HATAHOLI 7:41 - Susula Malalaok Hehelu Palak Ma Hehelu Beuk

⁴¹ Boema nai lelek ndia, ala doki-dulak la sapi ana esa, de basa boema ala tunu-hotu fe sapi ana nanadoki-dulak ndia tutunu-hohotuk, ma ala tao feta fo ala sene-do'ok neu buas fo sila tao lan ndia.

HATAHOLI 7:41 Referans Kwoze

NEHEMIA 9:18

Ala tao sosongo-tatangok sama leo sapi-a. Boema lafa'da lae, ‘Emi Manetualaim-ma nde ia, fo no emi neme Masir.’ Ou Manetualain, lakamumulu-lakamamaek-ka nde O mesam-ma!

NINITAK 9:20

Tehu ela hataholi fo susa soe katelu kala ta taolisa fas ala, ala ta nau hahae tao batu sosongo-tatangok. Ala ta hahae sene-do'ok neu dula dale mangalau kala ma songo-tango lilopilas, lilofulak, liti, batu ma ai, fo ta hapu lita do lamanene, do la'ok boen.

HOSEA 9:10

Manetualain nafa'da nae, “Lelek Au hapu Israel makasososan-na, Au amahoko sama leo hataholi-a hapu angol boak-ka nai moo solokaek-ka. Lelek Au ita emi bei-ba'i kaim makasososan-na, Au amahoko, sama leo hataholi-a nita kaa boa makasososak-ka. Tehu, lelek leu leo Letek Peor-ra leu, ala mulai sene-do'ok neu Baal-la, nalosa ala da'di langgenggeo, sama leo lamatua daebafak fo ala sue-lain ndia.

HOSEA 9:1

Hai leoina Israel-la lemin, boso boe tao seluk emi fai malolem-mala, sama leo leoina fe'ek-kala bai. Emi la'oela emi Manetualaim-ma so, ma emi ta lilineka neu fan. Nai popo'de gandum-mala esa-esak, emi mase'o emi aoinam-ma da'di leo manasosoa-piaok, ba'eneu lamatua daebafak Baal-la, ma emi mamahoko sipo gandum fo emi mafa'da mae, lamatua daebafak ndia, ana fe emi ngga'dim-ma nde ndia!