Números 24:7 - Bible in Tzeltal Bachajón

⁷ Ya xmal loq'uel ha' ta baldehetic yu'unic, ay bayel ha' yu'un te sts'umbale. Te ajwalil yu'unic c'ax hich sc'oblal a te bin ut'il Agag, ya xmuc'ub sc'oblal te ban c'alal ya xcuentahinwan.

Bible in Tzeltal de Oxchuc y Tenejapa

⁷ Te Israel c'ax bayal ja' yu'un ta swenta uch'el soc smalel ta ja' te yawal-sts'unube. C'ax jich ya xmandalaj te muc' ajwalil yu'unic a te bit'il Agag; te yip ta muc' ajwalil c'ax muc' stuquel.

Números 24:7 Referans Kwoze

1 Crónicas 14:2

Hich la sna' te David te hich yo'tan Jehová te ay ta ajwalil yu'un Israel, soc te muc'ubtesbot sc'oblal ya'tel ta ajwalil ta stojol te pueblo Israel.

2 Samuel 5:12

Hich la sna' te David te smelelil otsesot yu'un Jehová ta ajwalil yu'un Israel, soc te a'bot yich' yip ta a'tel ta ajwalil ta scuenta sc'uxul yo'tan ta stojol Israel te pueblo yu'une.

Apocalipsis 17:1

Tal jtuhl te huqueb ch'ul a'batetic te yich'ojic te huqueb copahetic, hich la yalbon: La', ya ca'bat awil te castigo ya x'a'bot te j'antsinel-ants hucul ta sba ha'etic.

Jeremías 51:13

Ha'at te nahinemat ta banti bayel ha'etic, te ay bayel ac'ulejal, c'ohtix te alajibal, set'bilix te hilo yu'un acuxlejal.

Apocalipsis 19:16

Ay sbihil ts'ihbabil ta smuc'ul-c'u' soc ta scub: Ajwalil yu'un ajwaliletic soc principal yu'un principaletic, xchi.

Apocalipsis 17:15

Soc hich la yalbon xan te ch'ul a'bat: Te ha'etic la awil te banti hucul te j'antsinel-ants, ha pueblohetic, bayel ants-winiquetic, nacionetic soc c'opiletic.

Apocalipsis 11:15

Te shuquebal ch'ul a'bat la yoq'uesin te scorneta, ay mach'atic tulan c'opojic ta ch'ulchan, hich yacalic ta yalel: Te cuentahinel yu'un te bahlumilal, ha yu'unix te Cajwaltic Dios soc te Cristo yu'une, ha ya xcuentahinwan sbahtel q'uinal, xchihic.

San Juan 1:49

La sjac' te Natanael: ¡Rabí, ha'at te Snich'anat Dios! ¡Ha'at Ajwalilat yu'un Israel! xchi.

Daniel 2:44

Te yorahil te ajwaliletic ini te Dios ta ch'ulchan ya me shach jchahp ban c'alal ya scuentahin jtuhl ajwalil te mayuc bin ora ya xlaj, soc ma ba ya x'ac'ot hilel ta sc'ab yan nación; ha ya swuyticlan soc ya slajinlan spisil te jchahp ban c'alal scuentahinejic te ajwaliletic ini, pero sbahtel q'uinal ya xhil stuquel,

Isaías 48:1

A'iya awa'iyic ini, ha'ex yu'unex Jacob, te abihilinej Israel, te ha sts'umbalex Judá, te ay bintic yac awalic ta jamal ta scuenta sbihil Jehová, soc te yac ac'oponic te Dios yu'un Israel, pero ma ba smelelil soc ma stojiluc.

Isaías 9:7

Te ya xmuc'ub te cuentahinel yu'un soc te lamal q'uinal yu'une, mayuc slajibal ta shuctajib David soc ta ban c'alal scuentahinej; ha ya shach soc ya ya'be yip ta scuenta stojil chahpanel soc toj bin ay ta pasel ta ora ini soc ta sbahtel q'uinal. Ha ya sc'ohtes ta pasel ini te xut'et yo'tan te Jehová te scuentahinej spisil.

Isaías 2:2

Ta nopol slajibal c'ahc'al ha jolal ya xc'oht yu'un spisil witsetic te wits yu'un te sna Jehová; ha toyol ya xc'oht yu'un te tsehletic, soc spisil te nacionetic ya me xtal syom sbahic ta stojol.

Salmos 68:26

¡Halbeyahic yutsil sc'oblal te Dios ta muc'ul tsoblej; halbeyahic yutsil sc'oblal Cajwaltic, ha'ex te sts'umbalex Israel!

Salmos 18:43

La awac'on ta libre yu'un te tsaltamba c'op yu'un te pueblo; la awac'on ta jolal yu'un te nacionetic; la yac' sbahic ta a'batinel cu'un te ants-winiquetic te ma ba la jna'be sba.

Esdras 4:20

Soc chicnaj ajwaliletic ta Jerusalén te bayel yipic, te hu' yu'untaybelic te q'uinal ay ta jehch muc'ul-ha' Éufrates, te la yich'ic tojbeyel spatanic soc yantic pataniletic.

1 Reyes 4:21

Te Salomón la scuentahin spisil te yantic nacionetic c'alal ta muc'ul-ha' Éufrates ha to ta sq'uinal filisteohetic soc ta sti'il sq'uinal Egipto. La yich'beyic tal mahtaniletic soc la yac' sbahic ta a'batinel yu'un Salomón te jayeb c'ahc'al cuxule.

Números 24:20

Te Balaam la yil te Amalec, hich la yal ta sc'op-jalwanej: Te Amalec ha jolal yu'un te nacionetic, pero ta patil jc'axel jimbil ya xc'oht, xchi.

Salmos 89:27

Soc ya cac' te ha ba-nich'anil cu'un ya xc'oht, ha toyol xan ay yu'un te ajwaliletic ta bahlumilal.

1 Reyes 5:1

Te Hiram ajwalil yu'un Tiro la sticon a'batetic yu'un ta stojol Salomón c'alal la ya'iy te och ta ajwalil ta sjelol te state; como te Hiram spisil ora lec yo'tan ta stojol David.

Ester 3:1

Ta patil ini, te ajwalil Asuero la stohytesbe ya'tel te Amán snich'an Hamedata, sts'umbal Agag, ha toyol xan c'oht yu'un spisil te príncipaletic te joquimbilic yu'une.

Salmos 72:11

Spisil te ajwaliletic ya me squejan sbahic ta stojol; spisil te nacionetic ya me yac' sbahic ta a'batinel yu'un.

Isaías 30:25

Ta sc'ahc'alel bayel miltamba soc te bin ora ya xjihn cohel toyol ilo-q'uinaletic ay me muc'ul ha'etic soc be-ha'etic te ya x'oquinic bahel ta spisil toyol witsetic soc ta toyol tsehletic.