta stojol Dios spisil te yantic ta balumilale. Ja'uc me to, c'alal ya xcha'ic'otic xane, ¿Ma bal jichuc ya xc'ot te bit'il cha'cux tel te mach'atic lajemique?

San Lucas 1:17

Ya me xneelaj ta yalel sc'oplal te Cajwaltique. Ja' me ya spajbey yo'tan soc yip yat'el te j'alwanej Eliase, swenta yu'un ya yac' junajuc yo'tanic te sme'-static ta stojol te alnich'anetique, soc swenta yu'un ya me yac'bey snopic xch'uunel mandal te jc'axintayej-c'opetique. Jich me chapalix yo'tanic ta lec a te lume te ya yic' ta stojolic te Cajwaltique c'alal ya xtale —xi' te ch'ul abate.

Malaquías 4:5

“Aiya awaiyic, ya jticunbeyex te j'alwanej Elías te c'alal ma to xc'ot sc'aalelal te Cajwaltic, te mero muc' sc'aalelal te xiweltic sbae.

San Marcos 9:11

Soc ay bila la sjojc'obeyic te Jesuse: —¿Bi yu'un te ya yalic te jts'ibojometic te puersa ja' neel ya xtal te Eliase? —xiic.

San Marcos 6:27

Jich yu'un te muc' ajwalile ora la sticun bael jtul soldado. La yalbey mandal te ya yich'bey tel sjol te Juane.

San Marcos 6:16

Te Herodes la yaiy stojol te jich la yalique. Jich la yal yu'un: —Ja' me te Juan te la jticunbey yajwal ta c'oquel te sjole. Cha'cuxemix tel ta bay te animaetique —xi'.

San Mateo 24:10

Ay me tsobol ta jtul ya xchebaj yo'tanic. Soc ya me xjajch' yilay sbaic soc ya me xjajch' yac' sbaic ta c'abal.

San Lucas 14:14

Jich me bin nax awutsil yu'un, melel ma xju' yu'un te ya yac'bey spacol te ya yic'at ta we'ele. Ja'uc me to, ya me awich'bey stojol te c'alal ya xcha'cuxat soc spisil te mach'atic toj awo'tan soc ta stojol te Diose —xi' te Jesuse.

Apocalipsis 1:2

Ja' la yal ta testigo te Sc'op Diose. Ja' testigo yu'un uuc te Jesucristo ta swenta te bila ac'bot yile.

Apocalipsis 2:26

Te mach'atic ya xju' yu'unic tsalawe soc te ya yat'elinic spasel ja' to c'alal ta slajibal c'aal te bila ya sc'an co'tane, ya me cac'bey yich' yat'elic ta stojol te nacionetique,

Apocalipsis 4:4

Ta sjoylejal te muc'ul nactijibale, la quil chaneb xcha'winic (24) nactijibaletic te tey nacalic a te chaneb xcha'winic (24) ta jtul mamaletic. Sac te sc'u'-spac' slapojique soc ay scorona ta sjolic te pasbil ta oro.

Apocalipsis 7:3

Jich la yal: “Ma to me x'alajinic te lum q'uinale soc te mare soc ni pejt'uc te te'etique. Ja' to teme la cac'beytic sello ta stibaic te abatetic yu'un te Dios cu'untique”, xiic.