YEREMIA 2:11 - Susula Malalaok Hehelu Palak Ma Hehelu Beuk

¹¹ Beita hapu leoina esa, ana tuka heni lamatuan-na, leomae lamatuak ndia, Manetualain ta nde ndia fa. Tehu, Au anang-ngala tuka heni Au, fo sila mandela-masa'an-na, nenik hata esa fo, sosoa-ndandaan ta.

YEREMIA 2:11 Referans Kwoze

ROMA 1:23

Ala ta sene-do'ok neu Manetualain fo matea-mahelek ndia fa, te ala sene-do'ok neu ai batu nanadoki-dula kala, fo lalupa hata maso'dak, tehu hahae ta kala; ala doki-dulak las lalupa hataholi daebafak, manupuia, bana ei hak, ma bana manalo'do-lae ka.

YESAYA 37:19

Ala hotuheni, ma ala tao lakalulutuk lamatua daebafan-nala boe, nana lamatua daebafak sila-la, ta lanuu koasa makandondook fa. Sila ka'da ai-batu nanadoki-dulak, fo hataholi daebafak-ka nde taon-nana.

YEREMIA 16:20

Hapu hataholi daebafak tao aon ndia lamatua daebafan-na do? Tao leo beo ta! Manataok ndia tao leo beo ta Manetualain fa.”

MAZMUR 106:20

Ala tuka Manetualain fo, matua-madema nenik sapi mana'a na'u-a, dodoki-dudulan.

MIKHA 4:5

Basa leoina manai daebafak-ka sene-do'ok ma tunga sila lamatua daebafan-na. Tehu neukose ita tunga Manetualain, fo ita Manetualain-na, fo sene-do'ok-kana losa dodoon-na neu.

1 KORINTUS 8:4

La'eneu na'a nana'ak fo nanafe basak neu sosongo-tatango ka, ita bubuluk tae, tunga ndo na sosongo-tatangok ta. Boema ita boeo bubuluk basa, Manetualain ka'da esa; ta hapu fe'ek so'on.

YEREMIA 2:8

Ta hapu imam esa boen, fo natane nae, Au, fo ndia Manetualain-na nai bee fa. Basa manaketu-mala'dik-kala boeo, ta bubuluk see Au fa basa manakoasa-la, lena-la'ban Au paletang-nga. Basa nabi-la, kokolak pake Baal na'den-na, ma ala sene-do'ok neu sosongo-tatangok fo, sosoa-ndandaa taak-ka.”

YEREMIA 2:5

Manetualain nafa'da nae, “O bei-ba'i kaim-mala, hapu sala beek nai Au-a, nalosa ala ke'di-ndiu Au? Ala usi ka'da sosongo-tatangok eli taak-ka de mate'en-na, lakadadaek seluk aoinan-nala.

MAZMUR 115:4

Sila sosongo-tatangon neme lilopilas ma lilofulak-ka mai, fo hataholi daebafak-ka lima tataan ndia.

MAZMUR 3:3

Hapu makadotok lafa'da lae Manetualain ta nau tulu-fali au fa.

ULANGAN 33:29

Maua-manalek ba'eneu o, hai Israel! Ta hapu leoina fo, Manetualain soi-tefa fas. Manetualain sama leo o tafainam-ma, ma o babaa fanam-ma; fo nasala'e o, ma Ana fe o sesengik. O musum-mala neukose ala mai fo ala dokodoe o dalek-kasiam-ma, ma neukose o heheta-aa'is.”

1 PETRUS 1:18

Emi bubuluk hata fo nanabae basak soaneu se'i po'i emi neme so'da manda'di tak fo emi bei ba'i mala ue ela kala. Baba'e na ta nanabaek ninik hata fo hapu nalutu fan sama leo lilo fulak do lilo pilas a,

GALATIA 4:8

Makahulu na, emi ta malelak Manetualain fa, hu ndia de emi da'di ata neme koasa fo lafa'da lae lamatuak, tehu tunga ndo na, Manetualain ta nde ndia fa.

SEMUEL SUSULAK-KA ESAN-NA 4:21

Ana foi ni'iana ndia na'de, Ikabod Nafa'da nae, “Manetualain Fo Mandela-masa'ak-ka, mopo ndela-sa'an neme Israel mai so.” – halan ndia tee tee-tutu'dan nde nae, loso-la Peti Hehelu-balataak-ka so, ma mate aliaman-na ma saon-na so. Hu ndia de, nafa'da nae, “Manetualain Fo Mandela-masa'ak-ka mopo ndela-sa'an neme Israel mai so, nanahu ala loso-la Manetualain Peti Hehelu-balataan so.”

2TAWARIKH 13:9

Ade emi ta usiheni la'iesak Manetualain imam-imam fo Harum tititi-nonosin ma hataholi Lewi-la so hetu? Da'di neu ngganggatin-na emi ho'i su'di see fo nahiik da'di imam, sa'di hataholi ndia neni sapi esa do bi'ilopo hitu, soona emi fen da'di imam soaneu hata fo Manetualain ta nde ndia fa, nana eno-na leondiak ba'eneu leoina fe'ek-kala so'u sila imam-ma. Tehu ami ta tao leo ndiak fa.

YEREMIA 5:7

Manetualain nafa'da nae, “Tao le'e de, Au muse fe do'o do ampon neu Au anang-ngala sala-singon? Ala la'o ela Au so, de ala sene-do'ok neu lamatua daebafak fe'ek. Au fes nana'ak, de la'a losa lakabete, tehu ala hohonge, ma nasi'a leu leo ina manasosoa-piaok-kala leu.

YEREMIA 18:13

Manetualain nafa'da nae, “Matane neu leoina-la esa-esak, ade dede'ak leoiak-ka ana da'di hai so do beik. Hataholi Israel-la ala tao-no'i hai hata esa fo mangalau ina nanseli!

YESKIAL 5:7

Manetualain Fo Mademaina, nafa'da nae, “Hai, Yerusalem, mamanene leona! Te o ta tunga Au paletang-ngala ma Au hoholo-lalaneng fa; o malenalanga-masabasoom-ma, lenaheni leoina manai o boboa-kaisum-ma, de o tunga leoina sila-la ha'dan-na.

YESKIAL 14:5

Basa sosongo-tatangok sila-la, ala tao-la Au anang-ngala, dook-ka leme Au mai, tehu sa'di leo been-na, no Au natataang ndia de, Au anang-ngala fali ma'is leo Au mai.’

ULANGAN 32:16

Ala sene-do'ok neu sosono-tatangok, nalosa Manetualain nape'da dale nasak-kasa fa, Nasa-melun fo'a, nanahu tatao-nono'i mangalauk ndia.

ULANGAN 32:21

Ala tao-la au ta ahiik hata fo, Manetualain ta nde ndia fa, ma Au amanasa sila dodoki-dudula sosongo-tatangon. Boema Au tao-a, Au anang-ngala ta lahiik hataholi fo, leoina ta ndia fa, ma Au amanasa leoina nggoak-ka.

1RAJA-RAJA 11:33

Neukose dede'ak ndia Au taon, nanahu Salomo la'oela Au so, de ana sene-do'ok neu lamatua daebafak-kala, fo nde: Astoret, leoina Sidon na lamatua daebafa inak ka; Kamos, fo leoina Moab pa lamatua daebafan-na; ma Milkom, fo leoina Amon na lamatua daebafan-na. Salomo ta tunga Au hihii-nanaung fa. Salomo ta sama leo aman Dauk fa, fo ana tunga neu Au ma ana tao tunga Au paletang-nga la.

2RAJA-RAJA 1:3

Tehu Manetualain ata nusa so'dan esa, nadenu Elia, fo nabi esa neme Tisbe mai, fo neu natongon-no Mane Ahazia, hataholi nadedenun sila-la, fo nafa'das nae, “Ade, nai Israel ta hapu Manetualain so'on, de nalosa, emi nau meu moke natutu'duk, neme Baal-Zebub, fo kota Ekron-na lamatua daebafan ndia mai?