IMAMAT 1:17 - Susula Malalaok Hehelu Palak Ma Hehelu Beuk

¹⁷ Basa soona, muse siin neu manupui ndia li'da huun-na, tehu ta bole ketu heni li'dan-na fa. Soona, muse tunu manupui ndia, nai mei tunu-hotuk lain. Tutunu-hohotuk nanatunuk ndia boon-na, nandaa no Manetualain dalen-na.

IMAMAT 1:17 Referans Kwoze

KEJADIAN 15:10

Boema, Abram tao fe'e bana sila-la, soaneu Manetualain. Ana seseli ba'e sapi, bi'ihiik ma bi'ilopo sila-la neu beke duak, de ana pe'das lasasalematak nai ta'dak dua dalek. Tehu ana ta seseli ba'e manupui sila-la fa.

1 PETRUS 3:18

Nanahu Kristus mate ka'da la'i esa mesa kana, losa dodoo na. Hu ka nde hataholi daebafa ka sala-singon de hataholi sala tak esa, Ana mate soaneu hataholi masala-masingo ka. Kristus tao-no'i basa sila la, fo ela Ana hapu hela-nole emi leo Manetualain mai. Ala tao lisan tunga ao paa ka, tehu nanatao naso'da falik tunga samane ka.

ROMA 4:25

Yesus ndia nanafe henik soaneu nanataonisak nanahu ita sala-singo nala; boema Manetualain tao naso'da fali kana, soaneu Ana soi enok fe ita malole falik to Manetualain.

YOHANIS 19:30

Yesus nalamei nita oe angol ndia, boema nafa'da nae, basa basan “Dai so!” Tutika Ana pelu neu de maten.

MATEOS 27:50

Basa boema Yesus nalo napene'e seluk, boema ketu hahae na.

MAZMUR 16:10

Nana, O ta po'ilotak au mate fa; hataholi fo O sue-laik-ka, O ta po'ilotak-kana mate-mopo fa.

IMAMAT 5:8

Muse neni manupui sila-la leo imam-ma neu. Fo imam-ma, muse tunu-hotu nakahuluk manupui fo, nanatunu-hotuk soaneu tutunu-hohotuk sala-singok hapu do'o do ampon-na. Muse po'de-la'di manupui ndia lesuha'in-na, tehu ta bole ketu langan-na fa.

IMAMAT 1:13

Boema hataholi ndia muse safe bana ndia tei-aten ma sakibolon-na. Basa soona, imam-ma muse tunu-hotu la'iesak paa ndia nai mei tunu-hotuk lain soaneu Manetualain. Tutunu-hohotuk ndia boon-na, nandaa no Manetualain dalen-na.

KEJADIAN 8:21

Tutunu-hohotuk ndia, boomenin-na tao namahoko Manetualain dalen-na, boema Ana dodoo nai dalen dalen-nae, “Neukose Au ta soo-supa seluk daebafak ia so'on, hu kande hataholi daebafak-ka tatao-nono'in; Au bubuluk, hataholi daebafak-ka dudu'a-aafin ndia, mangalauk neme bei muli-solun-na mai. Neukose, Au ta tao amopo-amate basa mahahae maso'dak, fo bei kaso'dak-kala so'on, sama leo besak-ka Au taok ia.

IMAMAT 9:13

Basa ndia boema, leni fen bana ndia langan-na, ma bibiak fe'e-fe'en-nala, de ana tunus nai mei tunu-hotuk lain.

IMAMAT 2:2

Muse nenin leo imam-imam fo Harun tititi-nonosin-nala neu. Imam malalau-maoonok-ka muse ho'in-na ha'desopuk ndia nafanggetek esa, no mina setun-na, ma boomenin-na lala'en-na, fo tunun nai mei tunu-hotuk lain, fo da'di leo ta'du-tana, nae basa-basan lala'en-na, nanatunu-hotuk basak soaneu Manetualain so. Tutunu-hohotu nana'ak ndia boon-na, nandaa no Manetualain dalen-na.

IMAMAT 3:5

Muse tunu basa sila-la, sama-sama no tutunu-hohotuk fe'ek-kala, nai mei tunu-hotuk lain. Tutunu-hohotuk nana'ak ndia boon-na, nandaa no Manetualain dalen-na.

IMAMAT 6:14

Nakanenetek la'eneu tutunu-hohotu nana'ak ba'eneu Manetualain nde ia. Harun tititi-nonosin esa, muse neni tutunu-hohotuk ndia leo mei tunu-hotuk-ka matan-na neu.

BILANGAN 15:3

Soaneu tutunu-hohotu nanatunuk, do tutunu-hohotuk fo bae nasar, do tutunu-hohotuk no dale hihii-nanau mesan-na, do tutunu-hohotuk nai feta-feta biasa soona, emi bole tunu-hotu fe Manetualain: sapi mane, bi'ilopo mane, bi'ilopo do bi'ihiik. Tutunu-hohotuk sila boon-na, neukose nandaa no Manetualain dalen-na.

BILANGAN 28:8

Bi'ilopoana, fo soaneu tunu-hotu le'donosok-ka, muse tunu-hotun sama leo tunu-hotu fafaik-ka, sama-sama no angol. Tutunu-hohotuk ndia boon-na, nandaa no Manetualain dalen-na.