Jeremías 46:5 - Bible in Tzeltal Bachajón

⁵ ¿Bin yu'un ya quil te bayel ayic ta xiwel, te suhtic bahel? Tsalbilic te soldadohetic yu'unic, loq'uiquix bahel ta ahnimal, ma ba la yilic suhtel ta spatic. ¡Bayuc ay xiwel! xchi te Jehová.

Bible in Tzeltal de Oxchuc y Tenejapa

⁵ “Ja'uc me to, ¿bila a te ya quile? Yacalic ta sujt'el tel, nojel tel xiwel ta yo'tanic. Te soldadoetic yu'un ya spuc sbaiquix bael; loq'uiquix bael ta animal, ma yiliquix sujt'el spatic. ¡Ay xiwel ta bayuc! Jo'on Ajwalilon, tulan ya cal.

Jeremías 46:5 Referans Kwoze

Jeremías 49:29

Ya me yich'beyic te snahilpaq'uic soc te tuminchijetic yu'unic, te smuhquil snahilpaq'uic, spisil te sbiluquic, soc te camellohetic yu'unic ya me yiq'uic, soc hich me ya yalbeyic ta aw: ¡Ay xiwel ta bayuc! xchihic.

Jeremías 6:25

¡Ma me xloc'at bahel ta aquiltic, ma me xbehenat ta behbetic, como ay espada yu'un te contra, soc bayuc ay xiwel!

Jeremías 46:21

Te tojbil soldadohetic yu'un te ayic ta yohlil, ha pajal soc juhp'en tut wacaxetic; ha nix hich suhtic ta spatic, spisilic loq'uic ta ahnel, ma ba quehchajic, como c'ohtix sc'ahc'alel te swocolic, te yorahil castigo yu'unique.

Nahúm 2:8

Te Nínive hich ay te bin ut'il yawil ha' te yac ta loq'uel te ya'lele. Hich ya yalic: ¡Tehc'ana abahic, tehc'an abahic! xchihic, pero mayuc mach'a ya yil suhtel.

Ezequiel 32:10

Ya cac' te xcham yo'tanic bayel pueblohetic ta acuenta, soc te ajwaliletic yu'unic ya me xtal bayel xiwel ta yo'tanic ta acuenta te c'alal ya cac' chicnajuc sts'anabul te espada cu'un ta stojolic; soc spisil ora ya me xnihquic yu'un xiwel te c'alal ya xch'ayat.

Jeremías 46:15

¿Bin yu'un loc' ta ahnel te Apis? ¡Ma ba hu' la stehc'an sba, como tsulq'uinot yu'un Jehová!

Jeremías 20:10

La jca'iybe sajsaj c'opic tsobolic te hich ya yalic: ¡Ay tulan xiwel ta bayuc! ¡Halbeyahic smul! ¡Ya jlehbetic smul! xchihic. Spisil te mach'atic jun co'tan soc ya smahliyic te ya jc'ohchin te coque. Hich ya yalic: Ya wan xhu' ta lo'loyel, hich ya jtsaltic soc ya jsutbetic spacol, xchihic.

Isaías 19:16

Ta hich ora te egipciohetic hich ya xc'ohtic te bin ut'il antsetic; ya me xnihc yo'tanic yu'un xiwel ta stojol te sc'ab Jehová te scuentahinej spisil te ya stoy ta stojolic.

Génesis 19:17

C'alal loq'uix bahel ta fuera yu'unic a, la yalbeyic: Loc'anic ta ahnel yu'un te acuxlejal, ma me xasut asit ta apat soc ma me ayuc banti ya xhalajat ta spamlej ini; bahan ta ahnel ta witsiltic scuenta yu'un ma ba ya xlajat a, xchihic.

Isaías 5:25

Ha scuentahil te tihl yilimba Jehová ta stojol te pueblo yu'un, soc te la shach sc'ab ta scontrahinel soc te la yehchentes; nihc te witsiltic, te schamen-baq'uetalic ch'ojbilic hilel ta callehetic. Ta spisil ini, ma ba quehchaj te yilimba Jehová, shachoj to te sc'ab ta yaq'uel castigo.

Isaías 13:8

Bayel me ya xiwic, ya xcuentahinotic yu'un wocol soc sc'uxul; hich sc'uxul te bin ut'il ya x'ayin yal te antse. Xcham yo'tanic jujutuhl te c'alal te ya yil sbahic, stsacoj c'ahc' te sit yelawic.

Isaías 42:17

Ya me suht ta spatic soc q'uexlal te mach'atic smuc'ulinej yo'tanic te loc'ombahetique, te hich ya yalbeyic te loc'ombahetic te uhltesbilic: Ha'ex diosex cu'uncotic, te xchihique.

Jeremías 49:5

Ilawil, ya quic' tal xiwel ta atojol te ya xtal ta stojol spisil mach'atic ayic ta ajoyobal, xchi te Jehová te scuentahinej spisil. Jujutuhl toj ya yich'ic tenel bahel, mayuc mach'a ya stsob talel te mach'atic loq'uic ta ahnel.

Ezequiel 39:18

Ya me ati'beyic sbaq'uetal te mach'atic ay yipic soc ya me awuch'beyic sch'ich'el príncipaletic ta q'uinal: hich c'ohemic te bin ut'il tat tuminchijetic soc tut tuminchijetic, tentsunetic soc torohetic, spisilic juhp'enic ta Basán.

Nahúm 2:9

¡Pojahic te plata, pojahic te oro! ¡Mayuc slajibal te c'ulejalil, bayel ta chahp bintic mulantic sba!

Sofonías 1:14

¡Nopolix te smuc'ul c'ahc'alel yu'un Jehová! ¡Nopolix yorahil! Ch'a ya xc'oht te aw ta sc'ahc'alel te Jehová, asta ya x'awon tey a te mach'a ay yip.