Éxodo 27:21 - Bible in Tzeltal Bachajón

²¹ Tey ta Nahilpac' Templo yu'un tahojibal, ta spat te tsalul pac' te ay ta stojol te Testigo-c'op, te Aarón soc te snich'nab ya me scuentahinic schahpanel te c'ahc' ta stojol Jehová ta xtibiltay c'alal ta sab. Ha mandaril te ma xlaj sc'oblal yu'un jujucaj sts'umbal te snich'nab Israel.

Bible in Tzeltal de Oxchuc y Tenejapa

²¹ Te Aarón soc te snich'nab ja' me ya swentainic xchajbanel te c'ajq'uetique. Ya me stilesic sjunal ajc'ubal ta jtojol jo'on te Ajwalilon, ta Nailpac' te bay ya quich' c'oponele. Ja' me ta spat te pac' smacoj scajonil te tratoe. Ja' jmandal ta sbajt'el q'uinal ta stojol te israeletic soc te sts'umbalique.

Éxodo 27:21 Referans Kwoze

Números 19:21

Ha mandar te ma xlaj sc'oblal. Te mach'a ya ya'iy tsihtsinwanej ta ha' scuenta lecubtesel ya me sac' sc'u'. Te mach'a ya spic te ha' scuenta lecubtesel, bohloben sc'oblal ya xhil c'alal ta yihc'ubel q'uinal.

Números 18:23

Te levitahetic ha nax stuquelic ya spasic te a'tel ta Nahilpac' Templo yu'un tahojibal, soc ha ay ta scuentahic te bin mulil ya xc'oht ta scuentahique. Ha mandaril te ma xlaj sc'oblal yu'un te ats'umbale. Mayuc q'uinal ya yich'ic ta yohlil te snich'nab Israel.

2 Crónicas 13:11

Ha'ic ya schiq'uic te scohtol chic'bil mahtaniletic ta jujun sab soc jujun tibiltic soc ya schiq'uic te pom te sumet yic' ta stojol Jehová; ya yaq'uic te pan ta ch'ul mesa soc ya stsunic te c'ahc' ta scajtajib c'ahc' pasbil ta oro yu'un ya xtihl jujun tibiltic. Como te ho'otcotic jcanantayejcotic te mandariletic yu'un Jehová te Dios cu'uncotic, yan te ha'exe la awihquitayiquix.

1 Samuel 3:3

Te Samuel wayal ta templo yu'un Jehová te banti ay te scaxahul te chapbil-c'op yu'un Dios, ma to ba tup'en a te tsumbil c'ahc' yu'un Dios.

Levítico 16:34

Ha mandar awu'unic te ma xlaj sc'oblal scuenta spasel stojel mulil jun buelta ta jujun ha'bil, yu'un spisil smul te Israel, xchi te Jehová. Te Moisés hich la spas te bin ut'il halbot yu'un Jehová.

Levítico 3:17

Ha mandaril te ma xlaj sc'oblal ta cajalcaj ats'umbalic ta bayuc ya xnahinex: ma me ayuc bin ora yac awe'beyic te sjuhp'el soc te sch'ich'ele, xchi te Jehová.

Éxodo 30:8

Te c'alal ya stsun te c'ahc' ta yihc'ubel q'uinal te Aarón ha nix hich ya me schic' te pom. Spisil ora ya me yich' pasel ta stojol Jehová yu'un te patil al-nich'anetique.

2 Pedro 1:19

Ha yu'un chican xan ta lec te ha smelelil te sc'op te jalwanejetique. Lec te yac awich'ic ta cuenta, hich te bin ut'il c'ahc' te yac ta tihlel ta yihc'al q'uinal, ha to c'alal ya sacub q'uinal soc te ya yac' sts'anabul ta awo'tanic te jsacubel ec'.

San Juan 5:35

Te Juan ha c'ahc' te tihl soc te la sacubtes q'uinal; soc la ac'anic te che'oxeb c'ahc'al te tse'el awo'tanic ya x'ayinex ta sacal q'uinal yu'un.

1 Samuel 30:25

(Ta hich ora ha mandar c'oht soc hich c'ahyemic ta spasel ta Israel c'alal ora ini.)

Éxodo 28:43

Ha ya slapic te Aarón soc te snich'nab te c'alal ya x'ochic bahel ta Nahilpac' Templo yu'un tahojibal, o te c'alal ya xnohpojic tal ta scajtajib ta chiq'uel mahtanil yu'un ya spas ya'tel ta ch'ul awilal, scuenta yu'un ma ba ya sta smulic te ya xchamic yu'une. Ha mandaril te stalel ya xhil ta stojol soc ta stojol te sts'umbal ta patil bahele.

Apocalipsis 2:1

Ts'ihbabeya te ch'ul a'bat yu'un te iglesia te ay ta Éfeso: Hich ya yal te mach'a ay huqueb eq'uetic ta swa'el-c'ab soc te ya xbehen ta yohlil te huqueb yawil c'ahc' pasbil ta oro:

2 Corintios 4:6

Como te Dios te la yal mandar te ac'a sacubuc q'uinal ta banti ay yihc'al q'uinal, ha nix la yac' tal sts'anabul ta co'tantic scuenta yu'un hich ya jna'tic a te yutsilal Dios ta sit yelaw te Jesucristo.

San Lucas 12:35

Chapaluquex me soc tsunuluc me ac'ahq'uic;

San Mateo 4:16

Te mach'atic ayic ta yihc'al q'uinal la yilic muc'ul sacal q'uinal, te mach'atic ayic ta yaxinal lajel, sacub q'uinal ta stojolic, te xchihe.

Malaquías 2:7

Como te ye te sacerdotehetic ya sc'an ya scanantay te p'ijil-o'tanil, soc tey ya sle a te Ley te pueblohe; como te sacerdote ha jal-c'op yu'un Jehová te scuentahinej spisil.

Salmos 134:1

Ilawilic, halbeyahic yutsil sc'oblal Jehová ha'ex apisilic te ya'batex Jehová te ya x'a'tejex ta ahc'abal ta sna Jehová.

Números 8:9

Yac awac' ya xnohpojic tal te levitahetic ta Nahilpac' Templo yu'un tahojibal soc yac atsob tal spisil te pueblo yu'un te snich'nab Israel.

Levítico 24:9

Ha yu'un Aarón soc snich'nab te pane, ya swe'ic ta lugar te ch'ultesbil, como ha te bin mero ch'ultesbil yu'un te chic'bil mahtaniletic te ha yu'un Aarón soc snich'nab te ya yich' chiq'uel ta stojol Jehová, xchi.

Levítico 24:3

Ta fuera yu'un te tsalul pac' yu'un te Testigo-c'op, ta Nahilpac' Templo yu'un tahojibal, te Aarón ya schahpan te c'ahc' ta stojol Jehová ta yihc'ubel q'uinal c'alal ta sacubel q'uinal; ha mandaril te ma xlaj sc'oblal ta cajalcaj ats'umbalic.

Levítico 3:8

Ya scajan sc'ab ta sjol te mahtanil yu'un, ya smil ta stojol te Nahilpac' Templo yu'un tahojibal. Te snich'nab Aarón ya stsihtsimbeyic sch'ich'el ta sjoyobal ta sba te scajtajib ta chiq'uel mahtanil.

Éxodo 40:3

Otsesa tey a te scaxahul Testigo-c'op, ya me amac ta tsalul pac'.

Éxodo 30:36

Ya me ajuch' ta lec j'ohliluc, ya me awac' ta stojol te yawil Testigo-c'op te ay ta Nahilpac' Templo yu'un tahojibal, ta banti ya jta jbahtic. Mero ch'ultesbil me ya xc'oht awu'unic.

Éxodo 29:44

Ya jch'ultes te Nahilpac' Templo yu'un tahojibal soc te scajtajib ta chiq'uel mahtanil; soc ya jch'ultes Aarón soc te snich'nab scuenta yu'un ha sacerdotehetic ya xc'ohtic cu'un.

Éxodo 29:42

Ha te scohtol chic'bil mahtanil te ya me yaq'uic spisil ora ta cajalcaj bahel ats'umbalic ta yochibal te Nahilpac' Templo yu'un tahojibal, ta stojol Jehová, ta banti ya jta jbahtic yu'un ya jc'oponex.

Éxodo 29:28

Yu'un Aarón soc snich'nab ya xc'oht, ha mandaril te ya x'a'bot te snich'nab Israel te stalel ay, como ha mahtanil te la yich' tuchilanel. Ha mahtanil te ac'bil yu'un te snich'nab Israel scuenta lamal q'uinal ta stojol Jehová.

Éxodo 25:16

Ya me awotses ta scaxahul te chapbil-c'op te Testigo-c'op te ya ca'bate.

Éxodo 16:34

Te Aarón la yac' ta stojol te Testigo-c'op yu'un ya yich' q'uejel, hich te bin ut'il halbot yu'un Jehová te Moisés.

Génesis 1:8

Dios la ya'be sbihil ch'ulchan te sjamalile. Te yihc'ubel q'uinal soc te sacubel q'uinal, ha schebal c'ahc'al.

Génesis 1:5

Dios la ya'be sbihil c'ahc'alel te sacal q'uinal, soc ahc'abal la ya'be sbihil te yihc'al q'uinale. Te yihc'ubel q'uinal soc te sacubel q'uinal, ha jun c'ahc'al.

Levítico 24:2

Pasa ta mandar te snich'nab Israel te ac'a yich'bat tal lequil aceite yu'un pits'bil olivahetic scuenta yu'un hich ya xtihl spisil ora te tsumbil c'ahq'ue.

Números 18:5

Ay ta acuentahic spasel te a'tel ta ch'ul awilal soc ta scajtajib ta chiq'uel mahtanil, scuenta yu'un ma ba ya xtal xan ilimba ta stojol te snich'nab Israel.

Éxodo 12:14

Te c'ahc'al ini ha sna'ojibal awu'unic ya xc'oht, ya me apasic scuenta q'uin ta stojol Jehová ta cajalcaj ats'umbalic bahel; ha mandaril te ma xlaj sc'oblal.

Éxodo 30:21

ya me spoc yoc sc'abic scuenta yu'un ma xchamic a. Ha mandaril te stalel ya xhil yu'un Aarón soc sts'umbal ta cajalcaj bahel, xchi.

Levítico 6:15

Ya sjohp ta sc'ab te lequil harina yu'un te mahtanil soc te aceite, soc spisil te pom ay ta sba te mahtanil, ya schic' ta scajtajib ta chiq'uel mahtanil scuenta sna'ojibal te sumet yic' ta stojol Jehová.

Levítico 7:36

Te c'alal bin ora la yich'ic malel ta aceite scuenta ch'ultesel, te Jehová la yalbe te snich'nab Israel te hich ya x'a'botic te Aarón soc te snich'nab; ha mandaril te ma xlaj sc'oblal ta cajalcaj sts'umbalic.

Levítico 10:9

Ha'at soc anich'nab te sjoquinejat, ma me xawuch'ic vino o yan bin pajuben te bin ora ya x'ochex bahel ta Nahilpac' Templo yu'un tahojibal, scuenta yu'un ma ba ya xchamex. Ha mandaril te ma xlaj sc'oblal yu'un cajalcaj ats'umbal,

Levítico 17:7

Ma ba ya ya'beyiquix xan milbil smahtan te pucujetic te la yac' sbahic ta antsinel yu'un c'ohem. Ha mandaril ini te ma xlaj sc'oblal ta spisil sts'umbalic, xchihan me.

Levítico 23:14

Ma me xawe'ic pan, ch'ilbil sit o yach'il sit ha to ta c'ahc'alil ini, ha to teme awac'ojix a te mahtanil yu'un te Dios awu'une. Ha mandaril te ma xlaj sc'oblal ta cajalcaj ats'umbalic ta bayuc te ya xnahinexe.

Levítico 23:21

Ha nix ta sc'ahc'alel a ya me apasic ch'ul tsoblej, ma me xapas awa'telic a. Ha mandaril te ma xlaj sc'oblal ta cajalcaj ats'umbalic ta bayuc te ya xnahinex.

Números 35:29

Ha mandariletic ini te ya xtuhun awu'unic ta cajalcaj ats'umbalic bayuc ya xnahinex.