Jeremías 42:5 - Bible in Tzeltal Bachajón

⁵ Hich la yalbeyic te Jeremías: Te Jehová ha'uc smelelil soc stojil testigo ta cohlilcotic teme ma ba ya jpascotic te bin ya sticonat ta yalel ta jtojolcotic te Jehová te Dios awu'une.

Bible in Tzeltal de Oxchuc y Tenejapa

⁵ Jich la yalbeyic: —Te Cajwaltic Diose ja' lequil testigo, soc melel te bila ya yalbotic stuquele, ac'a me scontroinotic teme ma jpastic spisil te bila ya yalbotic ta awenta te Diose.

Jeremías 42:5 Referans Kwoze

Génesis 31:50

Teme ya xhahch awuts'imbon te cantsil-nich'nab, o teme yac ale xan yan antsetic, aunque mayuc mach'a sjoquinejotic, na'a me te ha testigo cu'untic ta jchebaltic te Diose, xchi.

Jueces 11:10

Te mamaletic ta Galaad la yalbeyic te Jefté: Ha testigo cu'untic te Jehová te ya jpascotic te bin yac awale, xchihic.

Apocalipsis 3:14

Ts'ihbabeya te ch'ul a'bat yu'un te iglesia ta Laodicea: Hich ya yal te mach'a Hichuc, ha te testigo te stalel jun yo'tan soc te melel, te shahchibal te bintic pasticlambil yu'un Dios:

Apocalipsis 1:5

soc yu'un te Jesucristo, te testigo te stalel jun yo'tan, te ba-nich'anil te cha'cuxaj tal ta yohlil mach'atic chamenic soc te ha jcuentahinwanej yu'un te ajwaliletic ayic ta bahlumilal. Ayuc me yutsilal soc yu'el sbahtel q'uinal te mach'a la sc'uxultayotic soc te la yac'otic ta libre yu'un te jmultic ta scuenta sch'ich'el,

Malaquías 3:5

Ya xtalon ta atojolic scuenta chahpanwanej; ora nax ya jcontrahin ta testigo-c'op te j'ac'-chameletic, te j'antsiwejetic, te mach'atic ya yalic ta jamal ta lot, te mach'atic ma ts'acaluc ya ya'be stojol ya'tel, te ya ya'beyic swocol te me'ba' antsetic soc te me'ba' alaletic, te mach'atic ma stojiluc bin ya spasbe te jyanlumetic, soc te mach'atic ma ba ya xi'onic, xchi te Jehová te scuentahinej spisil.

Malaquías 2:14

Pero hich yac ajoc'oyic: ¿Bin yu'un? xchihex. Como te Jehová ha testigo ta atojol soc ta stojol te ants nuhpunat soc te c'alal queremat to a, te ma ba junix awo'tan ta stojol, aunque ha amohlol soc ha achapoj ac'op soque.

Miqueas 1:2

A'iya awa'iyic apisilic, pueblohetic; a'iya awa'iyic lumq'uinal soc spisil mach'atic ayic tey a, te Jehová te Ajwalil ha testigo ta scontrahimbelex, ha te Ajwalil c'alal ta sch'ul templo.

Romanos 1:9

Te Dios, te spisil co'tan ayon ta a'batinel yu'un ta yalel te lec yach'il c'op yu'un te Snich'an, ha testigo cu'un te spisil ora yac jna'belex te c'alal ya jc'opon Dios;

Jeremías 5:2

Aunque ya yalic: Yiloj Jehová, te xchihique, ma meleluc ya yalic ta jamal, xchi te Jehová.

1 Samuel 20:42

Te Jonatán hich la yalbe te David: Jun awo'tan xbahat, como jchebaltic hich calojtic ta jamal ta scuenta sbihil Jehová: Ha testigo ta jtojoltic spisil ora te Jehová soc ta stojol ats'umbal soc te jts'umbale, xchi. Hich loc' bahel te David, yan te Jonatán suht bahel ta pueblo.

1 Samuel 12:5

Te Samuel hich la yalbe: Te Jehová soc te mach'a tsahbil yu'un, ha testigohetic ta c'ahc'al ini te mayuc bin la atahbonic ta jc'ab, xchi. Hich nix a, xchihic xan.

Éxodo 20:19

Ha yu'un hich la yalbeyic te Moisés: Ha'at yac ac'oponotcotic, ya me ca'iycotic; pero ma me ha'uc ya sc'oponotcotic te Diose, scuenta yu'un ma ba ya xlajotcotic a, xchihic.

Éxodo 20:7

Ma me xatojoltabe ta halel sbihil te Jehová te Dios awu'un, como te Jehová ma ba ya yal te mayuc smul te mach'a ya stojoltabe ta halel te sbihile.

Jeremías 43:2

te Azarías snich'an Osaías, te Johanán snich'an Carea, soc spisil te toyba winiquetic hich la yalbeyic te Jeremías: ¡Lotil te bin yac awal! Te Jehová te Dios cu'untic ma ba hich la sticonat ta yalel: Ma me xbahex ta nahinel ta Egipto, ma xchihuc.

Jeremías 43:4

Ha yu'un te Johanán snich'an Carea, spisil te capitanetic yu'un te soldadohetic soc spisil te ants-winiquetic ma ba la sch'uhunic te bin la yal te Jehová te ya me xhilic ta sq'uinal Judá.

Jeremías 42:20

¿Bin yu'un la alo'loy abahic? Ha'ex nix la aticononic ta stojol Jehová te Dios awu'unic, te hich la awalic: C'opombotic Jehová te Dios cu'untic, soc a'botcotic jna'cotic spisil te bin ya yal te Jehová te Dios cu'untic, hich me ya jpascotic, xchihex.