YESKIAL 44:12 - Susula Malalaok Hehelu Palak Ma Hehelu Beuk

¹² Tehu, hu kande ala tao feta fo, sene-do'ok neu sosongo-tatangok, soaneu leoina Israel-la, de no enok ndia, ala loso leoina Israel-la, leo sala-singok dale leu, de Au, Manetualain Fo Mademaina soo, ae sila muse nanahukuk.

YESKIAL 44:12 Referans Kwoze

MAZMUR 106:26

Boema Ana soo, ma Ana helu nae, neukose Ana taonisas nai moo solokaek-ka.

YESKIAL 44:10

Manetualain nafa'da au nae, “Neukose, Au huku hataholi Lewi-la, sama-sama loo hataholi Israel fe'ek fo, manala'oela Au, ma manasene-do'ok neu sosongo-tatangok-kala.

YESKIAL 20:23

Nai moo solokaek ndia boe, Au soo ae neukose, Au tao tapasasalas leo basa daebafak-ka lala'en-na leu,

YESKIAL 20:15

Nai moo solokaek ndia boe, Au fes nasanene'da mahelek, ae neukose Au ta o leoina Israel-la, masok leo Au sadia fes dae-a leu, dae fo kamasu'ik ma maoe-maisik, ma malole nanseli nai basa daebafak-ka lala'en-na.

AMOS 8:7

Manetualain, fo leoina Israel-la Manetualain-na, soo-supa basa nae, Neukose Au ta afandele heni sila tatao-nono'i mangalaun-na fa.

HOSEA 5:1

Manetualain nae, “Hai imam-mala lemin! Mamanene leona. Hai hataholi Israel-la lemin, taoafik leona! Hai manek-ka tititi-nonosin-nala lemin! Huhukuk-ka, nana naketu basak soaneu emi so! Nana, tunga ndoon-na, emi maketu-mala'di tunga ndoos ma matetuk, tehu nasafalin-na, emi da'di sama leo meobesi nai Mizpa, sama leo hihi'ik nai Lete Tabor-ra so,

HOSEA 4:6

Emi, fo basa imam mala, ta taoafik neu Au fa, boema Au anang-ngala boeo, ala ta tatao-afik neu Au fa, nalosa ala hapu soe. Emi ta nau sipok Au nanoling-nga fa. Da'di, tao leo bee o, neukose Au boeo, ta sipok emi boen, ma Au ta manaku emi anam-mala, da'di leo Au imam-mala fa.

YESKIAL 44:13

Sila ta bole lalalau-laoono seluk Au, da'di leo imam, do ala koila'e hata fo, malalao-malalafuk ba'eneu Au, do ala masok leo Mamanak Fo Malalao-malalafuk nanseli-a, dalek leu fa. Sila tao, tatao-nono'i manggenggeok-ka, huhukun-na nde ndia.

YESKIAL 20:28

Au os leo nusak fo, Au helu basa, Au fen leo sila neu so. Lelek fo, ala lita pupuku mademaina-ma, ma ai matuaina-la, doon-nala leloaka, boema leu tunu-hotu tutunu-hohotu nai mamanak sila-la. Ala tao-la Au amanasa, nanahu sila tutunu-hohotu nanatunun-nala, ma tutunu-hohotu angon-nala.

YESKIAL 20:6

Nai lelek ndia, Au soo ae, neukose Au oos kalua leme Masir mai, fo leu leo Au hele fes nusak-ka leu. Nusak ndia kamasu'ik, ma maoe-maisik, dae fo malole nanseli, nai basa daebafak-ka lala'en-na.

YESAYA 9:16

Leoina ndia, ana kalua neme agama dalek mai, ma nalutu ha'da-tataon, ma hala-kokolan-nala mangalauk. Hu ndia de, Manetualain ta po'ilotak ta'eanan-nala, esa naladeak boen. Ana ta sue-lai basa faluina-anamaak-kala fa. Tehu Manetualainbei namanasa, de Ana huku nahele.

YESKIAL 48:11

Dae hehelik ndia, neukose ana da'di imam-imam fo, Zadok tititi-nonosin-nala, dae pusakan. Ala lalalau-laoono basa Manetualain, no lilinekak, te ta sama leo hataholi Lewi fo, sila leo esa, ala tunga tao sala-singok sama-sama loo hataholi Israel fe'ek-kala.

HOSEA 4:9

Boema, neukose emi doi-doso sama-na leo sila! Neukose Au huku emi, nandaa no emi tatao-nono'im-mala.