Apocalipsis 11:10 - Bible in Tzeltal de Oxchuc y Tenejapa

¹⁰ Te mach'atic nainemic ta balumilale, ya xbujts'naj yo'tanic ta lec yu'un te lajemic ya yilique, soc ya spasic q'uin yu'un, soc ya yac'bey sbaic smajt'anic yu'un. Melel bayal c'ax swocolic ta swenta te cheb j'alwanejetic yu'un te Diose.

Nuevo Testamento Tzeltal de Amatenango

¹⁰ Te machꞌatik kuxajtik ta balmilale lom kontentoik yuꞌun te chamike. Batsꞌi lom kontentoik, talel bael ya yaꞌbe sbaik smajtanik yuꞌun. Porke lom bayal a kꞌax swokolik yuꞌun te chꞌatul jꞌalwanejetike.

Bible in Tzeltal Bachajón

¹⁰ Te mach'atic nahinemic ta bahlumilal tse'el yo'tanic yu'un, ya spasic q'uin soc ya smahtantes sbahic yu'un, como te cheb jalwanejetic bayel la yuts'inic te mach'atic nahinemic ta bahlumilale.

Apocalipsis 11:10 Referans Kwoze

1 Reyes 18:17

C'alal la yil, jich la yalbey: —¿Ja'at bal te ya awac'bey swocol te Israele? —la yut.

Apocalipsis 3:10

Scaj te ach'uunejbon te bila la calbat te jun me awo'tan ya ats'ic awocole, jo'on me ya jcanantayat te c'alal ya xtal prueba ta spamal balumilal, swenta yu'un ya me x'ilbot yo'tanic spisil te mach'atic ainemic ta balumilale.

Hechos 5:33

Te c'alal la yaiyic stojole, la smich' sba yo'tanic yu'un. C'an smilic.

San Juan 7:7

Te mach'a ayic ta balumilal ma ba ya sp'ajex. Yan te jo'one ya sp'ajonic scaj te ya calbey ta jamal te amen te yat'elique.

San Mateo 10:22

Ya me awich'ic p'ajel ta apisilic ta swenta jbiil. Te mach'a ya xcujch' yu'un c'alal ta slajibale, ja' me ya xcol stuquel.

Miqueas 7:8

Ja'at nación te jcontroate, ma me binuc nax awo'tan yu'un te jwocole. Manchuc me yalon, ya me xjajch'on; manchuc me la sjoytayon te ijc' q'uinal, te Cajwal ja' saquil q'uinal cu'un stuquel.

1 Reyes 22:8

Te muc' ajwalil yu'un Israel jich la yalbey te Josafat: —Ay jtul xan te ya xju' ya sjojc'obotic ta stojol te Cajwaltique, ja' te Micaías te snich'an Imla. Mero ma jmulanbey sc'op, melel ma'yuc bi ora ya yalbon te bila leque, puro ma lecuc te bila ya yalbone —xi'. Pero jich albot yu'un te Josafat: —Ma xawal jich —xi' sc'oplal.

Apocalipsis 13:14

Soc ta swenta seña yu'el te ac'bot spas yu'un te sbabial muc'ul chambalam te xi'bantic sbae, la slo'lay te mach'atic nainemic ta balumilal. Jich la yal mandal te ya me spasbeyic sloc'omba te muc'ul chambalam te xi'bantic sba te la yich' ejch'entesel ta puñal te ju' yu'un te cuxine.

Apocalipsis 13:8

Spisil te mach'atic nainemic ta balumilale la slajin sbaic ta stojol te muc'ul chambalame, ja' te mach'atic ma nacaluc sbiilic ta lista swenta cuxinel te yich'oj te Alalchij te laje, te la yich' ts'ibuyel c'alal to te bi ora pastaj te ch'ulchan balumilale.

1 Corintios 13:6

Ma smulan te bila ma stojiluc te bila ay ta pasele, ja' ay sbujts' yo'tan yu'un te bila melele.

San Juan 16:20

Jamal ya calbeyex, ya me x'oq'uex cu'un soc bayal me ya amel awo'tanic. Yan te mach'atic te ayic ta swenta te balumilale, ya xbujts'naj yo'tanic yu'un, ja'uc me to, te mel-o'tan ya awaiyique, ya me xc'atp'uj ta sbujts' awo'tanic.

Jeremías 38:4

Jich yu'un, te mach'atic yich'oj yat'elique la yalbeyic te muc' ajwalile: —Ac'a yich' milel te winique, melel ta swenta sc'op ya snijq'uesbey yo'tanic te soldadoetic te ayic to xan ta lum, soc spisil te ants-winiquetique. Te winique ma ja'uc ya slebey yutsilal te lume, ja' ya slebey te bila amene —xiic.

Proverbios 24:17

Ma me binuc nax awo'tan yu'un, soc ma me xapas q'uin yu'un, teme pejc'ajix soc teme jajch' ta wocol te acontro.

Salmos 89:42

Te scontrotac la awac'beyix stoy sc'abic swenta bin nax yo'tanic te ju' yu'unic tsalawe.

Salmos 13:4

Ma me xyal te jcontroe: “La jtsalix”, ma me xiuc. Ma me binuc nax yo'tan yu'un teme ay la jta falta la yile.

1 Reyes 22:18

Te muc' ajwalil yu'un Israel jich la yalbey te Josafat: —¿Yu'un bal ma la calbat jiche te ma'yuc bi ora ya yalbon caiy te bila lec te winique? Ja' nax puro amen te bi ya yalbon caiye —xi'.

1 Reyes 21:20

Te Acab la sjac'bey te sc'op Elías: —¿Ja'at bal jiche te jcontroat te la ataone? —xi'. Te Elías jich la yal: —Jich, la jtaat. Melel puro amen bi ya apas ta sit te Cajwaltique.

Apocalipsis 16:10

Te yo'ebal ch'ul abate ba smal te copa ta bay smuc'ul nactijib te muc'ul chambalam te xi'bantic sbae. Och ta ijc' q'uinal spamal te smaquen-q'uinale. Spisil la sti' yaq'uic yu'un xc'uxul te swocolique.

Apocalipsis 12:13

Te muc'ul chan te xi'bantic sbae la sna' te ch'ojbilix coel ta balumilale. Jich ba snuts te ants te ayinemix squerem-ale.

Abdías 1:12

La sc'an te ma binuc nax awo'tan ta yilel xq'uexlal te awermano te c'alal ay swocole; soc te ma binuc nax awo'tan ta yilel swocol te Judá te c'alal la yich' jinele; la sc'an te ma la alaban a te c'alal ay swocole.

Jeremías 50:11

“Ja'ex caldeoetic, te la apojbeyic sbiluc te lum cu'une, binuc nax me awo'tanic soc bayaluc me yutsil q'uinal ya awaiyic. Wilanic jichuc jcojt' alal wacax ta aquiltic. Ilajananic jichuc caballoetic.

Salmos 35:19

Ma me binuc nax yo'tanic ta jtojol te jcontrotaque; ma me sts'esitayon te mach'atic ma'yuc swentail te ya yilayonique.