Apocalipsis 12:11 - Bible in Tzeltal de Oxchuc y Tenejapa

¹¹ Te quermanotactique la stsaliquix ta swenta xch'ich'el te Alalchije soc ta swenta te sc'op Dios te la stejc'an sbaic ta testigo yu'une. Melel ma la xc'uxtay sbaic soc te xcuxlejalique. Jun nax yo'tanic la yac' sbaic ta lajel yu'un.

Nuevo Testamento Tzeltal de Amatenango

¹¹ Te kermanotaktike la tsalikix jilel ta skuenta xchꞌichꞌel te la smal te Chꞌin Karnerae, y sok ta skuenta te skꞌop Dios te la yalik ta jamale. Maꞌ xiꞌik yuꞌun teme ya xlaj xkuxlejalik aye, sino ke spꞌejel yoꞌtanik la yakꞌ sbaik ta milel.

Bible in Tzeltal Bachajón

¹¹ Ha'ic la stsalic ta scuenta sch'ich'el te Jcolel Tuminchij soc ta scuenta te testigo-c'op la yalique. La sloq'ues sbahic ta yo'tanic, ma ba la xi'ic lajel.

Apocalipsis 12:11 Referans Kwoze

San Juan 16:33

La calbeyex spisil in to, swenta yu'un jich me lamal q'uinal ya awaiyic ta jwenta. Yan ta bay te balumilale ya me xc'ax awocolic, ja'uc me to, ayuc me smuc'ul awo'tanic ta jwenta, melel tsalbilix cu'un te balumilale —xi' te Jesuse.

1 Juan 5:5

¿Mach'a a te ya stsal te balumilale? Ja' te mach'a xch'uunej yo'tan te ja' Snich'an Dios te Jesuse.

1 Corintios 15:57

Ja'uc me to, wocol yal Dios yu'un te ya yac'botic caiytic tsalaw ta swenta te Cajwaltic Jesucristoe.

Apocalipsis 2:26

Te mach'atic ya xju' yu'unic tsalawe soc te ya yat'elinic spasel ja' to c'alal ta slajibal c'aal te bila ya sc'an co'tane, ya me cac'bey yich' yat'elic ta stojol te nacionetique,

Romanos 16:20

Te Dios yu'un lamal q'uinal, nopolix te ya yac'beyex apech'ic ta teq'uel te Satanase. Te yutsil yo'tan cu'untic te Cajwaltic Jesucristoe, ac'a me sjoinex ta apisilic.

Hechos 20:24

Ja'uc me to, ma ba ya jmel co'tan yu'un. Ma'yuc sc'oplal te bit'il ay te jcuxlejale. Ja' nax ay sc'oplal ta co'tan te bin nax co'tan ya jloq'ues te jayeb c'aal ay ta jwenta, ja' to c'alal te ya xc'ot coraile, soc te ya ju'tes cat'el te yac'ojbon ta jwenta spasel te Cajwaltic Jesuse, ja' bi ja' te la yac'bon ta jwenta yalel sc'oplal te jcoleltic ta swenta nax yutsil yo'tan cu'untic te Diose.

1 Juan 4:4

Cal-jnich'nab te ja' yu'unex te Diose, atsalojiquix te lotil j'alwanejetique, yu'un ja' cajal yip te mach'a jun ayex soque. Yan te mach'atic ayic ta swenta te balumilale, alan yip stuquel.

Apocalipsis 3:5

Te mach'atic ya xju' yu'unic tsalawe, ya me x'ac'bot slapic saquil sc'u'-spaq'uic, soc ma ba ya jtup'bey sbiilic ta bay te libro swenta cuxinele. Soc ya me calbey ta jamal sbiilic ta stojol te Jtate soc ta stojol uuc te ch'ul abatetic yu'une.

Apocalipsis 3:21

Te mach'atic ya xju' yu'unic tsalawe, ya me sjoinon ta naclej ta banti te muc'ul nactijibal cu'une, jich nix te bit'il caiyoj tsalaw te jo'one soc te joinejix ta naclej ta bay smuc'ul nactijib te Jtate.

Apocalipsis 3:12

Te mach'atic ya xju' yu'unic tsalawe, ja' me yoyalic ya xc'ot cu'un ta templo yu'un te Dios cu'une. Xujt' ma xloq'uic sbajt'el q'uinal tey a. Soc ya me jts'ibubey ta bay spatic te sbiil te Dios cu'une soc te sbiil te muc'ul lum yu'un te Dios cu'une, ja' te yach'il Jerusalén te ya xcoj tel ta ch'ulchan ta bay stojol te Dios cu'une. Soc ya me jts'ibubey ta bay spatic uuc te yach'il jbiile.

Apocalipsis 2:7

Te mach'a ay xchiquine, ac'a me yaiy stojol te bila ya yal te Espíritu ta stojol te jch'uunjeletique. Te jayeb mach'a ya xju' yu'un tsalawe, ya me cac'bey slo' te sit te' swenta cuxinel sbajt'el q'uinal, te ay ta bay yolil te yawal-sts'unub te Diose —xi'.

Apocalipsis 20:4

Soc la quil te ay muc'ul nactijibaletique. Te mach'atic nacalic tey ae, yich'oj yat'elic ta chajbanwanej. Soc la quilbey xch'ulelic te mach'atic la yich'ic coq'uel sjolic ta scaj te la yalic ta jamal ta testigo-c'op te Jesuse, soc ma'yuc banti la slajin sbaic ta stojol te muc'ul chambalam te xi'bantic sbae soc ta stojol te sloc'ombae, soc ma la xch'uunic yich'el smarca ta stibaic o ta sc'abic. La quil cha'cuxic spisilic soc la quil te sjoinejic ta ajwalil jmil (1,000) ja'wil te Cristoe.

San Lucas 14:26

—Te mach'a ya xtal ta jtojole, teme ma c'axuc jich c'uxon ta yo'tan a te bit'il te state, te sme'e, te yiname, te snich'nabe, te sbanquiltaque, te xwixitaque, te yijts'inabe, soc uuc te xcuxlejal ta q'uinale, ma xju' te jnopojel ya xc'ot cu'une.

Apocalipsis 11:7

Ja'uc me to, c'alal ju'ix yu'unic a te yat'elic ta testigoe, ya me xloc' tel ta xaab te muc'ul chambalam te xi'bantic sbae. Ya me spasic guerra soc ya me stsalotic yu'un, soc jc'axel ya xmilotic yu'un.

Apocalipsis 1:2

Ja' la yal ta testigo te Sc'op Diose. Ja' testigo yu'un uuc te Jesucristo ta swenta te bila ac'bot yile.

Hechos 21:13

Ja'uc me to, la yal te Pabloe: —¿Bi yu'un ya x'oq'uex? ¿Bi yu'un ya awac'bonic jmel co'tan? Te jo'one, jun co'tan chican teme chuquel o milel ya xc'o quich' ta Jerusalén ta swenta te Cajwaltic Jesuse —xi'.

Apocalipsis 19:10

La jpajc'an jba ta yacan te ch'ul abate, yu'un c'an jlajin jba ta stojol. Ja'uc me to, jich la yalbon: —Ma me xapas jich. Melel te jo'one, yabaton uuc te Diose, jich te bit'ilate soc spisil awermanotac te jun yo'tanic ta xch'uunel te testigo-c'op la yal te Jesuse. Ja' me x'alajin aba ta stojol te Diose —la yuton. Melel te testigo-c'op la yal te Jesuse, ja'ix te ya x'at'ej ta yo'tanic te mach'atic j'alwanejetic yu'un te Diose.

Apocalipsis 6:9

Te c'alal la sjam te yo'ebal sello te Alalchije, la quil te ay xch'ulelic ta bay yanil te xchic'jibal milbil smajt'an Dios te jayeb mach'atic la yich'ic milel ta scaj te sc'op Dios soc te jun yo'tan la yalic ta testigo te bila xch'uunejique.

Apocalipsis 2:17

Te mach'a ay xchiquine, ac'a me yaiy stojol te bila ya yal te Espíritu ta stojol te jch'uunjeletique. Te mach'a ya xju' yu'un tsalawe, ya cac'bey swe' te maná-waj te nac'bile. Soc ya cac'bey jp'ij saquil ton te ts'ibubil tey a te yach'il sbiil te ma'yuc mach'a ya sna' jtuluque. Ja' nax ya sna' stuquel te mach'a ya yich'e —xi'.

Apocalipsis 2:13

Jo'on quilojbat te awat'ele, soc ya jna' te banti nainemate soc ta banti ay smuc'ul nactijib te Satanase. Ja'uc me to, jun awo'tan awich'ojbon ta muc' te jbiile, ma ba amucojon ta awo'tan te bit'il ay xch'uunjel awo'tan cu'une, ni ja'uc te bi ora ac'ot ta lajel ta awolilic te Antipase, te jun yo'tan ta jtojol te la xch'uun milel tey a ta banti nainem te Satanase.

Apocalipsis 1:9

Jo'on Juanon te awermanoon te pajal ay ta jwentatic te woclajele soc te pajal ay ta jwentatic ya jointic ta ajwalil te Cristoe. Tey ac'bilon ta bay ch'in q'uinal te ay ta yolil mar te Patmos sbiile, ta scaj te sc'op Diose soc te jamal la cac' ta na'el te sc'oplal te Jesucristoe.

Apocalipsis 12:17

Jich te muc'ul chane c'axem to xan ilin yo'tan ta stojol te antse. Jich ba yaiy guerra soc te jich yipal te sts'umbal xane, ja' bi, ja' te mach'atic yat'elinejic xch'uunel smandal te Diose soc te jun yo'tan yich'ojic ta muc' te testigo-c'op yaloj te Jesucristoe.