Efesios 2:10 - Bible in Tzeltal Bachajón

¹⁰ Ha ya'telotic te Diose, pasbilotic ta scuenta Cristo Jesús yu'un ya jpastic te lequil a'teliletic te schahpanej ta nahil to te Dios te ya jpastique.

Nuevo Testamento Tzeltal de Amatenango

¹⁰ Yuꞌun jaꞌ te Dios te machꞌa la spasotike. Stukel a xchiknatesotik ta skuenta te Cristo Jesuse, yuꞌun ya jpastik te lekil aꞌtele, jich tutꞌil xchapoj te nail toe yuꞌun jich me ya kaꞌtelintik spasel.

Bible in Tzeltal de Oxchuc y Tenejapa

¹⁰ Melel ja' yat'elotic stuquel te Diose. La xchicnantesotic ta swenta Cristo Jesús, swenta yu'un ya jpastic te lequil at'elil te chajbanbil ta neelal to yu'un te Diose, swenta yu'un ja' me ya jt'untic ta beel stuquel.

Efesios 2:10 Referans Kwoze

Filipenses 2:13

como ha nix te Dios te ya x'a'tej ta awo'tanic, te ya yac' te yac ac'anic soc te yac apasic te bin lec ya sc'an yo'tan stuquel.

Colosenses 1:10

Hich ya xhu' ya x'ayinex te bin ut'il ya sc'an te Cajwaltic, te lecuc yo'tan awu'unic spisil, te yac awaq'uic sit ta scuenta spisil lequil a'teliletic soc behbe yac ana'beyic xan sc'oblal te Diose.

Hebreos 13:21

ac'a scoltayex ta spasel spisil bintic lec scuenta yu'un yac apasic te bin ya sc'an yo'tan, soc ta scuenta Jesucristo ac'a a'tejuc ta awo'tanic ta spasel te bin lec yo'tan yu'une; ayuc me yutsilal te Cristo scuenta sbahtel q'uinal stuquel. Hichuc.

2 Corintios 5:17

Ha yu'un teme ay mach'a junax c'ohemix soc Cristo, ha yach'il ants-winic: hilix te bin poco', spisil pasbilix ta yach'il.

2 Corintios 9:8

Soc ya xhu' yu'un te Dios te ya yac' p'ohluc spisil ta chahp bendición ta atojolic, scuenta yu'un spisil ora ay bin ay awu'unic te ya xtuhun awu'unic, hich ya xhu' yac apasic spisil lequil a'teliletic.

Efesios 4:24

soc lapahic me te yach'il cuxlejal, te hich pasbil te bin ut'il ay te Diose, te toj bin ya spas soc te ch'ultesbil ta smelelil.

Filipenses 1:6

Sch'uhunej co'tan te mach'a la shach te lequil a'tel ta atojolic, ya me shu'tes bahel ha to c'alal ya sta sc'ahc'alel yu'un te Jesucristo.

2 Timoteo 3:17

scuenta yu'un te winic yu'un Dios chapal ya xc'oht yu'un spasel spisil lequil a'teliletic.

Efesios 4:1

Ho'on te ayon ta chuquel ta scuenta te Cajwaltic, ya calbeyex bayel wocol te hichuc ya xcuxajex a te bin ut'il pasel ya sc'an yu'un te ic'bilexix yu'un Dios.

2 Timoteo 2:21

Ha yu'un te mach'a ya spoc sba yu'un te bintic chopol ini, ha ya yich' tuhunel yu'un spasel te bin bayel sc'oblal, ch'ultesbil ya xc'oht, ya xtuhunot yu'un te Cajwaltic soc chapal ta spasel spisil lequil a'telil.

Salmos 100:3

Na'ahic me te ha Dios stuquel te Jehová; ha la spasotic, ha yu'unotic; ha pueblohotic yu'un, soc tuminchijotic ta aquiltic yu'un.

Tito 2:14

Ha la yac' sba ta lajel cu'untic yu'un la smanotic loq'uel ta stojol spisil bintic chopol soc yu'un ya sch'ultes jun pueblo te yu'un ya xc'oht, te ya yo'tantayic spasel lequil a'teliletic.

Isaías 43:21

Ha te pueblo te la jchicnajtes yu'un cu'un ya xc'ohtic, scuenta yu'un ya spuquic ta halel te yutsil jc'oblale.

Efesios 1:4

Ha la stsahotic ta scuenta Cristo te c'alal ma to ayuc a te bahlumilal, scuenta yu'un ch'ultesbil ya xc'ohotic soc mayuc cabalquiltic ta stojol a.

1 Timoteo 6:18

Halbeya mandar te ac'a spasic te bin lec, ha'uc me sc'uhlejalic te lequil a'teliletic, soc te bayeluc bintic ya yaq'uic soc orahuc ay bin ya sq'uebenic.

Tito 3:14

Te mach'atic pajal jch'uhunejtic Dios soc ya sc'an ya snopic spasel lequil a'teliletic ta stojol te mach'atic ay falta yu'unic, scuenta yu'un hich ay scuentahil te scuxlejalique.

Hebreos 10:24

Soc ac'a jnoptic bin ut'il talel c'axel ya juc jbahtic ta c'uxultaywanej soc ta spasel lequil a'teliletic,

Tito 3:8

Ha stojil c'op ini, soc ya jc'an te tulan sc'oblal yac awa'be sna'ic, scuenta yu'un te mach'atic sch'uhunejic Dios ya me ya'telinic spasel lequil a'teliletic, te ha lec soc te ya xtuhun yu'un te ants-winiquetique.

Colosenses 3:10

la alapiquix te yach'il acuxlejalic, te xquechet ta ach'ubel te hich yilel ya xc'oht te bin ut'il te Jpaswanej yu'une, scuenta yu'un ts'acal yac ana'beyic sba ta lec a.

Tito 2:7

Ta spisil ac'a ta ilel ta yohlilic te bin lec ta pasele. C'alal yac awa'iy p'ijubteswanej ac'a ta ilel te jun ay te awo'tan, te ay sc'oblal ta awo'tan,

1 Corintios 3:9

Como te ho'otcotic joc jbahcotic ta a'tel soc Dios; te ha'exe sts'unubex Dios, ha snahex Dios.

1 Pedro 2:12

Lecuc me bin yac apasic ta stojol mach'atic ma ba sch'uhunejic Dios, aunque ya yalbeyex ac'oblalic te ha chopol bintic yac apasic, ya me yilbeyex te lec awa'telic, hich ya yalbe yutsil sc'oblal te Dios te bin c'ahc'alil ya xtale.

Tito 3:1

A'beya xan sna'ic te ac'a yac' sbahic ta cuentahinel yu'un te ajwaliletic soc te mach'atic ay ya'telic, ac'a sch'uhumbeyic smandar, te chapaluc ta spasel spisil lequil a'teliletic.

1 Juan 2:6

Te mach'a ya yal sba te spisil ora ay ta stojol te Diose, ya sc'an ya xbehen hich te bin ut'il behen te Jesuse.

Salmos 138:8

Te Jehová ya me sc'ohtes ta pasel ta jtojol te bin ya sc'an yo'tan. Te sc'uxul awo'tan, Jehová, sbahtel q'uinal ay; ¡ma me xawihquitay te ya'tel ac'abe!

Isaías 29:23

Como te c'alal ya yil te snich'nab, ha te ya'tel jc'ab ta yohlilic, ya me sch'ultesbonic te jbihile. Ya me sch'ultesic te Ch'ul Dios yu'un Jacob, ya me yich'ic ta muc' te Ch'ul Dios yu'un Israel.

San Mateo 5:16

Hich me yac asacubtes q'uinal ta stojol te ants-winiquetic, scuenta yu'un ya yilic te lec awa'telic soc hich ya yalbeyic yutsil sc'oblal a te Atatic ay ta ch'ulchan.

San Juan 3:21

Yan te mach'a ya spas te bin smelelil, ya xtal ta sacal q'uinal scuenta yu'un hich ya xchicnaj a te ha ta scuenta Dios te ya'tele, xchi.

Salmos 51:10

¡Dios cu'un, pasbon ta sac te co'tane, ach'ubtesbon co'tan te stalel toj ay!

2 Tesalonicenses 2:17

ac'a ya'beyex yip awo'tanic soc ac'a scoltayex ta spasel soc ta yalel spisil bintic lec.

Romanos 8:29

Como te mach'atic nahil la sna'be sba, ha nix la schahpan te pajal yilel ya xc'ohtic soc te Snich'ane, scuenta yu'un muc'ul banquilal ya xc'oht yu'un tsobol ihts'inaletic.

Hechos 9:31

Hich lamal q'uinal la ya'iyic te iglesiahetic ta spahmal sq'uinal Judea, Galilea soc Samaria; behbe yich'bel yipic soc spisil ora la yich'ic ta muc' Cajwaltic, soc behbe p'ohlel soc yich'bel yip yo'tanic ta scuenta te Ch'ul Espíritu.

Jeremías 31:33

Hich ay te chapbil-c'op te ya jpas soc te sna Israel ta patil bahel, xchi te Jehová: Ya cac' ta sjolic te ley cu'un soc ya jts'ihbabe ta yo'tanic. Ho'on Dioson yu'unic ya xc'ohon, soc ha pueblo cu'un ya xc'ohtic.

Isaías 60:21

Spisil te pueblo awu'un toj yo'tanic ya xc'ohtic, ya me a'bot yich'ic te q'uinal sbahtel q'uinal. Ha spuhl ya xc'ohtic te la jts'un, ha ya'tel jc'ab, scuenta yu'un hich ya cac' ta ilel a te cutsilale.

2 Corintios 5:5

Ha nix te Dios te hich la spasotic, soc te ya'beyejotic te Espíritu scuenta seña te bin ya quich'tic ta patil.

Isaías 44:21

Na'a me ini, Jacob, como ha'at a'batat cu'un, Israel. Ho'on la jpasat, ha'at a'batat cu'un, Israel, ¡ma ba ya xch'ayat ta co'tan!

1 Timoteo 5:25

Ha nix hich ya xchicnaj te lequil a'teliletic, soc te lequil a'teliletic te mucul ayic ya me sta yorahil te ya xchicnaj.

1 Timoteo 2:10

ac'a sch'ahl sbahic a te ta lequil a'teliletic, hich te bin ut'il ya sc'an pasel yu'un antsetic te sch'uhunejic te Diose.

Deuteronomio 5:33

Behenanic ta be te la spasex ta mandar te Jehová te Dios awu'unic, scuenta yu'un hich ya xcuxajex soc lec ya xc'ohex a, soc te naht aworahil ya xnahinex tey ta q'uinal te yac awu'untayique.

1 Timoteo 5:10

te lec sc'oblal yu'un te lec ya'tel: ha teme ay scoltesej yalatac, teme bayel yutsil yo'tan ya x'otseswan ta sna, teme ay la spocticlambe yoc mach'atic ch'uhltesbilic, teme ay la sc'uxultaylan mach'atic ay swocolic, teme ya'telinej spasel spisil lequil a'teliletic.

1 Juan 1:7

Yan teme yacotic ta behel ta sacal q'uinal, hich te bin ut'il ay ta sacal q'uinal stuquel te Diose, talel c'axel jun co'tan jbahtic, soc ha ya spocbotic loq'uel spisil jmultic te sch'ich'el Jesús, te Snich'ane.

Hechos 9:36

Ta Jope ay jtuhl ants te ha jnopojel, Tabita sbihil, (Dorcas, xchi te c'asesbile). Bayel la spas lequil a'teliletic soc la yac'ticlan ta mahtanil staq'uin.

Isaías 61:3

ta yalel mandar ta stojol mach'atic ay swocolic ta Sión, te ya x'a'botic t'ujbil corona scuenta sjelol stanul c'ahc', te ya x'a'botic aceite yu'un tse'el-o'tanil scuenta sjelol mel-o'tan, soc te ya x'a'botic nahtil-c'u'ul yu'un yutsil q'uinal ya ya'iyic scuenta sjelol pich'il-o'tanil. Hich ya x'a'bot sbihilinic: Jihte'etic yu'un bin stojil ta pasel, Te bin ts'umbil yu'un Jehová, xchi, scuenta yu'un ya yac' ta ilel yutsilal a.

Isaías 19:25

como te Jehová te scuentahinej spisil ya me yac'ticlambe bendición, hich ya yal: Bayel me yutsil te Egipto te pueblo cu'un; soc te Asiria, ha te ya'tel jc'ab; soc te Israel, ha te bin ya xc'oht ta jcuenta, xchi.

Salmos 119:3

mayuc bin chopol ya spasic, ya st'unic te behetic yu'une.

Salmos 81:13

Te lajuc ya'iybon jc'op te pueblo cu'un, te lajuc st'umbon te behetic cu'un te Israel,

Gálatas 6:15

Como ta scuenta Cristo Jesús mayuc sc'oblal teme quich'ojtic circuncisión o teme ma ba quich'ojtic circuncisión, ha nax ay sc'oblal te pasbilotic ta yach'il.

Romanos 8:1

Ha yu'un te mach'atic ayic ta stojol te Cristo Jesús, ma ba quechelix ta stojel te smulique, ha te mach'atic ma ba ya'telinejic spasel te bin ya sc'an te sbaq'uetalic, ha ya'telinejic spasel te bin ya sc'an te Espíritu,

Deuteronomio 32:6

¿Hich bal yac atojic a te Jehová, jsohquejol pueblohex te mayuc sp'ijil awo'tanic? ¿Ma bal ha'uc atat te la spasat? Ha la spasat soc la yac' ayinucat.

Efesios 2:2

te la apasic te c'alal la at'umbeyic stalel te bahlumilal soc la apasic te bin la sc'an te ajaw te scuentahinej te ic', ha te espíritu te yac ta a'tel ta stojol te al-nich'anetic yu'un c'axun-c'op.

Isaías 43:7

spisil te mach'atic yich'beyejonic te jbihile, te la jchicnajtes yu'un ya xchicnaj a te cutsilale, ha te mach'atic la jpas soc te la jchahpan, xchihon.

Efesios 1:1

Pablo, jpuc-c'opon yu'un te Jesucristo ta scuenta sc'anojel yo'tan Dios, ta stojol te mach'atic ayic ta Éfeso te ch'uhltesbilic soc te jun yo'tanic ta stojol Cristo Jesús:

Efesios 2:6

Soc pajal la scha'cuxajtesotic tal soc Cristo, soc ha nix la yac' huhcajucotic soc ta ch'ulchan,

Efesios 2:13

Pero ha'ex te namal ayex ta stojol Dios ta namey, ta ora ini, ta scuenta Cristo Jesús, la awich'iquix nohpojtesel tal ta scuenta sch'ich'el Cristo.

Efesios 2:15

ta scuenta sbaq'uetal la slajimbe sc'oblal te Ley, ha te mandariletic yu'un soc te bin ya xc'anot yu'une, scuenta yu'un ya spas te junax yach'il ants-winic ya xc'oht schebalic ta stojol, hich la yac' lamal q'uinal,