HAKIM-HAKIM 7:8 - Susula Malalaok Hehelu Palak Ma Hehelu Beuk

⁸ Hu ndia de, Gideon nadenu hataholi Israel fe'ek sila-la fali le'us, ela ka'da hataholi natu ka teluk sila-la. Ala ho'i falik tua-lepa ma pupuuk-kala, leme hataholi manafali le'us sila-la mai. Hataholi Midian-nala lai bafak manai hataholi Israel-la mamana ofun-na, boboan dae.

HAKIM-HAKIM 7:8 Referans Kwoze

1 KORINTUS 15:52

Dede'ak ndia neukose ana da'di no kaiboboianak nai hatematak esa dalek, nai lelek fo pupuu ka nanapuuk soaneu mate'e na. Nana nai lelek fo pupuuk ndia lii na nananamanenek soona, neukose hataholi manamate kala nanatao naso'da falik ninik ao paa matea-mahelek, ma ita basa-basa tala neukose nanatao nasafalik.

YESAYA 27:13

Nai lelek ndia, neukose pupuuk matua nanapuuk, fo naloo falik basa hataholi Israel fo, nanatapahenik manai Asyur ma Masir-ra. Neukose ala mai leo Yerusalem mai, fo ala sene-do'ok neu Manetualain nai pupuku malalao-malalafun-na.

HAKIM-HAKIM 6:33

Nai lelek ndia, basa hataholi Midian, Amalek ma leoina fe'ek-kala leo-leon manai moo solokaek Yarden-na boboan dulu, lakabubua so. Ala lena Lee Yarden-na, de ala ofu nai Bafak Yizreel-La.

HAKIM-HAKIM 3:27

Lelek ana losa nusa letelepak Efraim-ma, boema no lai-laik, ana puu pupuuk-ka, fo naloo hataholi Israel-la leu latee-lata'ti. Ala mai boema, nauli-nalangas, de ala kona leme letelepak ndia mai.

YOSUA 6:20

Boema, basa imam-mala, puu pupuun-nala. Ma hataholi Israel-la lamanene pupuuk-kala liin-na tu'tik-ka, ala eki lapane'e, de ndefa heni kota Yerikho-a, papala nanadaman-na. Basa solda'du Israel-la lala'en-na kae tutik, de leu leo kota ndia dalek leu, fo langatuu-lan.

YOSUA 6:4

Imam hitu, esa-esak neni pupuuk, fo muse ala la'ok nai Peti Hehelu-balataak-ka uluk. Neu fai ka hitun-na soona, o ma o solda'dum-mala, muse la'ok okofefeo kota ndia la'i hitu, fo ndia te, basa imam-mala puu pupuun-nala.

BILANGAN 10:9

Ma metema emi matee-mata'ti nai emi nusam-ma, fo emi masala'e emi aoinam-ma neme musu-a mamain-na soona, puu pupuuk sila-la. Soona Au Manetualain, fo emi Manetualaim-ma neukose tulu-fali, ma soi-tefa emi neme emi musum-ma mai.

IMAMAT 25:9

Boema nai hataholi Yahudi-la bula ka hitun-na, fain sanahulu, fo nde faik fo sala-singok hapu ampon-na soona, madenu hataholi puu puuk-ka nai basa mamanak lala'en-na, nai nusak dale.

HAKIM-HAKIM 7:7

Basa boema, Manetualain nafa'da Gideon nae, “Neukose Au soi-po'i emi ma Au fe emi sengi hataholi Midian-nala, nenik ka'da hataholi ka natun telu, fo lalamei oe-a neme liman dale mai sila. Madenu fe'ek-kala, fo ala fali le'us leona.”

HAKIM-HAKIM 7:9

Le'odaek ndia, Manetualain nafa'da Gideon nae, “Fo'a leon Gideon! Fo muu sapu-ma hataholi Midian-nala ofun-na leona. Te Au fe o sengis.