ULANGAN 23:18 - Susula Malalaok Hehelu Palak Ma Hehelu Beuk

¹⁸ Doik fo, ana hapun neme sosoa-piaon mai boeo, ta bole menin leo emi Manetualaim-ma Uman-na neu fa, fo bae nasar, nana emi Manetualaim-ma, ta hii mete manasosoa-piaok manai uma sosongo-tatangok-kala, ma manasosoa-piaok-kala, doi sese'ban-na fa.

ULANGAN 23:18 Referans Kwoze

FILIPI 3:2

I'akouk hataholi mana tao mangalau kala, fo hataholi sila la landaa lokes lae ‘busa’. Ala lakaseti hataholi la fo sunat asa.

NINITAK 22:15

Tehu hataholi fo manatao dede'a manggenggeo kala, manapake malela makahatu kala, hataholi manatao tatao-nono'i sosoa-piao kala, hataholi kanisa kala, manasongo-tango kala, ma hataholi masapepeko-masandandalik, nau ninik dede'a-kokolak, do ninik tatao-nono'ik boe, basa hataholi sila la mamana nala nai kota ndia deak.

MATEOS 7:6

Boso fe hata malalao ka neu busa, te see busa ndia ana lepos nasafali fo ana sapu na emi. Boema boso fe poemata neu bafi fo daenga bafi ndia boso heheta-aa'i poemata ndia.”

2 PETRUS 2:22

Hataholi sila tatao-nono'in, natetu-nandaa no dede'a lasi ka nae, “Neukose busa na'a seluk muta na”, ma “Ladiu basa bafi oe so, tehu neukose neu loli seluk nai tane dale.”

HABAKUK 1:13

Tehu, tao le'e de O makatatakak, mete hataholi manatao mangalauk fo dale susue-lalai tak sila-la? Ade O ta malalao-malalafuk manseli, soaneu mete tatao-nono'i magalauk fa hetu? Ade O ta malua mete ta ndoos ma matetuk-ka fa hetu? Da'di, tao le'e de, O ka'da denge-denge, nai lelek hataholi malenalanga-masa'basok-kala tao lakalulutuk hataholi kamahehelek-kala?

YESKIAL 16:33

Ina manasosoa-piaok esa, muse ana hapu sese'ba-babaek, tehu nasafalin-na, o nde fe o tou susue-lalaim-mala, bua palsen, nakalenak bai, o fufu'dis menik doik, fo ela ala mai leme basa mamanak lala'en-na mai, fo ala sungu loo o.

YESAYA 61:8

Manetualain nafa'da nae, “Au sue-lai ndoos ma matetuk-ka, ma akamuu-akadau tuni-ndenik, boema tatao-nono'i magalauk-ka. Neukose Au bae o ngga'dim-ma, no lilinekak, ma tao hehelu-balataa manaketu basa taak-ka o emi.

AMSAL 26:11

Sama leo busa fali leo muta-na neu, leondiak boe, hataholi nggoak-ka, la'i esa seluk nggoan-na.

MAZMUR 22:16

Au botolii koko'dong-nga namatuu sama leo fale fangik-ka, au maang-nga nakadita-na, au tanalaing-nga. Manetualain, O la'oela au nai daesopuk lain, sama leo hataholi manamate basak-ka so.

ULANGAN 23:21

Metema, emi helu mae, emi fe hata esa leo emi Manetualaim-ma neu soona, no lai-laik, tao matetu emi hehelum ndia, nanahu emi Manetualaim-ma, Ana la'ok nakandoo, fo metema, emi ta tao matetu fan soona, emi masala-masingo.

IMAMAT 18:22

Touk ta bole sao touk fa. Manetualain nakamuu-nakadau tatao-nono'ik ndia.

MALEAKHI 1:14

Soo-supak be'eneu manake'di-ndiuk, fo ana tunu-hotu fe Au bana beli tak, metema bei hapu bana neulauk nai banan-nala dalek, fo ana helu basa, ana fen neu Au so! Nana Au nde Mane Matua-madema, ma nanafe ha'da-holo mata neme basa leoina-la mai.”

ULANGAN 12:6

Nai mamanak ndia nde, emi muse meni tutunu-hohotu nanatunuk, boema tutunu-hohotu fe'ek-kala, fo nde emi tunu-hotu hahapu dadain ba'ek esa neme ba'eneu sanahuluh, tutunu-hohotuk soaneu bae nasar-ra, emi tutunu-hohotum fo, emi fe no emi dale hihiim-ma, ma emi sapi ana bi'ihii ana, bi'ilopo ana fo, nanabongi makasososak-kala.

IMAMAT 7:16

Metema, hataholi esa neni tutunu-hohotuk mole-dame, fo ana tao natetu hala hehelun neu Manetualain, do soaneu tutunu-hohotuk neme dale nameme'dan-na mai, soona ta paluu la'a basa paa ndia, nai faik ndia dalen-na fa. Bole na'a paa bei elak-kala, nai fai balahaan-na.

IMAMAT 19:29

Boso makadadaek emi anainam-mala na'den-na, nenik fes ala da'di ina manasosoa-piaok nai uma sosongo-tatangok. No tatao-nono'i leondiak-ka, emi tao manggenggeo emi nusam-ma, ma tatao-nono'i malela ha'da taak-ka, neukose nalole besa-besa nai ndia.

IMAMAT 20:13

Metema touk esa, ana sungu no touk fe'ek esa soona, ala tao tatao-nono'i ta kandaak ma nakamumulu-nakamamaek, de muse hukunisa duas. Sila mate, hu kande sila salan-na.

ULANGAN 22:21

soona muse no inak ndia, leo ina-aman lelesun-na neu. Fo basa touk manai kota ndia, ala tapan nenik batu, losa maten nai mamanak ndia. Inak ndia, ana tao tatao-nono'ik esa, neni mamaek fe ita leoinan, nanahu lelek bei nai ina-aman uman, fo ana beita saoana fa, te ana sungu hai no touk so. No huhukuk ndia de, emi tao mamopo tatao-nono'i mangalauk ndia.

MIKHA 1:7

Neukose Au akalulutuk dodoki-dudula kabeli inan-nala, ma neukose Au hotu heni basa ala fe bua-lo'as neu ina-inak fo lalalau-laoono nai uma sosongok-ka, boema neukose Au tao amopo-amate sosongo-tatangon lala'en-na. Bua-lo'as sila-la nde been-na, buna-baok neme sila huhule-haladoin neu lamatua daebafak fo manafe dae-oe naisi-namina. Besak ia, neukose musu ho'i neni basa sila-la, fo loke makasi neu sila lamatua daebafan-nala.”

1RAJA-RAJA 14:24

Nai mamanak sila-la ala tao tatao-nono'i sosoa-piaok da'dileo sosongo-tatangok neu lamatua daebafak-ka. Nakalenak touk-kala boeo hapu bela-ba'uk da'dileo mana sosoa-piaok. Hataholi Yehuda-la tao basa tatao-nono'i manggenggeok fo nanatao-no'ik neme leoina fo Manetualain usihenis nai lelek hataholi Israel-la masok leo nusak ndia dalek leu.