Miqueas 4:1 - Bible in Tzeltal Bachajón

¹ Ta slajibal c'ahc'al te wits yu'un te templo yu'un Jehová ha jolal ya xc'oht yu'un te witsiltique, toyol xan ya xc'oht yu'un te tsehletic, ya xbahtic tey a te pueblohetique.

Bible in Tzeltal de Oxchuc y Tenejapa

¹ Ta slajibal c'aal tulan me ya xc'ot xan te wits ta banti ay te templo yu'un Cajwaltique. Ja' me te wits te c'ax toyol xane; ja' c'ax toyol yu'un a te yantic witstiquile. Spisil te nacionetic ya me xtalic ta stojol.

Miqueas 4:1 Referans Kwoze

Jeremías 3:17

Ta hich ora ya me ya'beyic sbihilin te Jerusalén Muc'ul Huctajibal yu'un Jehová, xchi, soc spisil te nacionetic ya me stsob sbahic ta Jerusalén ta scuenta te sbihil Jehová; ma ba ya yo'tantayiquix st'unel bahel te chopol yo'tanique.

Salmos 22:27

Ya me sna'ic soc ya me suhtic tal ta stojol Jehová spisil mach'atic ayic ta sti'il bahlumilal, soc spisil ta chahp nahetic yu'un te nacionetic ya me squejan sbahic ta atojol,

Zacarías 8:3

Hich yaloj te Jehová: Ya suhton tal ta Sión soc ya xnahinon ta Jerusalén. Te Jerusalén ha pueblo yu'un bin Smelelil ya xc'oht sbihil, soc te wits yu'un Jehová te scuentahinej spisil, ha Ch'ul Wits ya xc'oht sbihil.

Salmos 86:9

Spisil te nacionetic te apasoj ya me xtalic ta atojol soc ya me sch'uhuntayat, Cajwal, soc ya me yalbat yutsil sc'oblal te abihile,

Hechos 2:17

Ta nopol slajibal c'ahc'al, xchi te Diose, ya jmal te Espíritu cu'un ta stojol spisil ants-winiquetic; te ach'ix queremetic awu'unic ya me yalic sc'op-jalwanej; te queremetic awu'unic ay bin ya yilic ta snahalsitic; te mamaletic awu'unic ay bin ya swayichtayic;

Oseas 3:5

Patil ya suhtic tal te snich'nab Israel, ya slehic te Jehová, te Dios yu'unic, soc David te ajwalil yu'unique; soc ta nopol slajibal c'ahc'al ya me xtal yich'ic ta muc' te Jehová soc te yutsil slequil.

Ezequiel 43:12

Ha te ley ini yu'un te templo: ta sjoyobal te sba wits mero ch'ultesbil ya xc'oht. Ha te ley ini yu'un te templo, xchi.

Malaquías 1:11

Como c'alal banti ya xloc' tal c'ahc'al c'alal banti ya xmahl c'ahc'al muc' te jbihil ta yohlil te nacionetique, ta bayuc ya yich' chiq'uel pom ta scuenta jbihil soc ya yich' aq'uel mahtaniletic te mayuc yabacul. Muc' te jbihil ta yohlil te nacionetic, xchi te Jehová te scuentahinej spisil.

Zacarías 2:11

Ta hich ora bayel nacionetic jun ya xc'ohtic soc te Jehová, ha pueblo cu'un ya xc'ohtic, soc ya xnahinon ta awohlil, xchi. Hich yac ana'ic a te ticombilon yu'un te Jehová te scuentahinej spisil.

Isaías 54:2

Muc'ubtesa te yawil te nahilpac' awu'un, lima xan bahel te pac' te banti nahinemat; ma me xacom aba, nahtubtesa te schuhquil, a'beya xan yip te ts'apbil te'etic awu'une.

Apocalipsis 20:4

La jquil muc'ul-huctajibaletic, soc huculic tey a te mach'atic a'bot ya'telic ta chahpanwanej. Soc la jquilbe sch'uhlelic te mach'atic xot'bot sjolic ta scaj te testigo-c'op yu'un Jesús soc ta scaj te sc'op Dios, ha te mach'atic ma ba la sch'uhuntayic te chambahlam te xiweltic sba o te sloc'ombahil, soc ma ba la yich'beyic smarca ta sti'bahic o ta sc'abic; la yich'ic scuxlejalic soc la sjoquinic Cristo ta cuentahinwanej lajunwinic yoxbahc' (1,000) ha'bil.

Apocalipsis 11:15

Te shuquebal ch'ul a'bat la yoq'uesin te scorneta, ay mach'atic tulan c'opojic ta ch'ulchan, hich yacalic ta yalel: Te cuentahinel yu'un te bahlumilal, ha yu'unix te Cajwaltic Dios soc te Cristo yu'une, ha ya xcuentahinwan sbahtel q'uinal, xchihic.

Hebreos 1:2

pero ta ora yo'tic te slajibal c'ahc'al ayotic, ha la sc'oponotiquix ta scuenta te Snich'an, ha te la ya'be yu'untay spisil bintic ay, soc ha nix ta scuenta te la spas spisil bintic ay.

Daniel 7:27

Soc te cuentahinel, te yip soc te yutsilal spisil ta chahp ban c'alal ayic ta cuentahinel ta ye'tal ch'ulchan ya x'a'bot te mach'atic ch'uhltesbilic te ha yu'unic te Mach'a mero toyol ay. Sbahtel q'uinal ay te cuentahinel yu'unic, soc spisil te ajwaliletic ya me yac' sbahic ta a'batinel yu'unic soc ya me sch'uhumbeyic smandar.

Daniel 2:44

Te yorahil te ajwaliletic ini te Dios ta ch'ulchan ya me shach jchahp ban c'alal ya scuentahin jtuhl ajwalil te mayuc bin ora ya xlaj, soc ma ba ya x'ac'ot hilel ta sc'ab yan nación; ha ya swuyticlan soc ya slajinlan spisil te jchahp ban c'alal scuentahinejic te ajwaliletic ini, pero sbahtel q'uinal ya xhil stuquel,

Isaías 49:6

hich ya yal: Jteb nax ya ca'iy te ha a'bat cu'un yu'un yac ahach te chahpalchahp sts'umbal Jacob, soc te yac apas te ya suhtic xan tal te mach'atic hilemic yu'un Israel; ha nix ya cac' te ha sacal q'uinal ya xc'ohat ta stojol te nacionetic, yu'un yac awich'bon bahel te colel cu'un c'alal ta sti'il te bahlumilale, xchi.

Apocalipsis 15:4

¿Mach'a a te ma ba ya xi'at, Cajwal, soc te ma ba ya yalbe yutsilal te abihile? como atuquel nax Ch'ul Diosat; spisil te nacionetic ya me xtal sch'uhuntayat, como chicanix te stojil chahpanel, xchihic ta c'ayoj.

Miqueas 3:12

Ha yu'un ha'ex ta acuentahic ya yich' tuquel te Sión, ya xc'atp'uj ta busul jinel te Jerusalén, soc te wits yu'un te Templo ya xpotsot ta ha'mal.

Daniel 7:18

Patil, te mach'atic yu'un te Mamal te ch'uhltesbilic ya me yich'ic te ban c'alal ay ta cuentahinel, ha yu'unic ya xc'oht ta sbahtel q'uinal.

Daniel 7:14

A'bot ya'tel ta cuentahinwanej, a'bot yutsilal soc te banti ya xcuentahinwan, scuenta yu'un spisil pueblohetic, nacionetic soc c'opiletic ya yac' sbahic ta a'batinel yu'un; sbahtel q'uinal te ya'tel ta cuentahinwanej, mayuc bin ora ya xc'ax bahel; soc te banti ya xcuentahinwan mayuc bin ora ya yich' jinel.

Daniel 2:35

La yich'ic wuyticlanel te hierro, chic'bil lum, bronce, plata soc te oro, hich c'oht te bin ut'il suhlil trigo ta swuyojibal ta yorahil snahtil c'ahc'al, jc'axel lichot bahel ta ic', mayuc bin chican hilel. Pero te ton te la smaj te loc'omba c'atp'uj ta muc'ul wits te la snojes spisil te bahlumilale.

Daniel 2:28

Pero ay jtuhl Dios ta ch'ulchan te ya yac' ta na'el te bintic wocol ta na'el, ha la ya'be sna' te ajwalil Nabucodonosor te bin ya xc'oht ta pasel ta patil. Te awayich soc te anahalsit te la awil te c'alal ayat ta awayib, hich ay:

Ezequiel 40:2

Ta scuenta nahalsitil yu'un Dios la yic'on bahel ta sq'uinal Israel, la yac'on hilel ta sba mero toyol wits te banti ay nahetic te hich yilelic te bin ut'il jun pueblo, ta stojol sur.

Ezequiel 38:16

ya xmohat tal ta scontrahinel te pueblo Israel cu'un hich te bin ut'il tocal te ya smac te q'uinale. C'alal ya sts'acay te sc'ahc'alel, ya quic'at tal ta jq'uinal scuenta yu'un ya me sna'bonic jba te nacionetic te c'alal ha'at ta acuenta, Gog, ya cac' ta ilel ta stojolic te Ch'ul Dioson.

Jeremías 48:47

Pero ta patil bahel ya cac' suhtuc xan tal te jchuqueletic yu'un Moab, xchi te Jehová. Li' ya xlaj sc'oblal te castigo yu'un Moab.

Jeremías 16:19

Jehová, ha'at quipat soc toyol ts'ahcat cu'un, soc j'ahnibalat cu'un ta yorahil wocol, ya me xtal ta atojol te nacionetic c'alal ta sti'il bahlumilal, hich me ya yalic: Ha nax lotil te a'bot yich'ic te jme'jtatic, ha te bin ma xtuhun, te mayuc bin la stahic a.

Isaías 43:6

Hich ya calbe te norte: La' li'i, xchihon, soc hich ya calbe te sur: Ma me xacom. Ic'bon tal ta namal te jnich'nab queremetic, soc te ach'ixetic c'alal ta sti'il te bahlumilal,

Isaías 27:13

Soc ta hich ora ya me yich' oq'uesinel muc'ul corneta, te mach'atic ch'ayemic ta sq'uinal Asiria, soc te mach'atic la yich'ic loq'uesel bahel ta Egipto, ya xtal sch'uhuntayic te Jehová ta ch'ul wits ta Jerusalén.

Salmos 110:3

Te pueblo awu'un jun yo'tan ya yac' sba ta acuenta te bin c'ahc'alil yac awa'iy cuentahinwanej, ta scuenta ch'ultesel te ha t'ujbil. C'alal ta shahchibal te sacubel q'uinal yac awich' te sts'ujulel te aqueremil.

Génesis 49:10

Ma ba ya xloc' bahel te bastón ta stojol Judá, ma ba ya xloc' bahel te seña ya'tel ta yohlil te yoc, ha to c'alal ya xtal te mach'a ha yu'un stuquel, te ya xch'uhumbot smandar yu'un te pueblohetique.

Génesis 49:1

Te Jacob la yic'ticlan tal te snich'nab, hich la yalbe: Tsoba abahic, ya calbeyex awa'iyic te bin ya xc'oht ta pasel ta atojolic ta patil bahel:

2 Pedro 3:3

Te bin bayel sc'oblal, ha te yac ana'ic te ta slajibal c'ahc'al ya me xtal jlabanwanejetic te ya spasic te bintic chopol ya smulanic,

Daniel 10:14

Talemon yu'un ya ca'bat ana' bin ya xc'oht ta pasel ta stojol alumal ta patil bahel, como te nahalsitil ha sc'oblal te yorahil ta patil bahel, xchi.

Daniel 7:22

ha to c'alal tal te jtuhl Mamal, la schahpan ta stojil te mach'atic ch'uhltesbilic yu'un te Mach'a mero toyol ay, soc c'oht yorahil te mach'atic ch'uhltesbilic la yu'untayic te ban c'alal ay ta cuentahinel.

Salmos 48:1

Muc' te Jehová, soc ha snuhp' te ya yich' halbeyel yutsil sc'oblal ta muc'ul pueblo yu'un te Dios cu'untic, ta ch'ul wits yu'un.

Isaías 56:7

ha'ic me ya quic' tal ta ch'ul wits cu'un soc ya ca'be yutsil yo'tanic ta jna te banti ya quich' c'oponele. Ya jtsacbe te scohtol chic'bil mahtaniletic soc te yantic milbil mahtaniletic ya ya'bonic ta scajtajib cu'un, como hich ya x'a'bot sbihil te jna: ha te na yu'un sc'oponel Dios yu'un spisil pueblohetic, xchi.

Jeremías 26:18

Te Miqueas te talem ta Moreset c'opoj ta sc'op-jalwanej te c'alal ay ta ajwalil yu'un Judá a te Ezequías, hich la yalbe spisil te pueblo yu'un Judá: Hich yaloj te Jehová te scuentahinej spisil: Te Sión ya yich' tuquel ta arado hich te bin ut'il q'uinal, te Jerusalén ya xc'atp'uj ta busul jinel soc te wits yu'un te templo ya xnoj ta pimil q'uinal, xchi.

Jeremías 31:12

Ya me xtalic soc aw yu'un tse'el-o'tanil ta sba wits Sión, ya me smulambe yutsil slequil te Jehová: ha te trigo, vino soc aceite, te yalatac te tuminchijetic soc te wacaxetique. Hich ya xc'oht scuxlejalic te bin ut'il awal-ts'unubil te ay ya'lel, mayuquix bin ora ya xlaj yipic.

Zacarías 14:10

Spisil te q'uinal ya xc'atp'uj ta muc'ul spamlej c'alal Geba ha to ta Rimón, te ay ta stojol sur yu'un Jerusalén. Toyol sc'oblal ya xc'oht te Jerusalén soc ya xnahinic tey a, c'alal te Puerta yu'un Benjamín c'alal ta yawil te nahil ochibal, ta ochibal yu'un te Angulo, soc c'alal ta toyol bahlal ts'ahc yu'un Hananeel c'alal ta yawil pits'el aceite yu'un te ajwalile.