YESKIAL 33:27 - Susula Malalaok Hehelu Palak Ma Hehelu Beuk

²⁷ No Au, Manetualain fo maso'dak-ka, Manetualain Fo Mademaina na'den-na, hataholi manaleo manai kota ndia manandefan-na, neukose nanataonisak. Sila manaleo manai mook-kala, neukose bana fuik-kala la'ahenis. Sila fo manake'ke lai letek-kala, ma lai leak-kala, neukose he'di-laus lepa nenis.

YESKIAL 33:27 Referans Kwoze

YEREMIA 42:22

Hundia de, mafandendelek leona te: nai nusak fo emi mahiik leo mahele ndia, neukose emi mate nai natee-natatik-ka dalek, ado hukande la'a-ndoes-sa do he'di-laus matuaina.”

SEMUEL SUSULAK-KA ESAN-NA 13:6

Basa boema, ala sapu-la hataholi Israel-la, nalosa lakahapi-la hataholi Israel-la. Hataholi Israel bubuak esa ke'ke nai leak-kala dalek, ma bolo-bolok manai letek-kala, do nai batu piak-kala lelan-nala, do nai oedolu-la dalek ma bolo dae-la dalek,

YESKIAL 39:4

Gog no basa solda'dun-nala, ma basa leoina fo manalook-kana, neukose mate la'iesak-kasa lai Israel leten-nala lain, fo Au fe popolan-nala neu manupui-la, ma bana makaak-kala, fo la'ahenis.

YESKIAL 33:24

“Hai hataholi daebafak fo, manasapu-manalalok-konei, hataholi manaleo nai dae Israel-la, kota-kota manandefan-nala, lafa'da lae, ‘Abraham mesak-kana, tehu ana hapu la'iesak dae ia. Ita ia, hataholi makadotok, da'di ita nde tanuu dae ia.’ ”

YEREMIA 44:12

Ma metema neme hataholi Yehuda fo bei elak-kala hapu lakisak dalen-nala fo leu lo Masir soaneu ala leo lai na soona, neukose mate-mopo la'iesak-kasa. Sila basa-basas ana matua, neukose mates nai Masir, nai natee-natatik-ka dalek do hukande la'a-ndoes-sa. Neukose hataholi litas soona, lame'da langgenggengo ao, ma neukose lakamumulu-lakamamaek-kasa. Sila na'den-nala neukose nanapakek da'di leo soo-supak.

YEREMIA 41:9

Oedolu ndia nde been-na oedolu matua, fo manek Asa nde taon-na nai lelek Baesa fo manek Israel-la sapu-nan nana.

YESAYA 2:19

Nai hatematak fo Manetualain fo'a, fo nanggenggengok daebafak-ka soona, neukose hataholi-la masok leo lea-luak manai pupuku mabatu piak-kala dalek leu, do ala kali bolok nai dae dale, fo ela ala boso hapu Manetualain nasa-melun, ma neme koasan fo mandela-masa'an-na mai. Metema faik ndia losa soona, ala tao-la sosongo-tatango lilofulak ma lilopilas fo ala sene-do'ok-ka, neukose nanala'oelak leondiak mesak-kana, soaneu fo lafo-la lo bauk-kala soan.

SEMUEL SUSULAK-KA ESAN-NA 24:3

Boema no lai-laik, Saul hele-na solda'du neulaun lifun telu, neme Israel lala'en-na mai, de leu sanga Dauk no solda'dun-nala, nai Lete Batu Bi'ihii Fuik-ka boboan dulu.

SEMUEL SUSULAK-KA ESAN-NA 23:14

Basa ndia boema, Dauk leo nai lea-leak manai letelepak-kala dalek, nai moo solokaek Zif-fa. Saul usi do'e-do'e non, tehu Manetualain ta fe Dauk leo manek ndia neu fa.

SEMUEL SUSULAK-KA ESAN-NA 22:1

Basa boema, Dauk la'oela kota Gat-ta, de neu ke'ke neme leak manadeka no Adulam-ma. Lelek ka'an-nala, ma basa teidalen-nala lala'en-na, lamanene lae Dauk nai ndia boema, ala mai tungan.

HAKIM-HAKIM 6:2

Hataholi Israel-la bii lanseli neu hataholi Midian-nala, nalosa leu ke'ke lai leak-kala dalek, ma lai mamana fe'ek fo nee-nee lino-linok nai letek-kala.

YESKIAL 14:21

Manetualain Fo Mademaina nafa'da nae, “Neukose, Au huku Yerusalem nenik Au huhukung haa, belan-na seli, fo Au tao amate-amopo, nau hataholi do bana-manu boe. Huhuku ka haak sila-la nde: natee-natatik-ka, la'a-ndoes-sa, bana makaa-makisuk-ka, ma he'di-laus-sa.

ZEFANYA 1:2

Manetualain nafa'da nae, “Neukose, Au tao amopo-amate basa hata manai daebafak-ka lala'en-na: