Oseas 7:11 - Bible in Tzeltal Bachajón

¹¹ Te Efraín hich c'ohem te bin ut'il stsuhmut, ma sna' q'uinal: ya yawtay Egipto, ya xbaht ta stojol Asiria.

Bible in Tzeltal de Oxchuc y Tenejapa

¹¹ Te Efraín jich c'oem te bit'il stsumut, ma sna' q'uinal, mero ma'yuc sp'ijil. Ya sc'anic coltayel ta Egipto, soc ora ya xba sc'anic coltayel ta Asiria.

Oseas 7:11 Referans Kwoze

Oseas 12:1

Te Efraín puro ic' ya swe', sjunal c'ahc'al ya st'un bahel te ic' te ya xtal ta stojol banti ya xloc' tal c'ahc'al; ya sp'oltes te lot soc te uts'inwanej, yu'un ya schap sc'op soc Asiria soc ya yich' bahel aceite ta Egipto.

Oseas 5:13

C'alal Efraín ya yil te ay ta chamel, soc te Judá ya yil sc'a'emal, hich te Efraín ya xbaht ta Asiria ta sc'anel coltayel ta stojol te muc'ul ajwalil; pero ma xhu' ya slecubtesex, ma xhu' ya spoxtaybeyex te sc'a'emal.

Oseas 11:11

Yaquic ta nihquel a ya xloq'uic tal ta Egipto hich te bin ut'il ha'mal mutetic, ya xloq'uic tal ta Asiria hich te bin ut'il stsuhmutetic; ya cac' te ya xnahinic ta snahic, xchi te Jehová.

Oseas 4:11

Te antsiwej, vino soc ya'lel ts'usub ya yac' ch'ayuc snopojibal.

Oseas 9:3

Ma ba ya xhilic ta sq'uinal Jehová, te Efraín ya suht bahel ta Egipto, soc ta Asiria me ya swe'elin we'elil te bohloben sc'oblale.

Oseas 14:3

Ma ba ya scoltayotcotic te Asiria; ma ba ya xmohotcotiquix ta cawu; ma ba hich ya calbecotiquix te bin jpasojtic ta jc'abcotic: Ha diosetic cu'uncotic, ma xchihucotic, como ha'at ta atojol ya sta c'uxultayel te me'ba' alal.

Jeremías 2:36

¿Bin yu'un te ora nax yac ayanijtes te behetic awu'une? Ya me xq'uexawat ta scuenta Egipto, hich te bin ut'il q'uexawat yu'un Asiria.

Jeremías 2:18

Yo'tic, ¿bin yac ata a te ya xbahat ta Egipto yu'un yac awuch'be ya'lel te muc'ul-ha' Nilo? Soc ¿bin yac ata a te ya xbahat ta Asiria yu'un yac awuch'be ya'lel te muc'ul-ha' Éufrates?

Proverbios 17:16

¿Banti ya xtuhun taq'uin ta sc'ab te mach'a ma sna' q'uinal yu'un ya sman p'ijil-o'tanil, teme ma sna' snopele?

Proverbios 15:32

Te mach'a mayuc scuentahil ta yo'tan te tojobtesel ha nix ya sp'aj sba, yan te mach'a ya ya'iy te tojobtesel ya sta sp'ijil yo'tan.

Proverbios 6:32

Soc te mach'a ya ya'iy antsiwej, mayuc snopojibal yu'un; te mach'a hich ya spas ha nix ya sjin sba.

2 Reyes 15:19

Te Pul te ajwalil yu'un Asiria la yochintay te q'uinal. Te Manahem la ya'be j'ohlil yoxbahc' (1,000) talento plata scuenta yu'un yacuc xcoltayot yu'un ta ya'beyel xan yip a te ya'tel ta ajwalil.

San Mateo 10:16

Ya jticonex bahel hich te bin ut'il tuminchijetic ta yohlil chojetic. Ha yu'un p'ijanic me hich te bin ut'il chan soc lamaluc me awo'tanic hich te bin ut'il stsuhmut.

Oseas 4:6

La yich'ix jinel te pueblo cu'un ta scaj te mayuc bin sna'oj. Te bin ut'il la ach'oj bahel te bin ay ta na'el, ya jch'ojat loq'uel ta sacerdotehil; te bin ut'il ch'ay ta awo'tan te ley yu'un te Dios awu'un, ha nix hichon ya jch'ay ta co'tan te anich'nabe.

Oseas 5:4

Te ya'telic ma xyaq'uic te ya suhtic tal ta stojol te Dios yu'unique, como ha nax ya sc'anic antsiwej, ma sna'beyic sba te Jehová.

Oseas 8:13

La ya'bonic chic'bil mahtaniletic soc la swe'beyic sti'balul, pero te Jehová ma ba lec yo'tan yu'un. Ya me sna'be te bin chopol spasojic, ya ya'be castigo yu'un smulic, ya me cha'suhtic bahel ta Egipto.

Oseas 9:6

Bahtic ta scaj te jinele; ha ya x'ic'otic yu'un Egipto, ya xmucotic yu'un Menfis. Ya x'u'untayotic yu'un ch'ix te bintic pasbilic ta plata yu'unic, soc ya xcol ch'ixetic ta snahic.

2 Reyes 16:7

Ha yu'un te Acaz la sticon bahel winiquetic ta stojol te Tiglat-pileser ajwalil yu'un Asiria, hich la yal: Ho'on awa'baton soc anich'anon. La', coltayawon ta sc'ab te ajwalil yu'un Siria soc te ajwalil yu'un Israel, te yac ya'belonic guerra, xchi.

Oseas 12:2

Te Jehová ay c'op yu'un soc Judá, ya ya'be castigo te Jacob ha chican bin yilel te stalele; ya ya'be stoj ha chicn bin ya sc'an te ya'tele.

Abdías 1:7

Spisil te mach'atic jun awo'tan soc la slo'loyat; la yac'at bahel c'alal ta sti'il te q'uinale; Te mach'atic lamal q'uinal yac awa'iy soc, la stsalat; te mach'atic la swe'bat te pan awu'un la spasbat ayacol ta awe'tal. ¡Mayuc sp'ijil yo'tan te Edom!