HAKIM-HAKIM 17:3 - Susula Malalaok Hehelu Palak Ma Hehelu Beuk

³ Mikha fe falik doik sila leo inan neu, boema inan nae, “a Anang-ngonei, ela leo been-na, o matapo'i meme au soo-supang ndia mai, fo au tunu-hotu fe Manetualain doi fulak ia-la, fo paken soaneu tao dodoki-dudulak neme ai mai, soona nakadiditak-ka nenik do fulak. Da'di, au fe falik doik sila-la leo o neu.”

HAKIM-HAKIM 17:3 Referans Kwoze

KELUARAN 20:4

Boso doki-dulak soaneu o aoinam-ma, dodoki-dudulak fo nalupa leo beek boe, nai lalai, nai daebafak-ka, do nai oe dale nai daebafak-ka buin-na.

IMAMAT 19:4

Boso sene-do'ok neu sosongo-tatangok. Boso tao dodoki-dudulak neme liti mai, fo sene-do'ok neun. Au nde emi Manetualain.

KELUARAN 20:23

Boso tao dodoki-dudulak lilofulak do lilopilas, fo sene-do'ok neun, te emi muse sene-do'ok ka'da neu Au mesang-nga.

YOHANIS 16:2

Neukose ala usiheni emi neme uma mamaso kala dalek mai. Boema losa fai na te, hataholi mana taonisa emi a, neukose naedaenga ndia tao malole soaneu Manetualain nde ndia so.

YEREMIA 10:8

Sila basa-basas nggoa-panganaa nana lamatua daebafan-na ka'da ai tuk mesak-kana, ma ta hapu nanoli hata neulauk fa.

YESAYA 66:3

Tehu leoina ndia, tao tunga sila dale hihii-nanau mesan-na; ala lamahoko, ala maso-kasasi no enok fo nanamaluak. Ba'eneu sila soona, tatao-nono'ik lala'en-na, matak esa fo nde: tunu-hotu sapi mane, ma tunu-hotu hataholi daebafak, tunu-hotu bi'ilopoana, ma helula'di busa lesuha'in-na; tunu-hotu gandum, ma tunu-hotu bafi daan-na, tunu boomenik, ma sene-do'ok neu dodoki-dudulak.

HAKIM-HAKIM 18:5

Boema, hataholi sila lafa'dan lae, “Metema leondiak soona, sue-na matane Manetualain, ade ami leleo-lala'om ia, neukose neni buna-boak do ta.”

HAKIM-HAKIM 17:13

Boema Mikha nae, “Nah, besak ia, au amahele, neukose Manetualain tao malole neu au, nana hapu hataholi Lewi esa, ana da'di imam ba'eneu au so.”

ULANGAN 12:3

Tao matu'u mei tunu-hotun-nala, ma tao makalulutuk lutu batu sosongon-tatangon-nala. Hotu heni Asyera dodoki-dudulan-nala, ma tao makalulutuk sila ai batu dodoki-dudula sosongo-tatangon-nala, fo ela ala boso boe, sene-do'ok neu lamatua daebafak sila-la, nai mamanak sila bai.

KELUARAN 34:17

Boso tao lamatua fe'ek neme liti mai, fo sene-do'ok neun.

HAKIM-HAKIM 17:2

Faik esa boema, nafa'da inan nae, “Ina, lelek ina namopo doi fulak 1.100 boema, au amanene ina soo-supa hataholi nakok-ka. Ina doin-na nde ia! Au nde amanako-an nana.” Inan nataa nae, “Sa'di leo been-na, Manetualain ba'e-pala o, anang-ngo!”

HAKIM-HAKIM 17:4

Mikha fe falik basa doik sila-la leo inan neu boema, inan ho'i-na doik sila-la 200, de ana fen leo tuka lilofulak esa neu. Boema, nadenu tuka ndia, tao dodoki-dudulak esa, neme ai mai, fo nakadiditak-kana nenik doi fulak sila-la. Basa boema, ana pe'da ai nanadoki-dulak ndia neu Mikha uman.

HAKIM-HAKIM 18:30

Sila leni dodoki-dudulak sosongok ndia, de lapadedeik-kana nai kota ndia, boema ala so'u Gerson anan Yonatan, fo Musa upun-na, a'di sila imam ma. Gersom ia, tititi-nonosin da'di lahele leo Dan-na imam, losa tepo-lelek hataholi Israel-la nanafook ma nanatapak leo nusa fe'ek neu.

YESAYA 30:22

Emi dodoki-dudula sosongo-tatangom fo, nananakadiditak nenik lilofulak ma lilopilas-sa, neukose emi tapahenis, sama leo manggenggeok-ka, boema emi mafa'da mae, “La'oela au leona!”

ULANGAN 27:15

Hataholi Lewi-la, ala kokolak lae, ‘Nanasoo-supak ba'eneu hataholi fo, ana tao dodoki-dudulak neme batu, ai, do liti-a mai, fo ana sene-do'ok neun, no nafufunik; Manetualain ta hii sosongo-tatangok fa!’ Basa laun Israel-la lala'en-na lataa lae: ‘Tete'ek-ka!’ (Amin)

2TAWARIKH 33:7

Ana pe'da dodoki-dudulak sosongo-tatangok leo Manetualain Uman dale neu, te se'kona la'eneu mamanak ndia, Manetualain nafa'da basa neu Dauk ma anamanen Salomo nae, “Au Umang manai Yerusalem ia, fo Au hele basan neme Israel leo kasanahulu dua-nala nusa-na mai so, nde bee na ana da'di mamanak fo Au aketun da'di leo mamanak makaluku-makatele neu Au losa dodoon-na.