Eclesiastés 1:13 - Bible in Tzeltal Bachajón

¹³ La jca'telin yilel soc slehel ta scuenta p'ijil-o'tanil spisil bin ya yich' pasel ta ye'tal ch'ulchan. Ha tulan a'tel a'bot yu'un Dios te yal-snich'nab ants-winiquetic scuenta yu'un ya x'a'tejic a.

Bible in Tzeltal de Oxchuc y Tenejapa

¹³ Soc sp'ijil co'tan la cat'elin yilel soc snopel spisil te bitic ya yich' pasel ta balumilal. Ja' jich ay te bit'il Dios yac'ojbey yijc'ats te winiquetic, swenta yu'un ya yac' bic'tajuc ta stojol.

Eclesiastés 1:13 Referans Kwoze

Eclesiastés 3:10

Quiloj te a'tel ya x'a'bot yu'un Dios te yal-snich'nab ants-winiquetic yu'un ya yo'tantayic spasel.

Génesis 3:19

Ta scuenta achic' yac ata awe'el, ha to c'alal ya xc'atp'ujat ta lum, como tey chicnajemat talel a; ta ts'ubil lum pasbilat, ta ts'ubil lum ya suhtat, xchi te Diose.

Eclesiastés 1:17

La jcac' co'tan ta sna'beyel sba te p'ijil-o'tanil soc nix te locahijel soc te bin sonsohil. La jna' te ha nix snutsel te iq'ue.

1 Timoteo 4:15

A'telina spasticlanel ini; ha me xbaht ta awo'tan, scuenta yu'un hich me ya xchicnaj ta comonsitil a te behbe yac ta hu'el awu'une.

Eclesiastés 12:12

Yo'tic, jnich'an, teme ay to xan c'opetic te bin ut'il ini, tsahtaya me aba yu'un. Te spasel tsobol librohetic mayuc slajibal, soc te bayel nohptesel ya yac' luhbel.

Eclesiastés 7:25

Ha yu'un la jcac' co'tan ta sna'beyel scuentahil, ta stsahtayel soc ta slehel te p'ijil-o'tanil soc te bin ut'il ay spisil, soc ta sna'beyel schopolil te sonsohil soc te ya xhowiyteswan te sohquejolalile.

Eclesiastés 8:9

Spisil la jquil ini te c'alal la jcac' co'tan ta sna'el bintic ay ta pasel ta ye'tal ch'ulchan, te c'alal jtuhl winic ya smosohin yan winic yu'un ya ya'be swocol.

Eclesiastés 4:4

Soc la jquil te spisil a'tel soc spisil te bin lec ya yich' pasel, tey ya xhahch tal a te sbic'tal yo'tan ta stojol te spat-xuhque. Ha nix hich tojol nax soc ha snutsel te iq'ue.

Eclesiastés 2:26

Como Dios ya ya'be sp'ijil yo'tan, sna'ojibal soc yutsil q'uinal ya'iy te mach'a lec ta site; yan te jmulawil ya ya'be ya'tel ta stsobel soc ta sbusanel c'ulejalil yu'un ya ya'be hilel te mach'a lec ta o'tanil yu'un Dios. Ha nix hich tojol nax soc ha snutsel te iq'ue.

Eclesiastés 2:23

Spisil scuxlejal c'ux obol sba soc ay swocol yu'un te ya'tel; ni ha'uc ya scux yo'tan ta ahc'abal. Ha nix hich tojol nax ini.

Proverbios 23:26

Jnich'an, a'bon awo'tan, ilbon te behetic cu'une.

Proverbios 18:15

Te yo'tan te mach'a p'ij yo'tan ya sta xan sp'ijil; te schiquin te mach'a p'ij, ya sle te bintic ay ta na'el.

Proverbios 18:1

Te mach'a t'ut' ha nax ya sle te bin ya sc'an yo'tan stuquel, soc ya scontrahin spisil lequil tojobtesel.

Proverbios 4:7

Ha nahil ay te p'ijil-o'tanil, ha yu'un ich'a sp'ijil awo'tan. Ich'a te bintic ay ta na'el, c'ax hich sc'oblal spisil a te bintic ay awu'un.

Salmos 111:2

Muq'uic te a'teliletic yu'un Jehová, tsahtaybilic yu'un spisil mach'atic ya smulanic.

Job 28:3

Te winiquetic ya slajimbeyic sc'oblal te yihc'al q'uinal; ya xco bahel ta mero sc'ubulil yutil lum, ya sle te tonetic ta yihc'al q'uinal.

Eclesiastés 3:11

Dios t'ujbil spasoj spisil ta yorahil; soc la ya'be sna' ta yo'tan te ants-winiquetic te bintic scuenta sbahtel q'uinal, aunque ma xhu' yu'unic sna'el te bin spasoj Dios c'alal shahchibal ha to ta slajibal.

Eclesiastés 4:8

Ay jtuhl winic te stuquel ay, mayuc sjelol, mayuc snich'an o yermano; pero ma scom sba ta a'tel, ma xlaj yo'tan yilbel sc'ulejal; soc ma ba hich ya sjoc'oy: ¿Mach'a ya x'a'tejon yu'un, soc bin yu'un ma ba ya jpas te bin ya smulan te co'tane? ma xchihuc. Ha nix hich tojol nax soc tulan a'tel.

Eclesiastés 11:5

Hich te bin ut'il ma ba yac ana' te be yu'un te iq'ue, o bin ut'il ya xchapaj ta sch'uht snan te alale, ha nix hich ma xhu' awu'un sna'el te bin ya spas te Diose, ha te mach'a la spas spisil bintic ay.

Proverbios 25:2

Ha yutsilal Dios te ay bin ya smuc; ha yutsilal te ajwaliletic te ya sle yil te bin mucul aye.