EFESUS 4:2 - Susula Malalaok Hehelu Palak Ma Hehelu Beuk

² Ela leo bee na, makaloe-makadae ao mala tataas esa, dale mangana'uk, ma boso haelai mamanasa. Matu'du emi susue-lalaim, ninik esa tulu-fali esa.

EFESUS 4:2 Referans Kwoze

1 KORINTUS 13:7

Nakatatakak nasasale matak no basa hata lala'ena, ma ana nau namahele hataholi fe'ek tatao-nono'i malole na; nai ha'da-tatao leo bee ka boe, hataholi manasue-laik ndia, ta ketu namahehena na nai basa dede'ak lala'ena dalek, ma nahani basa hata lala'ena no ta haelai namanasa fa.

ROMA 15:1

Ita fo tamahehele te'e-te'e neu hata fo ita tamahelek ndia soona, ita boso haelai tamanasa hataholi fo namahehele na beita natea-nahele fa ndia, hahapu na. Ita boso tao tamahoko ka'da ita aoina na mesa kana.

MATEOS 11:29

Tunga Au paleta nga, ma manoli neme Au a mai. Nanahu Au dale nga mangana'uk, ma taidaek, de neukose emi hapu namahokok ma seteleek.

1 TIMOTIUS 6:11

Tehu Manetualain nuun o de, o muse madook ao ma neme basa dede'ak sila la mai. Sanga enok fo daenga o da'di hataholi ndoos nai Manetualain matan, boema fe o so'da ma neu Manetualain, ma mamahele Kristus, sue-lai o nonoo hataholi ma, matea-mahele nai doidoso ka dalek, ma heo hilum mangana'uk.

AMSAL 3:34

Manetualain ta hii hataholi fo namatutua-namadedema aoinan-na fa, tehu Ana ba'e-pala hataholi fo nakaloe-nakadae aon-na.

BILANGAN 12:3

Musa nde been-na, hataholi esa, dale nakaloe nakadae aok nanseli, lena heni basa hataholi manai daebafak ia lala'en-na.

MAZMUR 138:6

O mamanam-ma, deman-na seli, tehu O taoafik neu hataholi, matasi'da-matasaek-ka boe; hataholi manakoao-ndaeaok-ka, ta hapu nafuni neme O mai fa.

1 PETRUS 3:15

Tehu nai emi dalem dale, ela leo bee na emi fe Kristus ha'da-holomata hehelik fo nandaa no nangatutuu na da'dileo Lamatua ka. Ma ela leo bee na emi mahehele aom tataas esa, soaneu emi fe natataak neu hataholi see fo natane, la'eneu emi namahehena ma.

2 TIMOTIUS 2:25

Hataholi ndia, muse nanoli hataholi mana lena-la'ba kala no mangana'uk; fo ela leo bee na, Manetualain fe hataholi sila la, fai loak soaneu ala tuka tei-sale dale leme sala-singo nala mai, fo lalelak nanoli ndo sa.

GALATIA 6:2

Ela leo bee na, emi matulu-mafali ao nai hataholi toto'a-tataa na dalek, fo ela no enok ndia de, emi tao tunga Kristus paleta na.

EFESUS 1:4

Lelek fo daebafak ia beita nananakada'dik fa te, Manetualain hele basa ita tunga Kristus no dudu'ak, fo ela ita da'di Ndia nuu hehelin, ma sala-singok tak nai mata na. Hu ka nde, Manetualain susue-lalain

ZEFANYA 2:3

Fali ma'im-ma leo Manetualain mai leona, hai basa hataholi dale taidaek manai nusak ia, ma basa hataholi manatunga paletan-nala lemin! Tao tunga Manetualain dale hihiin-na, ma makaloe-makadae aom-ma nai matan-na. Fafa'kama, neukose emi mala huhukuk-ka deak, nai Manetualain fain fo natu'du nasa-melun-na.

HATAHOLI 20:19

No dale nakaloe aok ma no luu oe, au aue-ale'di soaneu Lamatua ka nai doidoso ka tala'da, hu ka nde hataholi Yahudi la dale tutu'u mangalau nala.

AMSAL 16:19

Malole lenak makaloe-makadae aoinam-ma moo hataholi dale taidaek-ka, neme maba'e bua kakalok moo hataholi manakoao-ndaeaok-ka.

MARKUS 9:19

Boema Yesus nafa'da ana mana tunga nala nae, “Emi ia su'di selin! Emi ia hataholi fo te'e-te'e, ta mamahele fa. Au muse leo o emi, ma Au ta haelai amanasa emi losa faihi'da? Mo ni'iana ndia leo ia mai!”

ZAKHARIA 9:9

Hai laun Sion-nala lemin, mamahoko-setelee leon! Hai laun Yerusalem-mala lemin, eeki-matadale leon! Mete leon! Emi Manem-ma, ana mai no matua-mademan! Ndia manek fo manatao tunga ndoo-matetun-na, fo maneni so'da-molek-ka. Tehu henuk no dale taidaek, ana losa ana sa'e keledei, keledei ana esa.

YESAYA 57:15

Nana Manetualain Fo Mademaina, ma malalao-malalafuk, fo manakoasa losa dodoon-na, nafa'da nae leoia, “Au leo nai mamana mademaina, ma malalao-malalafuk, tehu, nai hataholi dale taidaek-kala, tala'da, ma nai hataholi manatukatei-saledale leme sala-singon-nala mai, fo daenga tao labebeu sila manggaten, ma namahehenan-na, tala'da boe.

MAZMUR 45:4

Pa'a o tafainam-ma neu o kale'bom-ma, hai manek fo ao makadelek-ka nei, o matua-madema nanseli, ma manahika-humek!

YAKOBIS 1:21

Hu ndia de, tu'u-tapa heni basa ha'da-tatao manggenggeok ma tatao-nono'i mangalauk lala'ena. Sipok ma Manetualain sele-nggali dede'a-kokolan manai emi dalem dale ndia, no dale nakaloe-nakadaek, nana dede'a-kokolak sila la, lanuu be'ibalakaik soaneu ana soi-tefa nala emi.

PENGKHOTBAH 7:8

Malole lenak dede'ak esa mate'en-na, neme dede'ak ndia manakoasan-na mai; malole lenak boso haelai mamanasa, neme namatutua dalek-ka nanseli.

KOLOSE 1:11

Ela leo bee na Manetualain koasa matua-madema na, ana tao natea-nahele emi, nalosa emi lu'a-lepa mabe'i doi doso ka, nai basa dede'ak lala'e na dalek, no namahokok ma dudu'a naluk,

1 PETRUS 3:8

Dede'a keke'u na nae: ela leo bee na emi teik esa-dalek esa ma dudu'a-aafik esa. Ela leo bee na emi masue-malai ao, sama leo tolanoo ka, boema esa tao malole neu esa, ma esa nakaloe-nakadae ao na neu esa.