Éxodo 29:18 - Bible in Tzeltal Bachajón

¹⁸ Ya me achic' scohtol te tat tuminchij ta scajtajib ta chiq'uel mahtanil; ha scohtol chic'bil mahtanil ta stojol Jehová te sumet yic', ha chic'bil mahtanil ta stojol Jehová.

Bible in Tzeltal de Oxchuc y Tenejapa

¹⁸ Ac'a ta scajtijib te milbil jmajt'ane, yu'un scojt'ol me ya yich' chiq'uel, melel ja' majt'anil quich'jibal ta muc' jo'on te Ajwalilon, te bujts'an yic' ta jtojole.

Éxodo 29:18 Referans Kwoze

Génesis 8:21

Te Jehová c'alal la ya'iy te sumet yic', la yal ta yo'tan: Ma xcaq'uix xan bohlobuc sc'oblal te lumq'uinal ta scaj te ants-winiquetic, como ta scolel sch'ihyelic to ya snopticlan ta yo'tanic te bintic chopol. Ma ba ya jlajinix spisil bintic cuxajtic hich te bin ut'il la jpasixe.

Filipenses 4:18

Yo'tic ts'acal la jquich'ix, ayix bayel bin ay cu'un; lequix ayon, te bin ut'il la jquich'beyix ta sc'ab te Epafrodito te bin la aticonic tal, ha mahtanil te sumet yic', ha milbil mahtanil te lec yo'tan Dios yu'une.

Efesios 5:2

C'ux me xawa'iy abahic spisil ora, hich te bin ut'il c'ux la ya'iyotic te Cristo soc te la yac' sba ta lajel ta jcuentatic, te ha milbil smahtan Dios te sumet yic' c'ohem ta stojol.

San Marcos 12:33

soc te c'ux ya ca'iytic ta spisil co'tantic, ta spisil jp'ijiltic, ta spisil jch'uhleltic soc ta spisil quiptic, soc te c'ux ya ca'iy jbahtic soc te jpat-xuctic hich te bin ut'il c'ux ya ca'iy jbahtic, te ha c'ax hich sc'oblal a te bin ut'il spisil scohtol chic'bil mahtaniletic soc milbil mahtaniletic, xchi.

Jeremías 6:20

¿Bin stuc cu'un te pom yu'un Sabá o te chi'il jalal te ya xtal ta namal q'uinal? Ma ba ya jtsac te scohtol chic'bil mahtaniletic awu'unic, soc ma lecuc co'tan yu'un te chic'bil mahtaniletic awu'unic, xchi te Jehová.

Isaías 1:11

Hich ya yal te Jehová: ¿Bistuc cu'un te bayel milbil mahtaniletic awu'unic? C'axemix co'tan yu'un te scohtol chic'bil tat tuminchijetic soc te sjuhp'el chambahlametic; ma jc'an te sch'ich'el torohetic, tuminchijetic o tat tentsunetic.

Salmos 50:8

Ma ba ya jtijat ta c'op yu'un te milbil mahtaniletic awu'un soc te scohtol chic'bil mahtaniletic te spisil ora ay ta jtojol.

1 Reyes 18:38

Hich co tal c'ahc' ta stojol Jehová, la schic' te mahtanil, te si', te tonetic, ts'ubil lum soc la slajin te ha' ay ta sch'acomal.

1 Reyes 3:4

Ya xbaht ta Gabaón, como ha toyol tsehl te ay sc'oblal. Te Salomón ya yac' lajunwinic yoxbahc' (1,000) scohtol chic'bil mahtaniletic tey a.

1 Samuel 7:9

Te Samuel la stsac jcoht alal-tuminchij te ya to schu'un, la ya'be scuenta scohtol chic'bil smahtan te Jehová; soc awon ta stojol Jehová ta scuenta Israel; a'iybot sc'op yu'un Jehová.

Levítico 9:24

Loc' tal c'ahc' ta stojol Jehová, la slajin te scohtol chic'bil mahtanil soc te sjuhp'el ayic ta scajtajib ta chiq'uel mahtanil. C'alal hich la yilic spisil te pueblo, awonic soc la squejan sbahic ta lum.

Levítico 1:17

Ya sjepbe ta xic', pero ma ba ya sloq'ues cheb a. Te sacerdote ya schic' ta scajtajib ta chiq'uel mahtanil ta sba te si' yac ta tihlel; ha scohtol chic'bil mahtanil, ha chic'bil mahtanil te sumet yic' ta stojol te Jehová.

Éxodo 29:25

Patil ya me awich'be te bin ay ta sc'abic, pajal ya me achic' ta scajtajib ta chiq'uel mahtanil soc te scohtol chic'bil mahtanil, scuenta sumet yic' ta stojol Jehová. Ha mahtanil a'bot te Jehová ta scuenta c'ahc'.

Génesis 22:13

Hich te Abraham la shach sit, la yil ta spat ay tat tuminchij ipajem xulub ta ch'ixiletic. Baht stsac talel te tat tuminchij, ha la smil scuenta scohtol chic'bil mahtanil te ha sjelol c'oht te snich'ane.

Génesis 22:7

Te Isaac la yalbe te Abraham te state: Jtat, xchi. ¿Bin a, jnich'an? xchi te Abraham. La yal te Isaac: Li' ay te c'ahc' soc te si', pero ¿banti ay te tuminchij te ya xtuhun yu'un te scohtol chic'bil mahtanil? xchi.

Génesis 22:2

Hich halbot yu'un: Ic'a bahel te Isaac te hip jtuhl anich'an te bayel c'ux ta awo'tan, bahan soc ta q'uinal Moriah, tey ta banti wits ya calbat, ya me xc'oht awac' ta scohtol chic'bil mahtanil, xchi.

Éxodo 29:17

Ya me asesen te tat tuminchij, ya me apocbe te sbiquil soc yoc, soc ya me awa'be sjoquin te sesembil sbaq'uetal soc te sjole.

Levítico 1:9

Ya yich'ic poquel ta ha' te sbiquil soc te ya', te sacerdote ya schic' spisil ta sba te scajtajib ta chiq'uel mahtanil. Ha scohtol chic'bil mahtanil, ha chic'bil mahtanil te sumet yic' ta stojol Jehová.

Levítico 4:31

Soc ya me sloq'uesbe spisil te sjuhp'el, hich te bin ut'il la yich' loq'uesbeyel sjuhp'el te milbil mahtanil scuenta lamal q'uinal; te sacerdote ya schic' ta scajtajib ta chiq'uel mahtanil scuenta sumet yic' ta stojol Jehová. Te sacerdote hich ya spasbe te stojel mulil yu'un, soc hich ya sta perdón a.

Levítico 8:21

La spoc ta ha' te sbiquil soc te ya', la schic' scohtol te tat tuminchij ta scajtajib ta chiq'uel mahtanil, ha scohtol chic'bil mahtanil te sumet yic', ha mahtanil te ya yich' chiq'uel ta stojol Jehová, hich te bin ut'il halbot yu'un Jehová te Moisés.

Génesis 8:20

Te Noé la spasbe scajtajib ta chiq'uel mahtanil te Jehová, la stsa te chambahlametic soc mutetic te lec sc'oblalic, la yac' scohtol chic'bil mahtanil ta scajtajib.