ZEFANYA 2:15 - Susula Malalaok Hehelu Palak Ma Hehelu Beuk

¹⁵ Manada'dik ndia nde neukose, ana da'di neu kota fo henuk no hika-setelek ndia, ma nafa'da nae ndia so'da-molek. Laun-nala laedaenga, sila kotan ndia, kota matuaina nanseli nai daebafak-ka. Te se'kona, kota ndia nee-nee lino-linok nanseli, ta hapu hataholi leo nai ndia fa, ka'da bana fuik-kala leo lai ndia! Hataholi see la'ok tunga kota ndia soona, neukose ana nggenge, ma aon-na ndefa kao-kao.

ZEFANYA 2:15 Referans Kwoze

YESKIAL 28:2

“Hai hataholi daebafak fo, manasapu-manalalok-konei, mafa'da mane Tirus-sa, hata fo Au, Manetualain Fo Mademaina nafa'da neun, ‘No koao-ndaeaok, o mafa'da mae o nde been-na lamatua daebafak, fo o mangatuuk nai kandela manek-ka, nai tasi-a tala'da heon. O bole tao o aoinam-ma, da'di leo lamatua daebafak, tehu mafandendelek leona te, o ka'da hataholi daebafak biasa mesak-kana.

NAHUM 3:19

O makahinam-ma, ta hapu puli-namo'do fan, ma o bisum-mala ta hapu hai fa. Basa hataholi fo lamanene halak la'eneu o nakalulutum-ma, ala totoko liman-nala nana lamahoko. Nana basa hataholi-la doi-doso, hu kande o tatao-nono'i mangalaum fo ta hapu mate'e-mahanin ndia fa.

YESAYA 22:2

Ta nandaa, kota-kota lala'en-na feta-dote ma eeki-latadale fa. Nana emi palani tatibatum, fo mates lai natee-natatik ia dalek, ta mates hu kande natee-natatik-ka fa.

YESKIAL 28:9

Nah, metema faik ndia losa soona, o bei bisa mafa'da mae Manetualain nde o do? Nai o hataholi kanisam-mala matan, ala bubuluk lae o ia, ka'da hataholi daebafak mesan.

RATAPAN 2:15

Basa hataholi manala'ok tunga ndia, hakinonoli o, nanahu nakalulutuk basa o lala'en-na so. Lakakale langa ma lafa'da lae, “Ade, ndia ta nde kota mana'ahiik nanseli, kota fo daebafak-ka namatutua-namadedeman do?”

RATAPAN 1:1

Besak ia, Yerusalem nee-nee lino-linok nanseli, kota fo makahulun-na henuk no makaseek nanseli. Makahulun-na nai leoina-la uluk, tehu besak ia, ana da'di sama leo inafalu so. Makahulun-na kota fo nanakoa-nanakiok nanseli, besak ia, ana da'di ata so.

YEREMIA 19:8

Neukose Au tipas mamate-momopok-ka fo matuaina nanseli neu kota ia de nalosa basa hataholi manala'ok tunga ndia neukose ala nggenge ma langgenggengo ao.

MATEOS 27:39

Basa hataholi mana la'ok tunga ndia lakakale langa ma lakamumulu-lakamamaek Yesus.

YESKIAL 29:3

Manetualain Fo Mademaina, nafa'da au nae, mafa'da mane Masir-ra, hala heheluk-ka nde ia nae, “O musum-ma nde Au ia, hai beis matuaina, fo o makandondoo nai lee-a tala'da. O malame'i mae Lee Nil-la nde been-na, o nuum ndia, ma o mae, o nde taolee ndia.

YESKIAL 27:36

Mopok o, losa dodoon-na. Basa manadangan manai daebafak-ka lala'en-na, ala nggenge-la, nanahu ala bii, boso nalosak sila ua-nalen leondiak boe.”

RATAPAN 2:1

Manetualain ho'i nakeketuk nai nasa-melun dale. Ana fe makiu-makahatuk-ka poti-na Sion. Israel matua-mademan fo dedemak lalai-a, Ana tapan leo daebafak-ka neu so. Nai faik Manetualain namanasa, Ana ta taoafik neu Uman manai Sion-na boe.

YESAYA 32:9

Mamanene leon, hai ina-inak fo so'dan-nala malole, ma ta hapu toto'a-tataak fa!

AYUB 27:23

Hataholi-la soluk tutu'dan-na, nenik totoko limak; ana hapu nakamumulu-nakamamaek nai mamanak lala'en-na.”

AYUB 16:4

Leouni'ka emi nde au ia ma au nde emi soona, au boeo bisa kokolak sama leondiak boe. Au kokolak dede'ak makadotok nanseli, o emi; neukose au akakale langa.

YESAYA 32:11

Losa hatematak ia, emi so'dam-ma malole, ma ta hapu toto'a-tataak fa. Tehu besak ia, emi dele ngge'be-ngge'be no bibii-namata'uk-ka! O'duheni emi bua papakem-ma, fo pa'a si'di lafa lapik neu emi tala'dam-ma.

YESAYA 32:14

Nakalenak uma manek-ka, neukose nanala'o elak, ma nusak-ka polon fo, makalupu-makaseek ndia, ana da'di nee-nee lino-linok. Pupukuk ma uma puni madema naneak-kala, lakatetepak lo dae bafan-na, losa dodoon-na.

YEREMIA 18:16

Nusak ia ala taon da'dik mamanak fo mangalau ina nan seli, ma ana da'di dede'a muu-dauk losa do doon-na. Basa mana la'ok tunga ndia neukose lakakale langa nau lame'da mangalauk-ka.

YESAYA 47:10

O mame'da, o dalem-ma tesa-tama nai o tatao-nono'i mangalaum-ma dalek, o dodoo mae, o tatao-nono'im, nanataoafi tak. O manatee-tenom-ma, ma o malelam-ma, ana taon-na o, matofa-matalak, o maedaenga, ta hapu hata, fo sama leo o fa.

YEREMIA 50:13

Hu ka nde Au amanasa nde Babel da'di nakalulutuk ma hataholin ta, neukose basa manatunga ndia la ala nggenge ma bii.

DANIAL 4:27

Hu ndia de ela leo been-na Ama Manek tunga au nanoli-nafa'dang. Ama Manek boso boe tao sala-singok seluk bai, tehu tao-no'i hata fo malole ma ndoos ma matetuk, ma sue-lai hataholi nuu-taa hata-taak-ka. No enok ndia, neukose Ama Manek naua-nanale nahele.”

HABAKUK 1:7

Bibii-namata'uk da'di nai mamanak lala'en-na; no koao-ndaeaok, ala ta sipok hoholo-lalanek lala'en-na fa; ala sipok ka'da hoholo-lalanek bee kande nandaa no dale hihiin-nala.