Jueces 6:34 - Bible in Tzeltal Bachajón

³⁴ Te Gedeón u'untayot yu'un te espíritu yu'un Jehová. C'alal la yoq'uesin te xulubil, tal ta joquinel yu'un te abiezeretic.

Bible in Tzeltal de Oxchuc y Tenejapa

³⁴ Te espíritu yu'un Cajwaltic wentainot ta jyalel yu'un te Gedeón. Jich la yoq'uesin xulubil swenta yu'un jun nax me ya xtal yac' sba soc te mach'atic sts'umbal Abiezer.

Jueces 6:34 Referans Kwoze

2 Crónicas 24:20

Ha yu'un te Espíritu yu'un Dios hul ta stojol te Zacarías snich'an te sacerdote Joiada, la stehc'an sba ta banti toyol, hich la yalbe te pueblo: Hich ya yal te Diose: ¿Bin yu'un yac ac'axuntaybeyic te mandariletic yu'un Jehová? Ma ba lec ya xc'ohex yu'un, como te bin ut'il la awihquitayic te Jehová, ha nix hich ya yihquitayex, xchi.

1 Crónicas 12:18

Tal te Espíritu ta stojol Amasai, te jtsobaw yu'un te lajuneb scha'winic (30) ta tuhl, hich la yal: ¡Awu'unotcotic, David! ¡Ya joquinatcotic, snich'anat Isaí! ¡Lamaluc me q'uinal, lamaluc me q'uinal ta atojol, soc ta stojol te mach'atic ya scoltayat, como ya me scoltayat te Dios awu'une! xchi. Te David la yic' ta stojol soc la yac'ticlambe ya'telic soc te yantic jtsobawetic yu'un te soldadohetique.

Jueces 3:27

C'alal c'oht ta sq'uinal Israel la yoq'uesin xulubil ta witsiltic yu'un Efraín, hich te snich'nab Israel cohic bahel ta wits soc Aod, ha nahilij bahel yu'unic.

Jueces 3:10

Te Otoniel u'untayot yu'un te espíritu yu'un Jehová, ha juez c'oht yu'un Israel soc loc' bahel ta guerra. Te Jehová la ya'be ta sc'ab Otoniel te Cusan-risataim ajwalil yu'un Siria, la ya'be stsal te Cusan-risataim.

Romanos 13:14

Ha me xawac' yu'untayex te Cajwaltic Jesucristo, ma me xanopic spasel mulil te ya smulan spasel te abaq'uetalique.

Gálatas 3:27

como apisilic te awich'ojic ha' ta scuenta Cristo, ac'u'inejic te Cristo.

Salmos 51:11

Ma me xach'ojon loq'uel ta atojol, soc ma me xaloq'ues ta jtojol te ch'ul espíritu awu'une.

1 Samuel 16:14

Te espíritu yu'un Jehová la yihquitay hilel te Saúl, ha uts'inot yu'un bohl espíritu te ticombil yu'un Jehová.

1 Samuel 11:6

C'alal hich la ya'iy te Saúl, hul ta stojol soc yu'el te espíritu yu'un Dios, soc bayel ilin yu'un.

1 Samuel 10:6

Hich te espíritu yu'un Jehová ya me yu'untayat soc yu'el, hich yac ajoquinlan ta aw ta sc'op-jalwanej, soc ya xc'atp'ujat ta yan winic c'ohem.

Jueces 15:14

C'alal c'ohtic ta Lehi, te filisteohetic yacalic ta aw a loq'uic tal stahic. Pero te espíritu yu'un Jehová hul soc yu'el ta stojol Sansón. Te lazohetic te chucajtic sc'ab a, hich c'oht te bin ut'il lino te c'ahq'uem, hich ch'ay cohel te bin chucul a te sc'abe.

Jueces 14:19

Te espíritu yu'un Jehová hul soc yu'el ta stojol Sansón, hich co bahel ta Ascalón, la smil lajuneb scha'winic (30) ta tuhl winiquetic tey a. La yich'be bahel sc'u'ic, ha baht stoj a te mach'atic la sna'beyic scuentahil te chucul c'ope; ilinem a suht bahel ta sna te state.

Jueces 13:25

Te espíritu yu'un Jehová hahch ta ya'beyel yip te Sansón ta campamentohetic yu'un Dan, ta ohlil yu'un Zora soc Estaol.

Jueces 8:2

Pero te Gedeón hich la sjac'be sc'opic: ¿Bin jpasoj ho'on te pajal soc bin la apasic te ha'exe? ¿Ma bal ha'uc lec xan te bin hilem ta yawil ts'usub yu'un Efraín te bin ut'il spisil bin ya xloc' yu'un Abiezer?

Jueces 6:11

Hich te ch'ul a'bat yu'un Jehová tal shuhcan sba ta ye'tal jihte' te ay ta Ofra, te ha yu'un Joás te abiezer-winic. Te Gedeón, ha te snich'an, yac ta smajel trigo ta sp'e'ojibal ts'usub scuenta yu'un ya snac' sba ta stojol te madianetique.

Josué 17:2

Soc la spasbeyic seña ta na'el te yantic snich'nab Manasés, ha chican te jaychahp ayic: ha te snich'nab Abiezer, Helec, Asriel, Siquem, Hefer, soc Semida. Ha'ic te squerem-nich'nab Manasés te snich'an José, ta jujuchahp.

Números 10:3

C'alal ya yich' oq'uesinel schebal, spisil te pueblo ya stsob sbahic tal ta atojol ta yochibal te Nahilpac' Templo yu'un tahojibal.

1 Samuel 13:3

Te Jonatán la ya'be guerra te jchahp filisteo soldadohetic te ayic ta Gabaa; hich la ya'iyic te filisteohetique. Ha yu'un te Saúl la yac' ta oq'uesinel xulubil ta spahmal q'uinal, hich la yal: ¡Ac'a me ya'iyic te hebreohetique! xchi.

1 Crónicas 12:19

Soc ay sts'umbal Manasés te c'axic ta stojol David te c'alal baht soc te filisteohetic ta ya'beyel guerra te Saúl. (Pero te David ma ba la scoltay te filisteohetic, como te jtsobawetic yu'un te filisteohetic, c'alal stsoboj sbahic, la snopic te ya sticonic bahel te David, hich la yalic: Ya me yich' loq'uesel joltic teme ya xc'ax bahel ta stojol Saúl te yajwale, xchihic yu'un.)