Éxodo 30:12 - Bible in Tzeltal Bachajón

¹² Te c'alal yac awahtay te snich'nab Israel, jujutuhl me ya ya'be Jehová te stojol sjelol scuxlejal te c'alal ya yich' ahtayel, scuenta yu'un ma ba ya xtal tulan chamel ta stojolic te c'alal yac awahtay.

Bible in Tzeltal de Oxchuc y Tenejapa

¹² —Te c'alal ya awac' ta censo te israeletic, juju-jtul me ya yac'bonic taq'uin swenta stojol xcuxlejal ta jtojol jo'on te Ajwalilon, swenta yu'un jich me ma xlajic. Jich me ma'yuc tulan chamel swenta lajel ya xtal ta stojolic ta scaj te censoe.

Éxodo 30:12 Referans Kwoze

Números 31:50

Ha yu'un la jca'becotic smahtanin Jehová te bintic la jtahcotic jujutuhl: ha te bintic pasbilic ta oro, sch'ahlel c'abaletic soc nuc' c'abaletic, ch'ocowiletic, staq'uinal chiquiniletic soc uhalil, scuenta stojel jmulcotic ta stojol Jehová, xchihic.

1 Crónicas 27:24

Te Joab te yal Sarvia hahch yahtay, pero ma ba hu' ta ahtayel yu'un, como ha tal castigo ta stojol Israel yu'un, ha scuentahil te ma ba ts'ihbabil hilel ta hun yu'un te ya'tel te ajwalil David.

San Mateo 20:28

como te Nich'anil ay ta scuenta winic ma ba tal ta a'batinwanej, ha tal yac' sba ta a'batinel, soc tal yac' sba ta lajel scuenta yu'un ya xweht scolel bayelic, xchi.

Salmos 49:7

Mayuc mach'a ya xhu' ya scoltay loq'uel ta libre te yermano o te ya ya'be Dios te stojol te ya xloc' ta libre,

1 Timoteo 2:6

te la yac' sba ta lajel yu'un smambeyel scolel spisilic, ha te la yich' halel ta testigo c'op te c'alal la sta yorahil.

San Marcos 10:45

Como te Nich'anil ay ta scuenta winic ma ba tal ta a'batinwanej, ha tal yac' sba ta a'batinel, soc tal yac' scuxlejal scuenta scolel tsobolic, xchi.

Job 36:18

Tsahtaya aba te manchuc ya slo'loybat awo'tan te c'ulejaliletic, ma me xawac' showiytesat te yich'el taq'uin yu'un chahpanwanej.

Job 33:24

te ya sna'be yo'bolil sba, te hich ya yalbe te Dios: Coltaya te manchuc ya xbaht ta muquenal, la jtahbey stojol te ya xcol, te xchihuque,

2 Crónicas 24:6

Ha yu'un te ajwalil la yic' tal te muc'ul sacerdote Joiada, hich la yalbe: ¿Bin yu'un ma ba la awalbe te levitahetic te ya me yich'ic talel ta Judá soc ta Jerusalén te spatanic te a'botic stojic yu'un Moisés te ya'bat Jehová te pueblo Israel yu'un te Nahilpac' yu'un te Testigo-c'op? xchi.

1 Crónicas 21:14

Ha yu'un te Jehová la sticon tal tulan chamel ta stojol Israel, lajic waxacpic soc ho'lajunbahc' (70,000) ta tuhl ta Israel.

1 Crónicas 21:12

oxeb ha'bil wi'nal, oxeb u yac awich' tsalel ta espada yu'un te acontratac, u oxeb c'ahc'al te espada yu'un Jehová, ha tulan chamel ta q'uinal, ha te ch'ul a'bat yu'un Jehová ya xlajinwan ta spisil te sq'uinal Israel, xchi. Nopa awa'iy bin ya calbe te mach'a la sticonon tal, xchi te Gad.

Éxodo 30:11

Te Jehová la yalbe te Moisés:

Números 31:49

hich la yalbeyic: Ho'otcotic te a'batotcotic awu'un la jcahtaycotic te soldadohetic te ay ta jcuentacotic, mayuc ch'ayem jtuhluc.

1 Crónicas 21:1

Te Satanás hahch ta scontrahinel te Israel, la stijbe yo'tan te David te ya yahtay te Israel.

1 Crónicas 21:3

La yal te Joab: ¡Jehová ac'a yac' p'ohluc ho'winic (100) xan buelta a te bin ut'il ay ta ora ini, ajwalilat cu'un! ¿Ma bal ha'uc spisilic a'batetic yu'un te cajwal? ¿Bin yu'un te hich ya sc'an ya spas te cajwal, te ya ya'be sta smul te Israel? xchi.

2 Crónicas 24:9

La yich' halel ta Judá soc ta Jerusalén te ac'a yich'ic tal spatanic ta stojol Jehová te la yal ta mandar te Moisés te ya'bat Jehová ta stojol Israel ta jochol taquin q'uinal.